Read Northwest Gbaya 1 SAMUƐL 12 Bible Online

1 SAMUƐL 12 - Northwest Gbaya bible

1 SAMUƐL 12

¹Samuɛl tɔ̧ɔ̧ ha̧ o be Israɛl lɛŋ: «Zɔ́k, kinii mi dee mɔ lɛŋ n’ɛnɛ aka ha̧‘m mɛ de; mi ee wan zu'nɛ́ kaɗi.

²Ɓɛɛ kinii, nɛ́ wan'i a̧ tɛ yak ti h’ɛ́nɛ́. Kɔ‘m, mi sɔka kɔ‘m kaɗi; zu'm fɛŋa nɛ mbui kaɗi; o bem kɔ‘m a̧a̧ hɛ̧ɛ̧ in'nɛ̀ɛ́. Nɛ́ mi'i duka ti h’ɛ́nɛ́ ŋgimbi n'am ɓɔna nɛ ŋgaiwi hɔ sɔsɔɔ.

³Mi nɛ́ mɔ'ɔ, ɛ̀nɛ̀ dé sedaako k’ɛ́nɛ́ ha̧‘m ti GASA WAN in ti wi n'aa tɛna nɔ̧́-wan a zu a̧. Mi ɓara ndai er o? Kà‘m ɓar nɛ̀ tuifuu er o? Nɛ́ o a̧‘m dora mɔ kɔ̧-a̧ er a̧ in nɛ́ o a̧‘m dee ŋgamɔ in a̧ o nde? Nɛ́ o a̧‘m baa mɔ er a̧ nɛ hu̧sa̧-a̧ ha̧‘m mɛ kpe yí‘m zu ŋma ɗaŋmɔ kɔ̧-a̧ o nde? Kà mɔ á̧ dee hegɔ nɛ̀ mbetɛ, ɓɛɛ mi tɛ ha̧ mɔ k’ɛ́nɛ́ h’ɛ́nɛ́ si ɗoŋ.»

⁴Wa kifa nú: «Ɛ́nɛ́ dor mɔ k’ɛɛ er yɛ na; ɛ́nɛ́ dé ŋgamɔ in yɛɛ na, in ɛ́nɛ́ ba mɔ er yɛ na mbɛt.»

⁵Samuɛl kifa nú ha̧ wa: «GASA WAN in mbe wan n'aa hoka sɔsɔɔ nɛ́ wi-sedaako; ŋma ɗaŋmɔ kɔ‘m bo na, ŋma mɔ k’ɛ́nɛ́ bo er-am na.» Ɓɛɛ wa kifi nú: «GASA WAN nɛ́ wi-sedaako mɔ‘i.»

⁶Samuɛl tɔ̧ɔ̧ ha̧ o bíí: «GASA WAN nɛ̀ ee so Moisɛ in Arɔŋ zu'nɛ́, nɛ̀ gboo so o dáà k’ɛ́nɛ́ nɛ̀ Egiptɛ, nɛ́ wi-sedaako.

⁷Kinii, ɛ̀nɛ̀ yá ti GASA WAN hɛ̧ɛ̧ ha̧‘m mbaŋ tɛ‘nɛ́ tɛ o deemɔ ko GASA WAN lɛŋ nɛ̀ yuwar-a n'aa dee wen'nɛ́ in o dáà k’ɛ́nɛ́.

⁸Ŋgimbi nɛ Jakob hɔɔ Egiptɛ, o dáà k’ɛ́nɛ́ hiɗa mɔ sitɛ GASA WAN, ɓɛɛ GASA WAN tom Moisɛ in Arɔŋ tɛnɛ mɛ gbo wa nú Egiptɛ yinɛ, ɓɛɛ e wa sɛn tɛ nù'ɛ.

⁹Ɓɛɛ nɛ ɗoŋ, tɛ-wa bìí ɗoŋ GASA WAN Sɔ̧ kɔ-wa, ɓɛɛ a̧ a wa kɔ̧ er Sisɛra, gasawi ko o wi-biro Hasɔr, kɔ̧ er o be Filistii in kɔ̧ er wannu Mɔab nɛ dee biro in wa.

¹⁰Wa hiɗa mɔ sitɛ GASA WAN woyo; wa tɔ̧a̧: ‹Ɛɛ dee ɗaŋmɔ wen n’ɛɛ ee GASA WAN duk mɛ gasi nɛ́ Bal in o Astarte. Kinii, ɛ̀nɛ̀ kpásí yɛ er o wisɛn k’ɛɛ, ɓɛɛ ɛɛ tɛ gasi'nɛ́.›

¹¹Hegɔ GASA WAN toma Yerubal, Barak,[7] Jɛfte ká bá nɛ̀ Samuɛl; a̧ kpasa'nɛ́ er o wisɛn k’ɛ́nɛ́ nɛ yaa so zik'nɛ́, nɛ́ mɔ'ɔ n’ɛnɛ yaa ɗɔɔ ga̧a̧mɔ.

