Read Northwest Gbaya 1 SAMUƐL 2 Bible Online

1 SAMUƐL 2 - Northwest Gbaya bible

1 SAMUƐL 2

¹Ana wora Sɔ̧ hee mɔ'ɔ ga: «See-am duk nɛ nyɛŋɛ wen zu GASA WAN; mi ba zu'm nɛ ŋgɔn wen zu deako ko GASA WAN, mi kpaa ŋgai zu o wi-sɛn-am. Tortɛ ba'm wen mi iŋa ɛ́nɛ́ yee ɗoŋ-am.

²Ŋma sa̧a̧-wi hee GASA WAN ga bo na; ŋma bíí, yak zu'nɛ́ bo na, ŋma kam-ta hee Sɔ̧ k’ɛɛ ga bo na.

³K’ɛ́nɛ́ dɔk wen-gɔ-tɛ na, ká ndiŋ wen gbo nɛ̀ nú‘nɛ́ na, GASA WAN nɛ́ Sɔ̧ nɛ duna nɛ iŋamɔ; nɛ́ a̧ a̧ we deemɔ.

⁴Kùsàà ko o ŋgaŋa-wi gbina, ɓɛɛ o ziɓa-wi kpa ŋgai.

⁵O wan-sura-zaŋ ye nɛ tom wen brɛt ɓɛɛ o wi nɛ wɔ gbɛ ɔm nɛ tɛ. Ko-yar-ndɔra ko nɛ bem war mɔɔrɔ-ɗoŋ-yiitoo, ɓɛɛ ko-ko-bem kaɗa koa-a.

⁶Nɛ́ GASA WAN a̧ de ha'i mɛ fe, in nɛ́ a̧ a̧ de ha'i mɛ duk kpasa. Nɛ́ a̧ a̧ de ha'i mɛ zir si fara ko o fio, ɓɛɛ a̧ baa wi daŋnɛ mbɛt.

⁷Nɛ́ GASA WAN a̧ de ha'i mɛ duk tɛ san mbɛt. In ha'i mɛ kpa mbɔi, A̧ e wi si ɗɔɔ, ɓɛɛ a̧ ee wi si ŋgɔn mbɛt.

⁸Nɛ́ a̧ a̧ ba ziɓa-wi ɗɔɔ fuunu e ŋgɔn, nɛ́ a̧ a̧ gbur wisan zuku-paa yinɛ, ha̧ a̧ mɛ e wa mɛ ya kpɔk fara in o be-wan, ha̧ nɛ̀ de fara tu̧u̧-tɛ ha̧ wa; wen o mbiŋ nɛ̀ tɔn nù e ŋgɔn nɛ́ ko GASA WAN, nɛ́ see zu mbiŋ nɔ‘i a̧ a̧ baa nù e sɛnɛ.

⁹A̧ tɛ zɔk naŋanɔ ko wi-mbo-zu, ɓɛɛ o wi-ɗaŋ fee kɔ‘i ɓɔn ti tum: bó nɛ́ ŋgai a̧‘i gan nɛ̀ zu mɔ na.

¹⁰O wisɛn ko GASA WAN tɛ gbin lɛŋ, a̧ tɛ duk yiwese mɛ tuɓi nɛ da̧ a zu wa. GASA WAN tɛ gɔn kita zu nù lɛŋ, a̧ tɛ ha̧ ŋgai ha̧ wannu kɔ̧-a̧; a̧ tɛ zɔn ŋgai ko wi n'aa tɛna nɔ̧́ a zu a̧.»

¹¹Ɛlkana sii ɗoŋ tɛ kɔ‘i sɛn Rama, ɓɛɛ bem ɓɔn kɔ‘i Silo de nɛ tom ha̧ GASA WAN nɛ̀ yí wi-ɗafi-sɔ̧ Elii.

¹²O bem ko Elii yaa so nɛ́ o wi-de-gba̧a̧-mɔ na nɛ iŋ so GASA WAN na.

¹³Yuwar mɔ nɛ o wi-ɗafi-sɔ̧ nɔ‘i de in dukbíí nɛ́ mɔ'ɔ: kà ŋma bíí ɗafi sɔ̧, ɓɛɛ wi-de-tom ko wi-ɗafi-sɔ̧ hɔa ŋgimbi nɛ wa gi nɛ kpoo nɛ̀ ŋma te nɛ sara-a taar er,

¹⁴ɓɛɛ a̧ pi̧i̧ tok nɛ̀ mɔ sɛn kɔ̧ ɗuka nyɛk, kóó kɔ̧ ɗuka kpánà, ɓɛɛ mɔ n'aa ba gbonɛ nɛ́ ko wi-ɗafi-sɔ̧. Wa de so kànà hegɔ in o be Israɛl lɛŋ nɛ tɛ sɛn Silo.

