Read Northwest Gbaya TƆ̧Ɔ̧ HU̧SA̧MƆ 5 Bible Online

TƆ̧Ɔ̧ HU̧SA̧MƆ 5 - Northwest Gbaya bible

TƆ̧Ɔ̧ HU̧SA̧MƆ 5

¹Ɓɛɛ mi zɔk ŋma kara kalata nɛ̀‘i yɔra mɔ ɗoŋ-aa in kɔ̧ a̧ mbɛt, nɛ̀ tumbal a̧a̧ sɛnɛ tɛ fara mɔɔrɔ-ɗoŋ-yiitoo; kalata'i duk wii-er wi nɛ̀ duk zu damti'i.

²Nɛ́ mɔ'ɔ n'am zɔka ŋma ŋgaya betom mɛ yiwese nɛ̀ tɔ̧ɔ̧ wen nɛ̀ hee ger'e: «Nɛ́ o'o nyɛma mɛ hu̧i̧ kalata’ɛ, ɓɛɛ a̧i̧a̧ o tumbal nɔ'ɔ yinɛ sɛnɛ o?»

³Ɓɛɛ ŋma bíí kpɔk sɛn yiwese, kóó sɛn zaŋnu, in ɗɔɔ nu nɛ̀ nyɛma mɛ hu̧i̧ kalata'i, kóó géé pi̧i̧ yí zɔk mɔ si sɛnɛ mbɛt bo na.

⁴Nɛ́ mɔ'ɔ n'am hi̧a̧ kɔ̧a̧ nɛ̀ dɔka-a nɛ̀ ɗaŋsee wen ŋma bíí kpɔk nɛ̀ nyɛma wen hu̧i̧a̧ kalata'i, mɛ́ zɔk mɔ nɛ̀ a̧a̧ kɔ̧ a̧ bo so na.

⁵Ɓɛɛ ŋma kuti-wi kpɔk tɔ̧ ha̧‘m: «Ká mɛ́ hi̧i̧ kɔ̧a̧ na. Mɛ̀ zɔ́k dila tɛ zuduk ko Juda, ŋma bezaŋ David gana zu mɔ. A̧ tɛ hu̧i̧ kalata'i, ɓɛɛ a̧ a̧i̧a̧ tumbal mɔɔrɔ-ɗoŋ-yiitoo nɔ‘i.»

⁶Ɓɛɛ mi zɔk ŋma be-sami nɛ̀ duk hee wa gbɛ̀ɛ́ só nɛ́ a̧ ga fara duka-a see damti in o saɗi naar ká bá nɛ̀ o kuti-wi nɔ‘i nɛ̀ ya zik a̧‘i. Be-sami a̧a̧ nɛ̀ zak mɔɔrɔ-ɗoŋ-yiitoo, gbaayí-a mɔɔrɔ-ɗoŋ-yiitoo nɛ̀ ya nɛ́ ɔmi ko Sɔ̧ mɔɔrɔ-ɗoŋ-yiitoo n'aa toma so tɛnɛ pii zu nu nɛ̀ oi-aa lɛŋ.

⁷Be-sami‘i ɗɔŋa siti mɛ ba kalata nɛ̀ duk wii-er wi nɛ̀ duk zu damti'i.

⁸Ŋgimbi n'aa baa kalata'i kaɗi, o saɗi naar in o kuti-wi ɓu-yiitoo-zua-naar nɔ‘i gbɛ̀ɛ́ zugur nù ti a̧, kóó o ndé kasi nɛ́ koloŋ er wi in ɗele-dɔ̧ɔ̧ nɛ̀‘i dee nɛ̀ lɔr, nɛ̀ duna nɛ̀ nɔ̧́-nyama. Nɔ̧́-nyama'i usi nɛ́ o kɔfa-sɔ̧ ko o sa̧a̧-bíí.

⁹Wa duka so bíí nɛ̀ mbe gima'e: «Mɛ́ nyɛma mɛ ba kalata'i, ɓɛɛ mɛ a̧i̧a o tumbal nɔ‘i yinɛ; wen mɛ́ nɛ́ wi nɛ̀‘i gbɛ̀ɛ́ só, ɓɛɛ mɛ́ gɔna zu o bíí nɛ̀ tɔk tɛ-mɛ ha̧ Sɔ̧, o wi nɔ‘i nɛ́ o zuduk bíí, o bii nɛ̀ tɔ̧ nú nɛtɛ nɛtɛ, o dukbíí, in o tugun bíí lɛŋ.

¹⁰Mɛ́ dee ha̧ o wi nɔ‘i mɛ ya nɛ́ zuduk o wi-ɗafi-sɔ̧ nɛ̀ tɛ ɔ wan zaŋnu’ɛ.»

¹¹Mi zɔka mɔ, ɓɛɛ mi zíí tiger dɔka betom mɛ yiwese katɛ damti'i in o saɗi ká bá nɛ̀ o kuti-wi nɔ‘i; dɔka wa gana booro nɛ̀ booro, nyɛm kà‘i tɔr pi̧ nù na.

¹²Ɓɛɛ wa tɔ̧́ nɛ̀ hee ger'e: «Be-sami nɛ̀‘i gbɛɛ so'i nyɛma mɛ́ kpa ŋgayamɔ, kpaamɔ, iŋa-mgbara-mɔ, ŋgai, tu̧u̧-tɛ-mɔ, gasamɔ in zɔnamɔ.»

¹³Ɓɛɛ mi zii tiger o mɔ nɛ̀ Sɔ̧ dee lɛŋ sɛn yiwese, sɛn zaŋnu in ɗɔɔ nù, ká bá nɛ̀ o mɔ nɛ̀ a̧a̧ ɗɔɔ gba-tɔp mbɛt nɛ̀ tɔ̧‘e: «Tu̧u̧-tɛ-mɔ, zɔnamɔ, gasamɔ in ŋgayamɔ a̧ dúk nɛ́ ko wi nɛ̀ duk zu damti in ko Be-sami hegɔ kpoo nɛ kpoo!»

¹⁴O saɗi nɔ‘i naar'i tɔ̧a̧: «Aamɛn!» Ɓɛɛ o kuti-wi nɔ‘i gbɛ zugur nù gasi nɛ̀ Sɔ̧.