Read Northwest Gbaya 2 SAMUƐL 15 Bible Online

2 SAMUƐL 15 - Northwest Gbaya bible

2 SAMUƐL 15

¹Ɗoŋ mɔ‘i, ɓɛɛ Absalɔm ba keekee in o nyaŋa gu nɛ̀ o bíí ɓu-mɔɔrɔ mɛ duk ti ha̧ a̧.

²Mɛ tutuyɛ sut, Absalɔm kura, ɓɛɛ nɛ́ɛ̀ yor ká̧ yuwar nú garo ye. Ŋgimbi lɛŋ nɛ̀ ŋma bíí nɛ̀ a̧a̧ nɛ̀ kita nɛ́ tɛ wannu wen gɔna kita kɔ‘i, Absalɔm saa a̧, ɓɛɛ aka a̧: «Mɛ́ nɛ́ bíí ge ye ge?» Ɓɛɛ wi’ɛi kifa nú: «Wi-de-tom k’ɛ́nɛ́ nɛ́ ŋma bíí mgbara o zuduk be Israɛl.»

³Ɓɛɛ Absalɔm tɔ̧ɔ̧ ha̧ a̧: «Mɛ̀ zɔ̀k! Wen kɔ-mɛ ɔ dee in nɛ̀ yuwar-a; mɔ kpɔk, ŋma mgbák bíí ko wannu nɛ tɛ zii wen kɔ-mɛ bo na.»

⁴Absalɔm tɔ̧ɔ̧ woyo: «Ho! Kà‘m bó so nɛ́ wi-gɔn-kita zu nù'ɛ, nɛ́ sɛn tɛ‘m a̧ o bíí lɛŋ nɛ̀ a̧a̧ nɛ̀ wen tɛ̀ɛ́ tɛ, ɓɛɛ mi gɔna kita ha̧ wa nɛ̀ yuwar-a.»

⁵Ŋgimbi nɛ bíí tɛ mɛ gu nù ti a̧, a̧ baa wi’ɛi e ŋgɔn, ɓɛɛ a̧ hɛra ŋmaa in a̧.

⁶Absalɔm ɔra o be Israɛl lɛŋ nɛ tɛ mɛ ɓa wen ti wannu, ɓɛɛ o be Israɛl lɛŋ kɔ̧ nɛ́ a̧.

⁷Absalɔm duka pɛ naar, ɓɛɛ tɔ̧ ha̧ wannu: «Ɛ̀nɛ̀ é war ha̧‘m nɛ sɛn Hebrɔŋ ha̧‘m nɛ́ɛ̀ de mɔ n'am ha̧a̧ so nú‘m wen dea-a ha̧ GASA WAN.

⁸Wen ŋgimbi n'am duka Gɛsur sɛn Aram, wi-de-tom k’ɛ́nɛ́ ha̧a̧ so nú ha̧ GASA WAN hee mɔ'ɔ ga: ‹Kà GASA WAN mgbɔ‘m sinɛ hɔ Jerusalɛm nɛ̀ mbetɛ, mi tɛ de tom ha̧ a̧!› »

⁹Nɛ́ mɔ'ɔ nɛ̀ wannu tɔ̧ɔ̧ ha̧ a̧: «Mɛ̀ nɛ́ zaŋ ga̧a̧mɔ,» ɓɛɛ Absalɔm ba yuwar yak si Hebrɔŋ.

¹⁰Ahai a̧ toma o betom kɔ̧-a̧ nɛnɛ tɔ̧ ha̧ o zuduk be Israɛl: «Ŋgimbi n’ɛnɛ tɛ zii dɔma zak, ɓɛɛ ɛnɛ tɛ tɔ̧: ‹Wa dee wan ha̧ Absalɔm sɛn Hebrɔŋ mɛ.› »

¹¹Wese'i, Absalɔm yaka so in o bíí Jerusalɛm gɔmŋmaa-yiitoo; wa nɛ́ o bíí nɛ wa saa saa tɛnɛ. Wa lɛŋ iŋ mgbara mɔ nɛ yak na.

¹²Ŋgimbi nɛ Absalɔm ɓɔna fara ɗafa sɔ̧, a̧ toma tom si Gilo mɛ nɛ̀ɛ́ sa Ahitɔfɛl be Gilo nɛ duk nɛ́ wi-tɔ̧-mbɔrɔ ko David. Kpɛra wan ko Absalɔm ŋgaya so nyɛmna, ɓɛɛ o bíí nɛ́ ɗoŋ-aa nɛ dɔka-a.

