Read Northwest Gbaya 1 SAMUƐL 16 Bible Online

1 SAMUƐL 16 - Northwest Gbaya bible

1 SAMUƐL 16

¹GASA WAN tɔ̧ɔ̧ ha̧ Samuɛl: «Mɛ tɛ duk tɛ hi̧a̧ Saul hɔ déè nde? Mi siŋa kɔ‘m a̧ pi̧ nù, a̧ beka ɔ wan zu Israɛl ɓɔna. Kinii, mɛ̀ á nɔ̧́ dun zak kɔ-mɛ, ɓɛɛ mɛ̀ kur! Mi tom mɛ nɛnɛ tɛ Jɛse be Bɛtlɛhɛm wen mi zɔka wan n'am kɔ̧ɔ̧ mgbara o bem kɔ̧-a̧.»

²Samuɛl aka mɔ: «Mi tɛ nɛ hi̧i̧ hee ge nde? Kà Saul zii nyɛrɛ-a, a̧ tɛ gbɛ‘m!» GASA WAN kifa nú: «Mɛ tɛ ba zɔŋa ndai, ɓɛɛ mɛ tɔ̧a̧: ‹Mi tɛ mɛ ɗafi sɔ̧ ha̧ GASA WAN.›

³Mɛ tɛ sa Jɛse si fara-ɗafi-sɔ̧, ɓɛɛ mi nɛ tɛ‘m, mi tɛ usi mɔ nɛ mɛ tɛ de ha̧ mɛ. Mɛ tɛ tɛn nɔ̧́ a zu wi n'am tɛ usi ha̧ mɛ‘i.»

⁴Samuɛl dee mɔ nɛ GASA WAN tɔ̧ɔ̧ ha̧ a̧ mɛ de'i. Ɓɛɛ ŋgimbi n'aa hɔɔ sɛn Bɛtlɛhɛm, o gasawi saaye wee ti a̧ tɛnɛ nɛ̀ naka-tɛ ak nɛ̀ mɔ: «Tɛa-a kɔ-mɛ'ɛ nɛ́ de naŋanɔ nde?»

⁵Samuɛl kifa nú: «Ii, mi tɛ mɛ ɗafi sɔ̧ ha̧ GASA WAN. Ɛ̀nɛ̀ ɗáfí war-tɛ‘nɛ́, ɓɛɛ ɛ̀nɛ̀ tɛ́ in am pii fara-ɗafi-sɔ̧.» A̧ ɗafa war-tɛ Jɛse in o bem kɔ‘i, ɓɛɛ a̧ sa wa pii fara-ɗafi-sɔ̧.

⁶Ŋgimbi nɛ wa hɔa, ɓɛɛ nɛ̀ Samuɛl zɔka Eliab, a̧ taa mɔ hee mɔ'ɔ ga: «Wi nɛ GASA WAN hoka nɛ́ mɔ'ɔ nɛ̀ yɔr ti a̧'ɛ!»

⁷Ɓɛɛ GASA WAN tɔ̧ ha̧ Samuɛl: «Ká mɛ zɔk nɛ́ kpoo-tɛ-a, kóó nɛ́ kúsì kɔ̧-a̧ na, wen mi foo a̧ yinɛ. Zɔkamɔ ko Sɔ̧ bo hee zɔkamɔ ko bíí ga na; wen bíí zɔk kɔ‘i nɛ mɔ nɛ duk yí-wi ɓɛɛ. GASA WAN zɔk kɔ‘i nɛ́ kɔ̧ see-wi.»

⁸Nɛ́ mɔ'ɔ nɛ̀ Jɛse saa Abinadab, ɓɛɛ fo a̧ e ti Samuɛl. Samuɛl tɔ̧a̧: «Bó nɛ́ a̧ a̧ GASA WAN hoka na mbɛt.»

⁹Jɛse foo Sama siti, ɓɛɛ Samuɛl tɔ̧: «Bó nɛ́ a̧ a̧ GASA WAN hoka na mbɛt.»

¹⁰Jɛse saa o bem kɔ‘i mɔɔrɔ-ɗoŋ-yiitoo tɛnɛ kpɔk kpɔk lɛŋ, ɓɛɛ Samuɛl tɔ̧ ha̧ Jɛse'e: «GASA WAN hok ŋma mgbara wa na, kóó kpɔk.»

¹¹A̧ aka Jɛse: «O be-wiwii kɔ-mɛ kaɗa kaɗi nde?» Ɓɛɛ Jɛse kifi nú ha̧ a̧: «Oi-aa ɓɔna nɛ́ ŋma geɗek-a; a̧ dai nɛ́ o mɔ-dai.» Ɓɛɛ Samuɛl tɔ̧ ha̧ Jɛse: «Mɛ̀ tóm ha̧ wa sa a̧ tɛnɛ. A̧ tɛ hɔ kaɗi sɛk’ɛɛ duka nù mɛ nyɔŋ mɔ.»

