Read Northwest Gbaya TƆ̧Ɔ̧ HU̧SA̧MƆ 22 Bible Online

TƆ̧Ɔ̧ HU̧SA̧MƆ 22 - Northwest Gbaya bible

TƆ̧Ɔ̧ HU̧SA̧MƆ 22

¹Nɛ́ mɔ'ɔ nɛ̀ betom mɛ́ yiwese usa gba-for-yì nɛ̀ tok hee bu bereŋ ta ga ha̧‘m; gba-for-yì‘i tok tok hee de toka-ta ga, ɓɛɛ fok nɛ̀ ti damti ko Sɔ̧ in ko Be-sami gbonɛ.

²Sɛn see bee-gara ye, ká̧ foka-yì‘i nɛ̀ kur yiitoo, te-duka-kpasa a̧a̧ sɛnɛ, nɛ̀ wai war ɓu-zua-yiitoo tɛ pɛ kpɔk kpɔk. Te'i wai tɛ fio-zɛ kpɔk kpɔk, ɓɛɛ o wa̧a̧-a̧ duk wen kpasa o tugun bíí.

³Fom beka bó ɓɔna; damti ko Sɔ̧ in ko Be-sami tɛ duk saaye'i, ɓɛɛ o wi-de-tom kɔ̧-a̧ tɛ gas'a̧.

⁴Wa tɛ zɔk saŋa-yí-a, ɓɛɛ nin-a tɛ duk sɔnti-wa.

⁵Zɛ beka de ɓɔna, ŋma bíí nɛ̀ tɛ ak wee lamba, kóó sa̧a̧mɔ-wese wen zɔka mɔ beka bo na, wen Gasa Wan Sɔ̧ tɛ de ha̧ sa̧a̧mɔ kɔ‘i mɛ nyɛk zu wa, ɓɛɛ wa tɛ ɔ wan kpoo nɛ kpoo.

⁶Ɓɛɛ a̧ tɔ̧ ha̧‘m: «O wen nɔ'ɔ nɛ́ kpasawen nɛ̀‘i nyɛma mɛ e ta nɛnɛ. Nɛ́ Gasa Wan Sɔ̧ nɛ̀ ha̧a̧ taamɔ ha̧ o wi-tɔ̧-wen oi nú Sɔ̧, a̧ toma betom kɔ‘i mɛ usi mɔ nɛ̀ tɛ hɔ kinii ha̧ o wi-de-tom kɔ‘i.

⁷«Zɔ́k mi'i tɛ‘i! Wi nɛ̀ kasi tɔ̧ɔ̧-wen oi nú Sɔ̧ nɛ̀ a̧a̧ zaŋ kalata’ɛ dúk nɛ̀ desee!»

⁸Mi Jean a̧‘m zia mɔ‘i ɓɛɛ mi zɔk mbɛt; ɗoŋ n'am zia mɔ‘i ɓɛɛ mi zɔk mbɛt, mi gbɛ̀ɛ́ zugur-am nù ti betom mɛ yiwese nɛ̀ usa o mɔɔ nɔ‘i ha̧‘m'i mɛ gas'a̧,

⁹ɓɛɛ a̧ tɔ̧ ha̧‘m: «Ká mɛ́ gas'am na; mi nɛ́ gbama wi-de-tom hee mɛ ga in o nya-mɛ nɛ̀ duk nɛ́ o wi-tɔ̧-wen oi nú Sɔ̧ ká bá nɛ̀ o wi nɛ̀ kasi wen zaŋ kalata’ɛ, ɓɛɛ nɛ́ Sɔ̧ a̧ mɛ tɛ gasi.»

¹⁰Ɓɛɛ a̧ tɔ̧ ha̧‘m woyo'e: «Ká mɛ́ kpe tɔ̧ɔ̧-wen oi nú Sɔ̧ nɛ̀ yɔra zaŋ kalata’ɛ e ɓɔn kɔ̧ see-mɛ ɓɛɛ na, wen ŋgimbi-a hɛɗa kaɗi.

