Read Northwest Gbaya 1 SAMUƐL 25 Bible Online

1 SAMUƐL 25 - Northwest Gbaya bible

1 SAMUƐL 25

¹Samuɛl fea, ɓɛɛ o be Israɛl lɛŋ mɔi̧ ŋmaa nɛ́ɛ̀ hi̧i̧ fio kɔ̧-a̧. Wa guna a̧ sɛn Rama tɛ kɔ̧-a̧. David baa yuwar zir si ŋga-gbárà Paraŋ.

²Ŋma bíí a̧a̧ so sɛn Maɔŋ; wi’ɛi a̧a̧ nɛ̀ nù kɔ‘i sɛn Karmɛl. A̧ duka so nɛ́ ŋma gasa wanmbɔi; a̧ a̧a̧ so nɛ̀ o sami booro-taar in o gbadua booro mbɛt. A̧ nɛɛ duk Karmɛl wen gɔna o buma-tɛ mɔ-dai kɔ̧-a̧.

³Nin wi’ɛi nɛ́ Nabal; ɓɛɛ nin kóò kɔ̧-a̧ nɛ̀ Abigail. Kóò kɔ̧-a̧ iŋa mɔ batɛ; a̧ yora so zɔŋa mbɛt; ɓɛɛ war ko wíì kɔ̧-a̧, a̧ duka so nɛ́ wi-ŋgazu in wi-ɗaŋ; a̧ duka so nɛ́ bezaŋ Kalɛb.

⁴Ɓɛɛ hee mɔ'ɔ nɛ David duka ŋga-gbárà zii nɛnɛ‘e, Nabal gɔn nɛ buma tɛ o sami kɔ‘i ga,

⁵a̧ toma o ŋgaiwi kɔ̧-a̧ ɓu nɛnɛ sitɛ Nabal; a̧ tɔ̧ɔ̧ ha̧ wa: «Ɛ̀nɛ̀ dáŋ si Karmɛl, ɛ̀nɛ̀ nɛ́ sitɛ Nabal, ɓɛɛ ɛ̀nɛ̀ fán a̧ nɛ nin-am.

⁶Mɔ n’ɛnɛ tɛ tɔ̧ ha̧ Nabal nɛ́ mɔ'ɔ: ‹Ga̧a̧mɔ a̧ dúk in'nɛ̀ɛ́; ga̧a̧mɔ a̧ dúk zu o bíí nutua k’ɛ́nɛ́ in mɔ k’ɛ́nɛ́ lɛŋ.

⁷Kinii, mi zia'e, wa gɔn nɛ buma tɛ o mɔ-dai k’ɛ́nɛ́. Nɛti, o wi-kɔr mɔ-dai k’ɛ́nɛ́ duka so in yɛɛ, ɛɛ de ŋma ɗaŋmɔ in wa na; ŋma mɔ kɔ-wa kóó kpɔk yɔ ŋgimbi nɛ wa duka nɛnɛ sɛn Karmɛl na.

⁸Ɛ̀nɛ̀ ák o wi-de-tom k’ɛ́nɛ́, ɓɛɛ wa tɛ tɔ̧ h’ɛ́nɛ́. Ɛ̀nɛ̀ kpɛ́k o ŋgaiwi kɔ‘m nɛ̀ de-a wen nɛ̀ ɛɛ tɛɛ mɛ wese yɔyɛ. Mi ai nú h’ɛ́nɛ́, ɛ̀nɛ̀ há̧ mɔ'ɔ er'nɛ́ h’ɛ́ɛ́, o wi-de-tom k’ɛ́nɛ́, in ha̧‘m, bem k’ɛ́nɛ́ David.› »

⁹O ŋgaiwi ko David hɔa, ɓɛɛ wa we ɗoŋ tom nɛ David toma nɛ̀ wa ha̧ Nabal, ɓɛɛ wa pɛm mɔ tikiɗi.

¹⁰Nabal kifa nú ha̧ o ŋgaiwi ko David: «David nɛ́ o? Bem ko Jɛse nɛ́ o? Sɔsɔɔ o bara ɔ dɔka nɛ yu mɔ er o wan kɔ-wa yak;

¹¹ɓɛɛ a̧‘m há̧ brɛt kɔ‘m, yì kɔ‘m in kpoo kɔ‘m n'am gbɛɛ ha̧ o wi-gɔn-buma tɛ mɔ-dai kɔ‘m, ɓɛɛ a̧‘m bá ha̧ a̧ o ŋma bíí nɛ tɛɛ nɛ ŋma fara n'am iŋ na nde?»

