Read Northwest Gbaya 2 SAMUƐL 12 Bible Online

2 SAMUƐL 12 - Northwest Gbaya bible

2 SAMUƐL 12

¹GASA WAN toma wi-tɔ̧-wen oi nú Sɔ̧ Nataŋ sitɛ David. Nataŋ nɛɛ kpa David ɓɛɛ tɔ̧ ha̧ a̧: «O ŋma bíí yiitoo yaa so kpɔk saaye; ɛ̧ɛ̧ kpɔk’ɛ nɛ́ wanmbɔi, ɓii-aa nɛ́ wisan.

²Wanmbɔi a̧a̧ so nɛ̀ o sami in o ndai nɛ̀ dɔka-a.

³Mɔ nɛ̀ wisan'i a̧a̧ nɛnɛ nɛ́ be-zɔŋa sami kpɔk ɓɛɛ. Sami'i nɛ́ be geɗek-a n'aa hi̧fa so. A̧ daia a̧ ɓɛɛ sami'i duk gasi nɛnɛ tɛ kɔ̧-a̧ in o bem kɔ̧-a̧. Sami'i nyɔŋ nɛ́ kpɔk nyɔŋmɔ nɛ̀ wan kɔ̧-a̧ nyɔŋ; a̧ nɔ mɔ nɛ̀ kpɔk bera-nɔ-mɔ ko wan kɔ̧-a̧. A̧ ɔ in wan kɔ̧-a̧ kpɔk mbɛt; sami'i duk so hee boko-bem kɔ̧-a̧ ga.

⁴Ŋma wese ŋma gɛnɛ hɔa tɛ ko wanmbɔi, ɓɛɛ wanmbɔi kɔ̧ so mɛ ɗaŋ o dɔka mɔ kɔ‘i na. A̧ nɛ̀ɛ̀ ɓar nɛ́ kpɔk sami ko wisan'i mɛ gbɛ ha̧ gɛnɛ kɔ̧-a̧ mɛ nyɔŋ.»

⁵See David nyima in wi’ɛi, ɓɛɛ tɔ̧ ha̧ Nataŋ: «Hee mɔ'ɔ nɛ GASA WAN duk kpasa ga, wi-de-mɔ‘i nyɛma so mɛ fe yinɛ!

⁶A̧ nyɛma so mɛ yoɓi zɔŋa sami'i nɛ̀ mbe-a naar, wen n'aa dee pɛrti yí-tom'i, ɓɛɛ n'aa de ko na.»

⁷Nataŋ tɔ̧ɔ̧ ha̧ David: «Wi’ɛi nɛ́ mɛ! Wen nɛ̀ GASA WAN Sɔ̧ ko Israɛl tɔ̧a̧ nɛ́ mɔ'ɔ: ‹Nɛ́ mi a̧‘m tɛna nɔ̧́-wan Israɛl a zu mɛ; nɛ́ mi a̧ kpasa mɛ er Saul.

⁸Mi ha̧a̧ kira ko wan kɔ-mɛ ha̧ mɛ; mi ha̧a̧ o kóò ko wan kɔ-mɛ ha̧ mɛ lɛŋ, mi ha̧a̧ Israɛl in Juda ha̧ mɛ mbɛt. Kà mɔɔ nɔ‘i lɛŋ nɛ́ nyɛma mɛ na, mi nyɛma mɛ ha̧ mbe-a ha̧ mɛ woyo.

⁹Wen ge mɛ ee wen ko GASA WAN tɛ geemɔ, de nɛ̀ mɔ n'aa kɔ̧ na ge? Mɛ gbɛɛ Urii be Hit wen nɛ mɛ dee ha̧ o be Amɔŋ mɛ gbɛ a̧ nɛ̀ gba-paa, ɓɛɛ mɛ ba kóò kɔ̧-a̧ nɛ̀ kóò e kɔ̧ tua kɔ-mɛ.

