Read Northwest Gbaya 1 SAMUƐL 19 Bible Online

1 SAMUƐL 19 - Northwest Gbaya bible

1 SAMUƐL 19

¹Saul tɔ̧ɔ̧ taamɔ gbɛɛ David ha̧ bem kɔ‘i Jɔnataŋ in ha̧ o wi-de-tom kɔ‘i lɛŋ. Jɔnataŋ, bem ko Saul kɔ̧ɔ̧ so David nyɛmna.

²A̧ mbaŋa tɛ David hee mɔ'ɔ ga: «Dáà kɔ‘m Saul kii mɛ gbɛ nɛ mɛ. Mɛ̀ dúk zu-naŋ-mɛ mɛ sa̧a̧mɔ mɛ tutuyɛ; mɛ̀ zɔ́k ŋma fara ɓɛɛ mɛ̀ hú̧sí sɛnɛ.

³Ɓɛɛ kɔ‘m, mi tɛ gbo nɛ́ɛ̀ yor katɛ dáà kɔ‘m sɛn zaŋbɛɛ fara nɛ mɛ tɛ duk sɛnɛ‘i; mi tɛ ai nú ha̧ dáà kɔ‘m wen zu mɛ. Mi tɛ zɔk mɔ nɛ a̧a̧ sɛnɛ, ɓɛɛ mi tɛ nɛ̀ɛ́ we ɗoŋ-aa ha̧ mɛ.»

⁴Jɔnataŋ yɔka dáà kɔ‘i Saul tɔ̧ nɛ de wen ko David ha̧ a̧; a̧ tɔ̧a̧: «Ká wannu de ɗaŋmɔ in wi-de-tom kɔ̧-a̧ David na; wen David de ŋma ɗaŋmɔ in a̧ na. Mɔ nɛ David dee lɛŋ dee nɛ́ ŋma gasa demɔ nyɛmna ha̧ wannu.

⁵Oi-aa tikiɗi, David fea; a̧ gbɛɛ ŋgaŋa be Filistii, ɓɛɛ GASA WAN gbin biro ha̧ Israɛl. Ɛnɛ zɔka mɔ‘i nɛ yí‘nɛ́, ɓɛɛ ɛnɛ kpa desee mbɛt. Wen ge ɛnɛ kɔ̧ɔ̧ mɛ de ɗaŋmɔ gbai nɛ tɔk tɛ bíí a nù géè, gbɛ nɛ̀ David n'aa de ŋma ɗaŋmɔ na ge?»

⁶Gba̧a̧-tɛ Saul gbina tɛ wen ko Jɔnataŋ, ɓɛɛ a̧ kan mɔ: «Hee mɔ'ɔ nɛ GASA WAN duk kpasa ga, mi beka gbɛ David na!»

⁷Jɔnataŋ saa David, ɓɛɛ we ɗoŋ wen nɔ‘i lɛŋ ha̧ a̧. A̧ mgbɔɔ David sinɛ ɗoŋ tɛ Saul, ɓɛɛ David ku̧ naŋ tom kɔ‘i woyo hee nɛti ga.

⁸Hee mɔ'ɔ nɛ biro ku̧u̧ naŋ woyo ga, David yaka mɛ bi o be Filistii; a̧ gbina biro, ɓɛɛ o be Filistii yu mɔ yak.

⁹Ŋma ɗaŋ ɔmi nɛ tɛ̀ɛ́ nɛ tɛ GASA WAN tika zu Saul nɛ ŋgaya-a; ɓɛɛ hee mɔ'ɔ n'aa duk nɛ nù kɔ̧ tua kɔ̧-a̧ ga, sɛ́ɛ̀ kɔ̧-a̧ a̧a̧ kɔ er-a; ɓɛɛ ŋgimbi'i, David duk mbɛr kɔ‘i nɛ mɔɔ-mbɛr kɔ‘i.

¹⁰Saul dee mɛ mgboi David nɛ̀ sɛ́ɛ̀ ndaɗi nɛ ŋgeŋ; ɓɛɛ a̧ gui sɛ́ɛ̀ ko Saul, ɓɛɛ sɛ́ɛ̀ si ba nɛ ŋgeŋ. David yuu mɔ yak mɛ zaŋzɛ‘i.

¹¹Saul toma o betom kɔ‘i nɛ zɛ mɛ pɛm David wen ha̧ wa mɛ gbɛ a̧ mɛ tutuyɛ. Ɓɛɛ kóò ko David, Mikal mbaŋ tɛ David: «Kà mɛ̀ yú mɔ yak mɛ zɛ hɛ̧ɛ̧ na, sa̧a̧mɔ wa tɛ gbɛ mɛ.»

