Read Northwest Gbaya 1 SAMUƐL 31 Bible Online

1 SAMUƐL 31 - Northwest Gbaya bible

1 SAMUƐL 31

¹O be Filistii baa biro dúk nɛ̀ Israɛl, ɓɛɛ o be Israɛl yu mɔ ti o be Filistii. O wɔr ya nɛ̀ mbɔɗɔnu sinɛ sɛn zu kaya Gilboa.

²O be Filistii nasa Saul in o bem kɔ‘i. Wa gbɛɛ Jɔnataŋ, Abinadab ká bá nɛ̀ Malki-Sua; wi nɔ‘i lɛŋ nɛ́ bem ko Saul.

³Biro kinii mɔi̧a ŋmaa lɛŋ nasi nɛ Saul. O wi-pi̧-góò kɔɓa a̧; ɓɛɛ kíì ba a̧ tɛ zɔka wa.

⁴A̧ tɔ̧ɔ̧ ha̧ baka-nyaŋa kɔ̧-a̧: «Mɛ̀ dák gba-paa kɔ-mɛ tok nɛ‘m gbɛ yinɛ, wen ká o wi-mbii-bɔr nɔ'ɔ tɛ́ɛ̀ gbɛ‘m, ɓɛɛ ká wa mam am.» Ɓɛɛ baka-nyaŋa kɔ̧-a̧‘i kɔ̧ na, wen kíì dee a̧ nyɛmna. Nɛ́ mɔ'ɔ nɛ̀ Saul daka gba-paa kɔ‘i, ɓɛɛ hɔ̧fi̧ tik yí-a.

⁵Ɓɛɛ hee mɔ'ɔ nɛ̀ baka-nyaŋa'i zɔka'e, Saul fea ga, a̧ mbɛt daka gba-paa kɔ̧-a̧ gbɛ nɛ̀ tɛ-a, ɓɛɛ a̧ fe in a̧ mbɛt.

⁶Saul in o bem kɔ‘i taar in baka-nyaŋa kɔ‘i gu nɛ̀ o bíí kɔ‘i lɛŋ fee kpɔk wese'i.

⁷Ŋgimbi nɛ̀ o be Israɛl nɛ̀ yaa so nɛ̀ kɔ̧ ɗɔŋgɔ nɛ̀ war kur zɔka'e, o wi-biro ko Israɛl yuu mɔ, Saul gu nɛ̀ o bem kɔ‘i fee mbɛt, wa yuu mɔ e ye kɔ-wa duk, ɓɛɛ o be Filistii tɛ́ɛ̀ ba o ye kɔ-wa.

⁸Ɔɔ mɔ sa̧ kaɗi, ɓɛɛ o be Filistii tɛ mɛ zɔk o wɔr wen ha̧ wa mɛ kai o mɔ kɔ-wa. Wa tɛɛ kpa Saul in o bem kɔ‘i taar nɛ̀ fea zu kaya Gilboa.

⁹Wa ɓira zu Saul, wa kaia o boi-biro kɔ̧-a̧; wa kaia o mɔɔ-de-biro nɔ‘i usi nɛnɛ dam nú Filistii lɛŋ. Wa hura nyɛrɛ mɔ‘i nɛnɛ ha̧ o géé-sɔ̧ kɔ-wa in o dukbíí kɔ-wa.

¹⁰Wa nɛ̀ɛ́ a o mɔɔ-de-biro ko Saul sɛn kɔ̧ tua ko o sɔ̧ kɔ-wa Astarte, ɓɛɛ ko wɔr-aa, wa nɛ̀ɛ̀ mgboi zaŋ garo ye Bɛt-Seaŋ.

¹¹Ŋgimbi nɛ̀ o bíí saaye Yabɛs sɛn nú Galad zia nyɛrɛ mɔ nɛ o be Filistii dee in Saul'i,

¹²o ŋgaŋa wi-biro lɛŋ baa yuwar yak, mɛ zɛ mɛ zɛ; wa nɛ̀ɛ̀ kai wɔr Saul in o bem kɔ̧-a̧ tɛ ŋgeŋ Bɛt-Seaŋ yinɛ pii sɛn Yabɛs, ɓɛɛ wa tɛ́ɛ̀ dɔ.

¹³Wa kaia o gba̧a̧-tɛ-wa, ɓɛɛ wa gun sɛn ɗɔɔ ŋma be te[16] sɛn Yabɛs, ɓɛɛ wa zim yì tɛ zɛ mɔɔrɔ-ɗoŋ-yiitoo.