Read Northwest Gbaya KU̧U̧NAŊMƆ 32 Bible Online

KU̧U̧NAŊMƆ 32 - Northwest Gbaya bible

KU̧U̧NAŊMƆ 32

¹Mɛ́ tutuyɛ sút, Labaŋ kura, ɓɛɛ dui nú o be-koo in o bem kɔ‘i; a̧ toka de yoŋgo zu wa, ɓɛɛ a̧ zik tɛ-a si ɗoŋ tɛ kɔ̧-a̧.

²Jakob nɛɛ siti, ɓɛɛ a̧ kpa ŋmaa rɛ́t in o betom ko Sɔ̧.

³Jakob zɔka wa, ɓɛɛ tɔ̧: «Fara’ɛ nɛ́ fara ko Sɔ̧!» Ɓɛɛ a̧ a nin fara'i'e Mahanayim.

⁴Jakob toma o betom yak ti sitɛ nya-a̧ Esau, nɛ duk sɛn nú Sɛir, nú Edɔm.

⁵Jakob ha̧a̧ nú ha̧ wa, a̧ tɔ̧a̧: «Mɔ n’ɛnɛ tɛ tɔ̧ ha̧ nyaa Esau nɛ mɔ'ɔ: ‹Tom ko wi-de-tom k’ɛ́nɛ́ Jakob nɛ tom nɛ mɔ'ɔ: Mi duka in Labaŋ sɛn fara kɔ̧-a̧ hɔ kinii.

⁶Mi kpaa o ndai in o tuifuu, o geɗek mɔ-dai, o wi-de-tom in o kó-de-tom sa'm pi̧ tom nɛti ha̧ nyaa Esau, wen ha̧ mɔ n'am tɛ de mɛ de tɛ-a.› »

⁷O betom pia ɗoŋ kpa Jakob, ɓɛɛ tɔ̧: «Ɛ́ɛ́ nɛ̀ɛ́ hɔ tɛ nya'nɛ́ Esau; a̧ nɛ tɛ-a in o bíí gɔmŋmaa naar a̧ we ti'nɛ́ tɛnɛ‘i.»

⁸Kíì dee Jakob nyɛmna, ɓɛɛ a̧ kpa dita-see. A̧ kɛ̧ɛ̧ mgbara o bíí nɛ yaa in a̧ tɛ fara yiitoo; o geɗek mɔ-dai, o ndai in o ŋgeloba mbɛt

⁹tɔ̧ nɛnɛ: «Kà Esau bá biro tɛnɛ tik nɛ ɓii gbagari, ɓɛɛ ɓii-aa yuu mɔ yak.»

¹⁰Jakob tɔ̧a̧: «Sɔ̧ ko dáà kɔ‘m Abraham in Sɔ̧ ko dáà kɔ‘m Izak, ɛ́nɛ́ GASA WAN nɛ̀ tɔ̧ɔ̧ ha̧‘m'e, à̧‘m sí ɗoŋ si nù kɔ‘m, sɛn fara nɛ wa koa'm sɛnɛ, ɓɛɛ wi tɛ de demɔ in am,

¹¹mi nyɛm so mɛ kpa o demɔ lɛŋ n’ɛnɛ ha̧a̧ ha̧‘m na. Ɛ́nɛ́ yora ɗoŋ o ha̧a̧nú k’ɛ́nɛ́ lɛŋ ha̧ wi-de-tom k’ɛ́nɛ́. Mi kuu so Jurdɛn nɛ dɔra er-am ɓɛɛ; ɓɛɛ kinii mi dee gbagari yiitoo.

¹²Mi aia nú h’ɛ́nɛ́, ɛ̀nɛ̀ kpás'am er nya'm Esau, wen mi yu nɛ a̧ de nɛ kíì, wen ka a̧ tɛɛ tik ɛɛ nɛ biro, o naa-wan-bem in o bem mbɛt.

¹³K’ɛ́nɛ́, ɛ́nɛ́ baa tɔ̧ ha̧‘m'e wi tɛ de demɔ in am, ɓɛɛ wi dee ha̧ o bezaŋ-am mɛ dɔk hee o nyɛmɛ ká̧ zaŋ gba-tɔp nɛ‘i nyɛm mɛ tɔr na ga, wen ɔ dɔka nyɛmna.»

¹⁴Ɓɛɛ Jakob ɔ fara'i mɛ zɛ‘i. O mɔ nɛ yaa so er-a lɛŋ, a̧ ndɛma zu-a wen ha̧a̧ ha̧ nya-a̧ Esau:

¹⁵mɛ̀ nɛ́ o nana gbadua gɔŋmaa-yiitoo, vala-a ɓu-yiitoo, o nana sami gɔmŋmaa-yiitoo in o vala-a ɓu-yiitoo;

¹⁶o nana ŋgeloba nɛ ɓɔna tɛ ha̧a̧ bere ha̧ o bem ɓu-taar in o be-a, nana ndai ɓu-naar, o wiwii-a ɓu, o nana tuifuu ɓu-yiitoo in o wiwii-a ɓu mbɛt.

¹⁷A̧ hoka o mɔ-dai nɔ‘i a er o wi-de-tom kɔ̧-a̧ nɛtɛ nɛtɛ, ɓɛɛ a̧ tɔ̧ ha̧ wa: «Ɛ̀nɛ̀ yák ti ha̧‘m, ɓɛɛ ɛ̀nɛ̀ é be fara mgbara o duk mɔ-dai nɛtɛ nɛtɛ.»

