Read Northwest Gbaya 2 SAMUƐL 14 Bible Online

2 SAMUƐL 14 - Northwest Gbaya bible

2 SAMUƐL 14

¹Jɔab bem ko Sɛruya zɔka'e, see wannu kifa sitɛ Absalɔm,

²ɓɛɛ Jɔab tom nɛ́ɛ̀ sa ŋma haya okoo sɛn saaye Tɛkɔa, ɓɛɛ tɔ̧ ha̧ a̧: «Mi ai nú ha̧ mɛ, mɛ̀ gɔ́n tɛ-mɛ hee mɛ zim nɛ mɔ ga; mɛ̀ á laa-zima-mɔ tɛ-mɛ, ká mɛ sɔ̧ nɔ̧́-nyama tɛ-mɛ na. Mɛ̀ dúk hee ŋma okoo nɛ̀ zim nɛ́ fio nɛ̀ zɛ-a dɔka kaɗi ga.

³Mɛ̀ nɛ́ tɛ wannu, ɓɛɛ mɛ̀ tɔ̧́ wen’ɛ ha̧ a̧.» Ɓɛɛ Jɔab we ɗoŋ wen n'aa tɛ tɔ̧‘i ha̧ a̧.

⁴Okoo Tɛkɔa'i nɛ̀ɛ̀ kpa wannu, ba yí gu nù, ɓɛɛ tɔ̧: «Wannu, ɛ̀nɛ̀ gbák am!»

⁵Wannu aka a̧: «Nɛ́ ge a̧ de mɛ ge?» Ɓɛɛ kóò‘i kifi nú: «Ɛ̀nɛ̀ zɔ̀k, mi nɛ́ ko-gera, wíì kɔ‘m fea.

⁶Kó-de-tom k’ɛ́nɛ́ a̧a̧ so nɛ̀ o bem yiitoo. Wa kia nú ŋmaa sɛn zaŋbɛɛ, ɓɛɛ ŋma bíí mɛ am wa bo na; ɛ̧ɛ̧ kpɔk’ɛ gbɛɛ ɓii-aa;

⁷ɓɛɛ o bíí kɔ‘m dik wen a zu'm kó-de-tom k’ɛ́nɛ́, wa tɔ̧a̧: ‹Mɛ̀ úsí wi nɛ gbɛɛ nya-wi h’ɛ́ɛ́ gbɛ a̧ hee mɔ'ɔ n'aa gbɛɛ nɛ̀ nya-a̧ ga. Hegɔ, ɓɛɛ ɛɛ gbɛɛ wi-kai-mɔɔ-oi yinɛ.› Wa tɛ gbɛ oi bem nɛ̀ ɓɔna ha̧‘m'i, ɓɛɛ nin wíì kɔ‘m in bezaŋ-aa bìí zaŋnu’ɛ.»

⁸Wannu tɔ̧ɔ̧ ha̧ kóò‘i: «Mɛ̀ sí ɗoŋ tɛ kɔ-mɛ; mi tɛ tɔ̧ wen zu mɛ.»

⁹Ko Tɛkɔa'i tɔ̧ɔ̧ ha̧ wannu: «Nyaa wannu kɔ‘m, ɗaŋmɔ a̧ tík tika-a zu'm in o bíí kɔ‘m. Wannu in damti kɔ‘i bo nɛ̀ yɔɔ-kaya zu mɔ‘i na.»

¹⁰Wannu tɔ̧ɔ̧ ha̧ a̧ woyo: «Mɛ̀ mgbɔ́ bíí nɛ tɛ de nana-gore in mɛɛ tɛnɛ ha̧‘m, ɓɛɛ a̧ beka de ŋma ɗaŋmɔ in mɛɛ woyo ɓɔna.»

¹¹Ɓɛɛ kóò‘i gɔm er woyo: «Ɛ̀nɛ̀ wór GASA WAN Sɔ̧ k’ɛ́nɛ́ ha̧‘m, wen ká wi-kifi-er oi tɔk-tɛ‘i tɛ́ɛ̀ gbɛ zu siti, ká wa tɛ́ɛ̀ gbɛ oi bem kɔ‘m'i.» Ɓɛɛ Wannu tɔ̧: «Mi kan mɔ nɛ̀ nin GASA WAN nɛ duk kpasa, mui̧-zu bem kɔ-mɛ kóó kpɔk beka tik nù na.»