¹²O ŋgaiwi ko David sii ɗoŋ; nɛ̀ wa hɔa, wa wee ɗoŋ wen nɔ‘i lɛŋ ha̧ David.

¹³David tɔ̧ɔ̧ ha̧ o bíí kɔ‘i: «Kóó o ndé a̧ hɛ́r gba-paa kɔ‘i.» Bíí lɛŋ hɛra gba-paa kɔ‘i, ɓɛɛ David hɛr kɔ‘i mbɛt. Bíí hee gɔmŋmaa-naar ga yaka in David, ɓɛɛ bíí gɔmŋmaa-yiitoo ya kɔ‘i ká̧ o tui.

¹⁴Ŋma kpɔk mgbara o wi-de-tom ko Nabal mbaŋa so tɛ Abigail kóò kɔ̧-a̧ ndé: «David toma o betom tɛnɛ nɛ̀ ŋga-gbárà mɛ fan gasawi k’ɛɛ, ɓɛɛ gasawi k’ɛɛ kpɛk wa nɛ̀ de-a na.

¹⁵O wi nɔ‘i nɛ tɛa'i dee so demɔ in yɛɛ. Wa duka nɛ̀ de-a in yɛɛ; ŋma mɔ k’ɛɛ yɔ ŋgimbi n’ɛɛ yaa nɛnɛ in wa sɛn zaŋbɛɛ na.

¹⁶Zɛ nɛ wese, wa duka zik yɛ hee garo ga ŋgimbi n’ɛɛ duka dai nɛ̀ o sami in wa.

¹⁷Mɛ̀ íŋ mɔ nɛ mɛ tɛ de kinii, wen fio ko wan k’ɛɛ in o bíí nutua kɔ̧-a̧ nɛ́ mɔ nɛ̀ yuwar-a ɗafa kaɗi'i; war kɔ̧-a̧, a̧ nɛ́ ŋma wi-ŋgazu nɛ‘i nyɛm mɛ tɔ̧ ŋma wen ha̧ a̧ na.»

¹⁸Abigail kaia brɛt gɔmŋmaa-yiitoo, dak dɔ̧ɔ̧ yiitoo, sami mɔɔrɔ n'aa gii gii; kilo hana gba̧a̧-nyɔnɔ ɓu-zua-mɔɔrɔ-ɗoŋ-yiitoo, sikila kora waya-nyak-dɔ̧ɔ̧ gɔmŋmaa, makala waya te-mbɔra gɔmŋmaa-yiitoo nɛ haya-a, ɓɛɛ a̧ kai a zu o tuifuu.

¹⁹Nɛ́ mɔ'ɔ n'aa tɔ̧ɔ̧ ha̧ o wi-de-tom kɔ̧-a̧: «Ɛ̀nɛ̀ yák ti, mi a̧‘m ndak pata'nɛ‘i.» Ɓɛɛ a̧ mbaŋ tɛ Nabal wíì kɔ̧-a̧ na.

²⁰Ɓɛɛ n'aa be daŋ zu tuifuu zir nɛnɛ nɛ̀ ká̧ naŋ kaya, David in o bíí kɔ‘i a̧ zir tɛnɛ'ɛ, ɓɛɛ wa kpa ŋmaa.

²¹David tɔ̧ɔ̧ so'e, demɔ nɛ‘i dee in Nabal sɛn ŋga-gbárà lɛŋ, Nabal iŋ kɔ‘i mɔ‘i na; o mɔ kɔ̧-a̧ lɛŋ nɛ‘i zɔka wen ká̧ ŋma mɔ kɔ̧-a̧ kpɔk tɛɛ yɔ wó‘i, a̧ zɔk i̧i̧ na; a̧ kifa er demɔ kɔ‘i nɛ̀ ɗaŋmɔ.

²²Sɔ̧ a̧ gbɛ́ wi ka'i nɛ ee ŋma wiwii kpasa tɛ kɔ̧-a̧ ku̧u̧naŋ-a nɛ sɔsɔɔ hɔ sa̧a̧mɔ.

