Read Northwest Gbaya RUTH 1 Bible Online

RUTH 1 - Northwest Gbaya bible

RUTH 1

¹Ŋma gasa kaɓa tika nù sɛn nú Israɛl ŋgimbi wan ko o wi-gɔn-kita, ɓɛɛ ŋma bíí Bɛtlɛhɛm, nù Juda in kóò ká bá nɛ̀ o bem kɔ̧-a̧ yiitoo yak mɛ ɔ ye sɛn nú Mɔab.

²Nin wi’ɛi nɛ́ Elimɛlɛk, nin kóò kɔ̧-a̧ nɛ́ Naɔmi, nin o bem kɔ̧-a̧ nɛ́ Malɔŋ in Kiliɔŋ. Wa nɛ́ o be Efrat saaye Bɛtlɛhɛm, nù Juda. Wa hɔa nú Mɔab, ɓɛɛ wa de ye hi̧i̧.

³Elimɛlɛk, wíì ko Naɔmi fea, ɓɛɛ e kóò in o bem yiitoo.

⁴O bem nɔ‘i baa o zɔŋa Mɔab nɛ̀ kóò; nin ŋma kpɔk nɛ́ Orpa, nin ɓii-aa nɛ́ Ruth. Wa yaa hi̧i̧ hee pɛ ɓu ga.

⁵Malɔŋ in Kiliɔŋ fea mbɛt e Naɔmi ɛ̀nɛ̀, wíì bo na, o bem yiitoo bo na mbɛt.

⁶Hegɔ Naɔmi in o be-for yiitoo ɗafa mɔ mɛ e nú Mɔab duk wen a̧ zia so'e GASA WAN dee so ko ha̧ dukbíí kɔ‘i, ɓɛɛ ha̧ nyɔŋmɔ ha̧ wa.

⁷Naɔmi ee nú Mɔab duk. A̧ kura in o be-for-aa, ɓɛɛ wa ba war mɛ si ɗoŋ si Juda.

⁸Naɔmi tɔ̧ɔ̧ ha̧ o be-for yiitoo: «Ɛ̀nɛ̀ yák mɔ k’ɛ́nɛ́, kóó o ndé a̧ sí ɗoŋ tɛ nàà kɔ‘i. Ɓɛɛ GASA WAN a̧ dé demɔ in'nɛ̀ɛ́ hee mɔ'ɔ n’ɛnɛ dee so in o wan-fio nɛti, in hee mɔ'ɔ n’ɛnɛ dee so in am ga.

⁹GASA WAN a̧ dé h’ɛ́nɛ́ mɛ kpa de fara sɛn kɔ̧ tua ko ŋma mbe wíì n’ɛnɛ tɛ ba.» Ɓɛɛ wa hɛr ŋmaa. O be-for-aa hi̧a̧ kɔ̧a̧ nɛ̀ dɔka-a.

¹⁰Wa tɔ̧ɔ̧ ha̧ a̧: «Weyaa, ɛɛ tɛ si in'nɛ̀ɛ́ si fara ko dukbíí k’ɛ́nɛ́.»

¹¹Naɔmi kifa nú ha̧ wa: «O bem kɔ‘m, ɛ̀nɛ̀ sì. Ɛ́nɛ́ tɛ́ tɛ̀ bɔɔ in am hee ge? Mi tɛ ko so ŋma bem kòò woyo k’ɛ̀nɛ̀ de k’ɛ́nɛ́ baa nɛ̀ wíì ɓɔ?

