Read Northwest Gbaya 1 SAMUƐL 26 Bible Online

1 SAMUƐL 26 - Northwest Gbaya bible

1 SAMUƐL 26

¹O bíí Zif tɛɛ kpa Saul sɛn Gibea, nɛ́ mɔ'ɔ nɛ̀ wa tɔ̧ɔ̧ ha̧ a̧: «Bo nɛ David hu̧si sɛn zu kaya Hakila nyɛm nɛ nú gbárà na nde?»

²Ɓɛɛ Saul ba yuwar zir si ŋga-gbárà Zif in o ŋga wi-biro Israɛl booro-taar ha̧ wa mɛ kii David sɛn hi̧i̧.

³Saul baa gbagari ká̧ kaya Hakila nɛ duk nú ŋga-gbárà ká̧ war. David duka so sɛn ŋga-gbárà nɛti. A̧ zɔka'e Saul ndak nɛ ɗoŋ wi tɛnɛ;

⁴nɛ́ mɔ'ɔ nɛ̀ David toma o wi-kpe-naŋ-mɔ nɛnɛ, ɓɛɛ a̧ iŋ‘e Saul hɔɔ nɛ mbetɛ.

⁵David baa yuwar yak, ɓɛɛ hɔ fara nɛ Saul de gbagari sɛnɛ. A̧ zɔka fara nɛ Saul in wan ko wi-biro Abnɛr bem ko Nɛr ɔ sɛnɛ. Saul ɔ see-gara, ɓɛɛ dɔka wi-biro ɔ kɔ-wa zik a̧ kpa nú ŋmaa.

⁶David aka Ahimɛlɛk, be Hit in Abisai, bem ko Sɛruya nya Jɔab: «Nɛ́ o mgbara'nɛ́ a̧ tɛ zir in am kɔ̧ gbagari hɔ tɛ Saul o nde?» Abisai tɔ̧a̧: «Nɛ́ mi'i tɛ zir in'nɛ̀ɛ́.»

⁷Ɓɛɛ David in Abisai zir nɛnɛ mɛ zɛ si fara nɛ o wi-biro ko Saul ɔ sɛnɛ; wa nɛɛ kpa Saul fara ɔ ya. Sɛ́ɛ̀ kɔ̧-a̧ zu̧ kɔ‘i zu̧u̧ sɛn ká̧ nú yara kɔ̧-a̧, ɓɛɛ Abnɛr in o dɔka wi-biro ɔɔ kɔ-wa zik a̧.

⁸Abisai tɔ̧ɔ̧ ha̧ David: «Sɔ̧ foo wisɛn k’ɛ́nɛ́ pi̧ kɔ̧ er'nɛ́ sɔsɔɔ; ɛ̀nɛ̀ é ha̧‘m tok a̧ nɛ sɛ́ɛ̀ kɔ̧-a̧ ɓɔn mbɔɗɔnu war kpɔk, bó nɛ́ war yiitoo na.»

⁹David tɔ̧ɔ̧ ha̧ Abisai: «Ká mɛ́ gbɛ a̧ na! Bíí nɛ tɛ gbɛ wi nɛ GASA WAN tɛna nɔ̧́ a zu a̧, ká kifa-er tik zu a̧ na, bo na.»

¹⁰David tɔ̧ɔ̧ ha̧ a̧ mbɛt: «Hee mɔ'ɔ nɛ GASA WAN duk kpasa ga, nɛ́ GASA WAN a̧ tɛ gbɛ a̧; ŋgimbi nɛ ŋgimbi kɔ̧-a̧ tɛ hɔ, ɓɛɛ a̧ fea, kóó kà a̧ zir si yí biro, ɓɛɛ a̧ fea mbɛt.

¹¹Ɓɛɛ war kɔ‘m nɛ̀ tɛ‘m, GASA WAN a̧ dór am tɛ gbɛɛ wi n'aa tɛna nɔ̧́ a zu a̧. Kinii, mɛ̀ bá sɛ́ɛ̀ kɔ̧-a̧ nɛ a̧a̧ nú yara kɔ̧-a̧ in dak-nɔ-yì kɔ̧-a̧, ɓɛɛ ɛ̀ɛ̀ yák k’ɛɛ.»

¹²David baa sɛ́ɛ̀ in dak-nɔ-yì ɗɔɔ zu Saul, ɓɛɛ wa yak; ŋma bíí zɔk na, ŋma bíí iŋ na, ŋma bíí tun na mbɛt. Wa lɛŋ ɔ nɛ ya, wen ŋma gasa ya nɛ tɛ̀ɛ́ nɛ tɛ GASA WAN tika so zu wa.

¹³Nɛ́ mɔ'ɔ nɛ̀ David ɓira nɛ̀ war mgbɔɔr, ɓɛɛ nɛ́ɛ̀ daŋ zu kaya nɛ̀ nyɛi̧a-a yor sɛnɛ.

