Read Northwest Gbaya KU̧U̧NAŊMƆ 8 Bible Online

KU̧U̧NAŊMƆ 8 - Northwest Gbaya bible

KU̧U̧NAŊMƆ 8

¹Tɛ Sɔ̧ mbaŋa ɗoŋ Nɔe in o saɗi ká bá nɛ̀ o mɔ-dai lɛŋ nɛ a̧a̧ in a̧ sɛn kɔ̧ kombon. A̧ dee ha̧ ŋma búk mɛ yu zu yì, ɓɛɛ yì ku̧naŋ ɔ̧sa̧-a̧.

²O kpút-kpút mɛ ɗuka-fara in o woi yiwese lɛŋ kpea, kórò gɔna.

³Yì daka ɔ̧si nɛnɛ mɔktɛ mɔktɛ tɛ́ ɔɔ-zɛ gɔmŋmaa-nɛ-ɓu-mɔɔrɔ.

⁴Tɛ́ mɔɔrɔ-ɗoŋ-yiitoo fio-zɛ, tɛ̀ ɓu-zua-mɔɔrɔ-ɗoŋ-yiitoo ɔɔ-zɛ, kombon zira duk zu kaya Arara.

⁵Yì ɔ̧sa̧ nɛnɛ hegɔɔ hɔ tɛ́ fio-zɛ ɓu, nɛ ɔɔ-zɛ ɓu-zua-kpɔk, ɓɛɛ o zu kaya ku̧naŋ gboa-a.

⁶Ɗoŋ ɔɔ-zɛ ɓu-naar, Nɔe hu̧i̧a̧ woi gasa kombon n'aa dee so;

⁷a̧ pi̧i̧ gba-kɔra ɓɛɛ gba-kɔra duk bu̧i nɛnɛ pii ɗoŋ na, hɔ ŋgimbi nɛ yì ɔ̧sa̧ nɛnɛ zu nù lɛŋ.

⁸A̧ pi̧i̧ gbaku̧i ha̧ a̧ mɛ zɔk kà yì nɛ ɔ̧sa̧ zu nù.

⁹Gbaku̧i'i nɛa, ɓɛɛ a̧ kpa fara gua-a na, ɓɛɛ a̧ pii ɗoŋ tɛ Nɔe sɛn kɔ̧ gasa kombon wen zù nu lɛŋ hura nɛ yì; Nɔe nyɛi̧a er, ba a̧ woyo pii kɔ̧ gasa kombon.

¹⁰A̧ pɛma mɔ zɛ mɔɔrɔ-ɗoŋ-yiitoo, ɓɛɛ a̧ pi̧ gbaku̧i si zan woyo.

¹¹Gbaku̧i'i pia ɗoŋ mɛ́ ga̧a̧mɔ nɛ be gbaa-er te-nɔ̧́ nú; hegɔ Nɔe iŋa'e yì ɔ̧sa̧ zu nù kaɗi.

¹²A̧ pɛma zɛ mɔɔrɔ-ɗoŋ-yiitoo woyo, ɓɛɛ a̧ e gbaku̧i yak, ɓɛɛ pii ɗoŋ ɓɔna.

¹³Tɛ kuti wese, tɛ kuti fio-zɛ nɛ Nɔe kpaa nɛ pɛ 601, yì ɔ̧sa̧ e nɛ zɔma nù. Nɔe hu̧i̧a̧ mɔɔ-kpe-zu gasa kombon, ɓɛɛ a̧ zɔka'e nù zɔma kaɗi.

¹⁴Tɛ yiitoo fio-zɛ, tɛ ɔɔ-zɛ ɓu-yiitoo-zua-mɔɔrɔ-ɗoŋ-yiitoo, nù kora lɛŋ.

¹⁵Sɔ̧ tɔ̧ɔ̧ ha̧ Nɔe:

¹⁶«Mɛ̀ gbó kɔ̧ kombon, mɛ́, kóò kɔ-mɛ, o bem kɔ-mɛ in o kóò kɔ-wa mbɛt.

¹⁷O saɗi lɛŋ nɛ a̧a̧ in mɛɛ, mɔ lɛŋ nɛ ɔm ɔm, mɔ nɛ tɔ̧a̧‘e nɔ̧́í̧, o mɔ-dai in o be saɗi lɛŋ nɛ yar zu nù, mɛ̀ káí wa gbonɛ, ɓɛɛ wa a̧ nyɛɓi sɛn zaŋnu, wa a̧ ko siti, ɓɛɛ wa a̧ dɔk zaŋnu.»

¹⁸Nɔe gboo in o bem kɔ‘i, koo kɔ̧-a̧ in o kóò ko o bem kɔ̧-a̧.

¹⁹O gasa saɗi, o be saɗi lɛŋ, o nɔ̧́í̧ in mɔ lɛŋ nɛ yar zu nù dam nɛ ɗoŋ zuduk-wa kpɔk kpɔk zira nɛ kɔ̧ kombon a nù.

²⁰Nɔe mboo fara-ɗafi-sɔ̧ ha̧ GASA WAN. A̧ baa sa̧a̧ saɗi in sa̧a̧ nɔ̧́í̧ kpɔk kpɔk dam nɛ zuduk-wa lɛŋ dɔ ɗafi nɛ Sɔ̧.

²¹Pɛr dɔɔ-kpoo-sɔ̧ dee tɛ GASA WAN, ɓɛɛ a̧ tɔ̧: «Mi beka fom nù wen zu bíí ɓɔna. Nɛ mbetɛ see bíí a̧a̧ tɛ ɗaŋmɔ nɛ bem mɛ gasi nɛnɛ. Ɓɛɛ kóó hegɔ mbɛt, mi beka kum o mɔ lɛŋ nɛ ya kpasa hee mɔ'ɔ n'am dea’ɛ ga woyo ɓɔna.

²²Ŋgimbi nɛ̀ nù tɛ duk nɛnɛ, guna nyɔnɔ in mɔi̧a-a, gɛ̧ɛ̧ in gbɛ̧ŋmɔ, bɛɛ in ɓar, wese in zɛ tɛ duk kpoo nɛ kpoo.»