Read Northwest Gbaya 1 SAMUƐL 20 Bible Online

1 SAMUƐL 20 - Northwest Gbaya bible

1 SAMUƐL 20

¹David yuu mɔ sɛn Nayot sɛn Rama yak nɛ́ɛ̀ kpa Jɔnataŋ, ɓɛɛ ak a̧: «Mɔ n'am dee nɛ́ ge? Ŋma yɔɔ-kaya kɔ‘m nɛ́ ge nde? Ŋma gasa ɗaŋmɔ n'am dee in dáà kɔ-mɛ sɛka a̧ kii mɛ gbɛ‘m yínɛ́'ɛ nɛ́ ge?»

²Jɔnataŋ kifa nú ha̧ a̧: «Mɔ‘i tɛ̀ɛ́ duk nɛ́ ŋma gasa ɗaŋmɔ nyɛmna; mɛ beka fe na; ŋma mɔ nɛ dáà kɔ‘m tɛ de ɓɛɛ n'aa mbaŋ tɛ‘m sɛnɛ na, bo na. Dáà kɔ‘m tɛ̀ɛ́ hu̧si mɔ‘i nɛ‘m hee ge nde? Mɔ beka de hegɔ na.»

³David kàná mɔ tɔ̧ nɛnɛ hee mɔ'ɔ ga: «Dáà kɔ-mɛ iŋa nɛ de-a'e mɛ kɔ̧a̧‘m; mɛ̀ nɛ́ wen mɔ‘i a̧ a̧ ta'e, Jɔnataŋ beka iŋ wen'i na, wen ká a̧ tɛ mbaŋ tɛ-a. Ɓɛɛ hee mɔ'ɔ nɛ GASA WAN duk kpasa in hee mɛ duk kpasa mbɛt ga, ɗoŋ-am nyɛi̧ nɛ fio ɓɔna.»

⁴Jɔnataŋ tɔ̧ɔ̧ ha̧ David: «Mi tɛ de mɔ nɛ mɛ kɔ̧a̧ ha̧ mɛ.»

⁵Ɓɛɛ David kifi nú ha̧ Jɔnataŋ: «Mɛ̀ zɔk, sa̧a̧mɔ nɛ́ gbaŋa mbe-yi-zɛ; ɓɛɛ mɛ̀ nɛ́ ŋgimbi'i a̧‘m tɛ duk nɛ nù mɛ nyɔŋ nɛ mɔ in wannu. Mɛ̀ é kɔ-mɛ war ha̧‘m yak a̧‘m nɛ́ɛ̀ hu̧si sɛn zaŋbɛɛ hɔ sa̧a̧mɔ-oi-aa nɛ ga̧a̧mɔ.

⁶Kà dáà kɔ-mɛ zɔk'e mi bo na, mɛ̀ tɔ̧́ ha̧ a̧ ndé: ‹David yee ɗɛɗ‘am wen ha̧ a̧ mɛ nɛ sɛn saaye kɔ̧-a̧ Bɛtlɛhɛm. Wa ɗafi nɛ sɔ̧ nyɛm nɛ ɗoŋ mɔ nɛ‘i de ti pɛ kpɔk kpɔk wen o bíí nú-gara kɔ-wa lɛŋ sɛn hi̧i̧.›

⁷Kà wannu kɔ̧ ɗɔaa, ɓɛɛ mɛ̀ íŋ‘e, wi-de-tom kɔ-mɛ kpasa. Kà see-aa á̧ ɗaŋa, ɓɛɛ mɛ̀ íŋ‘e, sɔnti wi-de-tom kɔ-mɛ ɗaŋa.

⁸Mɛ̀ dé mɔ nɛ̀ yuwar-a in am, wi-de-tom kɔ-mɛ, wen nɛ̀ mɛ́ dee ha̧‘m mɛ nɔ tɔk in mɛɛ nɛ nin GASA WAN; ɓɛɛ kà‘m nɛ́ dee ŋma ɗaŋmɔ, mɛ́ nɛ̀ tɛ-mɛ, mɛ̀ gbɛ́‘m; ɓɛɛ ká mɛ mgbɔ‘m mgbɔɔ si ti dáà kɔ-mɛ na.»

