Read Northwest Gbaya TƆ̧Ɔ̧ HU̧SA̧MƆ 2 Bible Online

TƆ̧Ɔ̧ HU̧SA̧MƆ 2 - Northwest Gbaya bible

TƆ̧Ɔ̧ HU̧SA̧MƆ 2

¹«Mɛ̀ yɔ́r kalata ha̧ betom ko Sɔ̧ nɛ̀ duk zu zuduk bíí ko Krist sɛn Efɛz ndé: «Mɔ nɛ̀ wi nɛ̀ kasi sɔra mɔɔrɔ-ɗoŋ-yiitoo kɔ̧ er mɛ wiiko, nɛ̀ nɛ́ nɔ̀ mgbara dek-e-wee mɔɔrɔ-ɗoŋ-yiitoo nɛ̀‘i dee nɛ̀ lɔr tɔ̧ nɛ́ mɔ'ɔ:

²Mi iŋa tom kɔ-mɛ, in bɔnɛ, ká bá nɛ̀ nɔɔ-ŋgiɗi kɔ-mɛ; mi iŋa'e mɛ kpɛk tom ko o wi-ɗaŋ na. Mɛ́ wee o wi nɛ̀ tɔ̧‘e wi nɛ́ betom ko Jesu, ɓɛɛ mɛ kpa'e wa nɛ́ o wi-ndela, wa bó nɛ́ o betom na.

³Mɛ́ a̧a̧ nɛ̀ nɔɔ-ŋgiɗi; mɛ zɔka bɔnɛ wen nin-am ɓɛɛ mɛ nɔ ŋgiɗi;

⁴ɓɛɛ mɔ kpɔk n'am kɔ̧ɔ̧ mɛ tɔ̧ zu mɛ nɛ́ dee wɔ-tɛ‘m nɛ̀ mɛ dee so nɛti ɓɛɛ mɛ e dúk'i.

⁵Tɛ-mɛ'ɛ mbaŋ ɗoŋ fara nɛ̀ mɛ duka so sɛnɛ sɛka mɛ biti yo nù‘i; mɛ̀ kpáí duka-a kɔ-mɛ, ɓɛɛ mɛ̀ dé nɛ́ tom nɛ̀ mɛ́ dee so tɛnɛ nɛti'i; kà bó hegɔ na in kà mɛ kpáí duka-a kɔ-mɛ na, mi tɛ́ nɛ̀ tɛ-mɛ, ɓɛɛ mi baa dek-e-wee kɔ-mɛ yinɛ fara-a.

⁶Mɔ kpɔk, mɔ nɛ̀ ɔ dee tɛ-mɛ nɛ́ mɔ'ɔ: mɛ sɛna tom ko o bíí ko Nikolaus, hee mi ga mbɛt.

⁷«Wi nɛ̀ a̧a̧ nɛ̀ zer a̧ zíí mɔ nɛ̀ Sa̧a̧ Ɔmi tɔ̧ ha̧ o zuduk bíí ko Krist! «Wi nɛ̀ gan zu mɔ, mi tɛ ha̧ waya-te duka-kpasa nɛ̀ duk kpɛɛfɔ ko Sɔ̧[3] mɛ̀, ha̧ a̧ mɛ nyɔŋ.»

⁸«Mɛ̀ yɔ́r kalata ha̧ betom ko Sɔ̧ nɛ̀ duk zu zuduk bíí ko Krist sɛn Smirn nde: «Mɔ nɛ̀ wi nɛ̀ duk nɛ́ kuti-mɔ in sɔŋkur-mɔ, nɛ̀ fee so ɓɛɛ kpasi, tɔ̧́ nɛ́ mɔ'ɔ:

⁹Mi iŋa bɔnɛ in san kɔ-mɛ, ɓɛɛ mɛ́ nɛ́ wanmbɔi; mi iŋa kaia-ndaa-wi ko o wi nɛ̀ ta'e wi nɛ́ Juif, ɓɛɛ wa bó nɛ́ Juif na; wa nɛ́ tua-mɔi̧-sɛnɛ ko Satan.

