Read Northwest Gbaya 1 SAMUƐL 6 Bible Online

1 SAMUƐL 6 - Northwest Gbaya bible

1 SAMUƐL 6

¹Kuɓa nɔɔ-tɔk ko GASA WAN duka tɛ ko o be Filistii fio-zɛ mɔɔrɔ-ɗoŋ-yiitoo.

²O be Filistii saa o wi-ɗafi-sɔ̧ in o wan-gbana, ɓɛɛ ak mɔ: «Nɛ́ ge ɛ̀ɛ̀ tɛ́ dè nɛ̀ Kuɓa nɔɔ-tɔk ko GASA WAN ge? Ɛ̀nɛ̀ úsí mɔ n’ɛɛ tɛ de mɛ tom nɛ a̧ siɗoŋ si oi-aa mɛ.»

³Wa kifa nú: «K’ɛ̀nɛ̀ nɛ́ kɔ̧ɔ̧ mɛ tom Kuɓa nɔɔ-tɔk ko Sɔ̧ ko Israɛl sinɛ, k’ɛ́nɛ́ tom a̧ sinɛ géè na. Ɛ̀nɛ̀ é ŋma mɔ nɛ ha̧a̧mɔ ɗafa-mgbara-ŋmaa in Sɔ̧ zu-a tom nɛnɛ sinɛ. Nyimmɔ k’ɛ́nɛ́ tɛ kaɗi, ɓɛɛ ɛ́nɛ́ tɛ iŋ mɔ nɛ dee ha̧ er Sɔ̧ ko Israɛl mɛ kaɗi nɛ usa bɔnɛ h’ɛ́nɛ́ na'i.»

⁴Wa aka mɔ woyo: «Nɛ́ ge mɔ ge ɛ̀ɛ̀ tɛ́ hà̧ nɛ̀ ha̧a̧mɔ ɗafa-mgbara-ŋmaa in Sɔ̧ e zu-a ge?» Wa kifa nú: «Ɛ́nɛ́ tɛ́ mbo mɔ nɛ̀ hɔɔ ŋmaa in suia-mbɔ-yì mɔɔrɔ nɛ lɔr, ɓɛɛ ɛ́nɛ́ mboo mɔ nɛ hɔɔ ŋmaa in zɔya mɔɔrɔ nɛ lɔr mbɛt, nyɛm nɛ̀ ɗoŋ o wannu Filistii, wen nɛ́ kpɔk ŋgamɔ‘i a̧ kpaa'nɛ in o wannu k’ɛ́nɛ́.

⁵Ɛ̀nɛ̀ mbó o mbɔ-yì in o zɔya nɛ̀ ɗaŋ nù k’ɛ́nɛ́, ɓɛɛ ɛ̀nɛ̀ há̧ ha̧ Sɔ̧ ko Israɛl gasi nɛ a̧. Ŋmafara a̧ tɛ kaɗi dee bɔnɛ in'nɛ̀ɛ́ in o sɔ̧ k’ɛ́nɛ́ gu nɛ nù k’ɛ́nɛ́ mbɛt.

⁶Ɛ́nɛ́ tɛ ŋgai k’ɛ́nɛ́ see'nɛ́ hee mɔ'ɔ nɛ o be Egiptɛ in wannu ŋgaia so nɛnɛ'ɛ ga mɛ de ge? Ŋgimbi nɛ̀ Sɔ̧ ɗaŋa nɛ̀ wa, bó nɛ́ wa ee o be Israɛl yak na nde?

⁷Kinii, ɛ̀nɛ̀ dé mbe keekee, ɓɛɛ ɛ̀nɛ̀ ɗáfí in o nana-ndai yiitoo nɛ̀ ha̧ nɛ́ bere ha̧ bem, nɛ̀ kpáŋá tɛ hɔ ger-wa hɔ̧ɔ̧ na; ɛ̀nɛ̀ kún ndai nɔ‘i tɛ keekee, ɓɛɛ ɛ̀nɛ̀ káí o be-a pii ɗoŋ fara ɔ kɔ-wa.

⁸Ɛ̀nɛ̀ bá Kuɓa nɔɔ-tɔk ko GASA WAN e zu keekee. Ɓɛɛ nɛ̀ war ko o mɔ nɛ‘i dee nɛ lɔr n’ɛnɛ ha̧ nɛ̀ ha̧a̧mɔ ɗafa-mgbara-ŋmaa in Sɔ̧ e zu-a'i, ɛ̀nɛ̀ á wa kɔ̧ kuɓa é ká̧ a̧, ɓɛɛ ɛ̀nɛ̀ é ha̧ wa yak.

⁹Ɓɛɛ ɛ̀nɛ̀ zɔ́k mɔ: kà Kuɓa nɔɔ-tɔk a̧ baa nɛ́ yuwar nù kɔ‘i daŋ nɛnɛ si war Bɛt-Sɛmɛs, ɓɛɛ nɛ́ Sɔ̧ ko Israɛl a̧ dee h’ɛ́ɛ́ mɛ zɔk gasa bɔnɛ'ɛ; kà bó hegɔ na, ɛ́ɛ́ tɛ iŋ bó nɛ́ er-a a̧ gusa yɛ na; ɓɛɛ nɛ́ ŋma hɔɔ-kɔ-mɔ.»