¹¹Wi-de-mɔ nɛ̀ yuwar-a na, a̧ dúk tɛ dea-a siti, ɓɛɛ wi-de-ndiŋmɔ a̧ dúk tɛ dea-a siti mbɛt; wi-de-mɔ nɛ̀ yuwar-a a̧ dé mɔ nɛ̀ yuwar-a siti, ɓɛɛ sa̧a̧-bíí a̧ ɗafi war-tɛ-wa siti.

¹²«Zɔ́k mi'i tɛ‘i, ɓɛɛ mi tɛ́ ba mɔɔ-oi-tom tɛnɛ mɛ ha̧ há̧ o bíí kpɔk kpɔk nyɛm nɛ̀ ɗoŋ tom kɔ-wa.

¹³Mi nɛ́ Alfa in Omega: kuti-a in sɔŋkur-aa, ku̧u̧naŋ-mɔ in kaɗa-mɔ.»

¹⁴O wi nɛ̀ fɔr laa kɔ‘i mɛ kpa yuwar wen nyɔŋa waya-te duka-kpasa in mɛ ye nɛ̀ nú garo si saaye'i ya nɛ̀ desee!

¹⁵O wi-de-mɔɔ-búù hee toyo ga, o wi-de-mɔɔ-kifi, o wi-de-mɔɔ-nyɛr, o wi-gbɛ-zu, o wi-gasi géé-sɔ̧, in o wi-de-ndela tɛ̀ tɔ̧ɔ̧-wen in deemɔ kɔ-wa lɛŋ, tɛ ɓɔn zan.

¹⁶«Nɛ́ mi Jesu a̧ toma betom kɔ‘m nɛnɛ mɛ de sedaako’ɛ ha̧ o zuduk bíí kɔ‘m; mi nɛ́ bezaŋ tɛ nutua ko David, mi nɛ́ nyɛka-sɔra-tuyɛ.»

¹⁷Ɓɛɛ Sa̧a̧ Ɔmi in kóò ko Be-sami tɔ̧‘e: «Mɛ̀ tɛ́!» Ɓɛɛ wi nɛ̀ zíí wen’ɛ a̧ tɔ̧́ mbɛt'e: «Mɛ̀ tɛ́!» Wi nɛ̀ wɔ-yì gbɛ a̧ a̧ tɛ́, ɓɛɛ wi nɛ̀ kɔ̧ɔ̧ mɛ nɔ yì-duka-kpasa a̧ a̧ nɔ géè.

¹⁸Mi Jean, mi mbaŋ nɛ̀ tɛ́ o nde nɛ̀ zíí tɔ̧ɔ̧-wen oi nú Sɔ̧ nɛ̀ a̧a̧ zaŋ kalata’ɛ‘e: kà bíí pí̧ ŋma wen zu wen nɛ̀ yɔra zaŋ kalata’ɛ, Sɔ̧ tɛ pi̧ ŋgamɔ nɛ̀ yɔra zaŋ kalata’ɛ mɛ tik zu a̧.

¹⁹Ɓɛɛ kà bíí bá ŋma wen nɛ̀ yɔra zaŋ kalata-tɔ̧ɔ̧-wen oi nú Sɔ̧'ɛ yinɛ, Sɔ̧ tɛ ba war mɔ kɔ̧-a̧ nɛ̀ duk tɛ te-duka-kpasa in tɛ sa̧a̧ ye nɛ̀ yɔra zaŋ kalata’ɛ yinɛ.

²⁰Wi nɛ̀ yor ɗoŋ o wen nɔ‘i tɔ̧a̧‘e: «Ii, mi'i tɛ́‘i!» Aamɛn, ɛ̀nɛ̀ tɛ́, Gasa Wan Jesu!

²¹Deemɔ nɛ̀ ta-tɛ ko Gasa Wan Jesu a̧ dúk in bíí lɛŋ.