¹⁰Ká mɛ́ de kíí bɔnɛ nɛ̀ mɛ tɛ zɔk na; zɔ́k, Wan-ɗaŋmɔ tɛ pi̧ o ŋma bíí mgbara'nɛ́ kɔ̧ zɔɓɔ wen wee'nɛ́. Ɛ́nɛ́ tɛ duk zaŋ bɔnɛ‘i zɛ ɓu. Mɛ̀ mbó zu hɔ tɛ fio, ɓɛɛ mi tɛ ha̧ laasɔ̧i̧-wan duka-kpasa ha̧ mɛ.

¹¹«Wi nɛ̀ a̧a̧ nɛ̀ zer a̧ zíí mɔ nɛ̀ Sa̧a̧ Ɔmi tɔ̧ ha̧ o zuduk bíí ko Krist! «Wi nɛ̀ tɛ gan zu mɔ beka zɔk bɔnɛ yiitoo fio na.»

¹²«Mɛ̀ yɔ́r kalata ha̧ betom ko Sɔ̧ nɛ̀ duk zu zuduk bíí ko Krist sɛn Pɛrgam'e ndé: «Mɔ nɛ̀ wi nɛ̀ a̧a̧ nɛ̀ tɔ̧ɔ̧-nú gba-paa nɛ̀ nú-a yiitoo tɔ̧ nɛ́ mɔ'ɔ:

¹³Mi iŋa'e fara nɛ̀ mɛ duk sɛnɛ, nɛ́ fara'i a̧ damti ko Satan duk sɛnɛ mbɛt. Wa gbɛɛ Antipas kpasa wi-sedaako kɔ‘m sɛn tɛ̀ k’ɛ́nɛ́, fara nɛ̀ Satan duk sɛnɛ‘i; mɛ ndaɗa in am, ɓɛɛ wese'i, mɛ kafi kɔ̧ɔ̧ɗɔɔwen kɔ‘m na mbɛt.

¹⁴Mɔ kpɔk, mi a̧a̧ nɛ̀ ŋma wen mɛ tɔ̧ zu mɛ: o ŋma bíí a̧a̧ tɛ̀ kɔ-mɛ nɛ̀ ndaɗi in usamɔ ko Balam nɛ̀ tɔ̧ɔ̧ so ha̧ Balak mɛ tui pɛ́r ha̧ o be Israɛl, ir nɛ̀ wa mɛ nyɔŋ o kpoo-ɗafi géé sɔ̧ de nɛ̀ ŋgazu.

¹⁵O ŋma bíí tɛ̀ kɔ-mɛ a̧a̧ sɛnɛ nɛ̀ ndaɗi in usamɔ ko o bíí ko Nikolaus mbɛt.

¹⁶Mɛ̀ kpáí duka-a kɔ-mɛ ŋgaɓo; kà bó hegɔ na, dekpaa mi tɛ́ nɛ̀ tɛ̀ kɔ-mɛ, ɓɛɛ mi dee biro in wa nɛ̀ gba-paa kɔ̧ nú‘m.»

¹⁷«Wi nɛ̀ a̧a̧ nɛ̀ zer a̧ zíí mɔ nɛ̀ Sa̧a̧ Ɔmi tɔ̧́ ha̧ o zuduk bíí ko Krist: «Wi nɛ̀ gan zu mɔ, mi tɛ ha̧ man nɛ̀ duk nɛ́ hu̧sa̧ nyɔŋmɔ ha̧ a̧. Mi tɛ ha̧ bu ta nɛ̀‘i yɔra ŋma mbe nin sɛnɛ zu a̧, nɛ̀ ŋma bíí nyɛm mɛ iŋ na, kànà nɛ́ wi nɛ̀ kpaa mbe nin'i ɓɛɛ.»

