Read Northwest Gbaya 1 SAMUƐL 10 Bible Online

1 SAMUƐL 10 - Northwest Gbaya bible

1 SAMUƐL 10

¹Samuɛl baa dak nɔ̧́, ɓɛɛ tɛn a zu Saul, ɓɛɛ hɛr a̧ rɔɔm. A̧ tɔ̧ɔ̧ ha̧ a̧: «Bo nɛ GASA WAN a̧ tɛna nɔ̧́ a zu mɛ wen ha̧ mɛ mɛ duk nɛ́ wan dukbíí kɔ̧-a̧ na nde?

²Tɛ̀ ea'm nɛ̀ mɛ tɛ e sɔsɔɔ mɛ yak, mɛ tɛ nɛ̀ɛ́ kpa bíí yiitoo ká̧ pɛsi-fio ko Rachɛl nyɛm nɛ gbìsì ko o be Bɛnjamin sɛn Sɛlsa, ɓɛɛ o wi nɔ‘i tɛ tɔ̧ ha̧ mɛ‘e, o nana tuifuu nɛ mɛ nɛɛ mɛ kii'i, wa kpaa wa kaɗi, ɓɛɛ kinii, tɛ dáà kɔ-mɛ bìí ɗoŋ o nana tuifuu nɔ‘i, kíì de nɛ a̧ wen zu'nɛ́; ɓɛɛ a̧ ta nɛ mɔ tɔ̧ nɛnɛ‘e, wi tɛ de héé ge nɛ̀ bem kɔ‘i ge nde?

³Mɛ́ bé tɛ̀ɛ́ nɛ siti hɔ ká̧ gasa te sɛn Tabɔr, mɛ tɛ kpa bíí taar fara daŋa-a sitɛ Sɔ̧ sɛn Bɛtɛl. Ŋma kpɔk tui kɔ‘i nɛ́ be gbadua taar, yiitoo-aa tui kɔ‘i nɛ brɛt taar, sɔŋkur-aa tui kɔ‘i nɛ dak dɔ̧ɔ̧.

⁴Wa tɛ fan mɛ, ɓɛɛ wa tɛ ha̧ brɛt ha̧ mɛ yiitoo; mɛ tɛ kai brɛt nɔ‘i er wa.

⁵Ɓɛɛ nɛ doŋ, mɛ tɛ hɔ sɛn Gibea ye ko Sɔ̧, fara nɛ o ŋma wi-duk-zu zika-nù[6] ko o be Filistii ya sɛnɛ. Tɛ hɔa-a kɔ-mɛ nú ye hegɔ rɛt, mɛ tɛ kpa o gíí wi-tɔ̧-wen oi nú Sɔ̧ fara zira-a nɛ kusa-fara mɛ tɛnɛ nɛ̀ o koloŋ, o bi̧ɔ̧, o mɔɔ-dɔm in o kunde; gbana tɛ ba wa.

⁶Ɓɛɛ ɔmi ko GASA WAN tɛ zir pii zu mɛ. Gbana tɛ ba mɛ in wa mbɛt, ɓɛɛ mɛ tɛ kifi nɛ mbe bíí.

⁷Ŋgimbi nɛ mɛ tɛ zɔk mɔɔ nɔ‘i hɔɔ kaɗi, mɛ̀ dé mɔ lɛŋ nɛ mɛ tɛ kpa mɛ de, wen Sɔ̧ a̧a̧ in mɛɛ.

⁸Mɛ tɛ zir yak ti ha̧‘m si Gilgal; mi tɛ zir nɛ́ɛ̀ kpa mɛ hi̧i̧ wen h’ɛ́ɛ́ mɛ dɔ kpoo-sɔ̧ in h’ɛ́ɛ́ mɛ ɗafi sɔ̧ wen kpaa ga̧a̧mɔ mbɛt. Mɛ tɛ pɛm mɔ zɛ mɔɔrɔ-ɗoŋ-yiitoo hɔ ŋgimbi n'am tɛ kpa mɛ, ɓɛɛ mi tɛ usi mɔ nɛ mɛ tɛ de ha̧ mɛ.»

⁹Ŋgimbi nɛ Saul zika tɛ mɛ e Samuɛl duk, Sɔ̧ kpaia see-aa. O mɔɔ-sedaako nɔ‘i lɛŋ hɔɔ gba̧a̧ wese'i.

¹⁰Ŋgimbi nɛ wa hɔɔ sɛn Gibea, o gíí wi-tɔ̧-wen oi nú Sɔ̧ wee ti a̧ tɛnɛ. Ɔmi ko Sɔ̧ zira pii zu a̧, ɓɛɛ gba gbana ku̧ naŋ baa a̧ hee o dɔka sɛm kɔ̧-a̧ ga.

¹¹O bíí nɛ iŋa so a̧ nɛti zɔka a̧ fara tɔ̧ɔ̧ wen oi nú Sɔ̧ in o ŋma wi-tɔ̧-wen oi nú Sɔ̧, ɓɛɛ wa tɔ̧ ha̧ o ŋmaa: «Nɛ́ ge a̧ de bem ko Kis ge? Saul nɛ́ ŋma wi-tɔ̧-wen oi nú Sɔ̧ mbɛt nde?»

¹²Ŋma bíí kpɔk mgbara o wi nɔ‘i aka mɔ ndé: «Dáà kɔ-wa nɛ́ o nde?» Hegɔ tua-wen gboo nɛ tɛ wen'i nɛ bíí tɔ̧ dɔ̧ɔ̧-dɔ̧ɔ̧‘e: «Mɔ'ɔ Saul nɛ́ ŋma wi-tɔ̧-wen oi nú Sɔ̧ mbɛt nde?»