¹⁵Nɛti ha̧ wa mɛ dɔ nɔ̧́-kpoo, wi-de-tom ko wi-ɗafi-sɔ̧ tɛ so, ɓɛɛ tɔ̧ɔ̧ ha̧ wi nɛ duk tɛ ɗafa-sɔ̧: «Mɛ̀ há̧ kpoo ko wi-ɗafi-sɔ̧ nɛ‘i tɛ dɔ tɛnɛ. A̧ beka kpɛk gii-kpoo er-mɛ na; nɛ́ tɔr-a a̧ a̧ tɛ kpɛk.»

¹⁶Ɓɛɛ kà wi’ɛi kifi nú ha̧ a̧‘e, wi tɛ dɔ nɔ̧́-kpoo'i nɛti sɛka a̧ baa mɔ lɛŋ n'aa kɔ̧a̧‘i wó, ɓɛɛ wi-de-tom ko wi-ɗafi-sɔ̧ kifa nú woyo: «Weyaa, mɛ̀ há̧ ha̧‘m kinii; kà bó hegɔ na, mi tɛ ba nɛ̀ ŋgai.»

¹⁷Ɗaŋmɔ ko be-ŋgaiwi nɔ‘i duka nɛ gasa-a nyɛmna ti GASA WAN, wen wa ba nɛ ha̧a̧mɔ ha̧ GASA WAN e tɛ geemɔ.

¹⁸Samuɛl duka de nɛ tom ha̧ GASA WAN, a̧ duka pi̧ nɛ yɛ́m-yɛ́m-laa.

¹⁹Nàà kɔ̧-a̧ duka fur nɛ ŋma be laa, ba nɛnɛ ha̧ a̧ tɛ pɛ lɛŋ ŋgimbi n'aa daŋ in wíì kɔ̧-a̧ mɛ nɛ̀ɛ́ ɗafi sɔ̧.

²⁰Elii toka de yoŋgo a zu Ɛlkana in kóò kɔ̧-a̧ tɔ̧ nɛnɛ: «GASA WAN a̧ dé h’ɛ́nɛ́ mɛ ko bem in kóò'ɛ kpai nɛ̀ wan n'aa ee ha̧ GASA WAN.» Ɗoŋ mɔ‘i, Ɛlkana in kóò sii ɗoŋ ye kɔ‘i mɛ.

²¹Hee mɔ'ɔ nɛ GASA WAN ha̧a̧ de sɔnti ha̧ Ana ga, a̧ baa zaŋ ɗoŋ ŋmaa ko nɛ̀ be-wiwii taar, in be-okoo yiitoo, ɓɛɛ Samuɛl duk kànà kɔ‘i tɛ tom ko GASA WAN gasi nɛnɛ.

²²Elii sɔka so nyɛmna. A̧ zia nyɛrɛ deemɔ ko o bem kɔ̧-a̧ in o be Israɛl lɛŋ; a̧ zia'e ndé, wa ɔ ɔɔ in o okoo nɛ mɔi̧ ya nú Tua-kpa-ŋmaa mbɛt.

²³A̧ aka o bem kɔ̧-a̧: «Wen ge ɛ́nɛ́ de mɔ hee mɔ'ɔ n'am zii nɛ́ ɗaŋ nyɛrɛ-a nɛ́ o bíí lɛŋ tɔ̧‘i ga ge?

²⁴Weyaa, o bem kɔ‘m, nyɛrɛ mɔ n'am zii nɛ̀ dukbíí ko GASA WAN tɔ̧ nɛ̀ nú ŋmaa nɛnɛ de tɛ‘m na. Ɛ̀nɛ̀ é mɔ‘i duk!

²⁵Kà ŋma bíí de ɗaŋmɔ in ŋmá-a, Sɔ̧ tɛ ye mgbara wa, ɓɛɛ kà a̧ bòò nɛ́ bíí a̧ de ɗaŋmɔ in GASA WAN, mɛ̀ nɛ́ o a̧ tɛ ye ɗoŋ-aa o nde?» Wa zii kɔ-wa wen ko dáà kɔ-wa na, wen GASA WAN kɔ̧ɔ̧ so mɛ gbɛ nɛ́ wa.

²⁶War ko Samuɛl, a̧ gasi gasi nɛ̀ kpoo-tɛ in déè ti GASA WAN in ti bíí mbɛt.

