Read Northwest Gbaya KU̧U̧NAŊMƆ 30 Bible Online

KU̧U̧NAŊMƆ 30 - Northwest Gbaya bible

KU̧U̧NAŊMƆ 30

¹Ŋgimbi nɛ Rachɛl zɔka'e wi ko ŋma bem ha̧ Jakob na, a̧ aa see mɔ in dàà kɔ̧-a̧, ɓɛɛ a̧ tɔ̧ ha̧ Jakob: «Mɛ̀ há̧ bem ha̧‘m; kà bo hegɔ na, mi tɛ gbɛ tɛ‘m.»

²Jakob kpaa ɗaŋsee in Rachɛl ɓɛɛ tɔ̧: «Mi nɛ́ Sɔ̧ kà‘m dor koa-a kɔ-mɛ nde?»

³Rachɛl tɔ̧a̧: «Zɔk kó-de-tom kɔ‘m Bilha nɛ́ mɔ'ɔ. Mɛ̀ dúk in a̧, ha̧ a̧ mɛ ko bem ha̧‘m mɛ ba e gɔn ku'm; mi tɛ kpa o bem nɛ ɗoŋ-aa.»

⁴A̧ ha̧a̧ Bilha kó-de-tom kɔ̧-a̧ nɛ kóò ha̧ Jakob, ɓɛɛ Jakob dúk in a̧.

⁵Bilha baa zaŋ ɓɛɛ ko be-wiwii ha̧ Jakob.

⁶Rachɛl tɔ̧a̧: «Sɔ̧ zɔka'e deemɔ kɔ‘m sa̧a̧ yí wi; a̧ zia kɔfamɔ kɔ‘m, ɓɛɛ a̧ ha̧ bem ha̧‘m.» Nɛ́ wen hegɔ Rachɛl aa nin bem’ɛi Dan.[9]

⁷Bilha kó-de-tom ko Rachɛl baa zaŋ woyo, ɓɛɛ a̧ ko ŋma be-wiwii ha̧ Jakob.

⁸Ɓɛɛ Rachɛl tɔ̧: «Mi dee biro in dàà kɔ‘m, biro nɛ̀ dúk nɛ́ biro ko Sɔ̧, ɓɛɛ ŋgai kɔ‘m gana ko dàà kɔ‘m.» Rachɛl aa nin bem’ɛi Nɛftalii.[10]

⁹Ŋgimbi nɛ Lea zɔka'e wi ko bem ɓɔna, a̧ ha̧a̧ Zilpa kó-de-tom kɔ̧-a̧ nɛ kóò ha̧ Jakob.

¹⁰Zilpa kó-de-tom ko Lea mbɛt koo nɛ be-wiwii ha̧ Jakob.

¹¹Ɓɛɛ Lea tɔ̧: «Oee de sɔnti wa!» Nɛ hegɔ a̧ Lea aa nɛ nin bem’ɛi Gad.[11]

¹²Zilpa kó-de-tom ko Lea koo mbe bem woyo ha̧ Jakob,

¹³ɓɛɛ Lea tɔ̧: «Oee bɔtɛ wa! Wen o dɔka okoo tɛ zɔn am.» Ɓɛɛ Lea a nin bem’ɛi'e Asɛr.[12]

¹⁴Tɛ ŋgimbi mɔi̧a alkamaari, Rubɛn yara nɛnɛ, ɓɛɛ a̧ kpa ŋma yiŋgi-nyɔnɔ,[13] ɓɛɛ a̧ ba piinɛ ha̧ nàà kɔ̧-a̧ Lea. Rachɛl tɔ̧ɔ̧ ha̧ Lea: «Ɛ̀nɛ̀ há̧ ŋma yiŋgi-nyɔnɔ nɛ bem k’ɛ́nɛ́ kpaa'i ha̧‘m na nde?»

¹⁵Ɓɛɛ Lea kifi nú ha̧ a̧: «Wíì kɔ‘m nɛ mɛ baa'i tɛ nyɛm mɛ na, sa mɛ kɔ̧ɔ̧ mɛ ba kànà yiŋgi-nyɔnɔ ko bem kɔ‘m nɛ kpaa ha̧‘m mbɛt nde?» Rachɛl tɔ̧ɔ̧ woyo: «Hegɔ laŋ, Jakob tɛ si tua ɗoŋ mɛ sɔsɔɔ oi yiŋgi-nyɔnɔ ko bem kɔ-mɛ.»

