Read Northwest Gbaya KU̧U̧NAŊMƆ 31 Bible Online

KU̧U̧NAŊMƆ 31 - Northwest Gbaya bible

KU̧U̧NAŊMƆ 31

¹Jakob zia wen nɛ o bem ko Labaŋ tɔ̧a̧‘e ndé: «Jakob kaia mɔ ko dáà k’ɛɛ lɛŋ, a̧ kpaa mbɔi kɔ̧-a̧ lɛŋ nɛ̀ ɗoŋ dáà k’ɛɛ.»

²Jakob zɔka er deemɔ ko Labaŋ kpaia in a̧; bo hee mɔ'ɔ nɛ Labaŋ duka so mɛ de in a̧ nɛti ga na.

³GASA WAN tɔ̧ɔ̧ ha̧ Jakob: «Mɛ̀ sí ɗoŋ tɛ nù ko o dáà kɔ-mɛ, fara nɛ wa koo mɛ sɛnɛ, ɓɛɛ mi tɛ duk in mɛɛ.»

⁴Jakob toma sa Rachɛl in Lea pii kpɛɛfɔ, fara n'aa duk sɛnɛ in o mɔ-dai kɔ̧-a̧‘i,

⁵ɓɛɛ a̧ tɔ̧ ha̧ wa: «Mi zɔka er deemɔ ko dáà k’ɛ́nɛ́ kpaia in am, ɓɛɛ Sɔ̧ ko dáà kɔ‘m a̧a̧ kànà in am.

⁶Ɛ́nɛ́ iŋa nɛ sa̧a̧-a̧ mbɛt, mi dee tom ha̧ dáà k’ɛ́nɛ́ nɛ ŋgai tɛ‘m lɛŋ;

⁷dáà k’ɛ́nɛ́ ɔra'm, a̧ kpaia mɔɔ-oi-tom kɔ‘m war ɓu, ɓɛɛ Sɔ̧ e yuwar ha̧ a̧ mɛ de ɗaŋmɔ in am na.

⁸Ŋgimbi lɛŋ n'aa tɔ̧‘e: ‹O mɔ-dai nɛ̀ lop-lop dap a̧a̧ tɛ-wa ɔ dɔka nɛ́ mɔɔ-oi-tom kɔ-mɛ›, ɓɛɛ o mɔ-dai lɛŋ ko kànà nɛ́ o be-a nɛ̀ lop-lop dap; ŋgimbi lɛŋ n'aa tɔ̧‘e: ‹O mɔ-dai nɛ̀ tɛ-wa ɔ zɛrɛŋ-zɛrɛŋ nɛ́ mɔɔ-oi-tom kɔ-mɛ wó›, ɓɛɛ o mɔ-dai lɛŋ ko kànà nɛ́ o be-a nɛ̀ tɛ ɔ zɛrɛŋ-zɛrɛŋ.

⁹Sɔ̧ kaia o mɔ-dai ko dáà k’ɛ́nɛ́ lɛŋ ha̧‘m.

¹⁰«Ŋgimbi nɛ̀ o gbadua daŋ so nɛ ŋmaa, mɔ n'am zɔka tɛ ɔɔ-zu nɛ́ mɔ'ɔ: Nɛ́ o vala gbadua nɛ̀ tɛ-wa ɔ zɛrɛŋ-zɛrɛŋ, o wan nɛ̀ tɛ-wa ɔ lop-lop in o wan nɛ̀ tɛ-wa ɔ laɓo-laɓo a̧ daŋ nana-a.

¹¹Tɛ ɔɔ-zu'i, betom ko Sɔ̧ saa'm: ‹Jakob!› Ɓɛɛ mi kɔ̧ sara: ‹Mi nɛ mɔ'ɔ!›

¹²Ɓɛɛ a̧ tɔ̧: ‹Mɛ̀ bá yí-mɛ nɛ̀ ŋgɔn a̧ mɛ zɔk o gbadua lɛŋ nɛ daŋ nana-a; tɛ-wa a̧a̧ nɛ gɔna dap zɛrɛŋ-zɛrɛŋ, lop-lop in laɓo-laɓo, wen mi zɔka mɔ lɛŋ nɛ Labaŋ dee in mɛɛ.

¹³Mi nɛ Sɔ̧ nɛ mɛ baa ta e ŋgɔn ká mɛ́ tɛn nɔ̧́ a zu-a kan nɛ mɔ ha̧‘m sɛn Bɛtɛl. Kinii, mɛ̀ kúr mɛ̀ yák fara’ɛ, ɓɛɛ mɛ̀ sí ɗoŋ tɛ nù ko o nam kɔ-mɛ.› »

¹⁴Rachɛl in Lea kifa nú ha̧ a̧: «Ŋma mɔɔ-oi n’ɛɛ tɛ ba er dáà k’ɛɛ so sɛnɛ?

