Read Northwest Gbaya 1 SAMUƐL 15 Bible Online

1 SAMUƐL 15 - Northwest Gbaya bible

1 SAMUƐL 15

¹Samuɛl tɔ̧ɔ̧ ha̧ Saul: «Nɛ́ mi a̧ GASA WAN toma mɛ tɛn nɔ̧́-wan a zu mɛ, wen ha̧ mɛ mɛ ɔ wan zu dukbíí kɔ̧-a̧ Israɛl. Kinii, mɛ̀ zíí wen ko GASA WAN.

²Wen nɛ̀ GASA WAN ko o gíí wi-biro tɔ̧ nɛ́ mɔ'ɔ: ‹Mi tɛ ak Amalɛk wen zu mɔ n'aa dee in o be Israɛl tɛ gɔna nú wa n'aa gɔna tɛ ŋgimbi nɛ wa daŋa so nɛnɛ nɛ Egiptɛ.

³Ɓɛɛ kinii, mɛ̀ nɛ́ mɛ̀ gusi o be Amalɛk; ɛ̀nɛ̀ kúm wa in o mɔ kɔ-wa lɛŋ. Ká mɛ de ko ha̧ wa na. Mɛ̀ gbɛ́ o wiwii in o okoo, o obem in o be-zɔɗi, o ndai in o sami, o ŋgeloba in o tuifuu kɔ̧-a̧ lɛŋ mbɛt.› »

⁴Saul saa o bíí lɛŋ si Tɛlaim ha̧ a̧ mɛ tɔr wa. A̧ kpaa o wi-biro booro-gɔmŋmaa-yiitoo; be Juda booro-ɓu.

⁵Saul nɛɛ hɔ ye ko Amalɛk, ɓɛɛ a̧ hu̧si kɔ̧ gboŋgo.

⁶Saul tɔ̧ɔ̧ ha̧ o be Kɛn: «Ɛ̀nɛ̀ yák, ɛ̀nɛ̀ yú mgbara o be Amalɛk, wen ká‘m tɛ gbɛ‘nɛ́ zaŋ ŋmaa in wa; wen ɛ́nɛ́ dee mɔ nɛ̀ de-a in o be Israɛl lɛŋ ŋgimbi nɛ̀ wa daŋa so nɛnɛ nɛ̀ Egiptɛ.» Ɓɛɛ o be Kɛn yu mgbara o be Amalɛk.

⁷Saul gusa Amalɛk ku̧u̧naŋ-a nɛ̀ Hawila hɔ Sur nɛ duk tan nɛ Egiptɛ.

⁸A̧ baa Agag wannu ko o be Amalɛk nɛ̀ kpasa, ɓɛɛ a̧ kum o bíí lɛŋ nɛ gba-paa.

⁹Saul in o wi-biro kɔ‘i fo Agag, o geɗek mɔ-dai in o gasa mɔ-dai, o ŋmaŋa mɔ-dai in o be-sami, ká bá nɛ̀ o demɔ lɛŋ na. Wa ɗaŋ o de mɔɔ nɔ‘i na, ɓɛɛ wa kum nɛ́ o ɔ̧ka̧-a̧ in o ɗaŋ-a.

¹⁰GASA WAN tɔ̧ɔ̧ wen ha̧ Samuɛl hee mɔ'ɔ ga:

¹¹«Mi nyim tɛ‘m nyɛmna wen n'am ha̧a̧ wan ha̧ Saul; wen a̧ ea'm duk, ɓɛɛ a̧ de mɔ nyɛm nɛ ɗoŋ o wen kɔ‘m na.» Samuɛl kpaa ɗaŋsee, ɓɛɛ a̧ ai nú ha̧ GASA WAN mɔ sa̧ nɛnɛ buu.

