Read Northwest Gbaya TƆ̧Ɔ̧ HU̧SA̧MƆ 4 Bible Online

TƆ̧Ɔ̧ HU̧SA̧MƆ 4 - Northwest Gbaya bible

TƆ̧Ɔ̧ HU̧SA̧MƆ 4

¹Hɔ-ɗoŋ mɔ‘i, mi zɔka ŋma nú tua nɛ̀ hu̧i̧a̧ bóóŋ yiwese mɛ̀, ɓɛɛ tiger nɛ̀ baa tɔ̧ so wen ha̧‘m nɛti, hee giti mbia ga'i, tɔ̧ woyo ha̧‘m'e: «Mɛ̀ dáŋ pi̧i̧ hɛ̧ɛ̧, ha̧‘m usi mɔ nɛ̀ tɛ hɔ nɛ̀ ɗoŋ ha̧ mɛ.»

²Soɓee Sa̧a̧ Ɔmi baa'm, ɓɛɛ mi zɔk ŋma damti sɛn yiwese mɛ̀ nɛ̀ ŋma bíí duk nù zu-a.

³Wi nɛ̀ duk zu damti'i hɔɔ ŋmaa in ŋma ta nɛ̀ tok tok nɛ̀‘i sa'e jaspɛ in ta-kui nɛ̀ nin-a nɛ́ sardɔan, ká bá nɛ̀ mbui ta harɗaŋ nɛ̀‘i sa'e emerod.

⁴O ŋma damti woyo ɓu-yiitoo-zua-naar zika damti'i kpa nú ŋmaa, ɓɛɛ o wi nɛ̀ duk zu o damti nɔ‘i nɛ́ o kuti-wi ɓu-yiitoo-zua-naar, wa pi̧i̧ nɛ̀ bu laa, ɓɛɛ laasɔ̧i̧-wan nɛ̀‘i dee nɛ̀ lɔr a̧a̧ zu wa.

⁵Wi zɔk nɛ́ o pi̧i̧-kórò in giti tiger in mbaŋa-kórò nɛ̀ gbo nɛ̀ ti damti. Lamba mɔɔrɔ-ɗoŋ-yiitoo nɛ̀‘i ee wee sɛnɛ duk nyɛk nɛnɛ ti damti. O lamba nɔ‘i mɔɔrɔ-ɗoŋ-yiitoo'i nɛ́ ɔmi ko Sɔ̧ mɔɔrɔ-ɗoŋ-yiitoo.

⁶Sɛn ti damti'i, ŋma mɔ hee gba-tɔp ga a̧a̧ so sɛnɛ nɛ̀ hɔɔ ŋmaa in bu bereŋ ta ŋgɛ́lɛ́lɛ́. O ŋma saɗi naar, nɛ̀ gbaayí-wa ya nɛ̀ ɗoŋ in nɛti mbɛt, ya mgbák bin-see damti'i in ká̧ a̧ mbɛt zik kpa nú ŋmaa.

⁷Kuti saɗi hɔɔ ŋmaa in dila; yiitoo-aa hɔɔ ŋmaa in daŋa wiwii-ndai, saŋa-yí taar-a hɔɔ ŋmaa in saŋa-yí bíí, ɓɛɛ naar-a hɔɔ kɔ‘i ŋmaa in zua nɛ̀ bu̧i̧'ɛ.

⁸O saɗi nɔ‘i naar'i a̧a̧ nɛ̀ wɔr-ɓaa-wa mɔɔrɔ-ɗoŋ-kpɔk dam wa, o gbaayí dama tɛ́ wa lɛŋ zik kpa nú ŋmaa in nɛ̀ kɔ̧ a̧ mbɛt. Mɛ́ zɛ in wese tom kɔ-wa nɛ́ tɔ̧a̧-a̧‘e: «A̧ ɔ sa̧a̧, a̧ ɔ sa̧a̧, a̧ ɔ sa̧a̧, Gasa Wan nɛ̀ a̧a̧ nɛ̀ ŋgayamɔ lɛŋ ɔ sa̧a̧; a̧ nɛ́ wi nɛ̀ duka so, wi nɛ̀ a̧a̧ sɛnɛ, in wi nɛ̀ tɛ‘i.»

⁹Ŋgimbi lɛŋ nɛ̀ o wi nɔ‘i gasi nɛ̀ wi-duk-zu damti'i, tu̧ nɛ̀ tɛ-a, de nɛ̀ osoko ha̧ wan nɛ̀ duk kpasa kpoo nɛ kpoo'i,

¹⁰ɓɛɛ o kuti-wi ɓu-yiitoo-zua-naar gbɛɛ zugur nù ti wi nɛ̀ duk zu damti'i gasi nɛ̀ wan nɛ̀ duk kpasa kpoo nɛ kpoo; ɓɛɛ wa a laasɔ̧i̧-wan kɔ-wa nù ti damti tɔ̧́ nɛnɛ‘e:

¹¹«Gasa Wan Sɔ̧ k’ɛ́ɛ́, ɛ́nɛ́ nyɛma mɛ kpa gasamɔ, tu̧u̧-tɛ-mɔ in ŋgayamɔ, wen nɛ́ ɛ́nɛ́'ɛ dee mɔ lɛŋ; nɛ́ ɛ́nɛ́'ɛ kɔ̧ɔ̧ ha̧ o mɔɔ nɔ‘i mɛ duk, ɓɛɛ ɛ́nɛ́ de nɛ̀ wa.»