⁹Jɔnataŋ kifa nú ha̧ a̧: «Mɔ‘i tɛ̀ɛ́ duk nɛ́ ŋma gasa ɗaŋmɔ. Kà‘m íŋ nɛ mbetɛ ndé, dáà kɔ‘m kɔ̧ɔ̧ mɛ gbɛ mɛ, mi kàná mɔ, mi tɛ tɔ̧ ha̧ mɛ.»

¹⁰Ɓɛɛ David tɔ̧ ha̧ Jɔnataŋ: «Kà dáà kɔ-mɛ nɛ́ kifa ɗaŋ nú, nɛ́ o'o tɛ mbaŋ tɛ‘m o?»

¹¹Jɔnataŋ tɔ̧ɔ̧ ha̧ David: «Mɛ̀ tɛ́ ɛ̀ɛ̀ gbó si zaŋbɛɛ.» Nɛ́ mɔ'ɔ nɛ̀ wa yiitoo lɛŋ gboo si zaŋbɛɛ.

¹²Jɔnataŋ tɔ̧ɔ̧ ha̧ David: «GASA WAN, Sɔ̧ ko Israɛl nɛ́ wi-sedaako! Sa̧a̧mɔ nyɛm nɛ ŋgimbi’ɛ, mi tɛ we dáà kɔ‘m; kà war mɔ nɛ́ dee wen mɛ, kà‘m tom nyɛrɛ-a nɛ̀ hu̧sa̧-a̧ ha̧ mɛ na,

¹³ɓɛɛ nɛ̀ GASA WAN a̧ pí̧ bɔnɛ zu'm war yiitoo. Kà dáà kɔ‘m á̧ kɔ̧ɔ̧ mɛ pi̧ bɔnɛ zu mɛ, mi tɛ mbaŋ tɛ-mɛ, ɓɛɛ mi ee ha̧ mɛ mɛ yak; mɛ tɛ yak, ŋma mɔ beka fo tɛ-mɛ na. Ɓɛɛ GASA WAN a̧ dúk in mɛɛ hee mɔ'ɔ n'aa duka so nɛnɛ in dáà kɔ‘m ga!

¹⁴Kà‘m nɛ́ duka kpasa nɛnɛ siti, ɓɛɛ dee sɛm kɔ-mɛ in am a̧ dúk kana ɓɔnsɛnɛ hee mɔ'ɔ nɛ GASA WAN kɔ̧ɔ̧ ga. Ɓɛɛ kà‘m nɛ́ fea,

¹⁵ká tɛ-mɛ bi ɗoŋ dee demɔ in o bíí nutua kɔ‘m na. Kóó nɛ́ ŋgimbi nɛ GASA WAN tɛ kum nɛ o wisɛn ko David kpɔk kpɔk yinɛ sɛn zu nù'ɛ mbɛt,

¹⁶ee-nú k’ɛɛ a̧ duk mgbara o bíí nutua k’ɛɛ ɓɔnsɛnɛ. Kà bo hegɔ na, GASA WAN tɛ ak David zu mɔ‘i!»[13]

¹⁷Jɔnataŋ dee ha̧ David mɛ kan mɔ zu mɔ‘i woyo, wen a̧ kɔ̧ɔ̧ so David nyɛmna hee kiitɛ-a ga.

¹⁸Jɔnataŋ tɔ̧ɔ̧ ha̧ a̧: «Gbaŋa mbe-yi-zɛ tɛ de sa̧a̧mɔ; wi tɛ iŋ‘e mɛ bo na, wen nɛ̀ fara kɔ-mɛ tɛ duk géè.

¹⁹Sa̧a̧mɔ-oi-aa woyo, wa tɛ zɔk mɛ bo na. Mɛ̀ nɛ́ si fara nɛ mɛ baa hu̧si so sɛnɛ wese wen'i, mɛ̀ dúk nù ká̧ ta Ezɛl.

