Read Northwest Gbaya KU̧U̧NAŊMƆ 17 Bible Online

KU̧U̧NAŊMƆ 17 - Northwest Gbaya bible

KU̧U̧NAŊMƆ 17

¹Ŋgimbi nɛ Abram kpaa nɛ pɛ 99, GASA WAN usa tɛ ha̧ a̧, ɓɛɛ tɔ̧: «Mi nɛ Sɔ̧ nɛ a̧a̧ nɛ ŋgayamɔ lɛŋ; mɛ̀ nɛ́ nɔ̀, dé nɛ̀ mɔ nɛ yuwar-a ti'm.

²Mi tɛ nɔ tɔk in mɛɛ, mi tɛ de ha̧ bezaŋ-mɛ mɛ dɔk.»

³Abram tika nù ba yí gu nù, ɓɛɛ Sɔ̧ tɔ̧ wen in a̧:

⁴«Nɔɔ-tɔk kɔ‘m in mɛɛ nɛ́ mɔ'ɔ kinii; mɛ tɛ duk nɛ dáà ko o dɔka dukbíí.

⁵Hegɔ, wa beka sa mɛ Abram ɓɔna, wa tɛ sa mɛ‘e, ‹Abraham›, wen mɛ nɛ dáà ko dɔka dukbíí.

⁶Mi tɛ de ha̧ o bezaŋ-mɛ mɛ dɔk. Mi tɛ de ha̧ mɛ mɛ ko o dɔka dukbíí, ɓɛɛ o wannu tɛ gbo nɛ̀ tɛ-mɛ.

⁷«Mi tɛ nɔ tɔk in mɛɛ in o bezaŋ-mɛ nɛ tɛ́ tɛ nɛ ɗoŋ. Nɔɔ-tɔk‘i tɛ duk kpoo nɛ kpoo, ɓɛɛ mi tɛ duk nɛ́ Sɔ̧ kɔ-mɛ in Sɔ̧ ko o bezaŋ-mɛ nɛ tɛ́ tɛ nɛ ɗoŋ.

⁸Mi tɛ ha̧ nù nɛ mɛ duk sɛnɛ hee gɛnɛ ga ha̧ mɛ in o bezaŋ-mɛ nɛ tɛ́ tɛ nɛ ɗoŋ; nú Kanaŋ lɛŋ tɛ duk nɛ kɔ-wa, ɓɛɛ mi tɛ duk nɛ Sɔ̧ kɔ-wa.»

⁹Sɔ̧ tɔ̧ɔ̧ ha̧ Abraham: «Mɛ tɛ kasi nɔɔ-tɔk kɔ‘m, mɛ in o bezaŋ-mɛ nɛ tɛ́ tɛ nɛ ɗoŋ.

¹⁰Ɛ̧ɛ̧ hɛ̧ɛ̧ nɛ nɔɔ-tɔk kɔ‘m in'nɛ̀ɛ́ n’ɛnɛ tɛ kasi in o bezaŋ‘nɛ́ mɛ ɗoŋ: ɛnɛ tɛ gɔn bɔr o be-wiwii k’ɛ́nɛ́ lɛŋ.

¹¹Ɛ́nɛ́ tɛ́ gɔn bɔr'nɛ́ ha̧ mɔ‘i mɛ duk nɛ mɔɔ-sedaako mgbara'm in'nɛ̀ɛ́.

¹²O be-wiwii k’ɛ́nɛ́ nɛ kpaa zɛ mɔɔrɔ-ɗoŋ-taar tɛ gɔn bɔr nyɛm nɛ ɗoŋ bezaŋ‘nɛ́ in o bara nɛ‘i koo kɔ̧ tua k’ɛ́nɛ́, kóó nɛ‘i hi̧fa nɛ ŋma gɔni nù, nɛ wa bo nɛ́ bezaŋ‘nɛ́ na.

¹³Wa tɛ gɔn bɔr o bara nɛ wa koo sɛn nutua k’ɛ́nɛ́, kóó wan nɛ‘i hi̧fa hi̧fi nɛ sede mbɛt. Nɔɔ-tɔk kɔ‘m nɛ beka kaɗi na tɛ duk tɛ‘nɛ́ kpoo nɛ kpoo.

