Read Northwest Gbaya 1 SAMUƐL 17 Bible Online

1 SAMUƐL 17 - Northwest Gbaya bible

1 SAMUƐL 17

¹O be Filistii mɔi̧a o wi-biro kɔ-wa wen biro. Wa lɛŋ mɔi̧a ŋmaa sɛn Soko, nú Juda. Wa baa gbagari mgbara Soko in Azɛka sɛn Efɛs-Damim.

²Saul in o be Israɛl mɔi̧a ŋmaa, ɓɛɛ wa ba gbagari sɛn kɔ̧ ɗɔŋgɔ Gasa Te.[11] Wa yora naŋ biro in o be Filistii.

³O be Filistii ya kɔ‘i nɛ̀ ɓii ká̧ naŋ kaya, ɓɛɛ o be Israɛl yaa kɔ‘i nɛ̀ war mgbɔɔr; nɛ́ ɗɔŋgɔ a̧ kɛ̧ɛ̧ mgbara wa.

⁴Ŋma ŋga wi-biro gboo nɛ̀ mgbara o be Filistii, nin-a nɛ́ Goliat; a̧ nɛ́ be saaye Gat. Kusa-a nɛ́ mɛtrɛ taar.

⁵A̧ guu nɛ́ laasɔ̧i̧ nɛ‘i dee nɛ ndɛrɛ, ɓɛɛ a̧ pi̧ laa nɛ mgbara-a a̧a̧ sɛnɛ hee saɗa-zoro ga. Dita laa-biro kɔ̧-a̧‘i nɛ́ kilo mɔɔrɔ-ɗoŋ-yiitoo.

⁶A̧ kpee ti-bee-a nɛ ndɛrɛ, ɓɛɛ a̧ kun nyak tɛ sɛ́ɛ̀ kɔ̧-a̧ pi̧ ɓaa-a.

⁷Te-sɛ́ɛ̀ kɔ̧-a̧ duka so nɛ̀ gasa-a hee te-mgboi-laa ko wi-de-laa ga; dita sɛ́ɛ̀‘i nɛ́ kilo mɔɔrɔ-ɗoŋ-yiitoo. Wi-tui-ŋgee duka ti ha̧ a̧.

⁸A̧ yora ti o be Israɛl nɛ nɛka so naŋ biro, ɓɛɛ a̧ hiɗi mɔ sitɛ wa: «Wen ge ɛnɛ gboo mɛ yor naŋ biro ge? Bo nɛ mi nɛ́ be Filistii, ɓɛɛ ɛnɛ nɛ́ o bara ko Saul na nde? Ɛ̀nɛ̀ hók ŋma bíí k’ɛ́nɛ́ kpɔk ha̧ zir pii tɛ‘m.

⁹Kà a̧ gan am nɛ biro in kà a̧ gbɛ‘m, ɓɛɛ ɛɛ tɛ ya nɛ́ o bara k’ɛ́nɛ́; ɓɛɛ kà‘m gan a̧, kà‘m gbɛ a̧, ɛnɛ tɛ ya nɛ́ o bara k’ɛɛ, ɓɛɛ ɛnɛ dee tom h’ɛ́ɛ́.»

¹⁰Be Filistii'i tɔ̧ɔ̧ mbɛt: «Kɔ‘m sɔsɔɔ, mi kɔna ŋguɗ‘am ti o be Israɛl; ɛ̀nɛ̀ tóm ŋma bíí kpɔk tɛnɛ ha̧‘m, h’ɛ́ɛ́ bi ŋmaa!»

¹¹Ŋgimbi nɛ Saul in o be Israɛl lɛŋ zia wen nɔ‘i ko be Filistii'i, kíì dee wa nyɛmna.

¹²David nɛ́ bem ko ŋma be Efrata sɛn Bɛtlɛhɛm nú Juda; nin wi’ɛi nɛ́ Jɛse. A̧ a̧a̧ so nɛ̀ bem mɔɔrɔ-ɗoŋ-taar. Jɛse'i duka so nɛ́ ŋma sɔkawi nɛ a̧a̧ nɛ dɔka pɛ nyɛmna ŋgimbi nɛ Saul ɔɔ nɛ wan kɔ‘i.