¹²Mikal zira David e nù nɛ woi-tua; ɓɛɛ a̧ yu mɔ yak.

¹³Mikal baa ŋma mboo sɔ̧, a̧ ɗafa mboo sɔ̧‘i nɛ buma gbadua nɛ̀ de-a pi̧ laa sɛnɛ, ɓɛɛ yɔmbi nɛ laa e ɗɔɔ zu.

¹⁴Saul toma o betom kɔ‘i tɛnɛ mɛ ba David, ɓɛɛ Mikal tɔ̧ ha̧ wa: «Tɛ David hai na.»

¹⁵Saul toma wa sinɛ ɗoŋ tɛ David woyo, tɔ̧ nɛnɛ ha̧ wa: «Ɛ̀nɛ̀ bá a̧ nɛ oi gado kɔ̧-a̧ tɛnɛ ha̧‘m mɛ gbɛ a̧.»

¹⁶Ŋgimbi nɛ o betom sii ɗoŋ nɛ́ɛ̀ ye tua, wa kpaa nɛ́ mboo sɔ̧‘i nɛ‘i kara nɛ ndara gbadua ɗɔɔ zu a̧.

¹⁷Nɛ́ mɔ'ɔ nɛ̀ Saul tɔ̧ɔ̧ ha̧ Mikal: «Wen ge mɛ ɔra'm hegɔ ge? Wen ge mɛ ee wisɛn kɔ‘m yak ge?» Mikal kifa nú ha̧ Saul'e: «Mɛ̀ nɛ́ a̧ a̧ tɔ̧ɔ̧ ha̧‘m, a̧‘m é ha'i yak wen ká‘i tɛɛ gbɛ‘m.»

¹⁸David yuu mɔ yak ɓɛɛ kpasi. A̧ nɛɛ tɛ Samuɛl sɛn Rama; ɓɛɛ a̧ we ɗoŋ mɔ lɛŋ nɛ Saul dee in a̧ ha̧ Samuɛl. Nɛ́ mɔ n'aa yaka in Samuɛl si Nayot.

¹⁹O bíí nɛɛ tɔ̧ ha̧ Saul hee mɔ'ɔ ga: «Zɔk, David a̧a̧ sɛn Nayot sɛn Rama.»

²⁰Saul toma o betom nɛnɛ wen ha̧ wa mɛ ba David; wa kpaa o gíí wi-tɔ̧-wen oi nú Sɔ̧ in Samuɛl nɛ gba gbana ba nɛ wa. Ɔmi ko Sɔ̧ tika zu o wi nɔ‘i mbɛt, ɓɛɛ wa ku̧ naŋ hiɗa mɔ yɔ nɛ yɔyɛ.

²¹Nyɛrɛ mɔ‘i sii a zer Saul, ɓɛɛ Saul tom o mbe bíí nɛnɛ woyo; kpɔk kale mɔ‘i hɔɔ zu o mbe bíí nɔ‘i. Saul toma o mbe-a woyo; kale kpɔk mɔ‘i hɔɔ zu o taar bíí n'aa toma nɛnɛ‘i mbɛt.

²²A̧ yaka nɛ̀ tɛ-a si Rama. Ɗoŋ n'aa hɔɔ fara gasa gɔna-yì sɛn Seku, a̧ aka fara nɛ Samuɛl in David ya sɛnɛ, ɓɛɛ wa kifi nú ha̧ a̧: «Wa a̧a̧ sɛn Nayot sɛn Rama.»

²³A̧ duka hi̧i̧ yak nɛnɛ si Nayot sɛn Rama. Ɓɛɛ ahai ɔmi ko Sɔ̧ tika zu a̧; a̧ hiɗa mɔ yɔ nɛ yɔyɛ hegɔ hɔ nɛnɛ Nayot sɛn Rama.

²⁴A̧ kpɔ̧i̧a̧ laa kɔ̧-a̧ pi̧ nù, ɓɛɛ gbana ba kànà nɛ́ a̧ ti Samuɛl. A̧ tika nù, ɓɛɛ a̧ duk hi̧i̧ nɛ̀ géé tɛ mɛ wese hegɔ zɛ de nɛnɛ mɔ sa̧ mbɛt; mɛ̀ nɛ́ sɛn zu mɔ‘i a̧ ŋma tua-wen hɔɔ nɛnɛ‘e: «Saul nɛ́ ŋma wi-tɔ̧-wen oi nú Sɔ̧ mbɛt nde?»