¹⁶Ŋgimbi nɛ Jakob pia nɛ kpɛɛfɔ mɛ́ ga̧a̧mɔ, Lea wee ti a̧ si sɛn nú war mɛ, ɓɛɛ tɔ̧ ha̧ a̧: «Mɛ tɛ si tua ɗoŋ-am sɔsɔɔ, wen mi ha̧a̧ yiŋgi-nyɔnɔ kɔ‘m ha̧ Rachɛl, wen ha̧ mɛ mɛ si tua ɗoŋ-am sɔsɔɔ», ɓɛɛ Jakob si tua ɗoŋ Lea wese'i.

¹⁷Sɔ̧ kpɛka akamɔ ko Lea, ɓɛɛ a̧ ba zaŋ ko nɛ be-wiwii nɛ duk nɛ mɔɔrɔ bem kɔ̧-a̧ ha̧ Jakob.

¹⁸Lea tɔ̧a̧: «Sɔ̧ ha̧a̧ mɔɔ-oi-tom kɔ‘m ha̧‘m, wen n'am ha̧a̧ kó-de-tom kɔ‘m nɛ kóò ha̧ wíì kɔ‘m.» Ɓɛɛ Lea a nin bem’ɛi Isakar.[14]

¹⁹Lea baa zaŋ woyo, ɓɛɛ a̧ ko mɔɔrɔ-ɗoŋ-kpɔk bem ha̧ Jakob.

²⁰A̧ tɔ̧a̧: «Sɔ̧ ha̧a̧ demɔ ha̧‘m, wen kinii'i, wíì kɔ‘m tɛ tu̧ tɛ‘m, wen mi koo o be-wiwii mɔɔrɔ-ɗoŋ-kpɔk ha̧ a̧;» ɓɛɛ Lea a nin bem’ɛi Zabulɔŋ.[15]

²¹Ɗoŋ mɔ‘i, a̧ koo nɛ be-okoo, n'aa aa nin-a Dina.

²²Tɛ Sɔ̧ mbaŋa ɗoŋ Rachɛl, a̧ zia akamɔ kɔ̧-a̧, ɓɛɛ a̧ e ha̧ Rachɛl mɛ ba zaŋ.

²³A̧ baa zaŋ, ɓɛɛ a̧ ko nɛ̀ be-wiwii. A̧ tɔ̧a̧: «Sɔ̧ gɔna foe yí‘m.»

²⁴Ɓɛɛ Rachɛl a nin-a'e, Jozɛf,[16] tɔ̧ nɛnɛ: «GASA WAN a̧ ha̧ ŋma mbe bem e zu a̧ ha̧‘m.»

²⁵Ŋgimbi nɛ Rachɛl koo nɛ Jozɛf kaɗi, ɓɛɛ Jakob tɔ̧ ha̧ Labaŋ: «Ɛ̀nɛ̀ é yuwar ha̧‘m si tɛ kɔ‘m, tɛ nù kɔ‘m.

²⁶Ɛ̀nɛ̀ há̧ yuwar yaka-a ha̧ o kóò kɔ‘m n'am dee kɔfɛ wa, gu nɛ o bem kɔ‘m, ha̧‘m yak in wa lɛŋ. Ɛ́nɛ́ iŋa tom n'am dee h’ɛ́nɛ́ mbɛt.»

²⁷Ɓɛɛ Labaŋ tɔ̧ ha̧ a̧: «Mi ai nú‘m ha̧ mɛ́, mɛ̀ zíí wen kɔ‘m. Mi pi̧i̧ tani iŋ nɛnɛ‘e Sɔ̧ ha̧a̧ mɔ ha̧‘m nɛ ɗoŋ mɛ.

²⁸Mɛ̀ gɔ́n gɛnɛ tom nɛ mɛ dee ha̧‘m lɛŋ, ɓɛɛ mi tɛ yoɓi ha̧ mɛ.»

²⁹Jakob kifa nú ha̧ a̧: «Ɛ́nɛ́ iŋa tom n'am dee h’ɛ́nɛ́ nɛ de-a in nyɛɓa̧-a̧ nɛ mɔ-dai k’ɛ́nɛ́ nyɛɓa̧ nɛnɛ er-am.

³⁰Ɛ́nɛ́ a̧a̧ so nɛ mɔ tikiɗi nɛti ŋgimbi hɔa-a kɔ‘m, ɓɛɛ kinii wa dɔka siti tɛ ŋgimbi n'am daia nɛ wa. GASA WAN toka de yoŋgo zu'nɛ́ nɛ ɗoŋ-am. Kinii, mi tɛ kii nɛ mɔ nɛ tɛ gbak am wen tua kɔ‘m.»

