Read Northwest Gbaya 1 SAMUƐL 14 Bible Online

1 SAMUƐL 14 - Northwest Gbaya bible

1 SAMUƐL 14

¹Ŋma wese, Jɔnataŋ bem ko Saul tɔ̧ɔ̧ ha̧ baka-nyaŋa kɔ‘i: «Mɛ̀ tɛ́, ɛ̀ɛ̀ nɛ́ɛ̀ hɔ fara nɛ o be Filistii baa gbagari kɔ-wa sɛnɛ kur mɛ‘i.» Jɔnataŋ yaka, mbaŋ tɛ dáà kɔ‘i na.

²Saul ɓɔna so kɔ‘i fara duk nù sɛn gbìsí Gibea ɗɔɔ ŋma te hee kóɓò[8] ga, nɛ duk ká̧ Migrɔŋ; gíí wi-biro duka in a̧ hee gɔmŋmaa-mɔɔrɔ-ɗoŋ-kpɔk ga.

³Tɛ ŋgimbi'i, wi-ɗafi-sɔ̧ nɛ pi̧i̧ so laa-ɗafi-sɔ̧ nɛ‘i sa'e Efod duka so nɛ́ Ahiya, bem ko Ahitub, nya Ikabot. Ikabot duka so nɛ́ bem ko Pinas, be-koo Elii, wi-ɗafi-sɔ̧ ko GASA WAN nɛ duka so sɛn Silo. O dɔka bíí iŋ‘e Jɔnataŋ yaka na.

⁴Sɛn mgbara kaya nɛ Jɔnataŋ kɔ̧ɔ̧ mɛ ɓir yak nɛnɛ si fara nɛ o be Filistii ya sɛnɛ‘i, ɓɛ̧i̧a nú ta yiitoo a̧a̧ hi̧i̧: nin ɛ̧ɛ̧ kpɔk’ɛ nɛ́ Bosɛs, nin ɓii-aa nɛ́ Sɛnɛ.

⁵Kuti-a a̧a̧ nɛ̀ ká̧-zan-mɛ́-ŋgɔn ti Mikmas; yiitoo-aa a̧a̧ nɛ̀ ká̧-zan-mɛ́-ɗɔɔ ti Geba.

⁶Jɔnataŋ tɔ̧ɔ̧ ha̧ baka-nyaŋa kɔ‘i: «Mɛ̀ tɛ́, ɛ̀ɛ̀ ɓír si fara ko o wi-mbii nɔ'ɔ; ŋmafara GASA WAN tɛ de ŋma mɔ wen yɛ, wen ŋma mɔ nɛ tɛ dor GASA WAN tɛ dea-a h’ɛ́ɛ́ mɛ gbin biro, kóó ɛɛ dɔka, kóó ɛɛ dɔk na, bo na.»

⁷Baka-nyaŋa kɔ̧-a̧ tɔ̧ɔ̧ ha̧ a̧: «Ɛ̀nɛ̀ dé mɔ lɛŋ nyɛm nɛ ɗoŋ taamɔ k’ɛ́nɛ́, ɛ̀nɛ̀ nɛ́ siti; kɔ‘m, mi zɔk nɛ́ ɛ́nɛ́ ɓɛɛ.»

⁸Jɔnataŋ tɔ̧a̧: «Kinii, ɛ́ɛ́ nɛ́ nɛ̀ɛ́ sitɛ wa, o bíí kɔ-wa tɛ zɔk yɛ.

⁹Kà wa tɔ̧ h’ɛ́ɛ́‘e: ‹K’ɛ́nɛ́ fo tɛ‘nɛ́ na hɔ fara n’ɛɛ tɛ nɛ̀ɛ́ kpa'nɛ́ wó,› ɛɛ tɛ yor fara'i, ɓɛɛ ɛɛ beka daŋ sitɛ wa na.

¹⁰Ɓɛɛ kà wa tɔ̧ h’ɛ́ɛ́‘e: ‹Ɛ̀nɛ̀ dáŋ pii tɛ yɛ,› ɛɛ tɛ daŋ sitɛ wa. Mɛ̀ nɛ́ wen nɛ tɔ̧, GASA WAN aa wa kɔ̧ er yɛ. Mɔ‘i tɛ duk nɛ́ ŋma mɔɔ-usi-mɔ.»