¹³O gasa bem ko Jɛse taar nɛɛ so biro zu Saul. Nin bem nɔ‘i taar nɛ nɛ̀ɛ́ biro ɗoŋ Saul'i nɛ́ mɔɔ nɔ'ɔ: kaya-a nɛ́ Eliab, hɔ-ɗoŋ kaya-a nɛ́ Abinadab, ɓɛɛ taar-a nɛ́ Sama.

¹⁴David duka kɔ‘i nɛ́ nduti-bere ko be-wiwii. O zɔmwi kɔ̧-a̧ taar yaka so kɔ‘i ɗoŋ Saul.

¹⁵David nɛ́ so kɔ‘i tɛ ko Saul, ɓɛɛ a̧ pia pii, wen daia mɔ-dai ko dáà kɔ̧-a̧ sɛn Bɛtlɛhɛm.

¹⁶Nɛ́ mɔ'ɔ nɛ̀ be Filistii duka usi nɛ tɛ ti o be Israɛl mɛ tutuyɛ in mɛ ga̧a̧mɔ sɛn tɛ zɛ ɓu-naar.

¹⁷Jɛse tɔ̧ɔ̧ ha̧ bem kɔ‘i David: «Mɛ̀ bá kilo hana gba̧a̧-mɔ ɓu in brɛt nɔ'ɔ ɓu’ɛ ma nɛ yì nɛnɛ ha̧ o zɔmwi kɔ-mɛ sɛn kɔ̧ gbagari mɛ.

¹⁸Ɓɛɛ nɛ̀ ko o kaŋa yibere nɔ'ɔ ɓu’ɛ, mɛ̀ há̧ ha̧ gasa wi-biro. Mɛ̀ ák mɔ wen o zɔmwi kɔ-mɛ, a̧ mɛ̀ bá mɔɔ-sedaako piinɛ nɛ̀ tɛ wa.

¹⁹Wa a̧a̧ in Saul in o bíí Israɛl sɛn kɔ̧ ɗɔŋgɔ Gasa Te, fara bi biro in o be Filistii.»

²⁰Nɛ́ mɔ'ɔ nɛ̀ David kura mɛ tutuyɛ sut; a̧ ee mɔ-dai lɛŋ ha̧ ŋma wi-kɔr-wa; a̧ baa tui kɔ̧-a̧, ɓɛɛ a̧ yak si ɗoŋ o zɔmwi kɔ̧-a̧ nyɛm nɛ ɗoŋ tɔ̧ɔ̧-wen ko Jɛse. A̧ hɔɔ kɔ̧ gbagari nyɛm nɛ ŋgimbi nɛ o wi-biro gbo nɛnɛ mɛ yor naŋ biro gai nɛ̀ mɔ.

²¹O be Israɛl in o be Filistii lɛŋ gboo nɛk ti ŋmaa wen biro.

²²David ee tui-nyɔŋmɔ er wi-pɛm-tui, ɓɛɛ ma yì nɛnɛ fan o zɔmwi kɔ‘i sɛn yí biro mɛ.

²³Ɓɛɛ ŋgimbi nɛ wa wor nɛ mɔ in o ŋmaa, Goliat, be Gat, ŋgaŋa wi-biro ko o be Filistii gboo mgbara wa, si yor, ɓɛɛ kɔn ŋguɗi ti o be Israɛl hee mɔ'ɔ n'aa de so ga, nɛ̀ zer David.

²⁴Ŋgimbi nɛ o be Israɛl zɔka wi’ɛi, wa lɛŋ yuu mɔ nyɛi̧ nɛ̀ a̧; kíì baa wa nyɛmna;

²⁵wa tɔ̧a̧: «Ɛnɛ zɔka wi’ɛ nɛ daŋ'ɛ nde? A̧ daŋ mɛ tɛ̀ɛ́ kɔn ŋguɗi ti Israɛl! Wi nɛ tɛ gbɛ a̧, wannu tɛ ha̧ mbɔi nɛ dɔka-a ha̧ a̧; a̧ tɛ ba be-okoo kɔ̧-a̧ ha̧ nɛ̀ kóò ha̧ wi’ɛi, ɓɛɛ dáà kɔ̧-a̧ beka gbo garama sɛn Israɛl ɓɔna.»