¹³Nɛ́ mɔ'ɔ nɛ̀ ŋma bíí tɛɛ tɔ̧ ha̧ David hee ndé: «See o be Israɛl lɛŋ kɔ̧ɔ̧ nɛ́ Absalɔm.»

¹⁴David tɔ̧ɔ̧ ha̧ o gasawi kɔ‘i lɛŋ nɛ ya in a̧ sɛn Jerusalɛm: «Ɛ̀ɛ̀ bá war ɛ̀ɛ̀ yú mɔ wen Absalɔm beka e yɛ na. Ɛ̀nɛ̀ kpán nɔ, wen ká a̧ tɛɛ kpa yɛ, ká a̧ bi yɛ, ɓɛɛ ká a̧ kum o bíí saaye lɛŋ nɛ gba-paa.»

¹⁵O gasawi ko wannu kifa nú ha̧ a̧: «Ɛɛ tɛ de mɔ lɛŋ nɛ nyaa wannu hoka; ɛɛ nɛ́ wi-de-tom k’ɛ́nɛ́ ɓɔnsɛnɛ.»

¹⁶Wannu gboo tik zan nɛ̀ naŋ in o bíí nutua kɔ‘i lɛŋ; ɓɛɛ wannu e o zɔŋa-kóò ɓu wen pɛma kira.

¹⁷Wannu gboo nɛ̀ naŋ in o bíí kɔ‘i lɛŋ, ɓɛɛ wa nɛ́ɛ̀ yor sɛn tɛ sɔŋkur tua.

¹⁸O wi-biro kɔ̧-a̧ lɛŋ gbara ti a̧: mɛ̀ nɛ́ o be Kɛrɛt, o be Pɛlɛt nɛ̀ pɛm so wannu, sɛka o be Gat gɔmŋmaa-mɔɔrɔ-ɗoŋ-kpɔk nɛ̀ tɛa so ɗoŋ-aa.

¹⁹Wannu tɔ̧ɔ̧ ha̧ Itai gasawi ko o wi-biro Gat: «Wen ge mɛ kɔ̧ɔ̧ mɛ nɛ in yɛɛ mbɛt ge? Mɛ̀ sí ɗoŋ mɛ̀ dúk in ɓii wannu wen mɛ́ nɛ́ gɛnɛ. Wa ndaka so mɛ ndak nɛ̀ nù kɔ-mɛ yinɛ mbɛt.

²⁰Mɛ hɔɔ kɔ-mɛ mɛ mboyɛɛ, ɓɛɛ sɔsɔɔ mi tɛ mgbɔ mɛ yak nɛnɛ n'am yar kɔ‘m nɛ̀ nú-tum nɛnɛ'ɛ nde? Mɛ̀ sí ɗoŋ in o nya-mɛ, ɓɛɛ GASA WAN a̧ dúk in mɛɛ; a̧ a̧ dé ko ha̧ mɛ mbɛt.»

²¹Itai kifa nú ha̧ wannu: «Mi kan mɔ sɔsɔɔ sɛn ti GASA WAN nɛ duk kpasa in sɛn ti'nɛ́ wannu kɔ‘m. Fara lɛŋ nɛ wannu tɛ nɛ, kóó nɛ́ fio, kóó nɛ́ duka-kpasa, wi-de-tom k’ɛ́nɛ́ tɛ nɛ in'nɛ̀ɛ́.»

²²Nɛ́ mɔ'ɔ nɛ̀ David tɔ̧ɔ̧ ha̧ Itai: «Mɛ̀ tɛ́ ɛ̀ɛ̀ yàk.» Ɓɛɛ Itai be Gat yak in o bíí kɔ‘i gu nɛ̀ obem kɔ-wa.

²³Bíí lɛŋ hi̧i̧ so nɛ́ kɔ̧a̧ nɛ̀ ŋgaya-a ŋgimbi nɛ wa gbar nɛnɛ yaknɛ. Wannu kuu be-zer Sɛdrɔŋ in o bíí kɔ‘i lɛŋ, ɓɛɛ wa ba war si ká̧ ŋga-gbárà.

²⁴Wi-ɗafi-sɔ̧ Sadɔk a̧a̧ so hi̧i̧ mbɛt in o be Levii lɛŋ nɛ̀ tui nɛ́ Kuɓa nɔɔ-tɔk ko Sɔ̧. Wa nɛ̀ɛ̀ ba Kuɓa'i e nu, ɓɛɛ Abiatar duk ɗafi nɛ̀ sɔ̧ hɔ ŋgimbi nɛ̀ ndaa o bíí nɛ̀ gbar tɛnɛ nɛ̀ saaye gɔna.[10]

²⁵Wannu tɔ̧ɔ̧ ha̧ Sadɔk: «Mɛ̀ bá Kuɓa nɔɔ-tɔk ko Sɔ̧ sinɛ ɗoŋ saaye woyo; kà GASA WAN á̧ kɔ̧a̧, a̧ tɛ mgbɔ‘m piinɛ, ɓɛɛ mi zɔka a̧ woyo in fara kɔ̧-a̧.

