Read Northwest Gbaya 1 SAMUƐL 9 Bible Online

1 SAMUƐL 9 - Northwest Gbaya bible

1 SAMUƐL 9

¹Ŋma bíí nɛ̀ nin-a nɛ́ Kis duka tɛ zuduk o bezaŋ Bɛnjamin. Kis nɛ́ bem ko Abiɛl be-koo Sɛrɔr, be nutua ko Bekɔrat, nɛ duk nɛ ŋma nú-gara ko Afia. A̧ duka so nɛ́ ŋma bezaŋ Bɛnjamin ɓɛɛ a̧ duka nɛ́ tu̧u̧-tɛ bíí mbɛt.

²Kis a̧a̧ so nɛ̀ ŋma bem nɛ̀ nin-a nɛ Saul, nɛ̀ duka nɛ́ de daŋa ŋgaiwi. Ŋma bíí mgbara o be Israɛl nɛ yora so ŋgaiwi hee a̧ ga bo na. A̧ duka so nɛ́ kusa bíí mbɛt; zu-a yaka zu o dɔka bíí lɛŋ.

³Ŋma ŋgimbi, o nana tuifuu ko Kis dáà ko Saul yɔɔ zaŋbɛɛ, ɓɛɛ Kis tɔ̧ ha̧ bem kɔ‘i Saul: «Mɛ̀ mgbɔ́ ŋma wi-de-tom kpɔk, a̧ mɛ̀ yák mɛ̀ kíí o nana tuifuu nɛ yɔa’ɛ.»

⁴Nɛ́ mɔ'ɔ nɛ̀ Saul in wi-de-tom kura, wa ɓira nɛ mgbara kaya Efraim tik sɛn Salisa zir hɔ Salim tik nɛnɛ sɛn nù ko Bɛnjamin takaɗi, wa kpa o tuifuu nɔ‘i na.

⁵Ŋgimbi nɛ wa hɔɔ nù Suf, Saul tɔ̧ɔ̧ ha̧ wi-de-tom nɛ nɛ́ in a̧: «Mɛ̀ tɛ́ ɛ̀ɛ̀ sí ɗoŋ, wen ká dáà kɔ‘m tɛɛ ta mɔ wen yɛ gan zu o nana tuifuu.»

⁶Wi-de-tom kifa nú ha̧ a̧: «Ŋma bíí ko Sɔ̧ ɔ saaye ti yɛ'ɛ. Wi’ɛi a̧a̧ nɛ̀ hura nin nyɛmna. Mɔ n'aa tɔ̧ tɛ hɔ gba̧a̧ nɛ mbetɛ; ɛ̀ɛ̀ nɛ́ tɛ-a iŋ-saŋ-mɔ na, a̧ tɛ tɔ̧ mgbara naŋanɔ n’ɛɛ nɛa h’ɛ́ɛ́.»

⁷Saul tɔ̧ɔ̧ ha̧ wi-de-tom kɔ‘i: «Kaɗa ɛ̀ɛ̀ nɛ, ɓɛɛ k’ɛ̀ɛ̀ nɛ́ hɔɔ ti dáa-wan’ɛi, nɛ́ ge ɛ̀ɛ̀ tɛ ha̧ ha̧ a̧ ge? Nyɔŋmɔ nɛ́ mɔ'ɔ nɛ̀ kaɗa kɔ̧ ŋgoɓo k’ɛɛ kaɗi’ɛ, ɓɛɛ bo nɛ ɔ dee ha'i mɛ ha̧ nɛ nyɔŋmɔ-yari ha̧ bíí ko Sɔ̧ na. Nɛ́ ge ɛ̀ɛ̀ a̧a̧ nɛnɛ ge?»

⁸Wi-de-tom kifa nú ha̧ Saul: «Mi a̧a̧ nɛ ŋma be kɔya bu-mbɔi er-am n'am tɛ ha̧ ha̧ bíí ko Sɔ̧, ɓɛɛ a̧ tɔ̧ɔ̧ mgbara naŋanɔ k’ɛɛ h’ɛ́ɛ́.»