¹⁵Bó nɛ́ a̧ zɔka ɛɛ hee o gɛnɛ ga, wen n'aa ɗɔra ɛɛ nyɔŋ nɛ mbɔi-ɗoŋ yɛ kaɗi na nde?

¹⁶Mbɔi lɛŋ nɛ Sɔ̧ kaia yinɛ er dáà k’ɛɛ, nɛ́ k’ɛɛ in o bem k’ɛɛ. Kinii, mɛ̀ dé kɔ-mɛ mɔ lɛŋ nɛ Sɔ̧ tɔ̧ɔ̧ ha̧ mɛ.»

¹⁷Jakob kura, ɓɛɛ kai o bem in o kóò kɔ‘i a zu o ŋgeloba.

¹⁸A̧ kaia o mɔ-dai kɔ̧-a̧ gu nɛ o mɔ lɛŋ n'aa kpaa so ŋgimbi n'aa duka nɛnɛ sɛn bɔkɔ-nú Aram, ɓɛɛ a̧ pii ɗoŋ pii tɛ ko dáà kɔ̧-a̧ Izak, nú Kanaŋ.

¹⁹Labaŋ yaka so mɛ́ nɛ̀ɛ́ gɔn buma-tɛ o sami kɔ‘i, ɓɛɛ Rachɛl zu̧ o be mboo sɔ̧ ko dáà kɔ‘i.

²⁰Jakob ɔra Labaŋ, be Aram, wen n'aa kura yak, a̧ mbaŋ tɛ Labaŋ na.

²¹Jakob yuu mɔ yak nɛ oi mɔ kɔ‘i lɛŋ; a̧ kuu nana-yì Efrat, ɓɛɛ a̧ nɛ si war ká̧ naŋ o kaya Galad.

²²Jakob yuu mɔ yak ɔ zɛ taar, ɓɛɛ wa ba wen-aa tɔ̧ ha̧ Labaŋ,

²³ɓɛɛ Labaŋ kai o nya-wi ndak nɛ pata Jakob tɛ zɛ mɔɔrɔ-ɗoŋ-yiitoo, ɓɛɛ wa nɛ́ɛ̀ kpa a̧ sɛn mgbara kaya Galad.

²⁴Sɛn tɛ ɔɔ-zu, Sɔ̧ tɔ̧ɔ̧ ha̧ Labaŋ, be Aram mɛ zɛ‘e: «Ká mɛ́ tɔ̧ ŋma wen a zu Jakob na; kóó nɛ de-a, kóó nɛ ɗaŋ-a mbɛt, ká mɛ́ tɔ̧ na.»

²⁵Labaŋ nɛɛ kpa Jakob nɛ ɗafa tua-laa kɔ‘i e sɛn mgbara kaya, ɓɛɛ Labaŋ in o nya-wi ɗafi tua-laa kɔ‘i e mgbara kaya Galad mbɛt.

²⁶Labaŋ tɔ̧ɔ̧ ha̧ Jakob: «Nɛ́ ge a̧ mɛ dee in am nɛ mɛ ɔra'm’ɛ ge? Mɛ kaia o bem kɔ‘m hee bara-biro ga wen ge?

²⁷Wen ge mɛ yaka nɛ̀ hu̧sa̧-a̧, ɓɛɛ mɛ mbaŋ tɛ‘m na, ɔr nɛ‘m mbɛt ge? Mi tɛ̀ɛ́ war so mɛ nɛ̀ desee, nɛ̀ gima, nɛ̀ kuŋge in nɛ̀ koloŋ mbɛt.

²⁸Mɛ́ é ha̧‘m mɛ dui nú o be-koo-am in o bem kɔ‘m na mbɛt! Mɛ dee mɔ in am hee bíí nɛ̀ bó nɛ̀ zu ga na!

²⁹Mi a̧a̧ nɛ ŋgai nyɛmna wen dee ɗaŋmɔ in mɛɛ, ɓɛɛ mɛ zɛ'ɛ, Sɔ̧ ko o dáà kɔ-mɛ hɔɔ zu ha̧‘m ɓɛɛ tɔ̧: ‹Ká mɛ́ tɔ̧ ŋma wen a zu Jakob na, kóó nɛ de-a, kóó nɛ ɗaŋ-a mbɛt.›

³⁰Kinii mɛ kura yak kaɗi, wen mɛ duka so ai nɛ nú-mɛ wen fara oi dáà kɔ-mɛ; wen ge sa mɛ zu̧u̧ bɔɔ o sɔ̧ kɔ‘m ge?»

