Read Northwest Gbaya 1 SAMUƐL 29 Bible Online

1 SAMUƐL 29 - Northwest Gbaya bible

1 SAMUƐL 29

¹O be Filistii mɔi̧a o wi-biro kɔ-wa lɛŋ sɛn Asɛk; o be Israɛl baa gbagari kɔ‘i sɛn zu-zer nɛ̀ duk nú Yizreɛl.

²O wannu Filistii yaka ti ha̧ o wi-biro, dùk-aa gɔmŋmaa, in o wi-biro, duk-aa booro. David in o bíí kɔ‘i wee kɔ‘i naŋ biro kɔ‘i nɛ̀ ndaa-gɔtɔ in Akis.

³O gasawi Filistii aka mɔ: «O be Hebreu nɔ'ɔ nɛ́ o nde?» Akis kifa nú ha̧ o gasawi Filistii: «Mɛ̀ nɛ́ David wi-de-tom ko Saul, wannu Israɛl, na nde! A̧ duk in am kinii dee pɛ kpɔk, kóó pɛ yiitoo kaɗi; mi kpa ŋma yɔɔ-kaya kɔ̧-a̧ na, ku̧u̧naŋ-a nɛ wese n'aa hɔɔ nɛnɛ tɛ kɔ‘m hɔ sɔsɔɔ.»

⁴See o gasawi Filistii nyima zu Akis, ɓɛɛ wa tɔ̧ ha̧ a̧: «Mɛ̀ fó wi’ɛ sinɛ ɗoŋ fara nɛ̀ mɛ ha̧a̧ ha̧ a̧‘i. Ká a̧ nɛ biro in yɛɛ na, wen ká a̧ tɛɛ zik tɛ-a mɛ bi yɛ. Bo nɛ a̧ nyɛma mɛ gbɛ o bíí k’ɛɛ ha̧ a̧ mɛ kpa ea-ɗaŋmɔ ko wannu kɔ̧-a̧ ha̧ a̧ na nde?

⁵Bo nɛ David nɛ̀ wa e so nɛ̀ gima'e ndé: ‹Saul gbɛɛ bíí booro nɛ̀ dɔka-a, ɓɛɛ David gbɛ kɔ‘i nɛ̀ dɔka-a, nɛ‘i nyɛm mɛ tɔr na’ɛ,› na nde? »

⁶Akis saa David, ɓɛɛ tɔ̧ ha̧ a̧: «Hee mɔ'ɔ nɛ GASA WAN duk kpasa ga, mɛ́ nɛ́ wi-de-mɔ nɛ̀ yuwar-a, ɓɛɛ mi kɔ̧ɔ̧ so ha̧ mɛ mɛ nɛ̀ɛ́ e'm fara biro, wen nɛ‘m kpa ŋma ɗaŋmɔ sɛn tɛ mɛ na, ku̧u̧naŋ-a nɛ wese nɛ mɛ tɛɛ nɛnɛ sɛn tɛ kɔ‘m hɔ sɔsɔɔ. Mɔ kpɔk, o dɔka gasawi lɛŋ zɔk mɛ nɛ̀ de yí na.

⁷Ɓɛɛ kinii, mɛ̀ sí ɗoŋ zaŋ ga̧a̧mɔ, wen ká o wannu Filistii nɔ‘i tɛɛ kpa ɗaŋsee zu mɛ.»

⁸David aka Akis: «Nɛ́ ge a̧‘m dee ge, nɛ́ ge a̧ wi-de-tom k’ɛ́nɛ́ dee ɗaŋ yí‘nɛ́ ŋgimbi n'aa hɔɔ nɛnɛ tɛ k’ɛ́nɛ́ hɔ sɔsɔɔ sa a̧ beka nɛ biro ha̧ a̧ mɛ gbɛ o wisɛn ko nyaa wannu na ge?»

⁹Akis kifa nú ha̧ David: «David, mɛ ɔ dee tɛ‘m hee betom ko Sɔ̧ ga; mɔ kpɔk, o gasawi Filistii tɔ̧ɔ̧ ndé, ká mɛ́ nɛ́ biro in yɛɛ na.

¹⁰Mɛ in o wi-de-tom ko wan kɔ-mɛ nɛ tɛ̀ɛ̀ in mɛɛ‘i, ɛ̀nɛ̀ kúr mɛ tutuyɛ sut, kà mɔ be tɛ̀ɛ́ sa̧, ɓɛɛ ɛnɛ sia.»

¹¹David in o bíí kɔ‘i kura mɛ gɔnamɔ wen yaka-a mɛ tutuyɛ sut, ha̧ wa mɛ si si nú Filistii, ɓɛɛ o be Filistii daŋ kɔ‘i si Yizreɛl.