¹²Kóò‘i aka mɔ woyo: «Mi ai nú h’ɛ́nɛ́, ɛ̀nɛ̀ é war ha̧ kó-de-tom k’ɛ́nɛ́ mɛ tɔ̧ ŋma wen kpɔk.» Ɓɛɛ wannu kifi nú: «Mɛ̀ tɔ̧̀.»

¹³Kóò‘i tɔ̧a̧: «Wen ge ɛnɛ ee pɛrti zu-mɔ hegɔ wen o bíí ko Sɔ̧ ge? Tɛ gɔna kita'i, wannu iŋa'e, wi yɔɔ kaya, wen nɛ‘i sa wi nɛ‘i ndaka piinɛ ɗoŋ na.

¹⁴Ŋgimbi n’ɛɛ fe, ɛ́ɛ́ duk hee yì nɛ̀ gbaia a nù nɛ‘i nyɛm mɛ ɗu woyo ɓɔna ga. Sɔ̧ ba fio e ŋgɔn na, ɓɛɛ a̧ ɗafa kànà mɔ wen ká wi nɛ‘i ndaka tɛ́ɛ̀ duk nyɛi̧ nɛ́ wi.

¹⁵Kinii, mi tɛɛ mɛ tɔ̧ wen’ɛ ha̧ nyaa wannu kɔ‘m, wen nɛ̀ o bíí pi̧i̧ kíì tɛ kó-de-tom k’ɛ́nɛ́, ɓɛɛ sa'm tɔ̧, mi tɛ nɛ̀ɛ́ tɔ̧ ha̧ wannu; ŋmafara, wannu tɛ de mɔ nyɛm nɛ ɗoŋ mɔ nɛ kó-de-tom k’ɛ́nɛ́ tɛ ak,

¹⁶kà wannu nɛ kpɛka mɛ ɓar am yinɛ er wi nɛ kɔ̧ɔ̧ mɛ gbɛ‘m yinɛ tɛ kpɔk ŋgimbi in bem kɔ‘m mgbara o bíí nɛ Sɔ̧ hoka mɛ duk nɛ́ bíí kɔ‘i.»

¹⁷Koo'i tɔ̧ɔ̧ woyo: «Wannu a̧ tɔ̧́ ŋma wen-ga̧-see, wen gasa wan kɔ‘m wannu duk hee betom ko Sɔ̧ ga, tɛ kɛ̧ɛ̧ mgbara demɔ in ɗaŋmɔ. GASA WAN Sɔ̧ k’ɛ́nɛ́ a̧ dúk in'nɛ̀ɛ́.»

¹⁸Nɛ́ mɔ'ɔ nɛ̀ wannu kifa nú ha̧ kóò‘i: «Kà‘m nɛ́ aka mɛ, ká mɛ hu̧si ŋma mɔ nɛ‘m na.» Kóò‘i tɔ̧a̧: «Nyaa wannu kɔ‘m a̧ ák mɔ.»

¹⁹Wannu aka mɔ: «Nɛ́ Jɔab a̧ usi war ha̧ mɛ tɛ mɔ‘i nde?» Kóò‘i kifa nú: «Hee nyaa wannu kɔ‘m duk kpasa ga, ŋma bíí nyɛm mɛ a̧r si wiiko, kóó si gale tɛ mɔ nɛ̀ nyaa wannu tɔ̧ na. Nɛ̀ mbetɛ, nɛ́ wi-de-tom k’ɛ́nɛ́ Jɔab a̧ ha̧a̧ nú, in nɛ́ a̧ a̧ wee ɗoŋ wen lɛŋ nɛ kó-de-tom k’ɛ́nɛ́ tɛ̀ɛ́ tɔ̧.

²⁰Jɔab dee mɔ‘i, wen h’ɛ́nɛ́ mɛ kpai mɔ lɛŋ. Nyaa wannu kɔ‘m iŋa mgbara mɔ hee betom ko Sɔ̧ ga. Ɛnɛ iŋa mɔ lɛŋ nɛ yak zu nù'ɛ.»

²¹Ɗoŋ mɔ‘i, wannu tɔ̧ɔ̧ ha̧ Jɔab: «Mi kpɛka mɔ‘i. Mɛ̀ nɛ́ɛ̀ mgbɔ daŋa-ŋgaiwi Absalɔm piinɛ ɗoŋ.»