¹⁴Wi tɛ fo wi-mbii yinɛ mgbara o nam kɔ̧-a̧ wen n'aa gbina nɔɔ-tɔk kɔ‘m.»

¹⁵Sɔ̧ tɔ̧ɔ̧ ha̧ Abraham: «Ká mɛ́ sa nin kóò kɔ-mɛ, Sarai ɓɔna; nin-a tɛ duk nɛ Sara.

¹⁶Mi tɛ tok de yoŋgo zu a̧, mi tɛ ha̧ be-wiwii ha̧ mɛ nɛ̀ ɗoŋ-aa. Mi tɛ tok de yoŋgo zu a̧, ɓɛɛ a̧ koo o dukbíí nɛ dɔka-a. O wannu ko o dukbíí tɛ gbo nɛ̀ tɛ-a.»

¹⁷Abraham tika nù, ba yi gu nù; a̧ mama mami, ɓɛɛ a̧ tɔ̧ nɛ kɔ̧ see-aa'e: «Bíí nɛ̀ a̧a̧ nɛ pɛ gɔmŋmaa tɛ ko bem nde? In Sara nɛ̀ a̧a̧ nɛ pɛ ɓu-mɔɔrɔ-ɗoŋ-naar nyɛma mɛ ko nde?»

¹⁸Abraham tɔ̧ɔ̧ ha̧ Sɔ̧: «Ho! Ismaɛl a̧ kpa de sɔnti sɛn ti'nɛ́ na nde?»

¹⁹Sɔ̧ tɔ̧a̧: «Weyaa! Kóò kɔ-mɛ Sara tɛ ko be-wiwii ha̧ mɛ, ɓɛɛ mɛ tɛ sa nin-a Izak. Mi tɛ nɔ tɔk nɛ tɛ duk kpoo nɛ kpoo in a̧ in o bezaŋ-aa nɛ tɛ́ tɛ nɛ ɗoŋ.

²⁰Ko Ismaɛl, mi zia kɔfamɔ kɔ-mɛ; mi tɛ tok de yoŋgo zu a̧. Mi tɛ de ha̧ a̧ mɛ ko in ha̧ a̧ mɛ dɔk. A̧ tɛ ko o be-wan ɓu-zua-yiitoo, mi tɛ de ha̧ gasa dukbíí mɛ gbo nɛ tɛ-a,

²¹ɓɛɛ mi tɛ nɔ tɔk in Izak nɛ Sara tɛ ko tɛ ŋgimbi hee mɔ'ɔ ga tɛ mbe pɛ.»

²²Ɗoŋ nɛ Sɔ̧ kaɗa tɔ̧ɔ̧ wen in Abraham kaɗi, a̧ ee a̧ duk.

²³Abraham mgbɔɔ Ismaɛl bem kɔ‘i, o bara lɛŋ nɛ wa koo kɔ̧ tua kɔ̧-a̧ in o wan nɛ wa hi̧fa hi̧fi, o wiwii lɛŋ sɛn kɔ̧ tua kɔ̧-a̧; a̧ gɔna bɔr-wa kpɔk kale wese nɛ Sɔ̧ tɔ̧ɔ̧ nɛ wen in a̧.

²⁴Abraham a̧a̧ so nɛ pɛ ɓu-mɔɔrɔ-ɗoŋ-naar-zua-mɔɔrɔ-ɗoŋ-naar, in bem kɔ̧-a̧ Ismaɛl pɛ ɓu-zua-taar ŋgimbi nɛ wa gɔna so nɛ bɔr-wa.

²⁶Kpɔk wese'i, wa gɔna bɔr Abraham in ko bem kɔ̧-a̧ Ismaɛl.

²⁷O bíí kɔ̧ tua kɔ̧-a̧ lɛŋ, o bara nɛ wa koo kɔ̧ tua kɔ̧-a̧ in o wan nɛ wa hi̧fa hi̧fi nɛ sede sɛn gɔni fara gɔna bɔr in a̧ mbɛt.