¹⁴A̧ ku̧u̧ naŋ saa mɔ sitɛ o wi-biro in Abnɛr bem ko Nɛr. A̧ tɔ̧a̧: «Mɛ̀ kɔ̧́ sara nú‘m na nde, Abnɛr?» Ɓɛɛ Abnɛr kifi nú: «Mɛ́ wi nɛ mɛ hiɗi mɔ zer wannu’ɛ, mɛ́ nɛ́ o nde?»

¹⁵David kifa nú ha̧ Abnɛr: «Mɛ́ bó nɛ́ wiwii na nde? Ŋma bíí nɛ nyɛma ŋmaa in mɛɛ sɛn Israɛl nɛ́ o nde? Ɓɛɛ wen ge mɛ pɛm wannu, gasawi kɔ-mɛ na ge nde? Mɛ̀ zɔ̀k, ŋma bíí nɛɛ mɛ gbɛ wannu, gasawi kɔ-mɛ!

¹⁶Mɔ‘i nɛ̀ mɛ de-a'i de na. Hee GASA WAN duk kpasa ga, ɛnɛ lɛŋ nyɛma so kànà mɛ kum, wen ɛnɛ pɛm wan k’ɛ́nɛ́, wi nɛ GASA WAN tɛna nɔ̧́ a zu a̧ na. Kinii, sɛ́ɛ̀ ko wannu in dak-nɔ-yì kɔ̧-a̧ nɛ a̧a̧ so ɗɔɔ zu-a a̧a̧ déè nde?»

¹⁷Saul iŋa tiger David, ɓɛɛ ak mɔ: «Mɛ̀ nɛ́ tiger-mɛ nɛ̀ mbetɛ nde, bem kɔ‘m David?» David kifa nú: «Ii, nɛ́ tiger-am, nyaa wannu.»

¹⁸Ɓɛɛ David tɔ̧ siti ha̧ a̧: «Nyaa, wen ge s’ɛnɛ ndak pata wi-de-tom k’ɛ́nɛ́ ge nde? Nɛ́ ge a̧‘m dee ge? Nɛ́ ge ɗaŋmɔ ge ɛnɛ zɔka tɛ‘m ge?

¹⁹Kinii, nyaa wannu a̧ zíí wen ko wi-de-tom kɔ‘i; nɛ́ bòò nɛ́ GASA WAN a̧ de ha̧ see'nɛ́ mɛ kur sɛn zu'm, wi tɛ ga̧ see-aa nɛ̀ de pɛr dɔɔ-kpoo-sɔ̧; ɓɛɛ kà nɛ́ bòò nɛ́ o géé bíí, fom a̧ bá wa ti GASA WAN, wen nɛ wa ndaka'm sɔsɔɔ, ɓɛɛ wa fo'm yinɛ zu mɔɔ-oi ko GASA WAN, tɔ̧ nɛnɛ ha̧‘m'e a̧‘m nɛ́ɛ̀ de tom ha̧ o ŋma sɔ̧.

²⁰Kinii, ká tɔk tɛ‘m gbai a nù nyɛi̧ nɛ̀ yí GASA WAN na, wen wannu yee zaŋbɛɛ mɛ gbɛ‘m, hee mɔ'ɔ nɛ‘i ndak nɛ gbafɔ zu kaya ga.»

²¹Saul tɔ̧a̧: «Mi dee ɗaŋmɔ, mɛ̀ píí ɗoŋ, bem kɔ‘m David; mi beka de ɗaŋmɔ in mɛɛ ɓɔna, wen duka-a kɔ‘m duka nɛ́ gasamɔ sɛn yí-mɛ sɔsɔɔ‘i; mi dee mɔ hee mgbelewi ga in mi yɔɔ kaya nyɛmna nɛ mbetɛ.»

²²David kifa nú: «Zɔ́k sɛ́ɛ̀ ko wannu hɛ̧ɛ̧; ŋma ŋgaiwi k’ɛ́nɛ́ a̧ tɛ́ɛ̀ ba.

²³Nɛ́ GASA WAN kpɔk a̧ nyɛma kifa er demɔ ha̧ bíí! Sɔsɔɔ, GASA WAN ee'nɛ́ kɔ̧ er-am, ɓɛɛ kɔ‘m, mi kɔ̧ mɛ gbɛ wi nɛ GASA WAN tɛna nɔ̧́ a zu a̧ na.

²⁴Hee mɔ'ɔ nɛ duka-a k’ɛ́nɛ́ duka nɛ́ gasamɔ sɛn yí‘m sɔsɔɔ ga, kale-a mbɛt, duka-a kɔ‘m a̧ dúk nɛ gasamɔ sɛn yí GASA WAN, ɓɛɛ a̧ a̧ kpás'am tɛ ŋgamɔ lɛŋ.»

²⁵Saul tɔ̧ɔ̧ ha̧ David: «Toka-de-yoŋgo a̧ dúk zu mɛ, bem kɔ‘m. Mɛ tɛ de gasamɔ nɛ̀ dɔka-a, mɛ tɛ de mɔ lɛŋ hɔ gba̧a̧.» David yaka kɔ‘i, ɓɛɛ Saul si ɗoŋ tɛ kɔ‘i.