³¹Labaŋ tɔ̧a̧: «Nɛ́ ge a̧‘m tɛ ha̧ ha̧ mɛ ge?» Jakob kifa nú: «Ɛ́nɛ́ beka ha̧ ŋma mɔ ha̧‘m na. K’ɛ̀nɛ̀ nɛ́ kɔ̧ɔ̧ ɗɔɔ wen n'am tɛ tɔ̧ h’ɛ́nɛ́‘i, mi tɛ duk mɛ dai o mɔ-dai k’ɛ́nɛ́ siti.

³²Mi tɛ yar nɛ poo o mɔ-dai k’ɛ́nɛ́ sɔsɔɔ; mi tɛ kai o tu̧ sami yinɛ mgbara o dɔka-a in o gbadua nɛ dap tɛ-wa a̧a̧ sɛnɛ lop-lop kóó zɛrɛŋ-zɛrɛŋ yinɛ mgbara o dɔka-a mbɛt. Nɛ́ wa nɔ‘i a̧ tɛ duk nɛ mɔɔ-oi-tom kɔ‘m.

³³Sa̧a̧mɔ, ŋgimbi n’ɛnɛ be tɛ̀ɛ́ tɛ mɛ zɔk mɔɔ-oi-tom kɔ‘m, o gbadua lɛŋ nɛ dap beka bó tɛ-wa na in o sami lɛŋ nɛ beka bó nɛ́ tu̧-a̧ na, tɛ usi'e mi de mɔ nɛ yuwar-a na; mɔ‘i tɛ duk nɛ́ mɔɔ-zuzu.»

³⁴Labaŋ tɔ̧a̧: «Ɔ dee, mɔ‘i a̧ de hee mɔ'ɔ nɛ mɛ tɔ̧ɔ̧ ga.»

³⁵Wese'i, Labaŋ mɔi̧a o vala gbadua nɛ dap a̧a̧ tɛ-wa a nɛtɛ in o nana gbadua nɛ dap a̧a̧ tɛ-wa mbɛt gu nɛ o tu̧ sami lɛŋ. Ɓɛɛ a̧ ha̧ wa ha̧ o bem kɔ̧-a̧.

³⁶Nɛ́ mɔ'ɔ nɛ̀ o bem kɔ̧-a̧ nɛɛ nɔ̀ tɛ zɛ taar kai nɛ o mɔ-dai yak nyɛi̧ nɛ Jakob, ɓɛɛ Jakob ɓɔn kɔ‘i hi̧i̧ dai nɛ o oi mɔ-dai ko Labaŋ.

³⁷Jakob baa gbaa-er o ŋma gasa te nɛtɛ nɛtɛ,[17] ɓɛɛ a̧ or tɛ-wa yinɛ lɛŋ, gɔn dap sɛnɛ nɛ bu-a zɛrɛŋ-zɛrɛŋ.

³⁸A̧ kaia o gbaa-er te nɔ‘i n'aa ora so tɛ-wa yinɛ‘i a ti o mɔ-dai ká̧ kombon-nɔ-yì kɔ-wa; ɓɛɛ ŋgimbi nɛ wa tɛ mɛ tɛ̀ɛ́ nɔ yi, ɓɛɛ wa daŋa ŋmaa.

³⁹O gbadua daŋa ŋmaa ká̧ o te nɔ‘i ɓɛɛ wa ko lɛŋ nɛ̀ gɔna dap tɛ-wa.

⁴⁰Ŋgimbi lɛŋ nɛ o ŋmaŋa mɔ-dai kɔ̧ɔ̧ mɛ daŋ ŋmaa, ɓɛɛ Jakob usa o te nɔ‘i ha̧ wa sɛn ká̧ kombon-nɔ-yì kɔ-wa ha̧ wa mɛ daŋ ŋmaa sɛn ɗɔɔ dap te nɔ‘i.

⁴¹War ko o sami, Jakob kaia wa a nɛtɛ ɓɛɛ a̧ zik wa zɔk mɔ sitɛ o tu̧ mɔ-dai ko Labaŋ in o wan nɛ dap-aa a̧a̧ sɛnɛ mbɛt. Nɛ́ hegɔ á̧ a̧ kpaa nɛ o mɔ-dai kɔ̧-a̧ n'aa a zu ko Labaŋ na.

⁴²Kà Jakob zɔk mɔ-dai ɔ ɔ̧ka̧, ɓɛɛ a̧ usi dap te ha̧ wa na, wen i̧i̧ nɔ‘i hi̧i̧ nɛ́ ko Labaŋ. Ɓɛɛ o ŋmaŋa mɔ-dai lɛŋ nɛ́ kɔ̧-a̧.

⁴³Jakob kpaa mɔ nɛ dɔka-a, o mɔ-dai, o kó-de-tom, o wi-de-tom, o ŋgeloba ká bá nɛ̀ o tuifuu.