Read Northwest Gbaya KU̧U̧NAŊMƆ 42 Bible Online

KU̧U̧NAŊMƆ 42 - Northwest Gbaya bible

KU̧U̧NAŊMƆ 42

¹Jakob zia'e, wa ɗɔr nɛ alkamaari sɛn Egiptɛ mɛ, ɓɛɛ a̧ tɔ̧ ha̧ o bem kɔ̧-a̧: «Mɔ h’ɛ́nɛ́ mɛ́ ya yaa zɔk nɛ̀ yí ŋmaa a̧a̧?

²Mi zia'e alkamaari a̧a̧ sɛn Egiptɛ; ɛ̀nɛ̀ zír si mɛ, ɛ̀nɛ̀ hí̧fí nyɔŋmɔ tɛnɛ, wen k’ɛ́ɛ́ tɛɛ fe.»

³Nɛ́ mɔ'ɔ nɛ̀ o zɔmwi ko Jozɛf ɓu yaka si nú Egiptɛ wen hi̧fa alkamaari,

⁴ɓɛɛ Jakob e so war ha̧ Bɛnjamin nya Jozɛf mɛ nɛ in o zɔmwi kɔ̧-a̧ na, wen Jakob kɔ̧ so ha̧ ŋma ŋgamɔ mɛ hɔ zu a̧ na.

⁵O bem ko Israɛl nɛɛ mɛ hi̧fi alkamaari, hee o dɔka bíí ga, wen nɛ kaɓa baa nú Kanaŋ mbɛt.

⁶Jozɛf duka so nɛ gasawi zu nú Egiptɛ, ɓɛɛ nɛ́ a̧ a̧ ɗɔr alkamaari ha̧ o bíí nù kɔ̧-a̧ lɛŋ. O nya-a̧ hɔa, ɓɛɛ gu nù ti a̧, ba yí hikiɗi nɛ nù.

⁷Ŋgimbi nɛ Jozɛf zɔka wa, ɓɛɛ a̧ iŋ yí wa; a̧ kɔ̧ dea-a ha̧ wa mɛ iŋ a̧ na, a̧ tɔ̧ɔ̧ wen nɛ ŋgai in wa, ak nɛ wa'e: «Ɛ́nɛ́ tɛ nɛ déè?» Ɓɛɛ wa kifi nú: «Ɛ́ɛ́ tɛ nɛ̀ nú Kanaŋ h’ɛ́ɛ́ mɛ́ hi̧fi nyɔŋmɔ.»

⁸Jozɛf iŋa yí o zɔmwi kɔ‘i, ɓɛɛ kɔ-wa, wa iŋ yí-a na.

⁹Tɛ Jozɛf mbaŋa ɗoŋ zu n'aa ɔɔ so, nɛ usa so mɔ wen wa, ɓɛɛ a̧ tɔ̧ ha̧ wa: «Ɛ́nɛ́ nɛ́ o wi-kpe-naŋ-mɔ! Ɛ́nɛ́ kíí mɛ iŋ nɛ fara-ɓɔsi ko nù'ɛ!»

¹⁰Wa kifa nú: «Nyaa, o wi-de-tom k’ɛ́nɛ́ tɛɛ kɔ‘i mɛ hi̧fi nɛ nyɔŋmɔ.

¹¹Ɛ́ɛ́ hɛ̧ɛ̧ lɛŋ nɛ́ o bem ko kpɔk dáà, ɛ́ɛ́ nɛ wi-tɔ̧-kpasawen, o wi-de-tom k’ɛ́nɛ́ bó nɛ́ o wi-kpe-naŋ-mɔ na.»

¹²Jozɛf tɔ̧ɔ̧ ha̧ wa: «Bó nɛ́ kpasawen na; ɛ́nɛ́ kíí mɛ iŋ nɛ̀ fara-ɓɔsi ko nù'ɛ!»

¹³Wa kifa nú woyo: «Ɛ́ɛ́ o wi-de-tom k’ɛ́nɛ́, ɛ́ɛ́ yaa so nɛ́ ɓu-zua-yiitoo, bem ko kpɔk dáà sɛn nú Kanaŋ. Sɔŋkur bem a̧a̧ in dáà k’ɛɛ, ɓɛɛ ŋma kpɔk bo ɓɔna.»

¹⁴Jozɛf tɔ̧ɔ̧ ha̧ wa nɛ ŋgaya-a woyo: «Nɛ mbetɛ, mi tɔ̧ɔ̧ h’ɛ́nɛ́, ɛ́nɛ́ nɛ́ o wi-kpe-naŋ-mɔ.

¹⁵Mɔ nɛ tɛ hɔ zu'nɛ́ nɛ́ mɔ'ɔ. Mi kana mɔ, hee mɔ'ɔ nɛ wannu Egiptɛ duk kpasa ga, ɛ́nɛ́ beka yak sɛn hɛ̧ɛ̧ na hɔ ŋgimbi nɛ wa tɛ ba sɔŋkur nya'nɛ́ tɛnɛ hɛ̧ɛ̧ sɛ!

