Read Northwest Gbaya TƆ̧Ɔ̧ HU̧SA̧MƆ 8 Bible Online

TƆ̧Ɔ̧ HU̧SA̧MƆ 8 - Northwest Gbaya bible

TƆ̧Ɔ̧ HU̧SA̧MƆ 8

¹Ŋgimbi nɛ̀ Be-sami a̧i̧a̧ mɔɔrɔ-ɗoŋ-yiitoo tumbal, mɔ duka sélélé sɛn yiwese mɛ̀ ɗoŋ-aa nyɛi̧ hee reeta ŋgimbi ga.

²Mi zɔka o betom mɛ yiwese mɔɔrɔ-ɗoŋ-yiitoo nɛ̀ yor ti Sɔ̧, ɓɛɛ wa ha̧ mbia mɔɔrɔ-ɗoŋ-yiitoo ha̧ wa.

³Ŋma betom ko Sɔ̧ mɛ yiwese hɔɔ yor ká̧ fara-ɗafi-sɔ̧; a̧ kasi nɛ́ nyɛk-dɔ-fuu-nyama nɛ̀‘i dee nɛ̀ lɔr, ɓɛɛ wa ha̧ zɔm fuu-nyama ha̧ a̧ mɛ dɔ ká bá nɛ̀ o kɔfa-sɔ̧ ko o sa̧a̧-bíí sɛn zu fara-ɗafi-sɔ̧ nɛ̀‘i mboo nɛ̀ lɔr nɛ̀ duk ti damti'i.

⁴Zi-wee fuu-nyama in kɔfa-sɔ̧ ko o sa̧a̧-bíí daŋ nɛ̀ kɔ̧ er betom mɛ yiwese fa̧ti̧i̧ si ti Sɔ̧ mɛ̀.

⁵Nɛ́ mɔ'ɔ nɛ̀ betom mɛ yiwese baa kpáná-dɔ-fuu-nyama ɓɛɛ aŋ kɛ̧i̧-wee sɛn fara-ɗafi-sɔ̧ a kɔ̧ a̧, a̧ siŋa kpánà‘i pi̧ mbɔɗɔnu ɓɛɛ wi zii mbaŋa-kórò, tiger bíí, in o pi̧i̧-kórò, ɓɛɛ nù nak.

⁶O betom mɛ́ yiwese mɔɔrɔ-ɗoŋ-yiitoo nɛ̀ kasa mbia mɔɔrɔ-ɗoŋ-yiitoo ɗafa mɔ mɛ́ dɔm mbia.

⁷Kuti-wi dɔma kɔ‘i, ɓɛɛ ɓɔrɔ in wee nɛ̀ zaŋa ŋmaa in tɔk ai a nù. Nù kɛ̧ɛ̧ tɛ́ fara taar, ɓɛɛ kpɔk sɛn mgbara wa bíí wee, o te bia wee hegɔ mbɛt gu nɛ̀ zɔ̧ lɛŋ gbuɗuk.

⁸Yiitoo betom mɛ yiwese dɔma mbia kɔ‘i; ɓɛɛ duk hee ŋma gasa kaya a̧ baa wee kin tik ɗɔɔ gba-tɔp ga. Gba-tɔp'i kɛ̧ɛ̧ tɛ́ fara taar; ɓɛɛ ɛ̧ɛ̧ kpɔk’ɛ kifi tɔk lɛŋ.

⁹O mɔɔ-ɗɔɔ gba-tɔp nɛ̀ duk kpasa kɛ̧ɛ̧ tɛ́ fara taar, ɓɛɛ o mɔ nɛ̀ a̧a̧ ɗɔɔ ŋma kpɔk mgbara wa'i kum gbuɗuk a nù lɛŋ; o gasa kombon kɛ̧ɛ̧ tɛ́ fara taar mbɛt, ɓɛɛ kɛ̧a̧-a̧ kpɔk mbaŋ ɗaŋ yinɛ lɛŋ.

¹⁰Taar betom mɛ yiwese dɔma mbia ɓɛɛ ŋma gasa sɔra ai nɛ̀ yiwese mɛ̀ tik nù; a̧ nyɛk hee kan a̧ bíí wee ga. O nana-yì in o be-zer kɛ̧ɛ̧ tɛ́ fara taar ɓɛɛ sɔra'i tik ɗɔɔ ŋma kɛ̧a̧-a̧‘i kpɔk.

¹¹(Nin sɔra'i nɛ́ Paŋmɔ.) Kɛ̧a̧-a̧ tɛ́ fara kpɔk'i paŋa, ɓɛɛ o bíí kum nɛ̀ dɔka-a wen zu yì nɛ̀ paŋa kifi ma̧a̧da'i.

¹²Naar betom mɛ yiwese dɔma mbia, ɓɛɛ wese, nyaŋa-zɛ in o sɔra kɛ̧, o ndé tɛ́ fara taar; tum kpee fara kpɔk kpɔk tɛ̀ kɛ̧a̧-a̧ taar'i lɛŋ. Tum kpee zu ŋma kɛ̧a̧-a̧ kpɔk wan mɛ́ ko wese; nɛ́ kpɔk mɔ in nyaŋa-zɛ mbɛt.

¹³Mi mbaɗa mɔ, ɓɛɛ mi zɔk[7] ŋma zua nɛ̀ bu̧i̧ mgbák zu'm hiɗi nɛ̀ mɔ‘e: «Oee bɔnɛ wa! Oee bɔnɛ wa! Oee bɔnɛ nɛ̀ o bíí zaŋnu tɛ́ zɔk ŋgimbi nɛ̀ oi betom mɛ yiwese nɛ̀ ɓɔna taar'i tɛ́ dɔm mbia kɔ-wa wa!»