Read Northwest Gbaya 1 SAMUƐL 13 Bible Online

1 SAMUƐL 13 - Northwest Gbaya bible

1 SAMUƐL 13

¹Saul a̧a̧ so nɛ̀ pɛ..., ŋgimbi n'aa ɔɔ nɛ̀ wan, ɓɛɛ a̧ ɔ wan pɛ yiitoo zu Israɛl.

²Nɛ́ mɔ'ɔ nɛ̀ Saul hoka bíí Israɛl booro-taar sɛn Israɛl: bíí booro-yiitoo duka in a̧ sɛn Mikmas in sɛn zu kaya Bɛtɛl; ɓɛɛ oi bíí booro duk kɔ‘i in Jɔnataŋ sɛn Gibea nú Bɛnjamin. Saul foo oi dɔka bíí siɗoŋ tɛ kɔ-wa.

³Ŋma wese, Jɔnataŋ gbɛɛ gasawi ko o be Filistii nɛ duk sɛn Geba, ɓɛɛ o be Filistii zii nyɛrɛ-a. Saul ha̧a̧ nú ha̧ wa mɛ dɔm zak dam fara lɛŋ tɔ̧ nɛnɛ: «O be Hebreu a̧ zii!»

⁴Nú Israɛl lɛŋ zia'e Saul gbɛɛ gasawi ko o be Filistii, nɛ́ mɔ'ɔ nɛ̀ o be Israɛl foo kiri pi̧ mgbara wa in o be Filistii. O bíí mɔi̧a duk ɗoŋ Saul sɛn Gilgal.

⁵O be Filistii mɔi̧a ŋmaa mɛ bi Israɛl nɛ keekee-biro booro-ɓu-taar; o wi-daŋ-nyaŋa booro-mɔɔrɔ-ɗoŋ-kpɔk in o dɔka wi-biro hee nyɛmɛ ká̧ zaŋ gba-tɔp ga. Wa tɛɛ ba gbagari sɛn Mikmas, nɛ war daŋa-wese ha̧ Bɛt-Avɛn.

⁶Nɛ̀ o be Israɛl zɔka'e, o be Filistii nasi wa nyɛmna, wa hu̧sa̧ kɔ̧ di̧i̧, o ŋma nɛ̀ kɔ̧́ kɔ̧̀, o ŋma nɛ̀ mgbara ta, kɔ̧ gbamgba in kɔ̧ o gɔna-yì mbɛt.

⁷O ŋma be Hebreu kuu Jurdɛn si nù Gad in nú Galad mbɛt. Saul ɓɔna so kɔ‘i sɛn Gilgal, ɓɛɛ o bíí nɛ ya in a̧ ya nɛ̀ naka-tɛ.

⁸Saul zɛma mɔ tɛ zɛ mɔɔrɔ-ɗoŋ-yiitoo nyɛm nɛ ɗoŋ zɛ nɛ Samuɛl gɔna takaɗi; Samuɛl tɛ sɛn Gilgal na, ɓɛɛ o bíí pɛsi e Saul duk.

⁹Saul tɔ̧a̧: «Ɛ̀nɛ̀ bá dɔɔ-kpoo-sɔ̧ in ha̧a̧mɔ ga̧a̧mɔ tɛnɛ ha̧‘m.» A̧ dɔɔ kpoo-sɔ̧.

¹⁰Ŋgimbi n'aa kaɗa dɔɔ kpoo-sɔ̧, Samuɛl hɔa, ɓɛɛ Saul gbo kpa a̧ mɛ kpɛk a̧.

¹¹Samuɛl aka a̧: «Nɛ́ ge a̧ mɛ dee’ɛ ge?» Ɓɛɛ Saul kifi nú: «Ŋgimbi n'am zɔka dukbíí ku̧u̧naŋ ea'm duk, pɛsi nɛnɛ, mɛ mbɛt, mɛ tɛ́ tɛ́ kale ŋgimbi n’ɛɛ tɔ̧ɔ̧ nɛnɛ na, in hee o be Filistii mɔi̧a ŋmaa sɛn Mikmas ga,

¹²mi taa mɔ kɔ̧ see-am hee mɔ'ɔ ga: ‹Kinii, o be Filistii tɛ zir tɛ́ɛ̀ kpa'm sɛn Gilgal, ŋgimbi n'am tɛ wor GASA WAN hɔ̧ɔ̧ na.› Mi nɔɔ ŋgiɗi, ɓɛɛ mi dɔ kpoo-sɔ̧.»