¹¹Wa yiitoo lɛŋ usa tɛ-wa ha̧ o be Filistii nɛ̀ hu̧sa̧ so, ɓɛɛ o be Filistii tɔ̧: «Ɛ̀nɛ̀ zɔ́k o be Hebreu fara gboa-a nɛ̀ kɔ̧ kɔ̧ nɛ̀ wa hu̧sa̧ so sɛnɛ.»

¹²O wi-pɛm-mɔ tɔ̧ɔ̧ ha̧ Jɔnataŋ in baka-nyaŋa kɔ̧-a̧: «Ɛ̀nɛ̀ dáŋ pii tɛ yɛ h’ɛ́ɛ́ tɔ̧ ŋma mɔ h’ɛ́nɛ́.» Ɓɛɛ Jɔnataŋ tɔ̧ ha̧ baka-nyaŋa kɔ‘i: «Mɛ̀ tɛ́ ɗoŋ am, kinii GASA WAN aa wa kɔ er o be Israɛl kaɗi.»

¹³Jɔnataŋ haia nɛ̀ er sitɛ wa, ɓɛɛ baka-nyaŋa kɔ̧-a̧ nɛ́ ɗoŋ-aa. O be Filistii tira a nù ɗɔɔ gba-paa ko Jɔnataŋ, ɓɛɛ baka-nyaŋa kɔ̧-a̧ gbɛ wa tɛnɛ nɛ ɗoŋ-aa.

¹⁴O bíí nɛ Jɔnataŋ in baka-nyaŋa kɔ‘i gbɛɛ tɛ kuti biro'i hɔɔ ɓu-yiitoo, ɓɛɛ fara-biro'i nɛ́ be fara kɛ̧́ɛ̧́ nɛ gasi batɛ na.

¹⁵Gasa kíì tika zu o bíí lɛŋ, nɛ kɔ̧ gbagari in nɛ zaŋbɛɛ mbɛt. O wi-pɛm-mɔ lɛŋ in o wi-ɗaŋ-mɔ yaa nɛ kíì mbɛt. Nù naka, ɓɛɛ duka nɛ́ gasa mɔɔ-kíì ko Sɔ̧.

¹⁶O wi-pɛm-mɔ ko Saul nɛ yaa so sɛn Gibea nú Bɛnjamin zɔka'e o bíí pɛsa dam fara lɛŋ;

¹⁷ɓɛɛ a̧ tɔ̧ ha̧ o bíí nɛ yaa in a̧: «Ɛ̀nɛ̀ tɔ́r bíí; ɛ̀nɛ̀ zɔ́k wi nɛ bo mgbara yɛ na.» Wa tɔra bíí, ɓɛɛ wa zɔk'e, Jɔnataŋ in baka-nyaŋa kɔ‘i bo mgbara wa na.

¹⁸Saul tɔ̧ɔ̧ ha̧ Ahiya: «Mɛ̀ bá laa-ɗafi-sɔ̧[9] nɛ‘i sa'e Efod tɛnɛ.» Wen wese'i nɛ́ Ahiya a̧ pi̧ so laa-ɗafi-sɔ̧‘i ti Israɛl.

¹⁹Ŋgimbi nɛ Saul tɔ̧ nɛ wen ha̧ wi-ɗafi-sɔ̧‘i, foomɔ dɔk dɔk kɔ̧ gbagari ko o be Filistii siti, ɓɛɛ Saul tɔ̧ ha̧ wi-ɗafi-sɔ̧: «Mɛ̀ ɗáí er-mɛ.»

²⁰Saul in o bíí nɛ a̧a̧ in a̧ mɔi̧a ŋmaa, ɓɛɛ wa nɛ hɔ yí biro. O be Filistii dak nɛ́ gba-paa sitɛ o ŋmaa; wa sakala ŋmaa ɗulugbuk.