¹⁶Ɛ̀nɛ̀ tóm ŋma bíí kpɔk mgbara'nɛ́ wen baa nya'nɛ́ tɛnɛ, ɓɛɛ nɛ̀ war k’ɛ́nɛ́, ɛ́nɛ́ tɛ ɓɔn sɛn kɔ̧ zɔɓɔ hɛ̧ɛ̧ hɔ ŋgimbi n’ɛɛ tɛ iŋ‘e mɔ n’ɛnɛ tɔ̧a̧ nɛ́ kpasawen. Kà bo hegɔ na, mi kana mɔ, hee mɔ'ɔ nɛ wannu Egiptɛ duk kpasa ga, ɛ́nɛ́ nɛ́ wi-kpe-naŋ-mɔ nɛ mbetɛ.»

¹⁷A̧ aa wa lɛŋ kɔ̧ zɔɓɔ tɛ zɛ taar.

¹⁸Ɗoŋ zɛ taar, Jozɛf tɔ̧ɔ̧ ha̧ wa: «Mɔ n’ɛnɛ tɛ de sɛk’ɛ́nɛ́ kpasa nɛ́ mɔ'ɔ; wen mi nɛ wi-yu-sɔ̧.

¹⁹K’Ɛ̀nɛ̀ nɛ́ bòò nɛ́ wi-tɔ̧-kpasawen, ɓɛɛ ŋma kpɔk mgbara'nɛ́ a̧ ɓɔn kɔ̧ zɔɓɔ oi nú‘nɛ́. Ɓɛɛ war k’ɛ́nɛ́, ɛ̀nɛ̀ káí nyɔŋmɔ nɛnɛ ha̧ o bíí nutua k’ɛ́nɛ́ nɛ wɔ gbɛ wa'i.

²⁰Ɛ́nɛ́ tɛ́ mgbɔ sɔŋkur bem tɛnɛ ha̧‘m; nɛ́ sɛn hi̧i̧ a'i tɛ iŋ nɛ̀ kpasawen; ɓɛɛ ɛ́nɛ́ beka fe na.» Wa dee hegɔ.

²¹Wa tɔ̧ɔ̧ nɛ nú ŋmaa: «Nɛ mbetɛ, ɛ́ɛ́ daka bɔnɛ pi̧ zu yɛ, wen zu nya-ɛɛ. Ɛ́ɛ́ zɔka dita-see kɔ̧-a̧ ŋgimbi n'aa kɔ̧ɔ̧ so h’ɛ́ɛ́ mɛ gbak a̧; ɛ́ɛ́ kɔ̧ so zia-a na, ɓɛɛ nɛ́ mɔ‘i sa bɔnɛ kpa yɛ sɔsɔɔ.»

²²Rubɛn tɔ̧ɔ̧ ha̧ wa: «Bó nɛ́ mi tɔ̧ɔ̧ so h’ɛ́nɛ́, k’ɛ́nɛ́ de ɗaŋmɔ in bem’ɛi na, na nde? Ɛ́nɛ́ zíí so wen kɔ‘m na. Kinii, Sɔ̧ ak nɛ ɛɛ wen zu tɔk-tɛ-a.»

²³Wa iŋ so'e Jozɛf zii wen nɛ wa tɔ̧‘i zii na, wen ŋma bíí duka mgbara wa wen wee ɗoŋ wen kɔ-wa ha̧ Jozɛf in tɔ̧ɔ̧ kifa-nú ko Jozɛf ha̧ wa.

²⁴Jozɛf yaka benaŋ tikiɗi, nɛ́ɛ̀ hi̧i̧ kɔ̧a̧, ɓɛɛ pii ɗoŋ tɛ́ɛ̀ kpa wa woyo, tɔ̧ nɛ wen in wa. A̧ baa Simɛɔŋ hɛr nɛ nyak-boi nɛ yí-wa.

²⁵Jozɛf ha̧a̧ nú ha̧ o bíí mɛ́ a alkamaari dun bufu kɔ-wa, mɛ́ a sede ko o wi nɔ‘i kpɔk kpɔk si ɗoŋ kɔ̧ bufu kɔ-wa, in ha̧ wa mɛ́ ha̧ nyɔŋmɔ-yuwar ha̧ wa mbɛt; nɛ́ mɔ‘i a̧ a̧ dee ha̧ wa.

²⁶Wa aa o tui zu tuifuu kɔ-wa, ɓɛɛ wa yak.

²⁷Tɛ yora-a wen ɔɔ nù, ŋma kpɔk mgbara wa hu̧i̧a̧ nú bufu wen ha̧a̧ nyɔŋmɔ ha̧ tuifuu kɔ‘i, ɓɛɛ a̧ kpa sede kɔ̧-a̧ nɛ duk nú bufu.