¹²Mɛ tutuyɛ sut, Samuɛl wee ti Saul. Wa tɛɛ tɔ̧ ha̧ Samuɛl'e: «Saul yaka si Karmɛl, ɓɛɛ a̧ mbo ŋma mɔ nɛ̀ tɛ de ha̧ tɛ bíí mɛ mbaŋ ɗoŋ-aa sɛn hi̧i̧. A̧ yaka siti woyo, ɓɛɛ a̧ zir si Gilgal.»

¹³Samuɛl hɔɔ tɛ Saul, ɓɛɛ Saul tɔ̧ ha̧ a̧: «Zɔnamɔ ko GASA WAN a̧ duk zu mɛ; mi dee mɔ nɛ GASA WAN ha̧a̧ nú ha̧‘m mɛ de kaɗi.»

¹⁴Samuɛl aka mɔ: «Ɓɛɛ nɛ̀ ko o hiɗimɔ ko o mɔ-dai n'am zii’ɛ nɛ́ ge?»

¹⁵Saul kifa nú ha̧ Samuɛl: «Wa kaia wa tɛnɛ nɛ̀ tɛ̀ ko o be Amalɛk, wa ee o de sami in o de ndai wen ha̧ wa mɛ ɗafi nɛ sɔ̧ ha̧ GASA WAN Sɔ̧ kɔ-mɛ. Ɓɛɛ nɛ̀ ko oi-aa, ɛɛ kuma wa lɛŋ.»

¹⁶Samuɛl tɔ̧ɔ̧ ha̧ Saul: «Nyɛma hegɔ; mɛ̀ é ha̧‘m tɔ̧ mɔ nɛ GASA WAN usa ha̧‘m mɛ zaŋzɛ'ɛ ha̧ mɛ.» Saul kifa nú ha̧ a̧: «Mɛ̀ tɔ̧̀.»

¹⁷Samuɛl tɔ̧a̧: «Kɔ-mɛ nɛ̀ tɛ-mɛ, mɛ́ é tɛ-mɛ tɛ geemɔ, ɓɛɛ bó nɛ́ mɛ a̧ duk zu o be Israɛl na nde? GASA WAN tɛna nɔ̧́ a zu mɛ ha̧ mɛ mɛ ɔ wan zu Israɛl.

¹⁸A̧ toma mɛ yak nɛnɛ, ɓɛɛ a̧ tɔ̧ ha̧ mɛ nde: ‹Mɛ̀ nɛ́, mɛ̀ kúm o be Amalɛk, o wi de ɗaŋmɔ nɔ‘i; mɛ̀ dé biro in wa a̧ mɛ̀ kúm wa lɛŋ.›

¹⁹Wen ge mɛ zii wen ko GASA WAN na ge? Wen ge mɛ kaia o mɔɔ-oi biro, ɓɛɛ mɛ de mɔ nɛ GASA WAN sɛna ge?»

²⁰Saul kifa nú ha̧ Samuɛl: «Mi mboo zu ha̧ GASA WAN, mi nɛɛ fara n'aa toma'm si sɛnɛ; mi baa Agag wannu Amalɛk piinɛ, ɓɛɛ mi kum o be Amalɛk lɛŋ.

²¹O bíí kaia demɔ mgbara geɗek mɔ-dai in o gasa mɔ-dai nɛ‘i tɛ̀ɛ́ gbɛ so, ɗafi nɛ̀ sɔ̧ ha̧ GASA WAN Sɔ̧ kɔ-mɛ sɛn Gilgal.»

²²Ɓɛɛ Samuɛl tɔ̧: «GASA WAN kɔ̧ɔ̧ so dɔɔ-kpoo-sɔ̧ in ɗafa-sɔ̧ nyɛm ŋmaa in mboozu tɛ wen kɔ̧-a̧ nde? Weyaa! Mboozu gana ɗafa-sɔ̧. Mboozu gana nɔ̧́ vala sami.

