Read Northwest Gbaya 1 SAMUƐL 5 Bible Online

1 SAMUƐL 5 - Northwest Gbaya bible

1 SAMUƐL 5

¹Ŋgimbi nɛ o be Filistii baa Kuɓa nɔɔ-tɔk ko Sɔ̧ kaɗi, wa baa a̧ nɛ Ebɛn-Ezɛr si Asdod.

²O be Filistii baa Kuɓa nɔɔ-tɔk ko Sɔ̧ nɛnɛ si kɔ̧ tua-wor Dagɔŋ. Wa ee kuɓa katɛ Dagɔŋ.

³Mɔ sa̧a̧ mɛ tutuyɛ, o be Asdod tɛɛ ye kɔ̧ tua-wor Dagɔŋ, wa tɛɛ kpa Dagɔŋ nɛ hɔ̧fa̧ tik nù, gu yí nù ti Kuɓa nɔɔ-tɔk ko GASA WAN. Wa baa Dagɔŋ nɛ̀ ŋgɔn e oi-aa woyo.

⁴Ɓɛɛ mɛ sa̧a̧mɔ mɛ tutuyɛ woyo, Dagɔŋ tika so nù, ba yí gu nù ti Kuɓa nɔɔ-tɔk ko GASA WAN. Zu Dagɔŋ in o er-a yiitoo ɓira a nù mgbák dadaa-nú tua. Nɛ́ ɔm Dagɔŋ a̧ ɓɔna nɛ̀ oi-aa ɓɛɛ.

⁵Mɛ̀ nɛ́ wen hegɔ, sa o wi-ɗafi Dagɔŋ in o bíí-wor-a lɛŋ i̧si̧ dadaa-nú tua-wor Dagɔŋ na hɔ sɔsɔɔ.

⁶GASA WAN usa bɔnɛ ha̧ o be Asdod, ɓɛɛ a̧ pi̧ wa tɛ gasa kíì. A̧ pi̧i̧ mbɔ-yì tɛ o be Asdod in o bíí nɛ ya katɛ wa.

⁷Ŋgimbi nɛ o be Asdod zɔka mɔ‘i, wa tɔ̧a̧: «Ká Kuɓa nɔɔ-tɔk ko Sɔ̧ ko Israɛl duk tɛ k’ɛɛ na, wen a̧ usi nɛ́ bɔnɛ h’ɛ́ɛ́ in ha̧ sɔ̧ k’ɛɛ Dagɔŋ.»

⁸Wa saa o wannu Filistii tɛnɛ tɛ kɔ-wa, ɓɛɛ wa ak mɔ: «Nɛ́ ge ɛ̀ɛ̀ tɛ́ dè nɛ̀ Kuɓa nɔɔ-tɔk ko Sɔ̧ ko Israɛl ge nde?» Wa kifa nú: «Ɛɛ tɛ ba Kuɓa nɔɔ-tɔk ko Sɔ̧ ko Israɛl yaknɛ si Gat.» Ɓɛɛ wa ba Kuɓa nɔɔ-tɔk ko Sɔ̧ ko Israɛl yaknɛ.

⁹Ɓɛɛ ɗoŋ nɛ wa baa a̧ yaknɛ kaɗi, GASA WAN pi̧i̧ bɔnɛ zu o bíí saaye Gat; saaye lɛŋ duka tɛ gasa kíì, wen a̧ pi̧i̧ mbɔ-yì tɛ o bíí lɛŋ, ku̧u̧naŋ-a nɛ tɛ o obem hɔ nɛnɛ tɛ o gasawi.

¹⁰Wa toma Kuɓa nɔɔ-tɔk ko Sɔ̧ si sɛn Ekrɔŋ, ɓɛɛ ŋgimbi nɛ Kuɓa nɔɔ-tɔk ko Sɔ̧ hɔɔ sɛn Ekrɔŋ kaɗi, o be Ekrɔŋ hiɗa mɔ tɔ̧ nɛnɛ: «Wa baa Kuɓa nɔɔ-tɔk ko sɔ̧ ko Israɛl tɛnɛ h’ɛ́ɛ́, ha̧ wa mɛ gbɛ yɛ in o bíí k’ɛɛ lɛŋ!»

¹¹Wa saa o wannu Filistii tɛnɛ lɛŋ, ɓɛɛ wa tɔ̧: «Ɛ̀nɛ̀ tóm Kuɓa nɔɔ-tɔk ko Sɔ̧ ko Israɛl sinɛ, a̧ a̧ sí ɗoŋ si fara kɔ̧-a̧, wen ká a̧ tɛɛ gbɛ yɛ in o bíí k’ɛɛ.» Gasa kíí-gbɛ-fio tika so nù saaye lɛŋ, wen nɛ̀ Sɔ̧ usi nɛ bɔnɛ ha̧ wa nyɛmna.

¹²Mbɔ-yì ha̧a̧ o bíí nɛ fe so kɔ‘i na, ɓɛɛ hiɗimɔ ŋga bɔnɛ ko o wi saaye daŋ hɔ yiwese.