¹²Jɛse saa a̧ tɛnɛ. A̧ nɛ gbɛ̧-wi, be-wiwii nɛ saŋa-yí dee nyɛmna in a̧ a̧a̧ nɛ̀ de kpoo-tɛ mbɛt. Ɓɛɛ GASA WAN tɔ̧: «Mɛ̀ kúr, mɛ̀ tɛ́n nɔ̧́ a zu a̧; mɛ nɛ́ a̧!»

¹³Samuɛl baa zak n'aa aa so nɔ̧́ kɔ̧ a̧, ɓɛɛ tɛn a zu a̧ sɛn mgbara o dɔka nya-a̧ hi̧i̧. Ɔmi ko GASA WAN zira zu David ku̧u̧naŋ-a nɛ̀ wese'i; ɓɛɛ Samuɛl ba war kɔ‘i, ɓɛɛ si sɛn Rama.

¹⁴Ɔmi ko GASA WAN yaka so Saul e duk, ɓɛɛ ɗaŋ ɔmi tɛ́ nɛ̀ tɛ̀ GASA WAN ye tɛ Saul, usi nɛ bɔnɛ ha̧ a̧.

¹⁵O wi-de-tom kɔ̧-a̧ tɔ̧ɔ̧ ha̧ a̧: «Ŋma ɗaŋ ɔmi nɛ̀ tɛ̀ɛ́ nɛ̀ tɛ́ Sɔ̧ nɛ́ mɔ'ɔ nɛ̀ usi bɔnɛ h’ɛ́nɛ́'ɛ.

¹⁶Nyaa, ɛ̀nɛ̀ tɔ̧́ wen ɓɛɛ o wi-de-tom nɛ ya in'nɛ̀ɛ́ tɛ kii ŋma bíí nɛ iŋa mbɛra kunde; ɓɛɛ ŋgimbi nɛ ɗaŋ ɔmi be tɛ̀ɛ́ tik zu'nɛ́, a̧ tɛ mbɛr kunde'i, ɓɛɛ ɛ́nɛ́ tɛ duk nɛ̀ de-a.»

¹⁷Saul tɔ̧ɔ̧ ha̧ o wi-de-tom kɔ‘i: «Ɛ̀nɛ̀ kíí ŋma bíí nɛ iŋa mbɛra mɔ nɛ̀ de-a, ɓɛɛ ɛ̀nɛ̀ mgbɔ́ a̧ tɛnɛ ha̧‘m.»

¹⁸Ŋma bíí kpɔk mgbara o wi-de-tom tɔ̧a̧: «Mi zɔka ŋma bem ko Jɛse, be Bɛtlɛhɛm nɛ iŋa mbɛra kunde nɛ̀ de-a nyɛmna; a̧ nɛ́ wi-kpee-see nɛ iŋa bíí biro mbɛt nɛ̀ de-a. A̧ tɔ̧ wen nɛ̀ yuwar-a, a̧ nɛ́ de daŋa ŋgaiwi, ɓɛɛ GASA WAN a̧a̧ in a̧.»

¹⁹Nɛ́ mɔ'ɔ nɛ̀ Saul toma bíí nɛnɛ tɛ Jɛse ha̧ a̧ mɛ nɛ̀ɛ́ tɔ̧ ha̧ a̧: «Mɛ̀ tóm bem kɔ-mɛ David nɛ pɛm nɛ mɔ-dai tɛnɛ ha̧‘m.»

²⁰Ɓɛɛ Jɛse ba tuifuu, brɛt, dak dɔ̧ɔ̧ in be gbadua ɓɛɛ ha̧ ha̧ David mɛ ba nɛnɛ ha̧ Saul.

²¹David hɔɔ tɛ Saul, ɓɛɛ ku̧naŋ dee tom ha̧ a̧. Saul kɔ̧ɔ̧ David batɛ, ɓɛɛ ba a̧ nɛ̀ baka-nyaŋa kɔ‘i.

²²Saul toma tɔ̧ ha̧ Jɛse'e David a̧ dúk kɔ‘i de nɛ̀ tom ha'i, wen a̧ dee tɛ-wi.

²³Ŋgimbi nɛ ɗaŋ ɔmi ko Sɔ̧ ba Saul, ɓɛɛ David baa kunde mbɛr nɛnɛ, ɓɛɛ Saul kpaa desee; tɛ-a gbina, ɓɛɛ ɗaŋ ɔmi'i ee a̧ duk.