²⁶David aka o wi nɛ yaa katɛ a̧‘i: «Nɛ́ ge a̧ wa tɛ de ha̧ wi nɛ tɛ gbɛ be Filistii’ɛ, ɓɛɛ baa foe zu Israɛl yinɛ ge? Be Filistii nɛ̀ gɔn mbii na, nɛ́ o sa a̧ tɛ kɔn ŋguɗi ti o wi-biro ko kpasa Sɔ̧ o?»

²⁷O bíí kifa nú ha̧ a̧ hee mɔ'ɔ nɛ wa tɔ̧ɔ̧ nɛti'i ga: «Mɔ nɛ wa tɛ de ha̧ wi nɛ tɛ gbɛ a̧ nɛ mɔ‘i.»

²⁸Zɔmwi ko David Eliab zia a̧ fara tɔ̧ɔ̧ wen in o bíí, ɓɛɛ see-aa nyim zu-a; a̧ tɔ̧a̧ ha̧ a̧: «Wen ge mɛ zira tɛnɛ ge? Mɛ ee o be mɔ-dai nɔ‘i kɔ-mɛ‘i sɛn ŋga-gbárà ha̧ o? Mi iŋa foomɔ kɔ-mɛ in gɔn-ta kɔ-mɛ. Mɛ tɛɛ mɛ zɔk nɛ́ biro.»

²⁹David kifa nú: «Mi dee nɛ́ ge? Bíí nyɛm mɛ ak mɔ na nde?»

³⁰David ee wi’ɛi duk, ɓɛɛ ak mɔ in ŋma bíí woyo. A̧ aka kpɔk mɔ‘i, ɓɛɛ wa kifi kale kpɔk nú‘i ha̧ a̧.

³¹Wa zia wen ko David, ɓɛɛ wa we ɗoŋ-aa ha̧ Saul. Saul saa a̧ tɛnɛ.

³²David tɔ̧ɔ̧ ha̧ Saul: «Ká ŋma bíí de kíì be Filistii'i na. Wi-de-tom k’ɛ́nɛ́ tɛ nɛ̀ɛ́ de biro in a̧.»

³³Saul kifa nú ha̧ David: «Mɛ nyɛm mɛ bi biro in be Filistii’ɛ na; wen mɛ́ nɛ́ be-zɔɗi ti a̧. A̧ nɛ́ wi nɛ yamba biro ká̧ a̧ ɓɔna nɛ̀ ŋgaiwi.»

³⁴David kifa nú ha̧ Saul: «Ŋgimbi nɛ wi-de-tom k’ɛ́nɛ́ duka so zaŋbɛɛ dai nɛ̀ mɔ ko dáà kɔ‘i, kà dila, kóó ŋma ŋga boko-nam[12] tɛ mɛ ba ŋma sami kpɔk mgbara o gíí sami,

³⁵ɓɛɛ mi ndaka wa, mi gusa wa nɛ̀ dɔra kɔ‘m, ɓɛɛ mi daka sami kɔ‘m nú-wa yinɛ. Wa kur so ba nɛ̀ mi nɛ̀ biro, ɓɛɛ mi kasa wa nɛ̀ buma tɛ-wa sɛka'm gusa wa gbɛ.

³⁶Wi-de-tom k’ɛ́nɛ́ gbɛɛ dila in ŋga boko-nam kaɗi; a̧ tɛ gbɛ mbii-bɔr ŋgaŋa be Filistii’ɛ nɛ kɔn ŋguɗi ti o wi-biro ko kpasa Sɔ̧'ɛ hee ŋga saɗi nɔ‘i ga.»