²⁰Ɓɛɛ war kɔ‘m, mi tɛ pi̧ góò si fara'i war taar hee mi kɔ̧ɔ̧ mɛ tok nɛ́ ŋma mɔ hi̧i̧ ga.

²¹Mi tɛ tom ŋgaiwi kɔ‘m a̧ a̧ nɛ́ɛ̀ kii o góò. Ka'm tɔ̧ ha̧ a̧‘e, a̧ a̧ zɔ́k mɔ, o goo kɔ‘m a̧a̧ ɗoŋ-aa'i, a̧ a̧ káí wa, ɓɛɛ mɛ̀ tɛ̀. Mɔ‘i tɛ usi'e mɔ lɛŋ duk nɛ de-a wen mɛ, ká mɛ yu mɔ na, mi kàná mɔ nɛ nin GASA WAN.

²²Ɓɛɛ ka'm nɛ tɔ̧ɔ̧ ha̧ bem’ɛi ndé, o góò ɔ nyɛi̧a wó, ɓɛɛ mɛ̀ dúk hi̧i̧ mɛ̀ yák nɛnɛ; mɛ̀ nɛ́ GASA WAN a̧ fo mɛ yaknɛ.

²³Ɓɛɛ nɛ̀ ko wen n’ɛɛ tɔ̧ɔ̧ in mɛɛ‘i, GASA WAN nɛ́ wi-sedaako mgbara yɛ ɓɔnsɛnɛ.»

²⁴David yaka nɛ́ɛ̀ hu̧si sɛn zaŋbɛɛ. Mbe-yi-zɛ gboa, ɓɛɛ wannu nɛ́ɛ̀ duk ka taŋe mɛ nyɔŋ mɔ.

²⁵Wannu duka nù fara n'aa duk so sɛnɛ nɛti, gado kɔ̧-a̧ ɛka ŋgeŋ. Jɔnataŋ duka kɔ‘i tan ti a̧. Abnɛr duka kɔ‘i katɛ Saul, ɓɛɛ fara ko David duk kɔ‘i géè.

²⁶Saul tɔ̧ wen wese'i na; a̧ duka tɛ taa mɔ: «Ŋma mɔ duk mɛ kpa David; ŋmafara war tɛ-a sa̧ na.»

²⁷Mbe-yi-zɛ hɔa zɛ yiitoo, fara ko David duka kana géè, ɓɛɛ Saul ak bem kɔ‘i Jɔnataŋ: «Wen ge bem ko Jɛse tɛ mɛ nyɔŋ mɔ mɛ mboyɛɛ in sɔsɔɔ na ge nde?»

²⁸Jɔnataŋ kifa nú ha̧ Saul: «David yee ɗɛɗ‘am ak nɛ‘m wen ha̧ a̧ mɛ nɛ sɛn Bɛtlɛhɛm.

²⁹A̧ tɔ̧a̧ ha̧‘m'e a̧‘m e ha'i yak, wi aia nú ha̧‘m, wen o bíí nutua kɔ‘i ɗafi nɛ sɔ̧ hee mɔ'ɔ nɛ‘i de ti pɛ kpɔk kpɔk ga sɛn saaye mɛ; ɓɛɛ zɔmwi kɔ‘i aka mɔ wen wi kinii; kà‘m nɛ́ kɔ̧ɔ̧ wi nɛ mbetɛ, a̧‘m e ha'i yak a'i nɛ́ɛ̀ zɔk o nya-wi. Mɔ nɛ dee ha̧ a̧ mɛ tɛ̀ɛ́ nyɔŋ mɔ na a̧‘i.»

³⁰Saul kura nɛ nyimsea zu Jɔnataŋ, ɓɛɛ tɔ̧ ha̧ a̧: «Mɛ́ be-dàlà, mi iŋa ndé, mɛ yor nɛ ɗoŋ bem ko Jɛse nɛ duk nɛ mɔɔ-foe kɔ-mɛ in mɔɔ-foe ko nàà kɔ-mɛ.

