Read Northwest Gbaya 1 SAMUƐL 28 Bible Online

1 SAMUƐL 28 - Northwest Gbaya bible

1 SAMUƐL 28

¹Ŋgimbi'i, o be Filistii mɔi̧a o wi-biro kɔ‘i mɛ nɛ̀ɛ́ bi Israɛl. Nɛ́ mɔ'ɔ nɛ̀ Akis tɔ̧ɔ̧ ha̧ David: «Mɛ̀ íŋ nɛ̀ de-a'e, mɛ tɛ nɛ biro in am, mɛ in o bíí kɔ-mɛ.»

²David kifa nú ha̧ Akis: «Ɔ dee, ɛ́nɛ́ nɛ̀ tɛ‘nɛ́, ɛnɛ tɛ zɔk mɔ nɛ wi-de-tom k’ɛ́nɛ́ tɛ de.» Akis tɔ̧ɔ̧ ha̧ David: «Nɛ́ bòò hegɔ, ɓɛɛ mi tɛ e mɛ nɛ wi-pɛm-am ɓɔnsɛnɛ.»

³Samuɛl fee so; o be Israɛl lɛŋ hi̧a̧ a̧, ɓɛɛ gun a̧ sɛn Rama ye kɔ̧-a̧. Saul ndaka so o wi-sa-sɔ̧-fio yinɛ tɛ nù kɔ‘i.

⁴O be Filistii mɔi̧a ŋmaa tɛ́ɛ̀ ba gbagari sɛn Sunɛm. Saul mbɛt mɔi̧a o be Israɛl lɛŋ tɛ́ɛ̀ ba kɔ‘i gbagari sɛn Gilboa.

⁵Saul zɔka gbagari ko o be Filistii, kíì dee a̧, ɓɛɛ ɗɛɗɛ-a gɔn nɛ̀ ŋgaya-a.

⁶A̧ aka mɔ in GASA WAN, ɓɛɛ GASA WAN kifi nú ha̧ a̧ na. GASA WAN hɔ zu ha̧ a̧ na, kifi nú ha̧ a̧ nɛ̀ Urim na, kóó nɛ̀ nú wi-tɔ̧-wen oi nú Sɔ̧ na mbɛt.

⁷Saul tɔ̧ɔ̧ ha̧ o wi-de-tom kɔ‘i: «Ɛ̀nɛ̀ kíí ŋma ko-sa-sɔ̧-fio tɛnɛ ha̧ a̧ zɔ́k mɔ ha̧‘m.» O wi-de-tom kɔ̧-a̧ tɔ̧ɔ̧ ha̧ a̧‘e, ŋma ko-sa-sɔ̧-fio a̧a̧ sɛn Ɛn-Dɔr.

⁸Nɛ́ mɔ'ɔ nɛ̀ Saul kpaia tɛ lɛŋ, ɓɛɛ pi̧ nɛ́ o ŋma mbe laa, ɓɛɛ a̧ yak in ŋma bíí yiitoo; wa hɔɔ tɛ ko kóò‘i mɛ zɛ. A̧ tɔ̧ɔ̧ ha̧ kóò‘i: «Mɛ̀ zɔ́k mɔ ha̧‘m; wi n'am tɛ sa nin-a ha̧ mɛ‘i, mɛ̀ sá a̧ ha̧‘m.»

⁹Kóò‘i kifa nú ha̧ a̧: «Mɛ́ nɛ̀ tɛ-mɛ, mɛ iŋa mɔ nɛ Saul dea. A̧ ndaka o wi-sa-sɔ̧-fio tɛ nù'ɛ yinɛ; wen ge mɛ tui pɛr-fio ha̧‘m ge?»

¹⁰Saul kànà mɔ ha̧ a̧ nɛ nin GASA WAN hee mɔ'ɔ ga; a̧ tɔ̧a̧: «Hee GASA WAN duk kpasa ga, ŋma ŋgayamɔ nɛ tɛ hɔ zu mɛ bo na.»

¹¹Kóò‘i aka mɔ: «Wi n'am tɛ sa ha̧ mɛ‘i nɛ o?» Saul kifa nú: «Mɛ̀ sá nɛ́ Samuɛl ha̧‘m.»

¹²Kóò‘i zɔka Samuɛl; a̧ hiɗa mɔ nɛ ŋgaya-a, ɓɛɛ a̧ tɔ̧ ha̧ Saul: «Wen ge ɛnɛ ɔr am ge? Bó nɛ́ ɛ́nɛ́ nɛ́ Saul na nde?»

¹³Wannu tɔ̧ɔ̧ ha̧ a̧: «Ká mɛ́ yu mɔ na; nɛ́ ge a̧ mɛ zɔka ge?» Ɓɛɛ kóò‘i kifi nú ha̧ Saul: «Mi zɔk nɛ ŋma sɔ̧-fio nɛ gbo nɛ̀ ɗɔɔ nù.»