²¹O be Hebreu nɛ yora so nɛ̀ ɗoŋ o be Filistii in nɛ̀ daŋa so in wa si kɔ̧ gbagari gira tɛ, ɓɛɛ tɛ́ɛ̀ yor nɛ ɗoŋ o be Israɛl nɛ yaa so in Saul, ká bá nɛ̀ Jɔnataŋ.

²²Zia-a nɛ o be Israɛl lɛŋ nɛ hu̧sa̧ so mgbara kaya Efraim zia'e, o be Filistii yuu mɔ wó, wa ndaka pata wa, bi nɛ̀ wa yaknɛ.

²³Wese'i nɛ́ wese nɛ GASA WAN yora nɛnɛ ɗoŋ Israɛl ha̧ a̧ mɛ gbin biro; wa bìí biro hegɔɔ si ɗoŋ Bɛt-Avɛn mɛ.

²⁴O be Israɛl zɔka so bɔnɛ wese'i nyɛmna, wen Saul ha̧a̧ so nú wese'i'e, ká bíí nyɔŋ mɔ na, ɓɛɛ a̧ be mɔ a zu wa hee mɔ'ɔ ga: «Fom a̧ bá wi nɛ tɛ nyɔŋ mɔ nɛti ha̧ ga̧a̧mɔ, nɛti ha̧‘m mɛ kifi er ɗaŋmɔ ha̧ o wisɛn kɔ‘m!» Ɓɛɛ ŋma bíí kpɔk mgbara o dɔka-a nyɔŋ géé nyɔŋa mɔ na.

²⁵Wa yee ti kombo ɓɛɛ wa kpa nɔ̧́-gɔrɔ hi̧i̧.

²⁶Ŋgimbi nɛ o bíí yee kɔ̧ kombo, wa zɔka nɔ̧́-gɔrɔ fara foka-a. Ŋma bíí ba nɔ̧́-gɔrɔ pi̧ kɔ̧̀ nú na wen wa yu nɛ fom.

²⁷Ɓɛɛ Jɔnataŋ zii so kɔ‘i bee-mɔ nɛ dáà kɔ̧-a̧ bee a zu dukbíí‘i na. A̧ pi̧i̧ nú te kɔ̧-a̧ nɛ duka so er-a ɗɔɔ nɔ̧́-gɔrɔ‘i, ɓɛɛ a̧ ba pi̧ kɔ̧ nú-a, ɓɛɛ hiɗ‘a pii ɗoŋ.

²⁸Ŋma bíí kpɔk mgbara o wi-biro tɔ̧a̧: «Tɛ o bíí mɔka nyɛmna wen nɛ dáà kɔ-mɛ bee mɔ a zu wa'e: ‹Fom a̧ bá wi nɛ tɛ nyɔŋ mɔ sɔsɔɔ.› »

²⁹Ɓɛɛ Jɔnataŋ kifi nú ha̧ a̧: «Dáà kɔ‘m gbɛɛ o bíí kaɗi; ɛ̀nɛ̀ zɔ̀k, bo nɛ kinii hiɗ‘am pia ɗoŋ n'am ndala be nɔ̧́-gɔrɔ'ɔ tikiɗi’ɛ na nde?

³⁰Kà o dɔka bíí nyɔŋ so mɔ nɛ wa kaia er wisɛn sɔsɔɔ, bo nɛ o be Filistii tɛ̀ɛ́ tir a nù lɛŋ na nde?»

³¹Wese'i, wa gusa o be Filistii ku̧u̧naŋ nɛ̀ Mikmas hɔ sɛn Ayalɔŋ. Tɛ o bíí mɔka so nyɛmna,

³²ɓɛɛ wa tik zu mɔɔ-oi-biro: wa kaia o geɗek mɔ-dai, o ndai, o be ndai gɔn a mbɔɗɔnu, ɓɛɛ wa nyɔŋ nɛ̀ oi tɔk.

³³Nyɛrɛ mɔ‘i aa zer Saul hee mɔ'ɔ ga: «O bíí de nɛ ɗaŋmɔ ti GASA WAN nyɔŋ nɛ mɔ nɛ̀ oi tɔk.» Ɓɛɛ Saul tɔ̧: «Ɛnɛ nɛ wi-e-ɗɔra tɛ bíí; ɛ̀nɛ̀ kín gasa ta pii hɛ̧ɛ̧ ha̧‘m.