³⁷David tɔ̧ɔ̧ woyo: «GASA WAN nɛ kpasa so'm er dila in ŋga boko-nam yinɛ‘i, tɛ kpas'am er be Filistii’ɛ.» Nɛ́ mɔ'ɔ nɛ̀ Saul tɔ̧ɔ̧ ha̧ David: «Mɛ̀ nɛ́, ɓɛɛ GASA WAN a̧ dúk in mɛɛ.»

³⁸Saul pi̧i̧ laa-biro kɔ‘i tɛ David, a̧ guu laasɔ̧i̧-ndɛrɛ zu a̧, ɓɛɛ a̧ pi̧ o boi-hɛr-tɛ kɔ̧-a̧ tɛ a̧.

³⁹David hɛra gba-paa ko Saul guntir, e zu o laa kɔ‘i, ɓɛɛ a̧ kimii nɛɛ nɔ̀ takaɗi, wen a̧ yambii so kɔ̧-a̧ mɔɔ-biro na. A̧ tɔ̧ɔ̧ ha̧ Saul: «Mi nyɛm mɛ nɛ nɔ̀ nɛ mɔɔ nɔ'ɔ tɛ‘m’ɛ na, wen mi yambi so tom-aa nɛti na.» Wa kaia mɔɔ nɔ‘i yinɛ tɛ a̧.

⁴⁰David baa dɔra kɔ‘i, nɛ́ mɔ'ɔ n'aa dɔra de yɔka ta mɔɔrɔ sɛn ɗɔɔ yì a sɛn kɔ̧ ŋgoɓo-dai-sami kɔ̧-a̧. Ɓɛɛ a̧ ba birndiŋ ɓɛɛ tik yuwar mɛ nɛ sitɛ be Filistii'i.

⁴¹Be Filistii'i kpɔɔ tɛnɛ pii tɛ David. Wi-ba-ŋgee kɔ̧-a̧ duka ti ha̧ a̧.

⁴²Be Filistii'i hu̧i̧a̧ yí sitɛ David, ɓɛɛ n'aa be zɔk a̧, a̧ ee a̧ tɛ geemɔ, wen a̧ nɛ́ obem. Nɛ́ ŋma be gbɛ̧ obem nɛ̀ de saŋa-yí nyɛmna.

⁴³A̧ tɔ̧ɔ̧ ha̧ David: «Mi nɛ́ toyo, sa mɛ tɛɛ mɛ bi'm nɛ̀ dɔra nde?» Ɓɛɛ ŋgaŋa-wi’ɛi fom David nɛ̀ nin o sɔ̧ kɔ̧-a̧.

⁴⁴Ɓɛɛ a̧ tɔ̧ ha̧ David: «Mɛ̀ tɛ́ pii hɛ̧ɛ̧ ha̧‘m ha̧ kpoo-tɛ-mɛ ha̧ o nɔ̧́í̧ in o saɗi-zaŋbɛɛ.»

⁴⁵Ɓɛɛ David kifi kɔ‘i nú ha̧ a̧: «Mɛ́ gbó biro pii tɛ‘m nɛ̀ gba-paa, gba labo in doe-sɛ́ɛ̀, ɓɛɛ kɔ‘m, mi gbo biro sitɛ mɛ nɛ̀ nin GASA WAN ko o gíí wi-biro, Sɔ̧ ko o duk wi-biro Israɛl, nɛ̀ mɛ kɔna ŋguɗi ti wa’ɛ.

⁴⁶GASA WAN tɛ e mɛ kɔ̧ er-am sɔsɔɔ, mi tɛ gbɛ mɛ, ɓɛɛ mi tɛ ɓir zu-mɛ pi̧ nù; mi tɛ ha̧ wɔr-mɛ in o wɔr gíí wi-biro kɔ-mɛ o be Filistii ha̧ o nɔ̧́í̧ in o saɗi sɔsɔɔ.

⁴⁷Nɛ́ tɛ mɔ‘i a̧ dukbíí nɔ'ɔ tɛ iŋ nɛnɛ‘e, GASA WAN gbin biro nɛ̀ gba-paa, kóó nɛ̀ sɛ́ɛ̀ na, wen a̧ nɛ́ wi-gbin-biro; wen GASA WAN nɛ́ wan-biro, ɓɛɛ a̧ tɛ fo'nɛ́ a kɔ̧ er yɛ.»