¹²O bem kɔ‘m, ɛ̀nɛ̀ sí mɔ k’ɛ́nɛ́. Mi sɔka kɔ‘m yak ŋgimbi baa wíì kaɗi. Kóó kà‘m tɔ̧ so'e, ŋgai kɔ‘m ɓɔna kaŋ, mi tɛ kpa mbe wiwii mɛ zɛ sɔsɔɔ, mi tɛ ko o mbe bem wó,

¹³ɛ́nɛ́ tɛ̀ɛ́ pɛm so mɔ ha̧ wa mɛ gasi h’ɛ́nɛ́ mɛ ba wa nde? Ɛ́nɛ́ tɛ dor tɛ‘nɛ́ tɛ baa mbe wíì hegɔ hee ge? Weyaa, o bem kɔ‘m, bɔnɛ kɔ‘m gana k’ɛ́nɛ́. GASA WAN dee ŋgayamɔ in am.»

¹⁴Wa hi̧a̧ kɔ̧a̧ nɛ̀ dɔka-a woyo. Ɔrpa hɛra for ɓɛɛ si kɔ‘i ɗoŋ tɛ kɔ‘i. Ruth ndaɗa kɔ‘i in for.

¹⁵Naɔmi tɔ̧ɔ̧ ha̧ Ruth: «Mɛ̀ zɔ̀k, gɔya-mɛ sii kɔ‘i sitɛ dukbíí kɔ‘i in sitɛ o sɔ̧ kɔ‘i. Mɛ mbɛt, mɛ̀ sí ɗoŋ, mɛ̀ ndák pata a̧.»

¹⁶Ruth kifa nú ha̧ for: «K’ɛ́nɛ́ de ha̧‘m mɛ e'nɛ́ duk nɛ̀ ŋgai na, wen fara n’ɛnɛ tɛ nɛ, mi tɛ nɛ, fara n’ɛnɛ tɛ ɔ, mi tɛ ɔ, bíí k’ɛ́nɛ́ tɛ duk nɛ́ bíí kɔ‘m, Sɔ̧ k’ɛ́nɛ́ tɛ duk nɛ́ Sɔ̧ kɔ‘m.

¹⁷Fara n’ɛnɛ tɛ fe sɛnɛ, mi tɛ fe sɛnɛ; mɛ̀ nɛ́ fara'i a̧ wa tɛ gun am sɛnɛ mbɛt. Kà‘m nɛ ee'nɛ́ duk, nɛ̀ bó nɛ́ fio a̧ gbɛa'm na, ɓɛɛ nɛ̀ GASA WAN a̧ dé ŋgayamɔ in am.»

¹⁸Hee mɔ'ɔ nɛ̀ Naɔmi zɔka Ruth kɔ̧ mɛ kɛ̧ tɛ nɛ̀ a̧ na ga, a̧ kaɗa tɔ̧ɔ̧ wen.

¹⁹Wa yaka in ŋmaa hɔ Bɛtlɛhɛm, ɓɛɛ hɔa-a kɔ-wa dee nɛ́ mɔɔ-kíì sɛn saaye'i. O okoo ku̧u̧ naŋ hiɗa mɔ: «Wi’ɛ nɛ́ o hee Naɔmi ga’ɛ o?»

²⁰Ɓɛɛ a̧ kifi nú ha̧ wa: «K’ɛ́nɛ́ sa'm'e Naɔmi[1] ɓɔna, ɛ̀nɛ̀ sá‘m'e Mara,[2] wen Sɔ̧ nɛ̀ a̧a̧ nɛ̀ ŋgayamɔ lɛŋ dee ha̧‘m mɛ kpa dita-see nyɛmna.

²¹Mi yaka nɛ̀ mɔ nɛ̀ dɔka-a, ɓɛɛ GASA WAN ba'm piinɛ nɛ̀ géé er. Wen ge s’ɛnɛ sa'm Naɔmi ge? GASA WAN nɛ̀ a̧a̧ nɛ̀ ŋgayamɔ lɛŋ kura zu'm, ɓɛɛ de ŋgayamɔ in am.»

²²Mɛ̀ nɛ́ hegɔ a̧ Naɔmi pia nɛnɛ nɛ̀ nú Mɔab in Ruth be-for-aa. Wa hɔɔ Bɛtlɛhɛm, ká o bíí ku̧u̧ naŋ gɔna alkamaari[3] kaɗi.