Read Northwest Gbaya 2 SAMUƐL 10 Bible Online

2 SAMUƐL 10 - Northwest Gbaya bible

2 SAMUƐL 10

¹Ɗoŋ mɔ‘i, wannu Amɔŋ fea, ɓɛɛ bem kɔ̧-a̧ Hanun ɔ wan oi-aa.

²Nɛ́ mɔ'ɔ nɛ̀ David tɔ̧a̧: «Mi tɛ de mɔ in Hanun bem ko Nahas nɛ̀ yuwar-a hee mɔ'ɔ nɛ dáà kɔ̧-a̧ dee so nɛnɛ in am ga.» David toma o wi-de-tom kɔ‘i nɛnɛ ha̧ wa mɛ nɛ̀ɛ́ hɔ tɛ Hanun oi fio ko dáà kɔ̧-a̧. Ŋgimbi nɛ̀ o wi-de-tom ko David hɔɔ tɛ nù ko o be Amɔŋ,

³o gasawi ko o be Amɔŋ tɔ̧ɔ̧ ha̧ Hanun wan kɔ-wa: «Ɛnɛ ta k’ɛ́nɛ́‘e David tu̧ nɛ tɛ dáà k’ɛ́nɛ́ wen n'aa toma o bíí mɛ hɔ tɛ‘nɛ́ oi fio ko dáà k’ɛ́nɛ́'ɛ nde? Bo nɛ wen kpee naŋ mɔ ha̧ a̧ mɛ gbin ye k’ɛ́nɛ́ a̧ a̧ toma nɛ̀ wa tɛnɛ na nde?»

⁴Hanun kaia o betom ko David, a̧ kpuia reeta zera kɔ-wa, ɓir laa kɔ-wa hɔ tɛ tua ndaa-wa, ɓɛɛ fo wa sinɛ.

⁵David zia nyɛrɛ mɔ‘i, ɓɛɛ a̧ tom ŋma bíí we nɛ̀ ti wa, wen foe dee wa nyɛmna; a̧ toma tɔ̧ ha̧ o wi nɔ‘i ndé, wa a̧ ɓɔ́n sɛn Jeriko pɛm nɛ̀ ŋgimbi nɛ̀ zera kɔ-wa tɛ hɔ lɛŋ kaɗi, sɛka wa pia ɗɔŋ saaye.

⁶O be Amɔŋ zɔka'e David kifa nɛ́ wisɛn kɔ‘i, ɓɛɛ wa yoɓi o be Aram mɛ Bɛt-Rehob in o be Aram mɛ Soba: mɛ̀ nɛ́ o wi-nɛ-biro nɛ̀ naŋ booro-ɓu-yiitoo. Wa kaia o wi-biro er wannu Maka tɛ bíí booro, in o bíí ko Tob booro-ɓu-zua-yiitoo.

⁷David zia nyɛrɛ mɔ‘i, ɓɛɛ a̧ tom Jɔab in o ŋgaŋa wi-biro lɛŋ nɛnɛ.

⁸O be Amɔŋ gboa, ɓɛɛ nɛk naŋ biro nú garo ye. O be Aram mɛ Soba in Rehob in o bíí ko Tob gu nɛ̀ o bíí ko Maka ya so kɔ-wa nɛtɛ sɛn zaŋbɛɛ.

⁹Jɔab zɔka'e wi tɛ̀ɛ́ bi biro nɛti in nɛ ɗoŋ mbɛt, nɛ́ mɔ'ɔ n'aa hoka o bíí mgbara o ŋgaŋa wi-biro Israɛl lɛŋ, ɓɛɛ wa nɛk naŋ biro tan ti o be Aram.

¹⁰A̧ ee o oi wi-biro ha̧ nya-a̧ Abisai, ɓɛɛ wa nɛk kɔ-wa tan ti o be Amɔŋ.

¹¹A̧ tɔ̧ɔ̧ ha̧ nya-a̧: «Kà o be Aram nɛ́ gana'm, mɛ tɛ tɛ̀ɛ́ gbak am; ɓɛɛ kà o be Amɔŋ nɛ́ gana mɛ, mi tɛ nɛ̀ɛ́ gbak mɛ.

¹²Mɛ̀ ŋgáí gba̧a̧ tɛ-mɛ, ɛ̀ɛ̀ yór nɛ̀ ŋgaya-a wen o bíí k’ɛɛ in wen o ye ko Sɔ̧ k’ɛɛ. GASA WAN a̧ dé mɔ n'aa kɔ̧a̧.»

¹³Nɛ́ mɔ'ɔ nɛ̀ Jɔab in o wi-biro kɔ‘i nɛ̀ɛ̀ ba zu dúk nɛ̀ ŋmaa in o be Aram, ɓɛɛ o be Aram yu mɔ ti wa.

¹⁴Ŋgimbi nɛ o be Amɔŋ zɔka'e, o be Aram yuu mɔ yak kaɗi, ɓɛɛ wa mbɛt yuu mɔ ti Abisai si saaye mɛ. Jɔab pia ɗoŋ nɛ yí biro n'aa bìì in o be Amɔŋ‘i, ɓɛɛ a̧ si ɗoŋ si Jerusalɛm.

¹⁵O be Aram zɔka'e, o be Israɛl gana wi nɛ̀ biro, ɓɛɛ wa mɔi̧ ŋmaa lɛŋ.

¹⁶Hadadɛzɛr toma o betom mɛ nɛ̀ɛ́ mɔi̧ o be Aram nɛ̀ ya nɛ̀ kur Efrat a tɛ biro. O wi nɔ‘i hɔɔ Helam; wi nɛ duka so zu wa nɛ́ Sobak gasawi ko o wi-biro ko Hadadɛzɛr.

¹⁷Nyɛrɛ mɔ‘i aa zer David; a̧ mɔi̧a o be Israɛl lɛŋ, ɓɛɛ a̧ yak nɛ̀ɛ́ ku Jurdɛn hɔ Elam. O be Aram nɛ̀ɛ̀ nɛk biro ti David, ɓɛɛ wa bi ŋmaa in a̧.

¹⁸Nɛ́ mɔ'ɔ nɛ̀ o be Aram yuu mɔ ti o be Israɛl yak. David gbɛɛ o nyaŋa nɛ‘i hɛra tɛ keekee gɔmŋmaa-mɔɔrɔ-ɗoŋ-yiitoo in o wi-daŋ-nyaŋa booro-ɓu-naar. A̧ gbɛɛ gasawi kɔ-wa Sobak ɓɔn kpɔk fara'i mbɛt.

¹⁹Ɗoŋ nɛ o be-wan ko Hadadɛzɛr lɛŋ zɔka'e ndé, o be Israɛl gana wi nɛ̀ biro kaɗi, ga̧a̧mɔ duka mgbara wa in Israɛl, ɓɛɛ wa ya ɗɔɔ ŋgai ko Israɛl. Ɗoŋ mɔ‘i, kíì dee o be Aram wen pia ɗoŋ mɛ gbak o be Amɔŋ woyo.