Read Northwest Gbaya TƆ̧Ɔ̧ HU̧SA̧MƆ 20 Bible Online

TƆ̧Ɔ̧ HU̧SA̧MƆ 20 - Northwest Gbaya bible

TƆ̧Ɔ̧ HU̧SA̧MƆ 20

¹Ɓɛɛ mi zɔk ŋma betom mɛ yiwese nɛ̀ zir tɛnɛ, a̧ kasi nɛ́ mɔɔ-hu̧i-nú ɗuka-fara er-a in ŋma gasa dita nyak-boi.

²Nɛ́ mɔ'ɔ n'aa baa ndiɓa, gɔk nɛ̀ duk ɓeemɛ, nɛ̀ duk nɛ́ Wan-ɗaŋmɔ in Satan, ɓɛɛ hɛr a̧ nɛ̀ nyak-boi wen pɛ booro.

³Nɛ́ mɔ'ɔ n'aa baa a̧ pi̧ kɔ̧ ɗuka-fara, kpe nú-a, ɓɛɛ e tumbal sɛnɛ, wen ká a̧ tɛ̀ɛ́ ɔr o tugun bíí ha̧ pɛ booro mɛ kaɗi sɛ. Ɓɛɛ ɗoŋ mɔ‘i wa tɛ gbo kana a̧ tɛ be ŋgimbi tikiɗi ɓɛɛ.

⁴Nɛ́ mɔ'ɔ n'am zɔka o ŋma damti, ɓɛɛ o wi nɛ̀ ya zu o damti nɔ‘i, wa ha̧a̧ so ŋgai ha̧ wa wen gɔna-kita. Mi zɔka sɔ̧-tɛ o wi nɛ̀‘i ɓira so zu-wa pi̧ nu wen zu sedaako ko Jesu in wen zu wen ko Sɔ̧, in o wi nɛ̀ gasi so saɗi in duia-mɔ kɔ̧-a̧ na, nɛ̀ yɔramɔ kɔ̧-a̧ bó só sɔnti-wa in er-wa na. Wa kpasa woyo ɓɛɛ wa ɔ wan in Krist tɛ pɛ booro.

⁵(O ŋma bíí nɛ̀ fee so kpasi na, hɔ ŋgimbi nɛ̀ pɛ booro'i tɛ kaɗi sɛ.) I̧i̧ nɛ kuti kura-ŋgɔn tɛ fio.

⁶O wi nɛ̀ kur tɛ kuti kura-ŋgɔn tɛ fio ya nɛ̀ desee in nɛ̀ sa̧a̧-a̧, wen yiitoo fio bó nɛ̀ ŋgai zu wa na; wa tɛ duk nɛ́ o wi-ɗafi-sɔ̧ ko Sɔ̧ in ko Krist, ɓɛɛ wa tɛ ɔ wan in a̧ tɛ pɛ booro.

⁷Ŋgimbi nɛ̀ pɛ booro tɛ kaɗi, wa tɛ gbo Satan tɛ zɔɓɔ kɔ̧-a̧,

⁸ɓɛɛ a̧ tɛ ba yuwar yaknɛ wen ɔra o tugun bíí nɛ̀ ya mgbii-zan naar, mɛ̀ nɛ́ o wi Gɔg in Magɔg; a̧ tɛ mɔi̧ o wi nɔ‘i wen bíí biro, dɔka wa hee nyɛmɛ-gba-tɔp ga.

⁹Wa tɛ hur nù lɛŋ ɓɛɛ wa kpee gbagari ko o sa̧a̧-bíí in ye nɛ̀ Sɔ̧ kɔ̧ɔ̧ nyɛmna; ɓɛɛ wee tɛ gɔm nɛ̀ yiwese dɔ wa a nù lɛŋ.

¹⁰Nɛ́ mɔ'ɔ nɛ̀ wa pi̧i̧ Wan-ɗaŋmɔ nɛ̀ ɔr wa'i ɗɔɔ tɔp-wee-baraadu katɛ saɗi in wi-tɔ̧-wen oi nú Sɔ̧ ndela; wen wa tɛ zɔk bɔnɛ zɛ nɛ wese kpoo nɛ kpoo.

¹¹Ɓɛɛ mi zɔk ŋma gasa damti nɛ̀ bu-a in wi nɛ̀ duk zu-a, nù in yiwese yuu mɔ yak nɛ̀ nyɛi̧a-a ti wi’ɛi, ɓɛɛ wi iŋ oi wa ɓɔna.

¹²Nɛ́ mɔ'ɔ n'am zɔka fio, o gasawi in o geɗek-wi nɛ̀ yor ti damti. O ŋma kalata nɛ̀‘i hu̧i̧a̧ a̧a̧ sɛnɛ. Wa hu̧i̧a̧ ŋma kalata woyo: kalata'i nɛ́ kalata duka-kpasa. Wa gɔna kita zu o fio nyɛm nɛ̀ ɗoŋ tom kɔ-wa hee mɔ'ɔ nɛ̀ yɔra zaŋ o kalata ga.

¹³Gba-tɔp ha̧a̧ o fio kɔ‘i piiɗoŋ; fio in fara ko o fio ha̧a̧ o fio kɔ‘i piiɗoŋ mbɛt; ɓɛɛ wa gɔn kita zu o ndé kpɔk kpɔk nyɛm nɛ̀ ɗoŋ tom ko o ndé.

¹⁴Ɓɛɛ wa ba fio in fara ko o fio pi̧ ɗɔɔ tɔp-wee. (Yiitoo fio nɛ́ wan mɛ́ ɗɔɔ tɔp-wee'i.)

¹⁵Kóó o ndé nɛ̀ nin yɔr zaŋ kalata duka-kpasa na, wa pi̧i̧ a̧ ɗɔɔ tɔp-wee'i.