²²Jɔab guu nù ti wannu, gbɛɛ zugur nù, ɓɛɛ tok de yoŋgo zu a̧; a̧ tɔ̧a̧: «Wi-de-tom k’ɛ́nɛ́ iŋa'e, ɛnɛ dee ko ha'i, wen nɛ̀ wannu dee mɔ nɛ wi-de-tom kɔ̧-a̧ aka'i.»

²³Nɛ́ mɔ'ɔ nɛ̀ Jɔab kura yak si Gɛsur, ɓɛɛ nɛ́ɛ̀ mgbɔ Absalɔm piinɛ ɗoŋ sɛn Jerusalɛm.

²⁴Wannu tɔ̧a̧: «A̧ a̧ nɛ́ si tɛ kɔ̧-a̧ wen mi kɔ̧ mɛ zɔk a̧ na.» Absalɔm sii ɗoŋ si tɛ kɔ‘i, ɓɛɛ wannu zɔk yí-a̧ na.

²⁵Sɛn Israɛl lɛŋ, ŋma bíí nɛ̀ yora so ŋgaiwi gan Absalɔm, nɛ‘i zɔna gan a̧ bo na. Tɛ naŋ-a hɔ zu-a, ŋma mɔ gɔ sɛnɛ na.

²⁶Tɛ pɛ lɛŋ, a̧ kpui nɛ́ zu-a, wen mui̧-zu-a dita so nyɛmna. A̧ kpui zu-a kà‘i wé dita-a, nɛ́ kilo yiitoo nyɛm nɛ dita kilo ko wannu.

²⁷Absalɔm koo be-wiwii taar in be-okoo kpɔk. Nin boko-bem’ɛi nɛ́ Tamar. Nɛ́ be-okoo nɛ̀ yora so zɔŋa nyɛmna.

²⁸Absalɔm dee pɛ yiitoo sɛn Jerusalɛm, a̧ zɔk wannu na.

²⁹Nɛ́ mɔ'ɔ n'aa saa Jɔab mɛ tom a̧ nɛnɛ tɛ wannu, ɓɛɛ Jɔab kɔ̧ so mɛ nɛ tɛ ko Absalɔm na. Absalɔm toma sa Jɔab woyo, ɓɛɛ a̧ bɛ̧ nɛa-a.

³⁰Ɓɛɛ Absalɔm tɔ̧ ha̧ o wi-de-tom kɔ‘i: «Bó nɛ́ ɛnɛ zɔka fɔ be-fon[9] ko Jɔab nɛ̀ dúk ká̧ kɔ‘m'i na, ɛ̀nɛ̀ nɛ́ɛ̀ pi̧ wee sɛnɛ.»

³¹Nɛ́ mɔ'ɔ nɛ̀ o wi-de-tom ko Absalɔm nɛɛ pi̧ wee tɛ fɔ‘i, ɓɛɛ Jɔab nɛ́ɛ̀ kpa Absalɔm kɔ̧ tua kɔ̧-a̧, ɓɛɛ ak a̧: «Wen ge sa o wi-de-tom kɔ-mɛ nɛ̀ɛ̀ pi̧ wee tɛ fɔ kɔ‘m ge?»

³²Absalɔm kifa nú ha̧ Jɔab: «Nɛ́ wen n'am saa so mɛ mɛ tom sitɛ wannu mɛ ak a̧ hee mɔ'ɔ ga: ‹Wen ge s'am pia nɛ̀ Gɛsur ge? Gana so ha̧‘m mɛ duk hi̧i̧ kaŋ. Kinii, mi kɔ̧ɔ̧ mɛ nɛ tɛ wannu. Kà mi a̧ dee ŋma ɗaŋmɔ, a̧ a̧ gbɛ́‘m yinɛ.› »

³³Jɔab nɛɛ tɛ wannu, ɓɛɛ we ɗoŋ wen'i ha̧ a̧. Nɛ́ mɔ'ɔ nɛ̀ wannu saa Absalɔm, ɓɛɛ a̧ nɛ tɛ a̧. A̧ guu nù ti a, ba sɔnti gu nɛ nù, ɓɛɛ wannu hɛr Absalɔm.