¹²Ŋgimbi n’ɛnɛ zɔka nɛ̀ Nahas, wannu ko o be Amɔŋ tɛɛ mɛ bi'nɛ́, ɛnɛ tɔ̧ɔ̧ ha̧‘m: ‹Weyaa, ɛɛ kɔ̧ɔ̧ ŋma wan mɛ duk zu yɛ.› Zu-a'i, ɛnɛ iŋa'e GASA WAN Sɔ̧ k’ɛ́nɛ́ nɛ́ wan k’ɛ́nɛ́.

¹³«Kinii, wannu n’ɛnɛ aka, n’ɛnɛ hoka nɛ́ mɔ'ɔ nɛ̀ GASA WAN ee zu'nɛ́'ɛ.

¹⁴K’ɛ̀nɛ̀ yu kíí GASA WAN, k’ɛ̀nɛ̀ gasi a̧, k’ɛ̀nɛ̀ zii wen oi nú-a in k’ɛ̀nɛ̀ zik tɛ‘nɛ́ tɛ ha̧a̧nú kɔ̧-a̧ na, ɓɛɛ ɛ́nɛ́ in wan nɛ duk zu'nɛ́ tɛ nɛ ɗoŋ GASA WAN Sɔ̧ k’ɛ́nɛ́ siti.

¹⁵Ɓɛɛ k’ɛ̀nɛ̀ zii wen oi nú GASA WAN na, k’ɛ̀nɛ̀ zik tɛ‘nɛ́ tɛ ha̧a̧nú kɔ̧-a̧, nyimsea kɔ̧-a̧ tɛ tik zu'nɛ́ in zu o dáà k’ɛ́nɛ́.

¹⁶Kinii ɛ̀nɛ̀ yá hɛ̧ɛ̧ woyo, ɛ̀nɛ̀ zɔ́k gasamɔ nɛ GASA WAN tɛ de nɛ̀ yí‘nɛ́.

¹⁷Bó nɛ́ ŋgimbi mɔi̧a alkamaari nɛ́ mɔ'ɔ na nde? Mi tɛ kɔfi GASA WAN ha̧ a̧ mɛ de ha̧ kórò mɛ hɔ tuɓi nɛnɛ. Ɛ̀nɛ̀ íŋ‘e, ɛ́nɛ́ dee gasa ɗaŋmɔ tɛ aka mbe wan n’ɛnɛ aka er-a.»

¹⁸Samuɛl kɔfa GASA WAN, ɓɛɛ GASA WAN de ha̧ kórò mɛ hɔ tuɓi nɛnɛ kpɔk kale wese'i. Dukbíí nɛ oi-aa lɛŋ yuu kíí GASA WAN in Samuɛl.

¹⁹Wa tɔ̧ɔ̧ ha̧ Samuɛl: «Ɛ̀nɛ̀ kɔ́fí GASA WAN Sɔ̧ k’ɛ́nɛ́ wen o wi-de-tom k’ɛ́nɛ́, wen k’ɛɛ tɛɛ fe; zu o dɔka ɗaŋmɔ k’ɛɛ, ɛɛ dee mbe-a wen n’ɛɛ aka mbe wan.»

²⁰Samuɛl tɔ̧ɔ̧ ha̧ wa: «K’ɛ́nɛ́ de kíì na; nɛ̀ mbetɛ nɛ́ ɛ́nɛ́ a̧ dee ɗaŋmɔ nɔ‘i lɛŋ. Mɔ kpɔk, k’ɛ́nɛ́ duk nyɛi̧ nɛ GASA WAN na, ɛ̀nɛ̀ gas'a nɛ̀ see'nɛ́ kpɔk.

²¹K’ɛ́nɛ́ e a̧ duk mɛ nɛ̀ nɛ́ doŋ o geemɔ, nɛ̀ beka gbak'nɛ́ na, na, wen wa nɛ́ geemɔ.

²²Nɛ̀ mbetɛ, GASA WAN beka e zuduk bíí kɔ‘i duk na, wen nin-a ɔ gasa nyɛmna, in GASA WAN dee kànà h’ɛ́nɛ́ mɛ ya nɛ́ dukbíí kɔ̧-a̧ ɓɔnsɛnɛ.

²³War kɔ‘m, kà‘m kaɗi kɔfa-sɔ̧ wen'nɛ́, mɔ‘i tɛ duk nɛ́ gasa ɗaŋmɔ yí GASA WAN;

²⁴mɔ kpɔk, ɛ̀nɛ̀ yú GASA WAn ɓɛɛ ɛ̀nɛ̀ dé tom ha̧ a̧ nɛ mboozu, nɛ see'nɛ́ kpɔk wen gasamɔ n'aa dee wen'nɛ́.

²⁵Ɓɛɛ k’ɛ̀nɛ̀ de ɗaŋmɔ, ɛnɛ tɛ kum in wannu k’ɛ́nɛ́ lɛŋ.»