¹³Samuɛl tɔ̧ɔ̧ ha̧ Saul: «Mɛ dee mɔ hee mgbelewi ga. Mɛ mbo zu tɛ ha̧a̧nú nɛ GASA WAN Sɔ̧ kɔ-mɛ ha̧a̧ ha̧ mɛ na. Bo nɛ GASA WAN tɛ̀ɛ́ de so kànà ha̧ mɛ mɛ́ duk nɛ́ wan zu Israɛl ɓɔnsɛnɛ na nde?

¹⁴Ɓɛɛ kinii, wan kɔ-mɛ beka yor ɓɔna. GASA WAN hoka ŋma bíí nɛ see-aa kpɛka, ɓɛɛ a̧ e a̧ nɛ wan zu dukbíí kɔ̧-a̧ wen nɛ mɛ kasi mɔ nɛ GASA WAN ha̧a̧ nú sɛnɛ ha̧ mɛ na.»

¹⁵Samuɛl kura nɛ Gilgal, ɓɛɛ ba yuwar si Gibea nú Bɛnjamin. Saul tɔra oi o wi-biro nɛ ɓɔna in a̧; o bíí nɛ ɓɔna so duka hee gɔmŋmaa-mɔɔrɔ-ɗoŋ-kpɔk ga.

¹⁶Saul in bem kɔ‘i Jɔnataŋ gu nɛ oi bíí nɛ ɓɔna in wa baa fara sɛn Gibea nú Bɛnjamin, ɓɛɛ o be Filistii ba kɔ‘i gbagari kɔ‘i sɛn Mikmas.

¹⁷O wi-ɗaŋ-mɔ gboo nɛ̀ kɔ̧ gbagari ko o be Filistii nɛ̀ dùk-aa taar. Kuti dùk-aa baa kɔ‘i nɛ war si Ofra nù ko Sual;

¹⁸yiitoo dùk-aa baa war si Bɛt-Hɔrɔŋ; taar dùk-aa zɔka kɔ-wa mɔ si mgbara kɔ̧ Ɗɔŋgɔ ko o Ɓoŋgo si war ŋga-gbárà.

¹⁹Kela bo so nú Israɛl na, kóó kpɔk, wen nɛ̀ o be Filistii tɔ̧ɔ̧ so ha̧ o ŋmaa ndé: «Ká‘i e ha̧ o be Hebreu mɛ dui o gba-paa in o sɛ́ɛ̀ na.»

²⁰O be Israɛl lɛŋ zir so sitɛ o be Filistii ɗafi nɛ̀ wara keekee-wa-fɔ in o géé wara kɔ-wa, in o kpi̧i̧, ká bá nɛ̀ o boi-tok-ndai kɔ-wa mbɛt.

²¹Ɓɛɛ nɛti ha̧ wa mɛ bɛŋ nú-boi kɔ-wa, wa tɛ yoɓi nú kpi̧i̧ in nú boi-tok-ndai tɛ geɗek kɔya sede kpɔk; a̧ kà bó nɛ́ wara keekee-nyaŋa, kóó géé wara, wa yoɓi nɛ́ geɗek kɔya sede yiitoo.

²²Wese biro, o gíí wi-biro ko Saul in Jɔnataŋ bó só nɛ̀ gba-paa in sɛ́ɛ̀ na. Sɛ́ɛ̀ duka so kànà nɛ́ ko Saul in ko bem kɔ̧-a̧ Jɔnataŋ ɓɛɛ.

²³Nɛ́ mɔ'ɔ nɛ̀ o ŋma wi-biro Filistii tɛɛ hu̧si mgbara kaya yuwar Mikmas.