²⁶A̧ kà a̧ nɛ́ tɔ̧a̧, mi de tɛ wi na wó, a̧ a̧ dé mɔ n'aa kɔ̧a̧ in am.»

²⁷Wannu tɔ̧ɔ̧ ha̧ Sadɔk wi-ɗafi-sɔ̧: «Mɛ̀ zɔ̀k! Mɛ̀ sí ɗoŋ saaye zaŋ ga̧a̧mɔ. Bem kɔ-mɛ Ahimas in Yɔnataŋ bem ko Abiatar, o bem k’ɛ́nɛ́ yiitoo'i a̧ yá in'nɛ̀ɛ́.

²⁸Ɓɛɛ war kɔ‘m, mi tɛ nik naŋ-am ɓɔn nɛnɛ sɛn ŋga-gbárà mɛ, zɛm nɛ nyɛrɛmɔ n’ɛnɛ tɛ tom tɛnɛ ha̧‘m.»

²⁹Nɛ́ mɔ'ɔ nɛ̀ Sadɔk in Abiatar gɔɔ Kuɓa nɔɔ-tɔk ko Sɔ̧ sinɛ ɗoŋ sɛn Jerusalɛm, ɓɛɛ wa ɓɔn kɔ-wa sɛn hi̧i̧.

³⁰David hi̧i̧ nɛ́ kɔ̧a̧ daŋ nɛ̀ kaya Te-nɔ̧́. A̧ kpee zu-a nɛ̀ laa, ɓɛɛ a̧ nɛ nɔ̀ nɛ̀ géé naŋ. O bíí lɛŋ nɛ̀ nɛ́ in a̧ kpee nɛ́ zu nɛ̀ laa; wa daŋ nɛ́ kaya, hi̧i̧ nɛ̀ kɔ̧a̧ mbɛt.

³¹Wa tɛɛ tɔ̧ ha̧ David: «Ahitɔfɛl a̧a̧ mgbara o bíí nɛ ee nú in Absalɔm.» Ɓɛɛ David tɔ̧: «GASA WAN a̧ ɗáŋ o tɔ̧ɔ̧-mbɔrɔ ko Ahitɔfɛl.»

³²David hɔɔ zu kaya fara nɛ‘i gu nù ti Sɔ̧ sɛnɛ, ɓɛɛ Husai be Ark nɛ̀ duk in a̧ ɓɔnsɛnɛ hɔ kpa a̧ nɛ̀ a̧ka̧ laa in nɛ̀ fuunu zu.

³³David tɔ̧ɔ̧ ha̧ a̧: «Kà mɛ tɛ in am, mɛ tɛ duk nɛ́ ŋma tui wen am.

³⁴A̧ kà mɛ si ɗoŋ si saaye, kà mɛ tɔ̧ ha̧ Absalɔm: ‹Wannu, mi tɛ duk nɛ́ wi-de-tom k’ɛ́nɛ́; nɛti, mi duka so nɛ́ wi-de-tom ko dáà k’ɛ́nɛ́, ɓɛɛ kinii, mi nɛ́ wi-de-tom k’ɛ́nɛ́,› hegɔ‘i, mɛ tɛ gbak am ɗaŋ nɛ̀ o tɔ̧ɔ̧-mbɔrɔ ko Ahitɔfɛl.

³⁵Bo nɛ o wi-ɗafi-sɔ̧ Sadɔk in Abiatar tɛ ya katɛ‘nɛ́ na nde? Mɔ nɛ mɛ tɛ zii lɛŋ nú o bíí nutua ko wannu, mɛ tɛ we ɗoŋ-aa ha̧ o wi-ɗafi-sɔ̧ Sadɔk in Abiatar.

³⁶Wa a̧a̧ nɛ̀ o bem kɔ-wa yiitoo: Ahimas bem ko Sadɔk in Yɔnataŋ bem ko Abiatar. Nyɛrɛ mɔ n’ɛnɛ tɛ zii lɛŋ, ɛnɛ tɛ tom nɛ̀ wa tɛnɛ ha̧‘m.»

³⁷Nɛ́ mɔ'ɔ nɛ̀ Husai sɛm ko David sii ɗoŋ si saaye ŋgimbi nɛ Absalɔm ye nɛnɛ Jerusalɛm.