²⁸A̧ tɔ̧ɔ̧ ha̧ o nya-a̧: «Wa ha̧a̧ sede kɔ‘m pii ɗoŋ ha̧‘m. Zɔk nɛ̀ duk nú bufu alkamaari kɔ‘m’ɛ!» Ɗɛɗɛ-wa gɔna, ɓɛɛ kíì de wa; wa tɔ̧ɔ̧ nɛ nú ŋmaa: «Nɛ́ ge mɔ ge nɛ Sɔ̧ dee in yɛɛ'ɛ ge?»

²⁹Wa sii ɗoŋ kpa dáà kɔ-wa Jakob sɛn nú Kanaŋ, ɓɛɛ wa we ɗoŋ mɔ nɛ yaka lɛŋ ha̧ a̧.

³⁰Wa tɔ̧a̧: «Wi nɛ duk zu nù‘i tuɓa da̧ a zu yɛ nɛ ŋgaya-a nyɛmna, ɓɛɛ a̧ ba ɛ́ɛ́ hee o wi-kpe-naŋ-mɔ ga.

³¹Ɛ́ɛ́ kifa nú ha̧ a̧: ‹Ɛ́ɛ́ nɛ́ o wi-tɔ̧-kpasawen, ɛ́ɛ́ bó nɛ́ o wi-kpe-naŋ-mɔ na.

³²Ɛ́ɛ́ nɛ́ o nya-wi ɓu-zua-yiitoo, dáà kpɔk, ɓɛɛ ŋma kpɔk mgbara yɛ bo ɓɔna; sɔŋkur nya-ɛɛ ɓɔna in dáà k’ɛɛ sɛn nú Kanaŋ.›

³³Ɓɛɛ wi nɛ duk zu nù‘i kifi nú h’ɛ́ɛ́: ‹Mɔ nɛ tɛ de ha̧‘m mɛ́ iŋ‘e ɛ́nɛ́ nɛ́ o wi-tɔ̧-kpasawen nɛ́ mɔ'ɔ: Ɛ̀nɛ̀ é ŋma nya'nɛ́ kpɔk in am sɛn hɛ̧ɛ̧, ɛ̀nɛ̀ káí nyɔŋmɔ wen o bíí nutua k’ɛ́nɛ́ nɛ wɔ gbɛ, ɓɛɛ ɛ̀nɛ̀ yak.

³⁴Hegɔ, ɛ̀nɛ̀ mgbɔ́ sɔŋkur nú-bere k’ɛ́nɛ́ tɛnɛ ha̧‘m; hegɔ mi tɛ iŋ‘e, ɛ́nɛ́ bó nɛ́ o wi-kpe-naŋ-mɔ na, ɛ́nɛ́ nɛ́ o wi-tɔ̧-kpasawen; mi tɛ ha̧ nya'nɛ́ h’ɛ́nɛ́ woyo, ɓɛɛ ɛ́nɛ́ dee gɛnɛ tɛ nù'ɛ!› »

³⁵Hee mɔ'ɔ nɛ wa ku̧u̧ naŋ sɛɛ mɔ kɔ̧ bufu alkamaari kɔ-wa ga, kóó o nde kpaa hɛra sede kɔ‘i kɔ̧ bufu kɔ‘i. Ŋgimbi nɛ wa zɔka sede'i, kíì dee wa lɛŋ in dáà kɔ-wa.

³⁶Ɓɛɛ dáà kɔ-wa Jakob tɔ̧ ha̧ wa: «Zɔk kinii'i, ɛ́nɛ́ dɔr nɛ́ o bem sɛn er-am; Jozɛf nɛ mɔ'ɔ nɛ bo kɔ‘i ɓɔna, Simɛɔŋ bo ɓɔna, ɓɛɛ nɛ́ mɔ'ɔ n’ɛnɛ kɔ̧ɔ̧ mɛ́ ba Bɛnjamin mbɛt, ɓɛɛ mɔ‘i lɛŋ pii nɛ ɗoŋ tik zu'm.»

³⁷Rubɛn tɔ̧ɔ̧ ha̧ dáà kɔ‘i: «Ɛ̀nɛ̀ gbɛ́ o bem kɔ‘m yiitoo yinɛ kà‘m nɛ́ mgbɔɔ Bɛnjamin pii ɗoŋ h’ɛ́nɛ́ na. Ɛ̀nɛ̀ é a̧ sɛn er-am, ɓɛɛ mi tɛ mgbɔ a̧ piinɛ h’ɛ́nɛ́.»

³⁸Ɓɛɛ Jakob tɔ̧ woyo: «Bem kɔ‘m beka si ɗoŋ in'nɛ̀ɛ́ na. Nya-a̧ fea e nɛ́ a̧ kpɔk sɛn mgbara'nɛ́ hɛ̧ɛ̧; kà ŋma ŋgamɔ kpa a̧ tɛ nɔ̀‘i n’ɛnɛ nɛ‘i, nɛ̀ oi sɔki kɔ‘m'i, mi tɛ fe nɛ tu̧u̧-see.»