²³Wee-zu nɛ̀ Sɔ̧ nyɛma ŋmaa in dee mɔɔ-dua; ɓɛɛ ŋgazu nyɛma ŋmaa in ɗaŋmɔ-gasa-gee-sɔ̧. Hee mɛ siŋa wen ko GASA WAN pi̧ nù ga, a̧ mbɛt, a̧ siŋa mɛ pi̧ nù; mɛ́ bó nɛ́ wannu ɓɔna.»

²⁴Saul tɔ̧ɔ̧ ha̧ Samuɛl: «Mi dee ɗaŋmɔ, mi yaka zu ha̧a̧nú ko GASA WAN, in o wen kɔ-mɛ. Mi yuu nɛ́ kíì o bíí ɓɛɛ mi mbo zu ha̧ wa.

²⁵Ɓɛɛ kinii, mi ai nú ha̧ mɛ, mɛ̀ é ɗaŋmɔ kɔ‘m ha̧‘m, ɓɛɛ mɛ̀ tɛ́ in am wen ha̧‘m mɛ gu nù ti GASA WAN.»

²⁶Samuɛl kifa nú ha̧ Saul: «Mi beka pii ɗoŋ in mɛɛ na, wen nɛ mɛ siŋa wen ko GASA WAN pi̧ nù; hegɔ GASA WAN siŋa mɛ pi̧ nù mbɛt; mɛ́ bó nɛ́ wan Israɛl ɓɔna.»

²⁷Ŋgimbi nɛ Samuɛl zika tɛ mɛ yak, Saul tika naŋ laa kɔ̧-a̧, ɓɛɛ laa'i a̧k.

²⁸Nɛ́ mɔ'ɔ nɛ̀ Samuɛl tɔ̧ɔ̧ ha̧ a̧ woyo: «GASA WAN ɓara wan Israɛl er-mɛ yinɛ sɔsɔɔ; a̧ ha̧a̧ ha̧ ŋma bíí nɛ gana mɛ.

²⁹Gasamɔ[10] ko Israɛl de ndela na, a̧ kpai taamɔ na mbɛt, wen a̧ bó nɛ́ bíí kà a̧ kpai taamɔ na.»

³⁰Saul tɔ̧a̧: «Mi dee ɗaŋmɔ ɓɛɛ mɔ kpɔk, mi ai nú ha̧ mɛ, mɛ̀ tú̧ tɛ‘m sɛn ti o gasawi in sɛn ti o be Israɛl. Mɛ̀ píí ɗoŋ in am wen ha̧‘m mɛ gu nù ti GASA WAN Sɔ̧ kɔ-mɛ.»

³¹Samuɛl pia ɗoŋ in Saul, ɓɛɛ Saul gu nù ti GASA WAN.

³²Samuɛl tɔ̧a̧: «Ɛ̀nɛ̀ bá Agag wan ko o be Amalɛk tɛnɛ ha̧‘m.» Agag nɛɛ sitɛ Samuɛl nɛ desee, wen n'aa taa kɔ̧ see-aa'e wi kpasa tɛ fio kaɗi.

³³Ɓɛɛ nɛ́ mɔ'ɔ nɛ̀ Samuɛl tɔ̧a̧: «Hee mɔ'ɔ nɛ gba-paa kɔ-mɛ ɓara o bem er nàà kɔ-wa ga, wi tɛ ɓar bem ko nàà kɔ-mɛ er-a yinɛ!» Ɓɛɛ Samuɛl ɓir Agag sɛ́kɛ́ɗɛ́-sɛ́kɛ́ɗɛ́ a nù ti GASA WAN sɛn Gilgal.

³⁴Samuɛl yaka kɔ‘i si Rama, ɓɛɛ Saul daŋ kɔ‘i si tɛ kɔ‘i sɛn Gibea ye ko Saul.

³⁵Samuɛl zɔk yí Saul ɓɔna hɔ wese fio kɔ̧-a̧. Samuɛl duk so kànà hí̧í̧ nɛ̀ kɔ̧a̧ Saul, wen see GASA WAN ɗaŋa wen nɛ‘i ee a̧ nɛ wan zu Israɛl.