²³Ɓɛɛ nɛ̀ Abigail zɔka David, a̧ zira zu tuifuu nɛ haya-a tik nù, gu yi nɛ nù ti David.

²⁴A̧ tika ti naŋ David tɔ̧ nɛnɛ: «Nyaa, ɗaŋmɔ nɛ́ kɔ‘m! Ɛ̀nɛ̀ é war ha̧ kó-de-tom k’ɛ́nɛ́ mɛ tɔ̧ wen h’ɛ́nɛ́; ɛ̀nɛ̀ zíí wen ko kó-de-tom k’ɛ́nɛ́!

²⁵Ká nyaa zii wen ko géé ɗaŋ tum Nabal’ɛ[15] na; wen nin nɛ wa gɔna a zu a̧ nɛ́ Mgbelewi; ɓɛɛ nɛ mbetɛ a̧ nɛ́ mgbelewi. Ɓɛɛ kɔ‘m, kó-de-tom k’ɛ́nɛ́, mi zɔk kɔ‘m o ŋgaiwi n’ɛnɛ toma so nɛnɛ‘i na.

²⁶Kinii, hee GASA WAN duk kpasa in ɛnɛ mbɛt duk kpasa ga, mɛ̀ nɛ́ GASA WAN a̧ dora'nɛ́ tɛ gbaia tɔk a nù, in tɛ kifa er ɗaŋmɔ nɛ tɛ‘nɛ́. Mɔ nɛ̀ tɛ kpa Nabal a̧ kpá o wisɛn k’ɛ́nɛ́ nɛ kii mɛ de ɗaŋmɔ in'nɛ̀ɛ́.

²⁷Nɛ̀ war ko nyɔŋmɔ'ɛ nɛ̀ mi, bara k’ɛ́nɛ́ ba tɛnɛ h’ɛ́nɛ́'ɛ, ɛ̀nɛ̀ káí ha̧ o ŋgaiwi k’ɛ́nɛ́ nɛ̀ tɛ ɗoŋ ɛnɛ‘i.

²⁸Mi aia nú h’ɛ́nɛ́, ɛ̀nɛ̀ é ɗaŋmɔ ko kó-de-tom k’ɛ́nɛ́ ha̧ a̧! GASA WAN tɛ ɗafi de ŋga tua ha̧ nyaa, wen biro nɛ nyaa bi ŋgimbi lɛŋ, nɛ́ biro ko GASA WAN, ɓɛɛ ká‘i kpa ŋma ɗaŋmɔ tɛ‘nɛ́ tɛ duka-a k’ɛ́nɛ́ zaŋnu na.

²⁹Kà ŋma bíí kur zu'nɛ́ wen ha̧ a̧ mɛ gbɛ‘nɛ́, GASA WAN tɛ ɗafi'nɛ́ e tɛ de fara mgbara o wi nɛ ya kpasa katɛ GASA WAN Sɔ̧ k’ɛ́nɛ́; ɓɛɛ nɛ̀ ko o wi-sɛn'nɛ́, a̧ tɛ pi̧ duka-kpasa kɔ-wa taŋ hee ta birndiŋ ga.

³⁰Ɓɛɛ ŋgimbi nɛ GASA WAN tɛ de mɔ n'aa tɔ̧ɔ̧ zu'nɛ́‘i mɛ hɔ gba̧a̧, a̧ tɛ e'nɛ́ nɛ̀ wan zu Israɛl.

³¹Ká see'nɛ́ tu̧ in k’ɛ́nɛ́ ta mɔ wen tɔk n’ɛnɛ gbaia so a nù tɛ kia war wen kpasa tɛ‘nɛ́ na! Ŋgimbi nɛ GASA WAN tɛ de demɔ in'nɛ̀ɛ́, nyaa, ká tɛ‘nɛ́ bi ɗoŋ kó-de-tom k’ɛ́nɛ́ na!»

³²David kifa nú ha̧ Abigail: «Zɔnamɔ a̧ dúk nɛ́ ko GASA WAN, Sɔ̧ ko Israɛl nɛ toma mɛ tɛnɛ sɔsɔɔ pii tɛ‘m.

³³Osoko ha̧ Sɔ̧ wen zu de taamɔ kɔ-mɛ; mɛ̀ kpá ga̧a̧mɔ wen nɛ̀ mɛ dora'm ka'm tɛɛ gbɛ zu in wen nɛ̀ mɛ dora er-am tɛ dee ɗaŋmɔ sɔsɔɔ.