¹⁸«Mɛ̀ yɔ́r kalata ha̧ betom ko Sɔ̧, nɛ̀ duk zu zuduk bíí ko Krist sɛn Tiatir ndé: «Mɔ nɛ̀ Bem ko Sɔ̧, wan nɛ̀ gbaayí-a nyɛk hee leɓe-wee ga, nɛ̀ naŋ-a duk hee gba de[4] ndɛrɛ ga tɔ̧ nɛ́ mɔ'ɔ:

¹⁹Mi iŋa tom kɔ-mɛ, in kɔ̧ɔ̧mɔ kɔ-mɛ, ká bá nɛ̀ kɔ̧ɔ̧ɗɔɔwen kɔ-mɛ; mi iŋa dee tom in nɔɔ-ŋgiɗi kɔ-mɛ; sɔŋkur tom kɔ-mɛ gana kuti-a,

²⁰ɓɛɛ mɔ kpɔk n'am kɔ̧ɔ̧ mɛ tɔ̧ zu mɛ, nɛ́ ee yuwar nɛ̀ mɛ e ha̧ Jezabɛl nɛ̀ tɔ̧‘e, wi nɛ́ okoo-tɔ̧-wen oi nú Sɔ̧ wó, ɓɛɛ ɔr nɛ̀ o wi-de-tom kɔ‘m ha̧ wa mɛ a̧r'i. Nɛ́ a̧ a̧ usi ha̧ wa mɛ de ŋgazu, nyɔŋ nɛ̀ kpoo-ɗafi géé sɔ̧ mbɛt.

²¹Mi ee ŋgimbi ha̧ a̧ mɛ kpai duka-a kɔ̧-a̧; nɛ́ mɔ'ɔ n'aa kɔ̧ mɛ e dee ŋgazu duk na.

²²Kà a̧ kpáí duka-a kɔ̧-a̧ e nɛ̀ ɗaŋ tom kɔ̧-a̧‘i duk na, mi tɛ pi̧ a̧ gɔn gado gasa dita-see gú nɛ̀ o gbama wi-de-ŋgazu kɔ̧-a̧‘i mbɛt.

²³Mi tɛ gbɛ o bem kɔ̧-a̧ ɓɛɛ o zuduk bíí ko Krist lɛŋ tɛ iŋ‘e, mi nɛ́ wi nɛ̀ yí zɔk mɔ hegɔ hɔ kɔ̧ kere-wi in kɔ̧ see-wi mɛ̀ lɛŋ, ɓɛɛ mi tɛ ha̧ mɔɔ-oi-tom ko o ndé nyɛm nɛ̀ ɗoŋ tom kɔ̧-a̧.

²⁴«Ɓɛɛ war k’ɛ́nɛ́ o wi Tiatir, nɛ̀ kpɛk ɗaŋ usamɔ‘i na, nɛ̀ kíí mɛ iŋ mɔ nɛ‘i sa'e ‹ɗukamɔ ko Satan› na mbɛt'i, mi beka e ŋma tui zu'nɛ́ na.

²⁵Ɓɛɛ ɛ̀nɛ̀ kásí mɔ n’ɛ̀nɛ̀ a̧a̧ nɛnɛ‘i a̧ nɔ, hɔ ŋgimbi n'am tɛ́ tɛ̀.

²⁶Wi nɛ̀ tɛ gan zu mɔ, kasi nɛ̀ tom kɔ‘m hɔ sɔŋkur-aa, mi tɛ́ ha̧ ŋgai ha̧ a̧ mɛ ɔ wan zu o tugun bíí,

²⁷ɓɛɛ a̧ tɛ́ kɔr wa nɛ̀ dɔra-boi, a̧ tɛ gusi wa hee mɔ'ɔ nɛ̀‘i gba nɛ̀ o kpáná-gìì'ɛ ga!

²⁸Kale-a mbɛt, hee Dáà ha̧a̧ ŋgai ha̧‘m ga, mi tɛ ha̧ sɔra-tuyɛ ha̧ wi’ɛi mbɛt.

²⁹«Wi nɛ̀ a̧a̧ nɛ̀ zer a̧ zíí mɔ nɛ̀ Sa̧a̧ Ɔmi tɔ̧ ha̧ o zuduk bíí ko Krist.»