¹⁰O bíí dee hee mɔ‘i ga. Wa kaia nana-ndai yiitoo nɛ ɓɔna fara ha̧ bere ha̧ bem, ɓɛɛ wa kun wa tɛ keekee. Wa dora o be geɗek-a ɓɔn fara ɔ kɔ-wa.

¹¹Wa baa Kuɓa nɔɔ-tɔk ko GASA WAN e zu keekee in kuɓa nɛ o zɔya in o mbɔ-yì nɛ‘i dee nɛ lɔr ya sɛnɛ.

¹²O ndai baa yuwar Bɛt-Sɛmɛs zééŋ, ɓɛɛ wa ba kànà nɛ́ kpɔk yuwar'i dɔm nɛ mɔ yak nɛnɛ. Wa a̧r si wiiko, kóó si war gale na mbɛt. O wannu Filistii nɛɛ ɗoŋ wa hegɔɔ hɔ gbìsì Bɛt-Sɛmɛs.

¹³O bíí Bɛt-Sɛmɛs mɔi̧ so nɛ alkamaari kɔ‘i sɛn kɔ̧ ɗɔŋgɔ. Wa baa yí-wa nɛ ŋgɔn, ɓɛɛ wa zɔk Kuɓa nɔɔ-tɔk. Wa kpaa desee nyɛmna.

¹⁴Ŋgimbi nɛ keekee hɔɔ fara ko Josue sɛn Bɛt-Sɛmɛs kaɗi, a̧ yora. Ŋma gasa ta duka hi̧i̧. Wa mbaŋa gua-keekee, ɓɛɛ wa dɔ ndai nɔ‘i nɛ̀ kpoo-sɔ̧ ha̧ GASA WAN.

¹⁵O be Levii bura so Kuɓa nɔɔ-tɔk ko GASA WAN in kuɓa nɛ o mɔ nɛ‘i dee nɛ lɔr duka kɔ̧ a̧ e nù zu gasa ta. Wese'i, o bíí Bɛt-Sɛmɛs dɔɔ kpoo-sɔ̧; ɓɛɛ wa gɔn saɗi ɗafi nɛ̀ mgbara ŋmaa in GASA WAN.

¹⁶Ɗoŋ nɛ o wannu Filistii mɔɔrɔ zɔka mɔ‘i kaɗi, wa sii ɗoŋ Ekrɔŋ kpɔk kale wese'i.

¹⁷O mboo mbɔ-yì nɛ‘i dee nɛ̀ lɔr nɛ̀ o be Filistii ha̧a̧ nɛ̀ ha̧a̧mɔ ɗafa-mgbara-ŋmaa in Sɔ̧ ha̧ GASA WAN nɛ́ mɔɔ nɔ'ɔ: ko Asdod kpɔk, ko Gaza kpɔk, ko Askelɔŋ kpɔk, ko Gat kpɔk in ko Ekrɔŋ kpɔk mbɛt.

¹⁸O zɔya nɛ‘i dee nɛ lɔr dama o wannu Filistii mɔɔrɔ lɛŋ nɛ ɔ wan zu o ye nɛ wa dee garo zik nɛnɛ in géè-a. Gasa ta nɛ wa ee Kuɓa nɔɔ-tɔk ko GASA WAN zu a̧ nɛ̀ duk hɔ sɔsɔɔ fara ko Josue sɛn Bɛt-Sɛmɛs nɛ́ sedaako mɔ‘i.

¹⁹O ŋma bíí Bɛt-Sɛmɛs zɔka so mɔ si kɔ̧ Kuɓa nɔɔ-tɔk ko GASA WAN, ɓɛɛ GASA WAN gbɛ wa; duka nɛ bíí ɓu-mɔɔrɔ-ɗoŋ-yiitoo. O bíí Bɛt-Sɛmɛs duka tɛ zima mɔ wen zu mɔ nɛ GASA WAN dee in wa.

²⁰Nɛ́ mɔ'ɔ nɛ̀ o bíí saaye Bɛt-Sɛmɛs tɔ̧a̧: «Nɛ́ o'o tɛ yor ti GASA WAN Sɔ̧ nɛ ɔ sa̧a̧ o? A̧ tɛ yak tɛ k’ɛɛ si sɛn tɛ ko ge bíí ge?»

²¹Wa toma o betom nɛnɛ ha̧ o bíí saaye Kiriat-Yearim mɛ tɔ̧ ha̧ wa ndé: «O be Filistii toma Kuɓa nɔɔ-tɔk ko GASA WAN pii ɗoŋ. Ɛ̀nɛ̀ zír, ɛ̀nɛ̀ tɛ́ɛ̀ bá a daŋnɛ sitɛ‘nɛ́ mɛ.»