³¹Ŋgimbi lɛŋ nɛ bem ko Jɛse tɛ duk kpasa zu nù'ɛ, mɛ beka duk nɛ̀ de-a na, in mɔɔ-wan kɔ-mɛ mbɛt beka yor na. Mɛ̀ dé ha̧ wa mɛ ba a̧ kinii, ɓɛɛ wa a̧ mgbɔ́ a̧ tɛnɛ; a̧ tɛ fe!»

³²Jɔnataŋ kifa nú ha̧ dáà kɔ‘i Saul: «Wi tɛ gbɛ a̧ wen ge? Nɛ́ ge a̧ a̧ dee ge?»

³³Ahai Saul baa sɛ́ɛ̀ mɛ tok nɛ Jɔnataŋ, ɓɛɛ Jɔnataŋ iŋ nɛ mbetɛ‘e, dáà kɔ‘i kɔ̧ɔ̧ kànà mɛ gbɛ David.

³⁴Jɔnataŋ kura nɛ̀ ɗaŋsee ká̧ nyɔŋmɔ‘i; wese'i a̧ nyɔŋ mɔ na wen see-aa ɗaŋa nyɛmna wen bɔnɛ ko David, in wen dáà kɔ̧-a̧ da̧a̧ a̧.

³⁵Mɛ bin mɛ tutuyɛ, Jɔnataŋ gboo yak si zaŋbɛɛ wen kpaa ŋmaa in David. Jɔnataŋ nɛɛ in ŋma be-wiwii.

³⁶A̧ tɔ̧ɔ̧ ha̧ bem’ɛi: «Mɛ̀ má yì nɛ́ɛ̀ dak góò n'am tɛ pi̧‘i.» Nɛ mɔ'ɔ nɛ bem’ɛi maa yì, ɓɛɛ Jɔnataŋ pi̧ góò yak ti ha̧ a̧.

³⁷Ɓɛɛ ŋgimbi nɛ bem’ɛi hɔɔ fara nɛ Jɔnataŋ pi̧i̧ góò si sɛnɛ‘i, Jɔnataŋ hiɗa mɔ nɛnɛ si ɗoŋ-aa: «Góò bó nɛ̀ ɗoŋ mɛ ɓíí‘i na nde?»

³⁸Jɔnataŋ hiɗa mɔ ha̧ bem’ɛi woyo: «Mɛ̀ kíí bee, ká mɛ yor na.» Bem’ɛi nɛɛ dak góò, ɓɛɛ a̧ pii ɗoŋ pii tɛ wan kɔ̧-a̧.

³⁹Ŋma mɔ nɛ bem’ɛi iŋa sɛn tɛ mɔ‘i kóó kpɔk bo na. O wi nɛ iŋa mɔ‘i kànà nɛ Jɔnataŋ in David ɓɛɛ.

⁴⁰Jɔnataŋ ha̧a̧ o boi kɔ‘i ha̧ bem’ɛi, ɓɛɛ tɔ̧ ha̧ a̧: «Mɛ̀ káí mɔɔ nɔ'ɔ siɗoŋ saaye.»

⁴¹Bem’ɛi sia, ɓɛɛ David kur nɛ̀ war ká̧ ta nɛ mgbɔɔr; a̧ hɔ̧fa̧ tik nù gbɛ zugur nù, ɓɛɛ gu yí nɛ nù war taar; wa hɛra ŋmaa, ɓɛɛ wa yiitoo lɛŋ hi̧i̧ kɔ̧a̧. Ɓɛɛ David hi̧i̧ kɔ̧a̧ gan.

⁴²Jɔnataŋ tɔ̧ɔ̧ ha̧ David: «Mɛ̀ yák zaŋ ga̧a̧mɔ, ɓɛɛ nɛ̀ ko kanamɔ n’ɛɛ kànà yiitoo lɛŋ, GASA WAN a̧ dúk mgbara yɛ in o bezaŋ yɛ ɓɔnsɛnɛ.»