Read Northwest Gbaya 1 SAMUƐL 27 Bible Online

1 SAMUƐL 27 - Northwest Gbaya bible

1 SAMUƐL 27

¹David taa mɔ nɛ̀ kɔ̧ see: «Ŋma wese, kóó ge, mi tɛ fe er Saul. Ŋma mɔ n'am tɛ de gan yuu mɔ si nù ko o be Filistii bo na. Saul tɛ e kia'm nú Israɛl duk, ɓɛɛ mi tɛ kpasi er-a.»

²David in o bíí kɔ‘i gɔmŋmaa-mɔɔrɔ-ɗoŋ-kpɔk kaia ŋmaa yak si tɛ ko Akis, bem ko Maɔk wannu Gat.

³David in o bíí kɔ‘i nɛɛ ɔ ye sɛn katɛ Akis sɛn Gat; wa lɛŋ nɛɛ kànà in o kóò kɔ-wa. David nɛɛ in kóò kɔ‘i yiitoo mbɛt: mɛ̀ nɛ́ Ahinɔam zɔŋa Yizreɛl ká bá nɛ̀ Abigail, ko-oi Nabal nɛ̀ ɔ so sɛn Karmɛl.

⁴O bíí nɛɛ tɔ̧ ha̧ Saul ndé, David yuu mɔ si Gat kaɗi; ɓɛɛ Saul e kia a̧ duk.

⁵David tɔ̧ɔ̧ ha̧ Akis: «K’ɛ̀nɛ̀ nɛ́ kɔ̧a̧‘m, ɛ̀nɛ̀ há̧ ŋma be fara ha̧‘m sɛn tɛ ŋma ye nɛ̀ zaŋbɛɛ, ha̧‘m duk sɛnɛ. Wi-de-tom k’ɛ́nɛ́ tɛ duk in'nɛ̀ɛ́ tɛ gasa ye-wan hee ge nde?»

⁶Wese'i Akis ha̧a̧ Siklag ha̧ a̧. Nɛ́ hegɔ a̧ Siklag duk nɛ́ ko o wannu Juda hɔ sɔsɔɔ.

⁷David duka sɛn nù ko o be Filistii pɛ kpɔk nɛ fio-zɛ naar.

⁸Nɛ́ mɔ'ɔ nɛ̀ David in o bíí kɔ‘i yaka mɛ nɛ̀ɛ́ bi o be Gɛsur, o be Girzi in o be Amalɛk wen wa nɛ o dukbíí nɛ ɔ tɛ nu'i ɓee, ku̧u̧naŋ-a nɛ Sur hɔ nɛnɛ tɛ nú Egiptɛ.

⁹David duka ɗaŋ nɛ̀ mɔ sɛn hi̧i̧ lɛŋ; ŋma mɔ n'aa e duk nɛ kpasa bo na; wiwii in okoo lɛŋ a̧ gbɛɛ wa. A̧ kaia o geɗek mɔ-dai in o gasa mɔ-dai hɔ nɛnɛ tɛ tuifuu in o ŋgeloba, ká bá nɛ̀ o laa. Kà a̧ pii, ɓɛɛ a̧ nɛɛ tɛ ko Akis.

¹⁰Ŋgimbi nɛ Akis ak mɔ: «Ɛnɛ bìì nɛ́ o sɔsɔɔ o nde?» Ɓɛɛ David kifa nú‘e, wi nɛɛ bi nɛ́ Nɛgɛb nú Juda, kóó sɛn Nɛgɛb nú Yerameɛl, kóó mana sɛn Nɛgɛb nù Kɛn.

¹¹David ba so ŋma okoo, kóó ŋma wiwii nɛ̀ kpasa piinɛ sɛn Gat na; a̧ dee hegɔ wen ka wa tɛ̀ɛ́ kpa ndaa wa. Yuwar deemɔ ko David nɛ dee ŋgimbi n'aa duka nɛnɛ sɛn nú Filistii nɛ̀ zaŋbɛɛ nɛ́ mɔ‘i.

¹²Akis ee ta nɛ̀ David tɔ̧ nɛnɛ: «O be Israɛl, o bíí ko David hɛɗa sɛn a̧ pi̧-er tɛ wee; a̧ tɛ duk nɛ́ wi-de-tom kɔ‘m ɓɔnsɛnɛ.»