²⁷Ŋma bíí ko Sɔ̧ tɛɛ kpa Elii, ɓɛɛ tɔ̧ ha̧ a̧: «Tɔ̧ɔ̧-wen ko GASA WAN nɛ mɔ'ɔ: Zɔk, mi usa tɛ‘m ha̧ bíí nutua ko dáà kɔ-mɛ ŋgimbi nɛ wa a̧a̧ sɛn Egiptɛ ɗɔɔ ŋgai ko o bíí nutua ko wannu.

²⁸Mi hoka dáà kɔ-mɛ mgbara o zuduk be Israɛl lɛŋ ha̧ a̧ mɛ duk wi-ɗaf'am, ha̧ a̧ mɛ daŋ zu fara-ɗaf'am; ha̧ a̧ mɛ dɔ fuu-nyama, in ha̧ a̧ mɛ pi̧ laa-ɗafi-sɔ̧ nɛ‘i sa'e Efod; mi ee mɔ lɛŋ nɛ̀ o be Israɛl ha̧ ha̧‘m ha̧ o bíí nutua ko dáà kɔ-mɛ.

²⁹Wen ge ɛ́nɛ́ zɔk ɗafa-sɔ̧ in ha̧a̧mɔ n'am aka so, ɓɛɛ nɛ̀ o bíí kɔ‘m ha̧‘m sɛn kɔ̧ Tua kɔ‘m nɛ̀ ɗaŋ yí ge? Wen ge sa mɛ tu̧ tɛ o bem kɔ-mɛ gan am ge? Ɛ́nɛ́ nyɔ́ŋ nɛ war de ha̧a̧mɔ ko Israɛl dukbíí kɔ‘m lɛŋ ŋmaŋ nɛnɛ.

³⁰Wen hegɔ, tɔ̧ɔ̧ wen ko GASA WAN Sɔ̧ ko Israɛl nɛ mɔ'ɔ: mi tɔ̧ɔ̧ so ndé, o bíí nutua kɔ-mɛ in nutua ko dáà kɔ-mɛ tɛ de tom-ɗafa'm ɓɔnsɛnɛ. Ɓɛɛ kinii, mi bɛ̧ɛ̧ mɔ‘i. Wen mi tu̧ nɛ tɛ o wi nɛ tu̧ tɛ‘m, ɓɛɛ o wi nɛ zɔk am hee geemɔ ga, duk nɛ́ geemɔ yí‘m mbɛt.

³¹Wese n'am tɛ gbin ɓaa-mɛ in ɓaa o bíí nutua ko dáà kɔ-mɛ hɛɗa kaɗi. Ŋma sɔkawi beka duk nutua kɔ-mɛ ɓɔna.

³²Mɛ tɛ zɔk ŋma wi-we-zu nɛ mɛ kɔ̧ Tua kɔ‘m in demɔ lɛŋ n'aa tɛ de ha̧ Israɛl, ɓɛɛ ŋma sɔkawi beka duk nutua kɔ-mɛ na kpoo nɛ kpoo.

³³Mɔ kpɔk, mi tɛ e ŋma bíí kɔ-mɛ ɓɔn ká̧ fara-ɗaf'am: yí-a tɛ ɗaŋ, see-aa tɛ diti, ɓɛɛ o bíí nutua kɔ-mɛ lɛŋ tɛ́ fe nɛ́ ŋga fio.

³⁴Mɔ nɛ tɛ mbaŋ tɛ-mɛ tɛ mɔ‘i nɛ́ mɔ nɛ̀ tɛ hɔ zu o bem kɔ-mɛ yiitoo, Hofni in Pinas: wa yiitoo tɛ fe kpɔk kale wese.

³⁵Nɛ̀ ɗoŋ, mi tɛ kii ŋma mbóó-zu wi-ɗafi-sɔ̧ kɔ‘m nɛ tɛ de mɔ nyɛm see-am in nɛ tɛ de mɔ n'am kɔ̧a̧. Mi tɛ de ha̧ nutua kɔ̧-a̧ mɛ duk ɗoŋ-aa nyɛi̧, ɓɛɛ a̧ tɛ de tom-ɗafa-sɔ̧ ɓɔnsɛnɛ nɛ yí wi n'am tɛna nɔ̧́ a zu a̧.

³⁶Ɓɛɛ o bíí nɛ tɛ ɓɔn mgbara o bíí nutua kɔ-mɛ tɛ tɛ̀ɛ́ gu nù ti a̧ mɛ kpa ŋma be geɗek kɔya bu-mbɔi in be brɛt, ɓɛɛ wa tɛ tɔ̧ ha̧ a̧: ‹Mi aia nú h’ɛ́nɛ́, ɛ̀nɛ̀ é‘m tɛ ŋma tom-ɗafa-sɔ̧ ha̧‘m mɛ kpa ŋma be ŋgonda brɛt a̧‘m nyɔŋ.› »