Read Northwest Gbaya 1 SAMUƐL 3 Bible Online

1 SAMUƐL 3 - Northwest Gbaya bible

1 SAMUƐL 3

¹Geɗek Samuɛl duk in Elii de nɛ̀ tom ha̧ GASA WAN. Tɛ ŋgimbi'i, GASA WAN tɔ̧ wen ha̧ bíí dɔk na; a̧ hɔ zu ha̧ bíí dɔk na mbɛt.

²Ŋma wese, Elii ɔ nɛ nù fara n'aa ɔ nù sɛnɛ ɓɔnsɛnɛ; a̧ sɔka kaɗi, ɓɛɛ a̧ zɔk mɔ sa̧ ɓɔna.

³Lamba ko Sɔ̧ tɛ bi hɔ̧ɔ̧ na, ɓɛɛ Samuɛl ɔ kɔ‘i nù sɛn kɔ̧ Tua ko GASA WAN, fara nɛ Kuɓa nɔɔ-tɔk ko Sɔ̧ duk sɛnɛ.

⁴GASA WAN saa Samuɛl, ɓɛɛ Samuɛl kifi nú: «Mi nɛ́ mɔ'ɔ.»

⁵A̧ wara yì si katɛ Elii, a̧ tɔ̧a̧: «Ɛ́nɛ́ sàá‘m, mi nɛ́ mɔ'ɔ.» Elii kifa nú ha̧ a̧: «Mi sa mɛ na, mɛ̀ sí ɗoŋ mɛ̀ ɔ́ nù.» Samuɛl sii ɗoŋ nɛ́ɛ̀ ɔ nù.

⁶GASA WAN saa Samuɛl woyo. Samuɛl kura nɛ́ tɛ́ Elii, a̧ tɔ̧a̧: «Ɛ́nɛ́ sàá‘m, mi nɛ́ mɔ'ɔ.» Elii kifa nú: «Bem kɔ‘m, mi sa mɛ na, mɛ̀ sí ɗoŋ mɛ̀ ɔ́ nù.»

⁷Samuɛl tɛ iŋ so GASA WAN nɛti na, a̧ tɛ iŋ tiger wen ko GASA WAN hɔ̧ɔ̧ na.

⁸GASA WAN saa Samuɛl war taar-a woyo; Samuɛl kura nɛ́ɛ̀ kpa Elii, ɓɛɛ tɔ̧: «Ɛ́nɛ́ sàá‘m, mi nɛ́ mɔ'ɔ.» Ɓɛɛ nɛ ɗoŋ, Elii iŋa'e nɛ́ GASA WAN a̧ sa Samuɛl.

⁹Nɛ́ mɔ'ɔ n'aa tɔ̧ɔ̧ ha̧ Samuɛl: «Mɛ̀ sí ɗoŋ mɛ̀ ɔ́ nù; ɓɛɛ kà wa a̧ saa mɛ, mɛ̀ tɔ̧́ ndé: ‹Ɛ̀nɛ̀ tɔ̧́ wen, GASA WAN, wi-de-tom k’ɛ́nɛ́ a̧ zii'i.› » Ɓɛɛ Samuɛl si ɗoŋ ɔ nù fara kɔ‘i.

¹⁰GASA WAN tɛɛ, ɓɛɛ usi tɛ. A̧ saa mɔ hee nɛti ga: «Samuɛl! Samuɛl!» Ɓɛɛ Samuɛl kifi nú: «Ɛ̀nɛ̀ tɔ̧́, wi-de-tom k’ɛ́nɛ́ a̧ zii'i.»

¹¹GASA WAN tɔ̧ɔ̧ ha̧ Samuɛl: «Mi tɛ nɛ̀ɛ́ de ŋma mɔ sɛn Israɛl ha̧ ɗɛɗɛ bíí lɛŋ nɛ tɛ zii wen-aa mɛ gɔn.

¹²Wese'i, mi tɛ de mɔ n'am taa so zu o bíí nutua ko Elii, tɛ ku̧u̧naŋ-a hɔ tɛ kaɗa-a.

¹³Mi tɔ̧ɔ̧ ha̧ Elii ndé, mi pi̧i̧ bɔnɛ zu o bíí nutua kɔ̧-a̧ ɓɔnsɛnɛ wen ɗaŋmɔ kɔ̧-a̧; a̧ iŋa'e o bem kɔ̧-a̧ da̧ nɛ Sɔ̧, ɓɛɛ a̧ kɔ̧ usa ɗoŋ mɔ ha̧ wa na.

¹⁴Mɛ̀ nɛ́ hegɔ sa'm kan mɔ ha̧ o bíí nutua ko Elii ndé, kóó nɛ́ ɗafa-sɔ̧, kóó nɛ́ ha̧a̧mɔ beka bi zu ɗaŋmɔ ko o bíí nutua ko Elii na.»

¹⁵Samuɛl ɔɔ nù hɔ mɛ tutuyɛ, ɓɛɛ a̧ hu̧i̧ o nú Tua ko GASA WAN. A̧ de so nɛ kíì wee ɗoŋ hɔɔ-zu nɛ̀ GASA WAN hɔɔ ha̧ a̧ ha̧ Elii.

¹⁶Elii saa Samuɛl ɓɛɛ tɔ̧ ha̧ a̧: «Bem kɔ‘m Samuɛl.» Samuɛl kifa nú: «Mi nɛ́ mɔ'ɔ.»

¹⁷Elii aka mɔ: «Nɛ́ ge wen ge a̧ GASA WAN tɔ̧ɔ̧ ha̧ mɛ ge nde? Ká mɛ́ hu̧si nɛ‘m na; mi aia nú ha̧ mɛ. GASA WAN a̧ dé ɗaŋmɔ in mɛɛ in a̧ a̧ é mbe-a zu a̧ mbɛt kà mɛ̀ nɛ́ hu̧sa̧ ŋma gba̧a̧ mɔ kpɔk tɛ mɔ n'aa tɔ̧ɔ̧ ha̧ mɛ‘i nɛ̀‘m.»

¹⁸Ɓɛɛ Samuɛl we ɗoŋ mɔ lɛŋ ha̧ Elii. A̧ hu̧si ŋma mɔ kpɔk nɛ̀ a̧ na. Elii tɔ̧a̧: «A̧ nɛ́ GASA WAN, a̧ a̧ dé mɔ lɛŋ nɛ see-aa kɔ̧-a̧.»

¹⁹Samuɛl duka gasi nɛnɛ, GASA WAN duka in a̧ ɓɔnsɛnɛ, ɓɛɛ a̧ e ha̧ ŋma mɔ nɛ̀ Samuɛl tɔ̧a̧ mɛ tik nù géè na.

²⁰Israɛl lɛŋ ku̧u̧naŋ-a nɛ̀ Dan hɔ nɛnɛ sɛn Bɛrseba iŋa'e, Samuɛl nɛ́ wi-tɔ̧-wen oi nú GASA WAN.

²¹GASA WAN duka usi nɛ tɛ siti sɛn Silo, wen a̧ duk hɔ nɛ̀ zu ha̧ Samuɛl tɛ o wen kɔ̧-a̧ sɛn Silo,