³¹Jakob kifa nú ha̧ Labaŋ, ɓɛɛ tɔ̧: «Mi dee nɛ kíì wen mi taa so, ŋmafara ɛ́nɛ́ tɛ̀ɛ́ kai o boko-bem k’ɛ́nɛ́ yinɛ sɛn er-am;

³²ɓɛɛ wi n’ɛnɛ tɛ́ kpa o sɔ̧ k’ɛ́nɛ́ er-a nyɛma mɛ fe! Ɛ̀nɛ̀ kíí mɔ nɛ duk nɛ mɔ k’ɛ́nɛ́ sɛn yí o nya k’ɛɛ hɛ̧ɛ̧ ŋgaɓo. Ɛ́nɛ́ nɛ́ kpaa ŋma mɔ k’ɛ́nɛ́ mgbara mɔ kɔ‘m, ɛ̀nɛ̀ bá yinɛ.» Ɓɛɛ Jakob iŋ kɔ‘i'e, Rachɛl zu̧u̧ so o mɔɔ nɔ‘i na.

³³Labaŋ gɔma ye kɔ̧ tua-laa ko Jakob wen kia mɔɔ nɔ‘i hɔ tɛ ko Lea, gu nɛ kɔ̧ tua-laa ko o kó-de-tom yiitoo mbɛt, ɓɛɛ a̧ kpa mɔ na. A̧ gboo kɔ̧ tua-laa ko Lea, ɓɛɛ a̧ ye kɔ̧ tua-laa ko Rachɛl.

³⁴Rachɛl kaia so mɔɔ nɔ‘i hu̧si sɛn ɗɔɔ kirki-ŋgeloba, ɓɛɛ duk sɛn zu wa. Labaŋ kia mɔ sɛn kɔ̧ tua takaɗi, a̧ kpa mɔ na.

³⁵Ɓɛɛ Rachɛl tɔ̧ ha̧ dáà kɔ‘i: «Mi nyɛm mɛ kur na, ɓɛɛ ká nyaa kpa ɗaŋsee zu'm na mbɛt, wen mi zɔk nɛ zɛ.» Ɓɛɛ a̧ kpa o sɔ̧ kɔ̧-a̧‘i na.

³⁶Jakob kpaa ɗaŋsee nyɛmna, a̧ kpɛra in Labaŋ, ɓɛɛ a̧ tɔ̧: «Nɛ́ ge ɗaŋmɔ ge n'am dea ge? Yɔɔ-kaya kɔ‘m nɛ́ ge s’ɛnɛ ndaka pata'm tɛnɛ nɛ ɗaŋsee ge?

³⁷Ɛ́nɛ́ kia mɔ mgbara tui kɔ‘m lɛŋ, ɛ́nɛ́ kpaa ŋma mɔ k’ɛ́nɛ́? Ɛ́nɛ́ nɛ́ kpaa n’ɛ̀nɛ̀ bá pí̧ zan ti o nya'm, in o nya'nɛ́ ha̧ wa gɔn kita mgbara yɛ ŋgaɓo!

³⁸Dee nɛ pɛ ɓu-yiitoo n'am duka in'nɛ̀ɛ́; o zaŋ sami in o zaŋ gbadua mbɛt hɔ na. Mi nyɔŋ ŋma vala sami k’ɛ́nɛ́ kpɔk na.

³⁹Ŋma wese n'am baa wɔr saɗi nɛ boko-nam gbɛɛ tɛnɛ h’ɛ́nɛ́ bo na. Nɛ́ mi a̧‘m duka so yoɓi mɔɔ nɔ‘i lɛŋ. Mɔ nɛ wa zu̧u̧ so er-am mɛ wese in mɛ zɛ mbɛt, ɛ́nɛ́ aka so ha̧‘m mɛ yoɓi.

⁴⁰Gbɛ̧ŋmɔ tɛ̀ɛ́ gbɛ so'm mɛ́ wese, gɛ̧ɛ̧ tɛ̀ɛ́ gbɛ so'm mɛ́ zɛ, ɓɛɛ ya hɔ so yí‘m na.

⁴¹Dee nɛ pɛ ɓu-yiitoo n'am duk nɛnɛ kɔ̧ tua k’ɛ́nɛ́, mi dee kɔfɛ pɛ ɓu-zua-naar wen o bem k’ɛ́nɛ́ yiitoo in pɛ mɔɔrɔ-ɗoŋ-kpɔk wen o mɔ-dai k’ɛ́nɛ́. Ɛ́nɛ́ kaia o mɔɔ nɔ‘i nɛ duk nɛ mɔɔ-oi-tom kɔ‘m war ɓu.