¹⁴Saul aka a̧: «Sɔ̧‘i hɔɔ ŋmaa in o?» Kóò‘i kifa nú ha̧ a̧: «Mɛ̀ nɛ́ ŋma sɔkawi a̧ daŋ tɛnɛ; a̧ pi̧i̧ nɛ́ gasa laa tɛ a̧.» Ɓɛɛ Saul iŋ‘e, mɛ̀ nɛ́ Samuɛl; ahai a̧ guu nù ba sɔnti-a hikiɗi nɛ nù.

¹⁵Samuɛl aka Saul: «Wen ge mɛ nukur'am sa nɛ‘m gbonɛ ge?» Saul kifa nú ha̧ a̧: «Mi a̧a̧ nɛ̀ dita-see nyɛmna; o be Filistii baa biro dúk nɛ̀‘m, ɓɛɛ Sɔ̧ ea'm duk. A̧ kifi nú ha̧‘m nɛ nú o wi-tɔ̧-wen oi nú Sɔ̧, kóó nɛ̀ hɔɔ-zu na mbɛt; mɛ̀ nɛ́ hegɔ sa'm sa'nɛ́ wen h’ɛ́nɛ́ mɛ usi mɔ n'am tɛ de ha̧‘m.»

¹⁶Samuɛl tɔ̧a̧: «Wen ge mɛ ak am ge? Kà GASA WAN a̧ zika ɗoŋ e ha̧ mɛ, ɓɛɛ kifi nɛ́ wisɛn kɔ-mɛ kaɗi, wen ge sa mɛ ak am ge?

¹⁷GASA WAN dee mɔ in mɛɛ hee mɔ'ɔ n'aa tɔ̧ɔ̧ so ha̧ mɛ nɛ nú‘m ga. A̧ ɓara wan er-mɛ yinɛ, ɓɛɛ a̧ ha̧ ha̧ ŋma bíí nɛtɛ, ha̧ David.

¹⁸GASA WAN dee mɔ hegɔ in mɛɛ wen nɛ mɛ zii wen nú-a na, in mɛ de mɔ nyɛm nɛ̀ ɗoŋ nyimsea kɔ̧-a̧ zu Amalɛk na.

¹⁹GASA WAN tɛ e mɛ in Israɛl nɛ oi-aa lɛŋ kɔ̧ er o be Filistii. Sa̧a̧mɔ, mɛ in o bem kɔ-mɛ lɛŋ, ɛnɛ tɛ pii ɗoŋ kpa'm, ɓɛɛ GASA WAN tɛ a o wi-biro Israɛl lɛŋ kɔ̧ er o be Filistii.»

²⁰Ɗɛɗɛ Saul gɔna nɛ ŋgaya-a, ɓɛɛ a̧ yu nù. Bele zara a̧ tɛ wen nɛ Samuɛl tɔ̧a̧‘i; tɛ-a mɔka mbɛt wen n'aa nyɔŋ so mɔ na mɛ tutuyɛ hegɔɔ zɛ de nɛnɛ.

²¹Kóò‘i tɛɛ pii katɛ Saul; a̧ zɔka'e ŋgai bo tɛ-a na, ɓɛɛ a̧ tɔ̧ ha̧ a̧: «Kó-de-tom k’ɛ́nɛ́ mboo zu h’ɛ́nɛ́. Mi ee tɛ‘m tɛ fio, ɓɛɛ mi mbo zu tɛ ha̧a̧nú n’ɛnɛ ha̧a̧ ha̧‘m.

²²Ɓɛɛ kinii, ɛ̀nɛ̀ zíí mɔ nɛ kó-de-tom k’ɛ́nɛ́ tɛ tɔ̧ h’ɛ́nɛ́. Ɛ̀nɛ̀ é ha̧‘m ha̧ brɛt h’ɛ́nɛ́ ɛ̀nɛ̀ nyɔŋ, ɓɛɛ ɛ́nɛ́ kpaa ŋgai wen sii ɗoŋ.»

²³Saul bɛ̧a̧, ɓɛɛ tɔ̧ ha̧ kóò‘i: «Mi beka nyɔŋ ŋma mɔ na.» O wi-de-tom kɔ̧-a̧ in kóò‘i dee a̧ nɛ̀ ŋgai, ɓɛɛ a̧ zii wen kɔ-wa. A̧ kura mbɔɗɔnu, ɓɛɛ a̧ duk zu kiti.

²⁴Kóò‘i a̧a̧ so nɛ̀ ŋma be ndai n'aa dai nɛ̀ de-a. A̧ gɔna be ndai'i nɛ̀ haya-a, a̧ baa fuu, ɓɛɛ a̧ gi nɛ brɛt nɛ̀ hao bo sɛnɛ na.

²⁵A̧ ha̧a̧ nyɔŋmɔ ha̧ Saul in o bíí kɔ̧-a̧ lɛŋ; wa lɛŋ nyɔŋa, ɓɛɛ wa si ɗoŋ mɛ zɛ‘i.