³⁴Ɓɛɛ mi kan mɔ ti GASA WAN Sɔ̧ ko Israɛl, wan nɛ dora'm tɛ dee ɗaŋmɔ in mɛ'ɛ, kà mɛ̀ we so ti'm nɛ haya-a na, ŋmafara ŋma wiwii tɛ ko Nabal kpɔk nɛ tɛ̀ɛ́ duk kpasa hɔ tɛ daŋa-wese beka bo so na.»

³⁵David kaia o mɔɔ nɔ‘i nɛ Abigail kaia tɛnɛ ha̧ a̧‘i, ɓɛɛ tɔ̧ ha̧ a̧: «Mɛ̀ sí ɗoŋ si tɛ kɔ-mɛ zaŋ ga̧a̧mɔ. Mi zia wen kɔ-mɛ, mi kpɛka mbɛt.»

³⁶Ŋgimbi nɛ Abigail sii ɗoŋ, a̧ nɛɛ kpa Nabal fara yɔɔ yɔyɛ kɔ̧ tua kɔ‘i; duka nɛ́ gasa yɔyɛ hee yɔyɛ ko wan ga. Nabal a̧a̧ so nɛ̀ gasa desee, in dɔ̧ɔ̧ gbɛ so nɛ́ a̧ mbɛt. Kóò kɔ̧-a̧ tɔ̧ wen ha̧ a̧ na, hɔ ŋgimbi nɛ mɔ sa̧a̧.

³⁷Nɛ̀ mɔ sa̧a̧ kaɗi, dɔ̧ɔ̧ gɔna yí Nabal; ɓɛɛ kóò kɔ̧-a̧ we ɗoŋ o mɔ nɛ yaka lɛŋ ha̧ a̧. Tɛ-a mɔka, ɓɛɛ a̧ duk zíŋ-zíŋ.

³⁸Duka ɗoŋ-aa'i zɛ ɓu, ɓɛɛ GASA WAN gusi Nabal gbɛ nɛ̀ fio.

³⁹Nɛ̀ David zia'e Nabal fea, a̧ tɔ̧a̧: «Zɔnamɔ a̧ dúk nɛ́ ko GASA WAN, wen n'aa gɔna foe yí‘m, tɛ da̧a̧‘m nɛ Nabal da̧a̧‘i. GASA WAN kɔ̧ ha̧ wi-de-tom kɔ‘i mɛ de ɗaŋmɔ na, ɓɛɛ a̧ kia nɛ war wen ha̧ ɗaŋ ko Nabal mɛ tik nɛ zu Nabal woyo.» Ɓɛɛ ɗoŋ mɔ‘i, David toma nɛ́ɛ̀ ak Abigail mɛ ba nɛ̀ kóò.

⁴⁰O wi-de-tom ko David tɛɛ kpa Abigail sɛn Karmɛl, ɓɛɛ wa tɔ̧ ha̧ a̧: «David toma yɛ tɛnɛ tɛ mɛ, ha̧ a̧ mɛ ba mɛ nɛ̀ kóò.»

⁴¹Abigail kura gu yi nɛ nù, ɓɛɛ tɔ̧: «Mi nɛ́ kó-de-tom nɛ duk nɛ bara kɔ̧-a̧, ɓɛɛ mi duk dɔ̧ɔ̧ mɛ fɔr naŋ o wi-de-tom kɔ̧-a̧.»

⁴²Abigail kura nɛ haya-a ɓɛɛ daŋ zu tuifuu, ɓɛɛ o kó-de-tom kɔ̧-a̧ mɔɔrɔ gbar ɗoŋ-aa. Abigail kura duk ɗoŋ o betom ko David, ɓɛɛ David ba a̧ nɛ̀ kóò.

⁴³David baa so ŋma kóò nɛti, nin-a nɛ́ Ahinɔam, zɔŋa Yizreɛl, ɓɛɛ wa yiitoo lɛŋ ya nɛ́ kóò kɔ̧-a̧.

⁴⁴Saul baa so be-okoo kɔ‘i Mikal n'aa ha̧a̧ so nɛ̀ kóò ha̧ David ha̧ ha̧ Palti, bem ko Layis be Galim.