Read Northwest Gbaya 1 SAMUƐL 7 Bible Online

1 SAMUƐL 7 - Northwest Gbaya bible

1 SAMUƐL 7

¹O bíí Kiriat-Yearim tɛɛ ba Kuɓa nɔɔ-tɔk ko GASA WAN sitɛ wa. Wa baa kuɓa'i nɛnɛ si kɔ̧ tua ko Abinadab sɛn zu kaya, ɓɛɛ wa e bem kɔ̧-a̧ Eleazar nɛ̀ wi-pɛm-kuɓa'i.

²Kuɓa nɔɔ-tɔk duka sɛn Kiriat-Yearim ɗoŋ-aa nyɛi̧ tɛ pɛ ɓu-yiitoo, ɓɛɛ o bíí nutua ko Israɛl lɛŋ ai nú sitɛ GASA WAN.

³Samuɛl tɔ̧ɔ̧ ha̧ o bíí nutua ko Israɛl lɛŋ: «K’ɛ̀nɛ̀ nɛ́ pia ɗoŋ tɛ GASA WAN nɛ̀ see'nɛ́ kpɔk, ɛ̀nɛ̀ fó o gɔni sɔ̧ in o Astarte tɛ k’ɛ́nɛ́ yinɛ; ɛ̀nɛ̀ é see'nɛ́ tɛ GASA WAN, ɛ̀nɛ̀ gásí nɛ́ a̧ kpɔk ɓɛɛ, ɓɛɛ a̧ tɛ gbo'nɛ́ er o be Filistii.»

⁴O be Israɛl ee o sɔ̧ Bal in Astarte duk, ɓɛɛ wa gasi nɛ́ GASA WAN kpɔk ɓɛɛ.

⁵Nɛ́ mɔ'ɔ nɛ̀ Samuɛl tɔ̧a̧: «O be Israɛl lɛŋ a̧ mɔ́í̧ sɛn Mispa, ɓɛɛ mi tɛ kɔfi GASA WAN wen'nɛ́.»

⁶Wa mɔi̧a ŋmaa sɛn Mispa, wa ɗuu yì, ɓɛɛ wa tɛn a nù ti GASA WAN. Wa zima yì wese'i, ɓɛɛ wa tɔ̧: «Ɛɛ dee ɗaŋmɔ ti GASA WAN.» Ɓɛɛ Samuɛl ɔ wan zu o be Israɛl sɛn Mispa.[4]

⁷O be Filistii zia'e, o be Israɛl mɔi̧a ŋmaa sɛn Mispa, ɓɛɛ o wannu Filistii daŋ mɛ ba biro dúk nɛ̀ wa. O be Israɛl zia mɔ‘i, ɓɛɛ kíì o be Filistii de wa.

⁸Wa tɔ̧a̧ ha̧ Samuɛl: «K’ɛ́nɛ́ duk nɛ̀ oi nú‘nɛ́ na! K’ɛ́nɛ́ e yɛ duk na! Ɛ̀nɛ̀ áí nú ha̧ GASA WAN Sɔ̧ k’ɛɛ mɛ kpasi yɛ er o be Filistii.»

⁹Samuɛl baa be-sami nɛ ɓɔna fara ama bere, ɓɛɛ a̧ dɔ nɛ̀ kpoo-sɔ̧ ha̧ GASA WAN; a̧ kɔfa GASA WAN wen Israɛl, ɓɛɛ GASA WAN zii kɔfamɔ kɔ̧-a̧.

¹⁰Ŋgimbi nɛ Samuɛl dɔ nɛ kpoo-sɔ̧ ha̧ GASA WAN'i, o be Filistii a̧ tɛ so mɛ bi o be Israɛl‘i. Ŋgimbi'i, GASA WAN dee ha̧ kórò mɛ mbaŋ tuɓi nɛnɛ a zu o be Filistii, bele zara wa, ɓɛɛ Israɛl gbin biro.

¹¹O be Israɛl gboo nɛ̀ Mispa, ɓɛɛ duk ɗoŋ o be Filistii nɛ̀ biro hegɔɔ hɔ ɗɔɔ kaya Bɛt-Kar.

¹²Samuɛl baa gasa ta e ŋgɔn mgbara Mispa in Sɛn, ɓɛɛ a̧ sa nin-a nɛ́ Ebɛn-Ezɛr, wen nɛ tɔ̧: Ta-gbak-bíí, wen a̧ tɔ̧a̧: «GASA WAN gbaka ɛɛ hɔ sɛn hɛ̧ɛ̧.»

¹³Tɛ o be Filistii gbina, wa pii ɗoŋ sɛn nú Israɛl ɓɔna; ɓɛɛ GASA WAN usi bɔnɛ ha̧ o be Filistii ŋgimbi nɛ Samuɛl duka nɛnɛ kpasa.

¹⁴O ye ko Israɛl nɛ̀ o be Filistii ɓara so er-wa lɛŋ pia ɗoŋ nɛ dama-a, ku̧u̧naŋ-a nɛ Ekrɔŋ hɔ nɛnɛ Gat; wa baa nù kɔ-wa er o be Filistii lɛŋ. Ɓɛɛ ga̧a̧mɔ pii ɗoŋ mgbara o be Israɛl in o be Amɔr.

¹⁵Samuɛl ɔɔ wan zu Israɛl hɔ wese n'aa fee nɛnɛ.

¹⁶Ti pɛ kpɔk kpɔk, a̧ yara nù kɔ̧-a̧ zɔk nɛ mɔ nɛnɛ; a̧ ku̧u̧naŋ-a nɛ̀ Bɛtɛl, Gilgal hɔ nɛnɛ sɛn Mispa. Ɓɛɛ tɛ nɛa-a kɔ̧-a̧‘i, a̧ gɔn kànà nɛ́ kita zu o be Israɛl yaknɛ.

¹⁷Ɓɛɛ a̧ pia ɗoŋ pii Rama wen nɛ́ hi̧i̧ à̧ tua kɔ̧-a̧ duk so sɛnɛ, in nɛ́ hi̧i̧ a̧ a̧ duk ɔ wan zu Israɛl. Nɛ́ hi̧i̧ a̧ a̧ mboo nɛ̀ fara-ɗafi-sɔ̧ ha̧ GASA WAN mbɛt.