Read Northwest Gbaya 1 SAMUƐL 21 Bible Online

1 SAMUƐL 21 - Northwest Gbaya bible

1 SAMUƐL 21

¹Nɛ́ mɔ'ɔ nɛ̀ David baa yuwar yak, ɓɛɛ Jɔnataŋ si kɔ‘i ɗoŋ saaye.

²David hɔɔ sɛn Nɔb tɛ ko wi-ɗafi-sɔ̧ Ahimɛlɛk. Ahimɛlɛk tɛɛ pii tɛ David nɛ naka-tɛ, ɓɛɛ ak a̧: «Wen ge mɛ tɛ ɛ̀nɛ̀-mɛ, ŋma wi-e-mɛ bo na ge?»

³David kifa nú ha̧ wi-ɗafi-sɔ̧ Ahimɛlɛk: «Wannu ha̧a̧ nú ha̧‘m'e, ká ŋma bíí iŋ mɔ n'am nɛ mɛ nɛ̀ɛ́ de'i na; ɓɛɛ nɛ̀ ko o ŋgaiwi kɔ‘m, mi usa ŋma fara h’ɛ́ɛ́ mɛ kpa ŋmaa sɛnɛ.

⁴Nɛ́ ge a̧a̧ er'nɛ́ ge? Ɛ́nɛ́ nɛ́ bòó nɛ̀ brɛt mɔɔrɔ, kóó mɔ n’ɛnɛ kpaa lɛŋ, ɛ̀nɛ̀ há̧ ha̧‘m.»

⁵Wi-ɗafi-sɔ̧ kifa nú ha̧ David: «Kànà nɛ́ brɛt nɛ‘i ee ha̧ Sɔ̧ a̧ a̧a̧ er-am ɓɛɛ; géè-a bo na. Ɓɛɛ kà o ŋgaiwi kɔ-mɛ nɛ́ hɔɔ katɛ o okoo na, mɛ nyɛma mɛ kai.»

⁶David kifa nú ha̧ wi-ɗafi-sɔ̧: «Nɛ mbetɛ, wa dora o okoo nɛ̀ ɛɛ hee nɛti ŋgimbi n'am nɛ́ nɛ̀ biro ga. Mɔ ko o ŋgaiwi lɛŋ yaa so nɛ̀ sa̧a̧-a̧. Ɛ̧ɛ̧ hɛ̧ɛ̧ nɛ́ géé naŋanɔ, ɓɛɛ nɛ mbetɛ, sɔsɔɔ mɔɔ nɔ‘i duk nɛ̀ sa̧a̧-a̧.»

⁷Wi-ɗafi-sɔ̧ ha̧a̧ brɛt nɛ‘i ee ha̧ Sɔ̧‘i ha̧ a̧; ŋma mbe brɛt bo so yak zu brɛt-ɗafi-sɔ̧ na. Wan nɛ a̧a̧ sɛnɛ nɛ brɛt nɛ‘i baa ti GASA WAN yinɛ, wen ee mbe wee-aa siɗoŋ woyo, wese nɛ‘i ba nɛ i̧i̧ yinɛ.

⁸Wese'i, ŋma wi-de-tom ko Saul nɛ‘i dora so e ti GASA WAN a̧a̧ hi̧i̧; nin-a nɛ Dog, be Edɔm; a̧ nɛ wi-duk-zu o wi-dai-mɔ ko Saul.

⁹David aka Ahimɛlɛk: «Ɛ́nɛ́ bó nɛ̀ ŋma sɛ́ɛ̀, kóó ŋma gba-paa sɛn er'nɛ́ hɛ̧ɛ̧ na nde? Mi yaka so géè, mi ba sɛ́ɛ̀ kɔ‘m kà bó nɛ̀ o boi kɔ‘m na, wen tom nɛ̀ wannu toma nɛ‘m'i haya nyɛmna.»

¹⁰Wi-ɗafi-sɔ̧ kifa nú: «Gba-paa ko Goliat, be Filistii nɛ mɛ gbɛ so sɛn kɔ̧ ɗɔŋgɔ Gasa Te mɛ‘i a̧a̧ sɛnɛ; mi kara a̧ kar nɛ laa nɛ duk ɗoŋ laa-ɗafi-sɔ̧ nɛ‘i sa'e Efod. Mɛ́ nɛ́ kɔ̧ɔ̧ mɛ ba a̧, ɓɛɛ mɛ̀ bá wen nɛ ŋma mbe-a bo hɛ̧ɛ̧ na.» David kifa nú ha̧ a̧: «Ŋma gba-paa nɛ̀ gana i̧i̧ gba-paa'i bo na; ɛ̀nɛ̀ há̧ a̧ ha̧‘m.»

¹¹David yuu mɔ nyɛi̧ nɛ Saul wese'i; a̧ nɛɛ hɔ sɛn tɛ ko Akis, wannu Gat.

¹²O wi-de-tom ko Akis tɔ̧ɔ̧ ha̧ a̧: «David wannu’ɛ bo a̧a̧ na nde? Bó nɛ́ a̧ a̧ o bíí e nɛ gima yɔ nɛ yɔyɛ‘e: ‹Saul gbɛɛ bíí booro nɛ dɔka-a, ɓɛɛ David gbɛ kɔ‘i nɛ dɔka-a, nɛ‘i nyɛm mɛ tɔr na’ɛ,› na nde?»

¹³Ɗɛɗɛ David gɔna tɛ zia o wen nɔ‘i, ɓɛɛ kíí Akis wannu Gat de a̧ nyɛmna.

¹⁴A̧ ku̧u̧ naŋ tɔ̧ɔ̧ wen siɓi-siɓi’ɛ, e nɛ̀ tɛ hee wi-dawa ga sɛn ti wa. A̧ mbɛra o kpar-nú tua; a̧ dee ha̧ sap mɛ hui nɛ nú-a nɛnɛ a tɛ zera kɔ̧-a̧ mbɛt.

¹⁵Akis tɔ̧ɔ̧ ha̧ o wi-de-tom kɔ‘i: «Ɛnɛ zɔka nɛ mbetɛ‘e wi’ɛi nɛ́ wi-dawa! Wen ge s’ɛnɛ baa a̧ tɛnɛ ha̧‘m ge?

¹⁶Wi-dawa bo tɛ kɔ‘m na s’ɛnɛ ba ɛ̧ɛ̧ wi’ɛ tɛnɛ ha̧ a̧ mɛ ndekel'am nɛ̀ o mɔɔ-dawa kɔ̧-a̧? A̧ beka ye kɔ̧-a̧ kɔ̧ tua kɔ‘m na!»