⁴²Kà bó so nɛ́ Sɔ̧ ko dáà kɔ‘m, Sɔ̧ ko Abraham in wi nɛ Izak yu à̧ dúk so in am na, ɛ́nɛ́ tɛ̀ɛ́ e so ha̧‘m mɛ yak nɛ gee er-am; ɓɛɛ Sɔ̧ zɔka fɛŋa'm n’ɛnɛ fɛŋa in dɔka tom n'am dea, ɓɛɛ mɛ zɛ'ɛ, a̧ yee ɗoŋ-am.»

⁴³Labaŋ kifa nú ha̧ Jakob, a̧ tɔ̧a̧: «O boko-bem nɔ'ɔ nɛ́ o bem kɔ‘m, o bem nɔ'ɔ nɛ́ o be-koo-am, o mɔ-dai nɔ'ɔ nɛ́ o mɔ-dai kɔ‘m, mɔɔ nɔ'ɔ nɛ̀ mɛ zɔk’ɛ lɛŋ nɛ́ mɔ kɔ‘m. Nɛ́ ge a̧‘m tɛ de ha̧ o bem kɔ‘m ge? Nɛ́ ge a̧‘m tɛ de ha̧ wa sɔsɔɔ in ha̧ o bem nɛ wa koo ge?

⁴⁴Mɛ̀ kúr, ɛ̀ɛ̀ nɔ́ tɔk in mɛɛ, ɓɛɛ ɛ̀ɛ̀ dé mɔɔ-sedaako e mgbara yɛ.»

⁴⁵Nɛ́ mɔ'ɔ nɛ̀ Jakob baa ŋma gasa ta e ŋgɔn.

⁴⁶A̧ tɔ̧ɔ̧ ha̧ o nya-a̧: «Ɛ̀ɛ̀ mɔ́í̧ o ta!» Ɓɛɛ wa mɔi̧ o ta a zu ŋmaa, ɓɛɛ wa nyɔŋ mɔ sɛn zu-a.

⁴⁷Labaŋ aa nin fara'i Yegar-Sahaduta, ɓɛɛ Jakob a kɔ‘i'e Galɛd.[18]

⁴⁸Labaŋ tɔ̧a̧: «Mɔi̧a-ta’ɛ a̧ duk nɛ́ mɔɔ-sedaako mgbara'm in mɛɛ ku̧u̧naŋ-a sɔsɔɔ'ɛ.» Nɛ́ hegɔ wa saa nin fara'i Galɛd.

⁴⁹Wa saa nin fara'i mbɛt'e Mispa, wen nɛ tɔ̧ «Fara-pɛm-mɔ», wen Labaŋ tɔ̧a̧‘e nde: «GASA WAN a̧ pɛm mɛ in am ŋgimbi n’ɛɛ beka zɔk yí ŋmaa ɓɔna.

⁵⁰Kà mɛ a̧ usa bɔnɛ ha̧ o bem kɔ‘m, kà mɛ a̧ baa o mbe okoo, kóó ŋma bíí bo oi-aa na mbɛt, Sɔ̧ kpɔk nɛ́ wi-sedaako mgbara mɛ in am.»

⁵¹Ɓɛɛ Labaŋ tɔ̧ ha̧ Jakob woyo: «Zɔk o ta nɔ'ɔ n'am kaia a hɛ̧ɛ̧ nɛ́ mɔɔ-sedaako mgbara'm in mɛɛ, in ta n’ɛɛ baa e ŋgɔn’ɛ.

⁵²O ta nɔ'ɔ nɛ́ mɔɔ-sedaako, ta nɛ̀ yor ŋgɔn’ɛ nɛ́ mɔɔ-sedaako mbɛt. Mi kana mɔ‘e mi beka yak zu o ta nɔ'ɔ mɛ nɛ sitɛ mɛ na; mɛ̀ kán mɔ mbɛt'e, wi beka yak zu o ta nɔ'ɔ mɛ tɛ pii tɛ‘m in zu ta nɛ yor ŋgɔn’ɛ na, wen ká fom ba yɛ.

⁵³Sɔ̧ ko Abraham in Sɔ̧ ko Nahɔr a̧ gɔn kita mgbara yɛ!» Ɓɛɛ Jakob kan mɔ nɛ nin wi nɛ Izak dáà kɔ̧-a̧ yu.

⁵⁴Jakob ɗafa Sɔ̧ sɛn mgbara kaya, ɓɛɛ a̧ sa o nya-a̧ mɛ tɛɛ nyɔŋ mɔ. Wa nyɔŋa mɔ, ɓɛɛ wa ɔ hi̧i̧.