Read Northwest Gbaya 1 SAMUƐL 23 Bible Online

1 SAMUƐL 23 - Northwest Gbaya bible

1 SAMUƐL 23

¹Wa tɛɛ́ tɔ̧ ha̧ David nde: «O be Filistii bi nɛ Kɛila, kai nɛ̀ mɔ fara-gusi-alkamaari.»

²David aka GASA WAN: «Mi tɛ nɛ biro'i, ɓɛɛ mi gbina biro ti o be Filistii nde?» GASA WAN kifa nú ha̧ a̧: «Mɛ̀ nɛ̀, mɛ tɛ gbin biro ti o be Filistii, ɓɛɛ mɛ kpasa Kɛila.»

³O bíí ko David tɔ̧ɔ̧ ha̧ David: «Ɛ́ɛ́ nɛ́ mɔ'ɔ nɛ̀ kíì de yɛ sɛn Juda hɛ̧ɛ̧, ɓɛɛ wan n’ɛɛ tɛ nɛ sɛn Kɛila kpa nɛ̀ o gíí wi-biro ko o be Filistii’ɛ, ɛɛ tɛ de hee ge nde?»

⁴David sii ɗoŋ mɛ nɛ́ɛ̀ ak Sɔ̧ woyo, ɓɛɛ GASA WAN tɔ̧ ha̧ a̧: «Mɛ̀ nɛ́, mɛ̀ zír si Kɛila, mi ee o be Filistii kɔ̧ er mɛ.»

⁵David in o bíí kɔ‘i zira si Kɛila, ɓɛɛ a̧ bi o be Filistii; a̧ kaia o mɔ-dai kɔ-wa lɛŋ yinɛ, a̧ bìí wa nɛ̀ ɗaŋ-a nyɛmna. Nɛ́ hegɔ a̧ David kpasa nɛ̀ o bíí Kɛila.

⁶Ŋgimbi nɛ Abiatar bem ko Ahimɛlɛk yuu so nɛ mɔ sitɛ David, a̧ zira si Kɛila nɛ oi laa-ɗafi-sɔ̧ nɛ‘i sa'e Efod.

⁷Nɛ́ mɔ'ɔ nɛ̀ wa tɔ̧ɔ̧ ha̧ Saul'e David a̧a̧ sɛn Kɛila, ɓɛɛ Saul tɔ̧: «Sɔ̧ foo a̧ pi̧ kɔ er-am kaɗi, wen a̧ kpee nú-a nɛ̀ tɛ-a ye nɛ̀ saaye nɛ̀ kpar-nú-a in mɔɔ-mana-a a̧a̧ sɛnɛ.»

⁸Saul mɔi̧a o bíí lɛŋ ha̧ wa mɛ nɛ̀ɛ́ kpe nú David in o bíí kɔ‘i e ɓɔn sɛn Kɛila.

⁹David zia'e Saul ɗafi nɛ ŋma ŋgamɔ wen wi, ɓɛɛ a̧ tɔ̧ ha̧ wi-ɗafi-sɔ̧ Abiatar: «Mɛ̀ bá gba laa-ɗafi-sɔ̧ tɛnɛ.»

¹⁰David tɔ̧a̧: «GASA WAN Sɔ̧ ko Israɛl, wi-de-tom k’ɛ́nɛ́ zia'e Saul kɔ̧ɔ̧ mɛ tɛ pii Kɛila mɛ ɗaŋ ye wen zu'm.

¹¹O gasawi saaye Kɛila tɛ e'm er a̧ nde? Saul tɛ tɛ kànà hee mɔ'ɔ nɛ wi-de-tom k’ɛ́nɛ́ zia ga nde? GASA WAN, Sɔ̧ ko Israɛl, ɛ̀nɛ̀ mbáŋ tɛ wi-de-tom k’ɛ́nɛ́.» GASA WAN kifa nú: «A̧ tɛ tɛ.»

¹²David aka mɔ woyo: «O gasawi saaye Kɛila tɛ ba'm in o bíí kɔ‘m e er Saul nde?» GASA WAN kifa nú ha̧ a̧: «Wa tɛ kai'nɛ́ ha̧ ha̧ a̧.»

¹³Ɓɛɛ nɛ́ mɔ'ɔ nɛ̀ David in o bíí kɔ‘i, hee gɔmŋmaa-mɔɔrɔ-ɗoŋ-kpɔk ga gboo saaye Kɛila yak. Bíí nɛɛ tɔ̧ ha̧ Saul'e, David bo sɛn Kɛila ɓɔna. Ɓɛɛ Saul e toma o wi-biro duk.

¹⁴David duka ŋga-gbárà mgbara o ta. A̧ ɓɔna zu kaya ŋga-gbárà Zif. Ŋgimbi'i lɛŋ Saul kii nɛ a̧, ɓɛɛ Sɔ̧ e a̧ kɔ̧ er Saul na.

¹⁵David zɔka'e, Saul kii mɛ gbɛ nɛ wi. Ŋgimbi'i, David a̧a̧ sɛn ŋga-gbárà Zif sɛn Hɔrɛsa.