³⁴Ɛ̀nɛ̀ pɛ́sí dam mgbara o dukbíí, ɓɛɛ ɛnɛ tɔ̧‘e, bíí kpɔk kpɔk a̧ ba ndai kɔ‘i, kóó sami kɔ‘i tɛnɛ ha̧‘m; wa tɛ gɔn hɛ̧ɛ̧, ɓɛɛ wa nyɔŋa; wa tɛ nyɔŋ nɛ̀ oi tɔk, ɓɛɛ beka duk nɛ́ dee ɗaŋmɔ ti GASA WAN na.» Bíí kpɔk kpɔk baa mɔ kɔ‘i nɛ̀ a̧a̧ so nɛnɛ tɛnɛ, ɓɛɛ mɛ zɛ‘i, wa gɔna mɔɔ nɔ‘i sɛn fara'i.

³⁵Saul mboo fara-ɗafi-sɔ̧ ha̧ GASA WAN. Mɛ̀ nɛ́ kuti fara-ɗafi-sɔ̧ nɛ Saul mboo ha̧ GASA WAN.

³⁶Saul tɔ̧a̧: «Ɛ̀ɛ̀ zír, ɛ̀ɛ̀ ndák ɗoŋ o be Filistii nɛ zɛ, ɓɛɛ ɛ̀ɛ̀ káí mɔ kɔ-wa hɔ mɛ tutuyɛ. Ɛɛ beka e ŋma bíí kpɔk kpasa na.» Wa kifa nú ha̧ a̧: «Ɛ̀nɛ̀ dé mɔ lɛŋ n’ɛnɛ kɔ̧a̧.» Ɓɛɛ wi-ɗafi-sɔ̧ tɔ̧: «Ɛ̀ɛ̀ ák mɔ in Sɔ̧ hɛ̧ɛ̧ sɛ.»

³⁷Saul aka Sɔ̧: «A̧‘m zír a̧‘m ndák o be Filistii nɛnɛ nde? Ɛ́nɛ́ tɛ a wa kɔ̧ er o be Israɛl nde?» Ɓɛɛ Sɔ̧ kifi nú ha̧ a̧ wese'i na.

³⁸Ɓɛɛ Saul tɔ̧: «Ɛ̀nɛ̀ ɗɔ́lí pii ti, ɛ́nɛ́ o wan ko dukbíí lɛŋ! Ɛ̀nɛ̀ zɔ́k mɔ, nɛ́ ge ɗaŋmɔ ge ɛ́ɛ́ dee sɔsɔɔ ge?

³⁹Hee mɔ'ɔ nɛ GASA WAN wi-kpasi Israɛl duk kpasa ga, kóó nɛ́ bem kɔ‘m Jɔnataŋ a̧ dee ɗaŋmɔ, a̧ tɛ fe nɛ mbetɛ!» Ŋma bíí kpɔk mgbara dukbíí nɛ̀ kifa nú ha̧ a̧ bo na.

⁴⁰A̧ tɔ̧ɔ̧ ha̧ o be Israɛl lɛŋ: «Ɛ̀nɛ̀ yá k’ɛ́nɛ́ nɛ̀ war mgbɔɔr, ɓɛɛ kɔ‘m in bem kɔ‘m Jɔnataŋ, ɛ́ɛ́ tɛ ya k’ɛɛ nɛ̀ war mgbɔɔr.» Dukbíí kifa nú ha̧ Saul: «Ɛ̀nɛ̀ dé mɔ n’ɛnɛ kɔ̧a̧.»

⁴¹Saul tɔ̧a̧: «GASA WAN, Sɔ̧ ko Israɛl, wen ge ɛ́nɛ́ kifi nú ha̧ wi-de-tom k’ɛ́nɛ́ sɔsɔɔ na ge nde? Kà ɗaŋmɔ á̧ duka zu'm, kóó zu bem kɔ‘m Jɔnataŋ, GASA WAN Sɔ̧ ko Israɛl, ɛ̀nɛ̀ bá nɛ́ Urim. Ɓɛɛ kà ɗaŋmɔ á̧ duka nɛ́ zu dukbíí k’ɛ́nɛ́ Israɛl, ɛ̀nɛ̀ bá nɛ́ Tumim.» Tani baa nɛ́ Saul in Jɔnataŋ, ɓɛɛ dukbíí yu kɔ‘i.