⁴⁸Ɓɛɛ baa naŋanɔ nɛ̀ ŋgaŋa be Filistii'i baa ha'i zir pii tɛ David wó, David gboo mgbara o gíí wi-biro, ma nɛ̀ yì pii tɛ-a.

⁴⁹David pi̧i̧ er kɔ̧ ŋgoɓo nɛ haya-a, ɓɛɛ ba ŋma be ta kpɔk e nú birndiŋ; n'aa be ɗai er-a tɛ birndiŋ‘i, ɓɛɛ be ta'i gɔm si nɛ́ɛ̀ ɗɔi sɔnti ŋgaŋa be Filistii pi̧ nù rum. A̧ yoo nù nɛ̀ sɔnti-a.

⁵⁰David gbina biro ti ŋgaŋa be Filistii nɛ̀ birndiŋ in ta kpɔk. A̧ gusa be Filistii gbɛ nɛ̀ fio, David bó so nɛ̀ gba-paa na.

⁵¹David maa yì si yor zu wɔr ŋgaŋa-wi’ɛi; a̧ daka gba-paa ko ŋgaŋa-wi’ɛi nɛ̀ kɔ̧ koɓo-a gbonɛ, ɓɛɛ ba gba-paa'i gɔn nɛ̀ ger wan-aa woyo. A̧ ɓira zu ŋgaŋa be Filistii'i pi̧ nù. Ɓɛɛ nɛ̀ o be Filistii be zɔk'e, ŋgaŋa-wi kɔ-wa fea kaɗi, wa yuu mɔ yak.

⁵²O be Israɛl in o be Juda lɛŋ kura a tɛ hiɗimɔ biro; wa zuɗa a ɗoŋ o be Filistii. Wa ndaka wa hegɔɔ hɔ kɔ̧ ɗɔŋgɔ in hɔ nú garo ye Ekrɔŋ; o wɔr be Filistii saŋ ŋmaa nɛ̀ mbɔɗɔnu sinɛ, ku̧u̧naŋ nɛ̀ Saraim gɔm tik Gat hɔ nɛnɛ Ekrɔŋ mɛ.

⁵³O be Israɛl pia ɗoŋ nɛ tɛ nasa o be Filistii, ɓɛɛ wa kai o mɔ ko o be Filistii kɔ̧ gbagari kɔ-wa.

⁵⁴David baa gɔɔ-zu ŋgaŋa be Filistii piinɛ Jerusalɛm; ɓɛɛ a̧ kai o laa-biro ko ŋgaŋa-wi’ɛi a kɔ̧ tua kɔ̧-a̧.

⁵⁵Tɛ yaka-a ko David nɛ yaka nɛnɛ mɛ nɛ̀ɛ́ bi nɛ be Filistii'i, Saul aka so Abnɛr, gasawi ko o wi-biro: «Bem’ɛi nɛ́ bem ko o nde?» Abnɛr kifa nú ha̧ a̧: «Kpasawen, wannu, mi iŋ na.»

⁵⁶Ɓɛɛ wannu tɔ̧: «Mɛ̀ kíí mɛ́ ìŋ dáà kɔ̧-a̧.»

⁵⁷Ŋgimbi nɛ David pia ɗoŋ tɛ gbɛɛ ŋgaŋa be Filistii kaɗi, Abnɛr baa a̧ ɓɛɛ mgbɔ a̧ nɛnɛ sitɛ Saul; a̧ kasa gɔɔ-zu ŋgaŋa-wi’ɛi er-a nɛnɛ.

⁵⁸Saul aka a̧: «Bem kɔ‘m, mɛ́ nɛ́ bem ko o nde?» David kifa nú ha̧ a̧: «Mi nɛ́ bem ko wi-de-tom k’ɛ́nɛ́ Jɛse be Bɛtlɛhɛm.»