¹⁶Nɛ́ mɔ'ɔ nɛ̀ Jɔnataŋ bem ko Saul tika yuwar mɛ nɛ sitɛ David sɛn Hɔrɛsa. A̧ tɛɛ ha̧ nɔɔ-ŋgiɗi ha̧ David nɛ nin Sɔ̧,

¹⁷ɓɛɛ a̧ tɔ̧ ha̧ a̧: «Ká mɛ de kíì na, er dáà kɔ‘m Saul beka tam tɛ-mɛ na. Nɛ́ mɛ a̧ tɛ ɔ wan zu Israɛl, ɓɛɛ yiitoo bíí nɛ‘m. Kóó nɛ́ dáà kɔ‘m Saul'i iŋa kànà mɔ‘i nɛ̀ de-a mbɛt.»

¹⁸Wa yiitoo lɛŋ nɔɔ tɔk sɛn ti GASA WAN. Nɛ́ mɔ'ɔ nɛ̀ David duka kɔ‘i ɓɔn sɛn Hɔrɛsa, ɓɛɛ Jɔnataŋ daŋ kɔ‘i si ɗoŋ tɛ kɔ‘i.

¹⁹O bíí Zif daŋa si Gibea katɛ Saul mɛ tɔ̧ ha̧ a̧: «Bo nɛ David hu̧sa̧ ɓɔn tɛ k’ɛɛ sɛn Hɔrɛsa zu kaya Hakila nɛ duk nú gbárà nɛ war ká̧-zan-mɛ́-ɗɔɔ na nde?

²⁰Ɓɛɛ kà wannu nɛ́ kɔ̧ɔ̧ mɛ zir si hi̧i̧, ɓɛɛ a̧ a̧ zír nɛnɛ; nɛ́ ɛɛ a̧ tɛ ba David ha̧ wannu.»

²¹Saul tɔ̧ɔ̧ ha̧ wa: «GASA WAN a̧ tók de yoŋgo zu'nɛ́ wen n’ɛnɛ zɔka'm nɛ ko.

²²Ɛ̀nɛ̀ nɛ̀, ɛ̀nɛ̀ nɛ́ɛ̀ kpe naŋ mɔ nɛ de-a, ɛ̀nɛ̀ kíí mɛ zɔk oi pat'a. Ŋma bíí zɔk a̧ sɛn hi̧i̧ na nde? Wa tɔ̧ɔ̧ ha̧‘m ndé, kɔ̧ zaŋ-aa ɔ gɔna nyɛmna.

²³Ɛ̀nɛ̀ nɛ́ ɛ̀nɛ̀ zɔ́k o fara n'aa nyɛma mɛ hu̧si sɛnɛ, ɓɛɛ ɛ̀nɛ̀ píí tɛ́ɛ̀ tɔ̧ ha̧‘m ɗoŋ n’ɛnɛ kpee naŋ mɔ nɛ̀ de-a kaɗi, ɓɛɛ mi tɛ nɛ in'nɛ̀ɛ́; ɓɛɛ kà a̧ nɛ́ bòò tɛ nù‘i, mi tɛ kii mɔ dam nú-gara Juda lɛŋ ha̧‘m mɛ kpa a̧.»

²⁴Wa baa yuwar yak ti ha̧ Saul si war Zif. David in o bíí kɔ‘i a̧a̧ kɔ‘i sɛn bɔkɔ-nu nú ŋga-gbárà Maɔŋ nɛ war ká̧-zan-mɛ́-ɗɔɔ.

²⁵Saul in o bíí kɔ‘i yaka mɛ kii a̧ nɛnɛ. Wa mbaŋa tɛ David, ɓɛɛ a̧ zir si ká̧ kaya, nɛ́ɛ̀ duk sɛn ŋga-gbárà Maɔŋ. Saul zia nyɛrɛ mɔ‘i, ɓɛɛ ndak ɗoŋ David si ŋga-gbárà Maɔŋ.

²⁶Saul in o bíí kɔ‘i ba nɛ ká̧ naŋ kaya nɛ mgbɔɔr, David in o bíí kɔ‘i tɛɛ ba kɔ-wa nɛ́ ɓii-aa. David kpàná nɔ̀ mɛ yu mɔ yak er Saul. Saul in o bíí kɔ‘i hɛɗa so kpaa David in o bíí kɔ̧-a̧ mɛ kɛr wa wen kaia wa kaɗi,

²⁷ɓɛɛ ŋma betom tɛ́ɛ̀ tɔ̧ ha̧ Saul: «Ɛ̀nɛ̀ tɛ́ nɛ̀ haya-a, o be Filistii hura nù kaɗi.»

²⁸Saul kaɗa ndaka pata David, ɓɛɛ tɛ́ɛ̀ zik tɛ mɛ ndak nɛ o be Filistii. Nɛ́ hegɔ sa wa a nin fara'i'e Ta-kɛ̧-mgbara-ŋmaa.