⁴²Saul tɔ̧a̧: «Ɛ̀nɛ̀ pí̧ tani mgbara'm in bem kɔ‘m Jɔnataŋ.» Tani baa nɛ́ Jɔnataŋ.

⁴³Ɓɛɛ Saul tɔ̧ ha̧ Jɔnataŋ: «Mɛ̀ ɓá mɔ nɛ mɛ dea ha̧‘m.» Jɔnataŋ kifa nú: «Nɛ́ te nɛ duka er-am a̧‘m pi̧i̧ nú-a ɗɔɔ nɔ̧́-gɔrɔ tikiɗi, ɓɛɛ mi ndal. Nɛ́ bòò nɛ́ fio, ɓɛɛ mi fea.»

⁴⁴Ɓɛɛ Saul kan mɔ: «Jɔnataŋ, kà mɛ́ nɛ́ fea na, Sɔ̧ a̧ de ŋgamɔ in am!»

⁴⁵Nɛ́ mɔ'ɔ nɛ̀ dukbíí tɔ̧ɔ̧ ha̧ Saul: «Jɔnataŋ nɛ̀ baa gbin so biro ha̧ Israɛl'ɛ tɛ fe nde? Hee mɔ'ɔ nɛ GASA WAN duk kpasa ga, mɔ‘i nɛ́ sara ɗaŋmɔ! Mui̧-zu Jɔnataŋ kóó kpɔk beka tik nù na; wen mɔ n'aa dea sɔsɔɔ, a̧ dea nɛ̀ ŋgai ko Sɔ̧.» Mɛ̀ nɛ́ hegɔ a̧ dukbíí kpasa nɛ Jɔnataŋ, ɓɛɛ a̧ fe na.

⁴⁶Ɗoŋ mɔ‘i, Saul pia ɗoŋ tɛ ndaka o be Filistii, ɓɛɛ o be Filistii si si nù kɔ‘i.

⁴⁷Ŋgimbi nɛ Saul ɔɔ nɛ wan zu Israɛl, a̧ dee biro dam fara lɛŋ in o wisɛn kɔ̧-a̧ nɛ ɔɔ zik a̧, ku̧u̧naŋ-a nɛ o be Mɔab, o be Amɔŋ, o be Edɔm, o wannu Soba in o be Filistii. Fara n'aa zika tɛ-a si sɛnɛ lɛŋ, a̧ gbina biro.

⁴⁸A̧ usa ŋgaŋa-iŋa-biro kɔ̧-a̧ gusi nɛ̀ o be Amalɛk, ɓɛɛ gbo Israɛl er o wi nɛ kaia so mɔ kɔ-wa.

⁴⁹O be-wiwii ko Saul nɛ́ Jɔnataŋ, Yiswi in Malki-Sua. O nin be-okoo kɔ̧-a̧ yiitoo nɛ́ mɔɔ nɔ'ɔ: kaya-a nɛ Mɛrab, ɓɛɛ hɔ-ɗoŋ-aa nɛ Mikal.

⁵⁰Nin kóò ko Saul nɛ́ Ahinɔam be-okoo ko Ayimas. Gasawi nɛ duk zu wi-biro kɔ̧-a̧ nɛ́ Abnɛr bem ko Nɛr; a̧ nɛ́ ŋma nya Saul.

⁵¹Kis dáà ko Saul in Nɛr dáà ko Abnɛr yaa so nɛ́ o bem ko Abiɛl.

⁵²Ŋgimbi ɔɔ-wan ko Saul, gasa biro duka mgbara wa in o be Filistii ɓɔnsɛnɛ, ɓɛɛ a̧ duka so kai o ŋgaŋa-wi in o ŋga-wi n'aa kpa lɛŋ a zu o wi-biro kɔ̧-a̧.