⁹(Ɓeemɛ sɛn Israɛl, kà bíí nɛ́ mɛ́ ak mɔ in Sɔ̧, a̧ tɛ tɔ̧‘e: «Ɛ̀ɛ̀ nɛ́ tɛ wan-zɔk-mɔ,» wen wi sa so wi-tɔ̧-wen oi nú Sɔ̧ nɛ́ «wi-zɔk-mɔ».)

¹⁰Saul tɔ̧ɔ̧ ha̧ wi-de-tom kɔ‘i: «Mɛ tɔ̧ɔ̧ wen nɛ de-a; kaɗa ɛ̀ɛ̀ yak.» Ɓɛɛ wa yak si saaye nɛ bíí ko Sɔ̧ a̧a̧ sɛnɛ‘i.

¹¹Hee mɔ'ɔ nɛ wa daŋ nɛ be kaya mɛ nɛ si saaye ga, wa kpaa ŋmaa in o be-zɔŋa nɛ tɛ mɛ ɗu yì, ɓɛɛ wa ak wa: «Wi-zɔk-mɔ a̧a̧ sɛnɛ nde?»

¹²O be-zɔŋa nɔ‘i kifa nú ha̧ wa: «Ii, wi-zɔk-mɔ a̧a̧ ti'nɛ́‘i, ɛ̀nɛ̀ nɛ́ bee! Mɛ̀ nɛ́ kinii a̧ a̧ tɛ̀ɛ́ saaye wen ha̧ a̧ mɛ duk oi ɗafa-sɔ̧ nɛ o bíí saaye tɛ ɗafi sɛn zu kusa-fara.

¹³Hɔa-a k’ɛ́nɛ́ saaye, ɛnɛ tɛ kpa a̧ nɛti ha̧ a̧ mɛ daŋ si zu kusa-fara wen nyɔŋa mɔ. A̧ tɛ hɔ nɛti sɛka o bíí nyɔŋa mɔ; wen mɛ̀ nɛ́ a̧ a̧ tɛ tok de yoŋgo zu ɗafa-sɔ̧, sɛka o bíí nɛ wa saa nyɔŋa mɔ. Kinii, ɛ̀nɛ̀ dáŋ, wen sɔsɔɔ ɛnɛ tɛ nɛ̀ɛ́ kpa a̧.»

¹⁴Wa daŋa si saaye. Ŋgimbi nɛ wa ye nɛ̀ ye, Samuɛl gbo so kɔ‘i gboo mɛ daŋ si zu kusa-fara, ɓɛɛ wa kpa ŋmaa.

¹⁵Zɛ kpɔk nɛti ha̧ Saul mɛ hɔ, GASA WAN mbaŋa so tɛ Samuɛl:

¹⁶«Sa̧a̧mɔ hee ŋgimbi kinii ga, mi tɛ tom ŋma bíí nù ko Bɛnjamin tɛnɛ ha̧ mɛ. Mɛ tɛ tɛn nɔ̧́ a zu-a ha̧ a̧ mɛ ɔ wan zu dukbíí kɔ‘m; a̧ tɛ gbo wa er o be Filistii yinɛ, wen mi zɔka bɔnɛ ko o bíí in hiɗimɔ-bɔnɛ kɔ-wa hɔɔ tɛ‘m mbɛt.»

¹⁷Ŋgimbi nɛ Samuɛl zɔka Saul fara tɛa-a, GASA WAN fu̧i̧a̧ wen ha̧ a̧: «Wi n'am tɔ̧ɔ̧ nɛnɛ'ɛ nɛ́ mɔ'ɔ; nɛ́ a̧ a̧ tɛ ɔ wan zu dukbíí kɔ‘m.»

¹⁸Saul nɛɛ si katɛ Samuɛl nú garo, ɓɛɛ tɔ̧ ha̧ a̧: «Mi ai nú h’ɛ́nɛ́, ɛ̀nɛ̀ úsí tua ko wi-zɔk-mɔ nɛ̀ duk fara k’ɛ́nɛ́'ɛ ha̧‘m.»