¹⁰Gba-paa beka nyaŋ nutua kɔ-mɛ na ɓɔnsɛnɛ, wen nɛ̀ mɛ ee am tɛ geemɔ, ɓɛɛ mɛ ba kóò ko Urii be Hit nɛ̀ kóò e kɔ̧ tua kɔ-mɛ.›

¹¹GASA WAN tɔ̧ɔ̧ woyo: ‹Mi tɛ de ha̧ bɔnɛ mɛ gbo nɛ̀ kɔ̧ tua kɔ-mɛ kpa nɛ̀ mɛ. Mi tɛ kai o kóò kɔ-mɛ nɛ̀ gbaa yí-mɛ ha̧ ha̧ ŋma bíí, ɓɛɛ wi’ɛi tɛ ɔ in wa nɛ̀ bu-wese.

¹²Kɔ-mɛ, mɛ dee nɛ̀ hu̧sa̧-a̧, ɓɛɛ kɔ‘m, mi tɛ kifi er mɔ‘i nɛ̀ gbaayí o be Israɛl nɛ̀ bu-wese.› »

¹³David tɔ̧ɔ̧ ha̧ Nataŋ: «Mi dee ɗaŋmɔ ti GASA WAN!» Ɓɛɛ Nataŋ tɔ̧ ha̧ David: «GASA WAN kpee yí zu ɗaŋmɔ kɔ-mɛ‘i, mɛ beka fe na.

¹⁴Mɔ kpɔk, hee mɔ'ɔ nɛ mɛ tu̧u̧ see GASA WAN batɛ tɛ mɔ‘i ga, bem’ɛi nɛ̀ wa kòò ha̧ mɛ‘i tɛ fe.»

¹⁵Ɓɛɛ Nataŋ si ɗoŋ tɛ kɔ‘i. Ɗoŋ mɔ‘i, GASA WAN pi̧i̧ zɛɛ tɛ bem nɛ̀ kóò ko Urii kòò ha̧ David'i.

¹⁶David kɔfa mɔ in Sɔ̧ wen zu bem’ɛi; a̧ zima yì mbɛt, ɓɛɛ ŋgimbi n'aa si tɛ kɔ̧-a̧ mɛ ɔ nù, a̧ ɔ nɛ mbɔɗɔnu.

¹⁷O gasawi nutua kɔ̧-a̧ mɔi̧a ya katɛ a̧ mɛ ba a̧ e ŋgɔn takaɗi; a̧ bɛ̧a̧ nyɔŋa mɔ in wa mbɛt.

¹⁸Tɛ mɔɔrɔ-ɗoŋ-yiitoo ɔɔ-zɛ, bem’ɛi fea. Kíì tɔ̧ɔ̧ wen fio'i ha̧ David dee o wi-de-tom. Wa taa so nde: «Ŋgimbi nɛ bem’ɛi ɓɔna so kpasa, ɛɛ tɔ̧ɔ̧ wen ha̧ a̧, ɓɛɛ a̧ zii na. Kinii ɛɛ tɛ de hee ge tɔ̧ nɛnɛ ha̧ a̧‘e, bem fea ge nde? Bo nɛ a̧ tɛ de ŋma ɗaŋmɔ na nde?»

¹⁹David zɔka'e, o wi-de-tom fu̧i̧ nɛ wen, ɓɛɛ a̧ iŋ ndé, bem’ɛi fea kaɗi: A̧ aka o wi-de-tom kɔ̧-a̧: «Bem’ɛi fea nde?» Wa kifa nú ha̧ a̧: «Ii, a̧ fea!»

²⁰Nɛ́ mɔ'ɔ nɛ̀ David kura mbɔɗɔnu, zui yì, a nɔ̧́-nyama tɛ, ɓɛɛ kpai laa pi̧ mbe-a, yak si kɔ̧ Tua ko GASA WAN, ɓɛɛ gbɛ zugur nù. A̧ sii ɗoŋ tɛ kɔ̧-a̧, a̧ aka ha̧ wa mɛ ha̧ nyɔŋmɔ ha̧ a̧, ɓɛɛ a̧ nyɔŋ.

