Read Northwest Gbaya 1 SAMUƐL 8 Bible Online

1 SAMUƐL 8 - Northwest Gbaya bible

1 SAMUƐL 8

¹Ŋgimbi nɛ̀ Samuɛl sɔka kaɗi, a̧ ee o bem kɔ̧-a̧ mɛ ɔ wan zu Israɛl.

²Nin kaya bem kɔ̧-a̧ nɛ Jɔɛl, hɔ-ɗoŋ-aa nɛ Abiya. Wa lɛŋ yaa so nɛ́ wi-gɔn-kita sɛn Bɛrseba.

³Mɔ kpɔk, o bem kɔ̧-a̧ zɔk ɗoŋ deemɔ kɔ̧-a̧ na: taamɔ kɔ-wa duka nɛ́ tɛ kpaamɔ batɛ. Wa kɔ̧ kɔ-wa nɛ́ mɔ nɛ̀ bíí ha̧ ha̧ wa, ɓɛɛ wa ee kɔ-wa deemɔ nɛ̀ yuwar-a duk.

⁴Hegɔ o gasawi Israɛl lɛŋ mɔi̧a ŋmaa, ɓɛɛ wa tɛ́ɛ̀ kpa Samuɛl sɛn Rama.

⁵Wa tɔ̧ɔ̧ ha̧ a̧: «Ɛ́nɛ́ sɔka kaɗi, ɓɛɛ o bem k’ɛ́nɛ́ zɔk ɗoŋ deemɔ k’ɛ́nɛ́ na. Ɛ̀nɛ̀ é ŋma wan ha̧ duk zu yɛ hee wan nɛ duk zu o ŋma dukbíí ga.»

⁶Wen nɛ̀ wa tɔ̧ɔ̧ ha̧ Samuɛl'e, a̧ a̧ é ŋma wan ha̧ duk zu wi wó‘i, de tɛ-a na, ɓɛɛ a̧ kɔfi GASA WAN.

⁷GASA WAN kifa nú ha̧ Samuɛl: «Mɛ̀ dé mɔ nɛ o wi nɔ'ɔ ak er-mɛ'ɛ lɛŋ. Bo nɛ mɛ́ a̧ wa pi̧ taŋ na, nɛ̀‘m a̧ wa pi̧ taŋ. Wa kɔ̧ ha̧‘m mɛ ɔ wan zu wa ɓɔna.

⁸Kpɔk mɔ nɛ wa dee so in am ŋgimbi n'am gboo so nɛ̀ wa nú Egiptɛ yinɛ hɔ ŋgimbi kinii, nɛ́ mɔ‘i a̧ wa de siti. Wa pi̧i̧ so'm taŋ mɛ gasi nɛ́ o géé sɔ̧. Nɛ́ kpɔk mɔ‘i a̧ wa de in mɛɛ‘i.

⁹Ɓɛɛ mɛ̀ dé kànà kɔ-mɛ nɛ́ mɔ nɛ wa ak er-mɛ. Mɔ kpɔk, mɛ́ tɛ mbaŋ tɛ-wa nɛ̀ de-a in mɛ tɛ usi yuwar tom ko wan nɛ tɛ duk zu wa'i ha̧ wa.»

¹⁰Samuɛl wee ɗoŋ wen ko GASA WAN lɛŋ ha̧ dukbíí nɛ ak nɛ wan er-a.

¹¹A̧ tɔ̧a̧: «Yuwar tom ko wan nɛ tɛ duk zu'nɛ́ nɛ́ mɔ'ɔ. A̧ tɛ fo o bem k’ɛ́nɛ́ a tɛ tom-keekee-nyaŋa in tɛ tom-baka-nyaŋa, ɓɛɛ wa tɛ ma yì ti keekee-nyaŋa kɔ̧-a̧.

¹²A̧ tɛ e wa nɛ̀ wi-duk-zu bíí booro, in o bíí ɓu-mɔɔrɔ. A̧ tɛ de ha̧ wa mɛ wa fɔ kɔ̧-a̧, ha̧ wa mɛ mɔi̧ nyɔnɔ kɔ̧-a̧, ha̧ wa mɛ dui o boi-biro kɔ̧-a̧ in mɔɔ-hɛr-nyaŋa e tɛ keekee kɔ̧-a̧.

¹³A̧ tɛ kai o be-okoo k’ɛ́nɛ́ nɛ̀ o kó-de-nyama, o kó-gi-nyɔŋmɔ in o kó-gi-brɛt.

¹⁴A̧ tɛ dor o de fɔ k’ɛ́nɛ́, de nyak-dɔ̧ɔ̧ k’ɛ́nɛ́, sɛka o de te-nɔ̧́ k’ɛ́nɛ́ ha̧ o gasawi ko o wi-de-tom kɔ̧-a̧.

¹⁵A̧ tɛ ba zu o nyɔnɔ k’ɛ́nɛ́ in zu o nyak-dɔ̧ɔ̧ k’ɛ́nɛ́, ɓɛɛ a̧ tɛ ha̧ ha̧ o kpàná kɔ̧-a̧ in ha̧ o wi-de-tom kɔ̧-a̧.

¹⁶A̧ tɛ kai o wi-de-tom k’ɛ́nɛ́, wiwii in okoo lɛŋ, gu nɛ o de ndai[5] k’ɛ́nɛ́, in o tuifuu k’ɛ́nɛ́ lɛŋ ha̧ wa mɛ de tom kɔ̧-a̧.

¹⁷A̧ tɛ ba zu o mɔ-dai k’ɛ́nɛ́, ɓɛɛ ɛ́nɛ́ nɛ̀ tɛ‘nɛ́ tɛ kifi nɛ́ o bara kɔ̧-a̧.

¹⁸Wese'i, ɛnɛ tɛ ai nú‘nɛ́ nɛ ŋgaya-a zu wan k’ɛ́nɛ́ n’ɛnɛ hoka so; mɔ kpɔk, GASA WAN beka kifi nú wese'i na.»

¹⁹Dukbíí kɔ̧ zia wen ko Samuɛl na, ɓɛɛ wa tɔ̧: «Weyaa, ɛɛ kɔ̧ɔ̧ mɛ kpa wan.

²⁰Ɓɛɛ ɛɛ mbɛt tɛ ya hee o dɔka zuduk bíí ga: wan k’ɛɛ tɛ gɔn kita zu yɛ; a̧ tɛ duk ti, ɓɛɛ a̧ bíí o biro k’ɛɛ.»

²¹Samuɛl zia wen ko o be Israɛl lɛŋ, ɓɛɛ a̧ nɛ́ɛ̀ we ɗoŋ-aa ha̧ GASA WAN.

²²Ɓɛɛ GASA WAN kifi nú ha̧ a̧: «Mɛ̀ zíí wen kɔ-wa, a̧ mɛ̀ há̧ wan ha̧ wa.» Ɓɛɛ Samuɛl tɔ̧ ha̧ o be Israɛl: «Ɛ́nɛ́ kpɔk kpɔk, ɛ̀nɛ̀ sí ɗoŋ si saaye k’ɛ́nɛ́.»