¹³Ɗoŋ nɛ gba gbana kaɗa baa Saul kaɗi, a̧ daŋa si kusa-fara.

¹⁴Ŋma dáà kɔ̧-a̧ aka a̧ in wi-de-tom kɔ̧-a̧: «Ɛnɛ nɛɛ so si déè?» A̧ kifa nú: «Ɛɛ nɛɛ so mɛ kii o nana tuifuu. Ɛɛ kpa wa na, ɓɛɛ ɛɛ nɛ si tɛ ko Samuɛl.»

¹⁵Dáà kɔ̧-a̧‘i tɔ̧ɔ̧ ha̧ a̧: «Mɛ̀ wé ɗoŋ mɔ nɛ Samuɛl tɔ̧ɔ̧ h’ɛ́nɛ́ ha̧‘m.»

¹⁶Saul kifa nú ha̧ dáà kɔ‘i: «A̧ tɔ̧ɔ̧ h’ɛ́ɛ́ ndé, wa kpaa o nana tuifuu kaɗi.» Ɓɛɛ Saul tɔ̧ wen ɔɔ-wan nɛ Samuɛl tɔ̧ɔ̧ ha̧ a̧‘i ha̧ dáà kɔ‘i na.

¹⁷Samuɛl saa dukbíí tɛnɛ gbisi ti GASA WAN sɛn Mispa;

¹⁸a̧ tɔ̧ɔ̧ ha̧ o be Israɛl: «Tɔ̧ɔ̧-wen ko GASA WAN Sɔ̧ ko Israɛl nɛ́ mɔ'ɔ: ‹Nɛ́ mi a̧‘m gboo Israɛl nɛ nú Egiptɛ in nɛ́ mi a̧‘m ɓara'nɛ́ er Egiptɛ in er nù lɛŋ nɛ duka de bɔnɛ in'nɛ̀ɛ́.

¹⁹Ɓɛɛ sɔsɔɔ, ɛnɛ ee Sɔ̧ k’ɛ́nɛ́ duk, wan nɛ gbak so'nɛ́ tɛ o ɗaŋsee in o bɔnɛ k’ɛ́nɛ́ lɛŋ, ɓɛɛ ɛnɛ tɔ̧ɔ̧ ha̧ a̧: Ɛ̀nɛ̀ é ŋma wan ha̧ duk zu yɛ!› Kinii ɛ̀nɛ̀ gbó yór ti GASA WAN nɛ̀ zuduk zuduk, in nɛ̀ nú-gara nú-gara.»

²⁰Samuɛl foo o zuduk be Israɛl lɛŋ pii ti, ɓɛɛ tani ba nɛ́ zuduk ko Bɛnjamin.

²¹A̧ foo zuduk ko Bɛnjamin pii ti nɛ nú-gara nú-gara, ɓɛɛ tani ba nɛ́ nú-gara ko Matri. A̧ foo bíí kpɔk kpɔk pii ti nɛ nú-gara ko Matri, ɓɛɛ tani ba nɛ́ Saul bem ko Kis. Wa kia a̧, ɓɛɛ wa kpa a̧ na.

²²Wa aka GASA WAN woyo: «Mɔ'ɔ kiitɛ Saul tɛɛ hɛ̧ɛ̧ mbɛt nde?» GASA WAN kifa nú ha̧ wa: «Ɛ̀nɛ̀ zɔ́k a̧ n'aa hu̧si sɛn mgbara o tui nɛ ya mɛ‘i.»

²³Wa wara yì nɛ́ɛ̀ ba a̧ tɛ́ɛ̀ e mgbara bíí. A̧ kusa gan wa lɛŋ pét-pét.

²⁴Ɓɛɛ Samuɛl tɔ̧ ha̧ bíí lɛŋ: «Ɛnɛ zɔka bíí nɛ GASA WAN hoka nde? Ŋma bíí nɛ nyɛma ŋmaa in a̧ mgbara'nɛ́, bo na.» Wa lɛŋ gaia mɔ nɛ desee, hiɗi nɛ mɔ‘e: «Wannu a̧ kásí a̧ ŋgai!»

²⁵Samuɛl tɔ̧ɔ̧ yuwar mɔɔ-wan ha̧ dukbíí nɔ‘i lɛŋ; a̧ yɔra mɔ‘i n'aa tɔ̧ɔ̧ ha̧ o bíí‘i lɛŋ zaŋ ŋma kalata, ɓɛɛ a̧ e sɛn ti GASA WAN. Nɛ́ mɔ'ɔ nɛ̀ Samuɛl tɔ̧ɔ̧ ha̧ dukbíí lɛŋ mɛ si ɗoŋ, kóó o ndé si tɛ kɔ‘i.

²⁶Saul mbɛt sii si tɛ kɔ‘i sɛn Gibea, ɓɛɛ o wi-kpee-see nɛ̀ Sɔ̧ yee so kɔ̧ see-wa si in a̧.

²⁷Ɓɛɛ o wan-de-gba̧a̧-mɔ na ku̧u̧ naŋ tɔ̧a̧-a̧: «Wi’ɛ tɛ kpasi yɛ hee ge?» Wa ee a̧ hee geemɔ ga, ɓɛɛ wa suk a̧ na. Ɓɛɛ kɔ̧-a̧, mɔ‘i de ŋma mɔ tɛ-a na.