¹⁹Samuɛl kifa nú ha̧ Saul: «Wi-zɔk-mɔ nɛ‘m; mɛ̀ yák ti, ɛ̀ɛ̀ dáŋ si kusa-fara; ɛ́nɛ́ tɛ nyɔŋ mɔ in am sɔsɔɔ. Sa̧a̧mɔ mɛ tutuyɛ, mi tɛ tɔ̧ mgbara mɔ nɛ duk kɔ̧ see-mɛ‘i ha̧ mɛ, ɓɛɛ mɛ yaka.

²⁰Ɓɛɛ nɛ̀ war ko o nana tuifuu nɛ yɔɔ er-mɛ zɛ taar kinii, ká ɗɛɗɛ-mɛ gɔn na, wa kpaa wa kaɗi. Mbɔi sɛn Israɛl lɛŋ duk nɛ́ ko o? Bo nɛ kɔ-mɛ in o bíí nutua ko dáà kɔ-mɛ na nde?»

²¹Saul kifa nú hee mɔ'ɔ ga: «Bo nɛ mi nɛ bezaŋ Bɛnjamin nɛ̀ duk nɛ́ geɗek zuduk sɛn nutua Israɛl in bo nɛ nutua kɔ‘m nɛ geɗek-a mgbara o nutua tɛ zuduk ko Bɛnjamin na nde? Wen ge s’ɛnɛ tɔ̧ pɛrti wen hegɔ ha̧‘m ge?»

²²Samuɛl mgbɔɔ Saul in wi-de-tom kɔ̧-a̧ yaknɛ. A̧ mgbɔɔ wa si kɔ̧ tua, ɓɛɛ a̧ ha̧ fara ha̧ wa ti o wi-nyɔŋ-mɔ nɛ̀ hɔɔ so hee ɓu-taar ga.

²³Samuɛl tɔ̧ɔ̧ ha̧ wi-gi-nyɔŋmɔ: «Mɛ̀ bá nyɔŋmɔ nɛ mɛ kɛ̧ɛ̧ e nɛtɛ n'am tɔ̧ɔ̧ nɛnɛ ha̧ mɛ‘i tɛnɛ.»

²⁴Wi-gi-nyɔŋmɔ baa ku saɗi in dom-aa tɛnɛ e ti Saul, ɓɛɛ tɔ̧: «Oi mɔ nɛ ɓɔna nɛ mɔ'ɔ; nyɔŋmɔ kɔ-mɛ nɛ́ mɔ'ɔ, mɛ̀ nyɔŋ. Ɛ́ɛ́ ee mɔ'ɔ ha̧ mɛ wen ŋgimbi’ɛ, ŋgimbi n’ɛɛ saa nɛ̀ bíí.» Saul nyɔŋa mɔ in Samuɛl wese'i.

²⁵Nɛ́ mɔ'ɔ nɛ̀ wa zira nɛ̀ kusa-fara pii saaye, ɓɛɛ wa tɔ̧ nyɛrɛ in ŋmaa zu zala mɛ ŋgɔn.

²⁶Wa kura nɛ haya-a mɛ tutuyɛ. Ŋgimbi nɛ mɔ gɔna kaɗi, Samuɛl saa Saul fara ɔ nù nú-zala, a̧ tɔ̧a̧: «Ɛ̀ɛ̀ yák ha̧‘m mgbɔ mɛ e yuwar.» Saul kura in Samuɛl, ɓɛɛ wa gbo si zan.

²⁷Ŋgimbi nɛ wa zira hɔ nú ye, Samuɛl tɔ̧ɔ̧ ha̧ Saul: «Mɛ̀ tɔ̧́ ha̧ wi-de-tom mɛ yak ti, ɓɛɛ kɔ-mɛ, mɛ̀ ɓɔ́n kɔ-mɛ tikiɗi ha̧‘m tɔ̧ wen ko Sɔ̧ ha̧ mɛ zii.» Wi-de-tom yaka kɔ‘i ti.