Read Northwest Gbaya KU̧U̧NAŊMƆ 16 Bible Online

KU̧U̧NAŊMƆ 16 - Northwest Gbaya bible

KU̧U̧NAŊMƆ 16

¹Sarai kóò ko Abram duka so, bem bo na; a̧ a̧a̧ so nɛ̀ zɔŋa Egiptɛ kó-de-tom kɔ̧-a̧; nin-a nɛ Agar.

²Sarai tɔ̧ɔ̧ ha̧ Abram: «GASA WAN dora'm tɛ koa-a; mɛ̀ dúk in kó-de-tom kɔ‘m, ŋmafara mi tɛ kpa bem nɛ ɗoŋ-aa.» Ɓɛɛ Abram zii wen nú Sarai.

³Ɗoŋ pɛ ɓu nɛ Abram baa nɛ fara nú Kanaŋ, Sarai ha̧a̧ Agar zɔŋa Egiptɛ, kó-de-tom kɔ̧-a̧ ha̧ wíì kɔ̧-a̧ Abram nɛ̀ kóò.

⁴A̧ duka in Agar, ɓɛɛ Agar ba zaŋ. Ŋgimbi nɛ wa gbara zaŋ Agar kaɗi, ɓɛɛ Agar zɔk naa-wan-tua kɔ‘i hee geemɔ ga.

⁵Sarai tɔ̧ɔ̧ ha̧ Abram: «Nɛ́ mɛ a̧ dee ha̧ dara mɛ da̧‘m. Nɛ́ mi'i ha̧a̧ kó-de-tom kɔ‘m ha̧ mɛ; ɗoŋ n'aa baa nɛ zaŋ kaɗi, a̧ zɔk am hee geemɔ ga; ɓɛɛ nɛ́ GASA WAN a̧ tɛ kɛ̧ mgbara war k’ɛɛ in mɛɛ.»

⁶Abram kifa nú ha̧ Sarai: «Mɛ̀ zɔk, mɛ a̧a̧ nɛ ŋgai zu kó-de-tom kɔ-mɛ. Mɛ̀ dé mɔ lɛŋ nɛ mɛ kɔ̧ɔ̧ in a̧.» Sarai usa bɔnɛ ha̧ Agar nyɛmna, ɓɛɛ a̧ yu mɔ yak.

⁷Betom ko GASA WAN kpaa Agar ká̧ gɔna-yì ŋga-gbárà yuwar nɛ̀ nɛ́ si sɛn nu Sur,

⁸ɓɛɛ a̧ tɔ̧: «Agar, kó-de-tom ko Sarai, mɛ́ tɛ́ nɛ̀ dee? Mɛ́ nɛ́ si dee?» Agar kifa nú: «Mi yu nɛ Sarai, naa-wan-tua kɔ‘m.»

⁹Ɓɛɛ betom ko GASA WAN tɔ̧ ha̧ a̧: «Mɛ̀ sí ɗoŋ tɛ ko naa-wan-tua kɔ-mɛ, ɓɛɛ mɛ̀ dé mɔ n'aa kɔ̧a̧.»

¹⁰Betom ko GASA WAN tɔ̧ɔ̧ ha̧ a̧ woyo: «Mi tɛ de ha̧ o bezaŋ-mɛ mɛ dɔk nɛ‘i beka nyɛm mɛ tɔr na.»

¹¹Betom ko GASA WAN tɔ̧ɔ̧ ha̧ Agar: «Mɛ̀ zii, mɛ́ a̧a̧ nɛ zaŋ, mɛ́ tɛ́ ko nɛ̀ be-wiwii, ɓɛɛ mɛ tɛ sa nin-a nɛ́ Ismaɛl, wen GASA WAN iŋa bɔnɛ kɔ-mɛ.

¹²Bem kɔ-mɛ tɛ duk hee tuifuu-zaŋbɛɛ ga, a̧ tɛ sɛn bíí lɛŋ, ɓɛɛ bíí lɛŋ tɛ sɛn a̧. A̧ tɛ duk nɛtɛ mgbara o nya-a̧.»

¹³Agar taa mɔ, wi zɔka Sɔ̧ nɛ mbetɛ nɛ mɔ'ɔ nɛ‘i biti nɛ yí'ɛ nde? Ɓɛɛ a̧ zɔn GASA WAN nɛ tɔ̧ɔ̧ so wen ha̧ a̧. A̧ saa nin GASA WAN'e Ɛl-Roi, nɛ mɔ nɛ tɔ̧: «Ɛ́nɛ́ nɛ́ Sɔ̧ nɛ̀ zɔk am.»

¹⁴Nɛ́ hegɔ a̧ wa saa nɛ nin gɔna-yì nɛ duk mgbara Kadɛs in Bɛrɛd'e, gɔna-yì ko Lahai, «wan nɛ duk kpasa nɛ zɔk am.»

¹⁵Agar koo be-wiwii ha̧ Abram, ɓɛɛ Abram a nin-a'e Ismaɛl.

¹⁶Abram a̧a̧ so nɛ pɛ 86 ŋgimbi nɛ Agar koo nɛ Ismaɛl ha̧ a̧.