¹⁸Jakob ha̧a̧ heembea ha̧ kuti wi-de-tom nɛ yaka ti: «Ŋgimbi nɛ nya'm Esau tɛ kpa mɛ, a̧ tɛ ak mɛ: ‹Mɛ́ nɛ́ bíí ko o? Mɛ́ nɛ́ déè? O mɔ-dai nɔ'ɔ ti mɛ'ɛ nɛ́ ko o?›

¹⁹Mɛ́ tɛ́ kifi nú: ‹Nɛ́ o mɔ ko wi-de-tom k’ɛ́nɛ́ Jakob; nɛ́ ha̧a̧mɔ a̧ a̧ ha̧ ha̧ nyaa Esau nɛ ta-tɛ, ɓɛɛ Jakob nɛ zu a̧ tɛ nɛ̀ ɗoŋ‘i.› »

²⁰Nɛ́ kpɔk heembea'i a̧ Jakob ha̧a̧ ha̧ hɔ-ɗoŋ kuti wi-de-tom in ha̧ taar wi-de-tom gu nɛ̀ oi o wi nɛ ndak kànà pata wa nɛ o mɔ-dai; a̧ tɔ̧a̧: «Nɛ́ kpɔk yuwar wen'i ɛ̀nɛ̀ tɛ́ tɔ̧ nɛnɛ ha̧ Esau ŋgimbi n’ɛnɛ tɛ kpa ŋmaa in a̧;

²¹ɛ́nɛ́ tɛ tɔ̧‘e, wi-de-tom kɔ̧-a̧ Jakob nɛ̀ zu, a̧ tɛ́ nɛ̀ ɗoŋ mbɛt'i.» Jakob taa so, wi tɛ ga̧ see Esau nɛ̀ o mɔ nɛ‘i ha̧a̧ ha̧ a̧ nɛti kaɗi, ɓɛɛ sɛka'i hɔɔ ti a̧, ŋmafara a̧ tɛ kpɛk wi nɛ de-a.

²²O ha̧a̧mɔ yaka nɛti, ɓɛɛ Jakob nɛ zu ɓɔn kɔ‘i sɛn kɔ̧ gbagari zɛ kpɔk.

²³Sɛn tɛ kale kpɔk zɛ‘i, Jakob kura, mgbɔ o kóò kɔ̧-a̧ yiitoo, o kó-de-tom kɔ̧-a̧ yiitoo in o bem kɔ̧-a̧ ɓu-zua-kpɔk ku nɛ̀ horo Yabɔk.

²⁴A̧ kaia wa ku nɛ̀ horo, a̧ foo o mɔ kɔ̧-a̧ lɛŋ ku nɛ yì yak ti,

²⁵ɓɛɛ a̧ ɓɔn ɛ̀nɛ̀-a. Nɛ́ mɔ'ɔ nɛ̀ ŋma bíí aa gɔta in a̧ nɛ zɛ hegɔ hɔ gɔna ndaa-zan.

²⁶Ŋgimbi nɛ̀ wi’ɛi zɔka'e, wi nyɛm mɛ yo Jakob nɛ nù na, a̧ ŋmaa Jakob sɛn gun kui-kɔra-a, ɓɛɛ gun ku-a nyun nú ŋmaa.

²⁷A̧ tɔ̧a̧: «Mɛ̀ é‘m duk, ndaa-zan a̧ gɔn tɛnɛ‘i,» ɓɛɛ Jakob kifi nú ha̧ a̧: «Mi beka e mɛ duk na, hɔ fara nɛ mɛ tɛ tok de yoŋgo zu'm sɛ.»

²⁸Ɓɛɛ wi’ɛi ak a̧: «Nin-mɛ nɛ o?» A̧ kifa nú: «Nin-am nɛ Jakob.»

²⁹Wi’ɛi tɔ̧ɔ̧ woyo: «Wi beka sa mɛ‘e Jakob ɓɔna; ɓɛɛ wi tɛ sa mɛ‘e Israɛl, wen mɛ bìí biro in Sɔ̧, mɛ bìí biro in o bíí mbɛt, ɓɛɛ mɛ gan zu mɔ.»

³⁰Jakob aka mɔ: «Mi aia nú h’ɛ́nɛ́, ɛ̀nɛ̀ sá nin'nɛ́ ha̧‘m.» Ɓɛɛ a̧ kifi nú: «Wen ge sa mɛ ak nin-am ge?» Nɛ mɔ'ɔ n'aa toka de yoŋgo ha̧ a̧ ɓɔn hi̧i̧.

³¹Jakob aa nin fara'i Pɛnuɛl, wen nɛ tɔ̧ «Saŋa-yí Sɔ̧», ɓɛɛ a̧ tɔ̧: «Mi zɔka Sɔ̧ nɛ gbaayí‘m, ɓɛɛ mi duk kpasa.»

³²Wese ɓɔna fara daŋa-a, ɓɛɛ Jakob ɓir Pɛnuɛl yak, a̧ dafi dafi.

³³Mɔ nɛ dee ha̧ o be Israɛl lɛŋ mɛ zim nɛ gasa nik tɛ kui-kɔra saɗi hɔ nɛnɛ sɔsɔɔ nɛ mɔ‘i. Wen Sɔ̧ ŋmaa so Jakob sɛn gun kui-kɔra, ɓɛɛ kui-kɔra-a nyun nu ŋmaa.