²¹O wi-de-tom kɔ̧-a̧ tɔ̧ɔ̧ ha̧ a̧: «Nɛ́ ge ɛ̀nɛ̀ de’ɛ ge nde? Ŋgimbi nɛ bem ɓɔna kpasa, ɛnɛ zima mɔ, hi̧i̧ nɛ̀ kɔ̧a̧, ɓɛɛ kinii nɛ̀ bem fea, ɛnɛ kura, ɓɛɛ ɛnɛ nyɔŋ mɔ.»

²²David kifa nú ha̧ wa: «Mi zima yì, hi̧i̧ nɛ̀ kɔ̧a̧ ŋgimbi nɛ̀ bem ɓɔna so kpasa, wen mi taa so kɔ‘m, ŋmafara Sɔ̧ tɛ de ko ha̧‘m, ɓɛɛ bem duka kpasa ha̧‘m.

²³Ɓɛɛ kinii, a̧ fea, mi tɛ zim yì wen ge? Mi tɛ ba so nɛ́ a̧ piinɛ ɗoŋ? Nɛ́ mi a̧ tɛ nɛ ɗoŋ-aa, bo nɛ a̧ a̧ tɛ pii ɗoŋ tɛ́ɛ̀ kpa'm na.»

²⁴David ha̧a̧ ga̧a̧-see ha̧ kóò kɔ̧-a̧ Bɛtseba. David sii tua ɗoŋ-aa, ɓɛɛ duk in a̧; a̧ baa zaŋ, ɓɛɛ a̧ ko be-wiwii, ɓɛɛ wa a nin-a Salomɔŋ. GASA WAN kɔ̧ɔ̧ Salomɔŋ,

²⁵ɓɛɛ tom Nataŋ, wi-tɔ̧-wen oi nú Sɔ̧ mɛ tɔ̧ wen-aa ha̧ David. Hegɔ Nataŋ aa nin Yedidia ha̧ bem’ɛi, wen nɛ tɔ̧: «Wi nɛ GASA WAN kɔ̧a̧,» wen GASA WAN kɔ̧ɔ̧ so a̧.

²⁶Jɔab bìí Raba, ye-wan ko o be Amɔŋ, ɓɛɛ a̧ ba.

²⁷Jɔab toma o betom ha̧ David: «Mi bìí Raba, ɓɛɛ mi ba ye nɛ̀ war ɗɔɔ.

²⁸Kinii, ɛ̀nɛ̀ mɔ́í̧ oi o wi-biro k’ɛ́nɛ́, ɛ̀nɛ̀ tɛ́ɛ̀ kɛr ye e nù ɓɛɛ ɛ̀nɛ̀ bá, wen ká tɛɛ duk hee mi a̧‘m baa ye ga, wen ká tɛɛ hur nɛ̀ nin-am.»

²⁹David mɔi̧a o wi-biro lɛŋ, ɓɛɛ daŋ si Raba; a̧ bìì ye'i, ɓɛɛ a̧ ba.

³⁰Mɔɔ-gu-zu nɛ‘i dee nɛ̀ lɔr tɛ kilo ɓu-taar-zua-mɔɔrɔ, nɛ de toka ta a̧a̧ sɛnɛ mbɛt, a̧a̧ so zu Milkɔŋ, géé-sɔ̧ ko o be Amɔŋ; David baa mɔ‘i yinɛ, gu zu-a nɛ̀ tɛ a̧. A̧ kaia o mɔɔ-oi-biro saaye'i nɛ̀ dɔka-a nyɛmna.

³¹Nɛ̀ ko o bíí saaye'i, a̧ nɛ̀ɛ̀ usi tom-ɓira-te, tom-za̧a̧-nù nɛ wara in tom-gɔma-te ha̧ wa. A̧ dee ha̧ wa mɛ de tom brik. Nɛ́ mɔ‘i a̧ a̧ dee in o bíí tɛ ye ko o be Amɔŋ lɛŋ. Ɓɛɛ David in o wi-biro kɔ‘i lɛŋ pii ɗoŋ pii Jerusalɛm.