Read Northwest Gbaya TƆ̧Ɔ̧ HU̧SA̧MƆ 6 Bible Online

TƆ̧Ɔ̧ HU̧SA̧MƆ 6 - Northwest Gbaya bible

TƆ̧Ɔ̧ HU̧SA̧MƆ 6

¹Mi zɔka mɔ ŋgimbi nɛ̀ Be-sami a̧i nɛ̀ kuti tumbal mɔɔrɔ-ɗoŋ-yiitoo'i, ɓɛɛ mi zii kuti saɗi mgbara wa naar'i fara tɔ̧ wen nɛ̀ hee ger hee mbaŋa-kórò ga'e: «Mɛ̀ tɛ́!»

²Ɓɛɛ mi zɔk ŋma bu nyaŋa; wi nɛ̀ daŋ nyaŋa'i kasi nɛ́ kusaa-góò; wa ha̧a̧ laasɔ̧i̧-wan ha̧ a̧ ɓɛɛ a̧ yak hee wi-gan-zu mɔ ga wen gana zu mɔ yaknɛ.

³Ŋgimbi nɛ̀ Be-sami a̧i̧a̧ yiitoo tumbal, mi zia yiitoo saɗi nɛ̀ tɔ̧a̧‘e: «Mɛ̀ tɛ́!»

⁴Ɓɛɛ ŋma nyaŋa nɛ̀ gbɛ̧-a̧ wéŋgé-wéŋgé gɔm hɔ; wa ha̧a̧ ŋgai ha̧ wi-daŋ-a'i mɛ ba ga̧a̧mɔ yinɛ zaŋnu, wen ha̧ o bíí mɛ gbɛ ŋmaa. Ɓɛɛ wa ha̧ zɔm gba-paa ha̧ a̧.

⁵Be-sami a̧i̧a̧ taar tumbal, ɓɛɛ mi zii taar saɗi nɛ̀ tɔ̧a̧‘e: «Mɛ̀ tɛ́!» Ɓɛɛ mi zɔk ŋma tu̧ nyaŋa; wi-daŋ-nyaŋa'i kasi nɛ́ mɔɔ-we-dita-mɔ sɛn er.

⁶Ɓɛɛ mi zii ŋma mɔ hee tiger ga mgbara o saɗi nɔ‘i naar'i nɛ̀ tɔ̧a̧‘e: «Ao alkamaari kpɔk wen yoɓa sede-tom tɛ wese kpɔk kpɔk, ao-fon taar wen yoɓa sede-tom tɛ wese kpɔk kpɔk mbɛt, ɓɛɛ ko nɔ̧́ in dɔ̧ɔ̧, ká mɛ́ fo na.»

⁷Be-sami a̧i̧a̧ naar tumbal, ɓɛɛ mi zii naar saɗi nɛ̀ tɔ̧a̧‘e: «Mɛ̀ tɛ́!»

⁸Ɓɛɛ mi zɔk ŋma fata-futu nyaŋa hegɔ; nin-wi nɛ̀ daŋa nyaŋa'i nɛ́ Fio, ɓɛɛ fara ko o fio ndak ɗoŋ-aa; wa kɛ̧ɛ̧ nù tɛ́ fara naar, ɓɛɛ wa ha̧ ŋgai ha̧ a̧ zu fara kpɔk wen ha̧ a̧ mɛ gbɛ bíí nɛ̀ gba-paa, kum nɛ̀ wa nɛ̀ kaɓa, fio in o ŋga saɗi zaŋnu’ɛ.

⁹Ŋgimbi nɛ̀ Be-sami a̧i̧a mɔɔrɔ tumbal, mi zɔka sɔ̧-tɛ o bíí nɛ̀ ya ti ɗɔɔ fara-ɗafi-sɔ̧; o wi nɔ‘i nɛ́ o wi nɛ̀ wa gbɛ̀ɛ́ so wen zu wen ko Sɔ̧, in wen sedaako nɛ̀ wa dee so.

¹⁰Ɓɛɛ o wi nɔ‘i hiɗi mɔ nɛ̀ hee-ger tɔ̧ nɛnɛ‘e: «Kpàsá[5] Gasa Wan nɛ̀ ɔ sa̧a̧; bɔɔ nɛ́ ge ŋgimbi ge ɛ̀nɛ̀ tɛ́ gɔn nɛ̀ kita k’ɛ́nɛ́‘i, wen h’ɛ́nɛ́ mɛ kifi er ha̧ o bíí zaŋnu oi gbɛ́ɛ́ yɛ nɛ̀ wa gbɛɛ so'i ge nde?»

¹¹Wa ha̧a̧ gasa bu laa kpɔk kpɔk ha̧ o wi nɔ‘i, ɓɛɛ tɔ̧ ha̧ wa mɛ pɛm mɔ tikiɗi hɔ ŋgimbi nɛ̀ o gbama wi-de-tom, in o nya-wa nɛ̀ tɛ fe hee wa ga tɛ dam sɛ.

¹²Ha̧‘m zɔk mɔ wó, mi zɔka Be-sami a̧i̧a̧ mɔɔrɔ-ɗoŋ-kpɔk tumbal. Nɛ́ mɔ'ɔ nɛ̀ nu naka nɛ̀ ŋgaya-a, ɓɛɛ wese tu̧ gír-gír hee ŋma laa nɛ̀‘i pi̧i̧ ɗɔɔ sikini ga, ɓɛɛ nyaŋa-zɛ kifi duk hee tɔk ga.

¹³O sɔra aia gbéyéŋ a nù nɛ̀ yiwese hee mbui waya-mbɔra nɛ̀ gba-búk-kórò foo a nù ga.

¹⁴Yiwese kara si ɗoŋ hee mɔ'ɔ nɛ̀‘i kar nɛ̀ dere[6] ga, ɓɛɛ o kaya in o see-kisi timgbi a nù.

¹⁵O wannu zaŋnu, o gasawi, o gasa wi-biro, o wanmbɔi in o wi nɛ̀ a̧a̧ nɛ̀ mɔɔ-ŋgai, o bíí lɛŋ, o bara in o bíí nɛ̀ bó nɛ́ bara na mbɛt, hu̧sa̧ tɛ̀ sɛn kɔ̧ di̧i̧ in o kɔ̧ ta mɛ zu kaya mɛ.

¹⁶Ɓɛɛ wa tɔ̧ ha̧ o kaya in o gasa ta'e: «Ɛ̀nɛ̀ gú zu yɛ, ɓɛɛ ɛ̀nɛ̀ hú̧sí yɛ nyɛi̧ nɛ̀ wi nɛ̀ duk zu damti'i, in wen zu nyimsea ko Be-sami.

¹⁷Wen gasa wese nyimsea kɔ-wa hɔɔ kaɗi, ɓɛɛ nɛ́ o'o nyɛma mɛ yor oi-aa o?»