Read Northwest Gbaya 2 SAMUƐL 17 Bible Online

2 SAMUƐL 17 - Northwest Gbaya bible

2 SAMUƐL 17

¹Ahitɔfɛl tɔ̧ɔ̧ ha̧ Absalɔm: «Ɛ̀nɛ̀ é war ha̧‘m hok o wi-biro booro-ɓu-zua-yiitoo, ha̧‘m kai wa ndak nɛ̀ ɗoŋ David mɛ zɛ hɛ̧ɛ̧.

²Mi tɛ hɔ kpa a̧ ŋgimbi n'aa tɛ mbɔi, ɓɛɛ mi pi̧i̧ kíì tɛ-a; o wi-biro kɔ̧-a̧ lɛŋ tɛ yu mɔ, ɓɛɛ mi gbɛɛ wannu ŋgimbi n'aa tɛ ɓɔn ɛ̀nɛ́-a.

³Hegɔ mi tɛ fo o bíí lɛŋ pii ɗoŋ tɛ‘nɛ́. K’ɛ̀ɛ̀ gbɛ wi n’ɛnɛ kii'i, ɓɛɛ o bíí lɛŋ tɛ pii ɗoŋ. O bíí lɛŋ tɛ ya tɛ ga̧a̧mɔ.»

⁴Wen'i dee tɛ Absalɔm in o gasawi Israɛl lɛŋ.

⁵Nɛ́ mɔ'ɔ nɛ̀ Absalɔm tɔ̧a̧: «Ɛ̀ɛ̀ sá Husai be Ark, ɛ̀ɛ̀ zíí mɔ n'aa a̧a̧ nɛnɛ mɛ tɔ̧ mbɛt.»

⁶Husai nɛ̀ɛ̀ tɛ Absalɔm, ɓɛɛ Absalɔm tɔ̧ ha̧ a̧: «Wen nɛ̀ Ahitɔfɛl tɔ̧a̧ nɛ́ mɔ'ɔ. Ɛ̀ɛ̀ dé nɛ mɔ n'aa tɔ̧a̧‘i nde? Kà a̧ bòò hegɔ na, mɛ̀ tɔ̧́ kɔ-mɛ ɛ̀ɛ̀ zìì.»

⁷Husai kifa nú ha̧ Absalɔm: «Ɛ̧ɛ̧ mbɔrɔ nɛ̀ Ahitɔfɛl tɔ̧a̧'ɛ de na.»

⁸Ɓɛɛ Husai tɔ̧ siti: «Ɛ́nɛ́ nɛ̀ tɛ‘nɛ́, ɛ́nɛ́ iŋa dáà k’ɛ́nɛ́ in o bíí kɔ‘i; wa nɛ́ o ŋgaŋa-wi, ɓɛɛ wa a̧a̧ nɛ̀ ɗaŋ hee ŋma bókó-nam[11] nɛ be-a yɔɔ ɓɔn zaŋbɛɛ ga. Dáà k’ɛ́nɛ́ nɛ́ wi-biro; a̧ beka ɔ kpɔk in o dɔka bíí na.

⁹Dáà k’ɛ́nɛ́ hu̧sa̧ kinii, kóó kɔ̧ ŋma kɔ̧, kóó sɛn ŋma fara. Ŋgimbi nɛ o bíí be tɛɛ ku̧ naŋ fea-a mgbara yɛ, ŋma bíí tɛ zii nyɛrɛ-a, ɓɛɛ tɔ̧a̧: ‹O bíí kuma mgbara o bíí nɛ nɛ́ in Absalɔm;›

¹⁰ɓɛɛ kóó nɛ́ ŋga bíí nɛ̀ a̧a̧ nɛ̀ see dila, tɛ-a tɛ gbin wen o be Israɛl lɛŋ iŋa'e, dáà k’ɛ́nɛ́ nɛ́ ŋgaŋa-wi, ɓɛɛ o bíí nɛ̀ nɛ́ in a̧ nɛ́ o ŋgaŋa-wi mbɛt.

¹¹Mbɔrɔ kɔ‘m n'am tɔ̧ nɛ mɔ'ɔ: o be Israɛl lɛŋ à̧ mɔ́í̧ katɛ‘nɛ́ ku̧u̧naŋ-a nɛ Dan hɔ Bɛrseba nɛ̀ dɔka-a hee nyɛmɛ ká̧ zaŋ yì ga, ɓɛɛ ɛnɛ mbɛt yee mgbara wa nɛ́ nɛ̀ biro.

¹²Ɛɛ tɛ kpa a̧, kóó a̧ hu̧sa̧ déè. Ɛɛ tɛ ai a zu a̧, hee mɔ nɛ mbɛŋ ai nɛnɛ a nù'ɛ ga. Ɛɛ beka e a̧, kóó ŋma bíí kɔ̧-a̧ mɛ duk kpasa na.

¹³Kà a̧ nɛ́ yuu mɔ hu̧si tɛ ŋma ye, o be Israɛl lɛŋ tɛ kai nyak tɛnɛ kpo tɛ ye'i, ɓɛɛ ɛɛ gbura nɛnɛ si ɗɔɔ yì, ɓɛɛ ŋma géé be ta kpɔk beka ɓɔn na.»

¹⁴Absalɔm in o be Israɛl lɛŋ tɔ̧a̧: «Mbɔrɔ ko Husai be Ark sa̧a̧ gan ko Ahitɔfɛl.» Mɛ̀ nɛ́ GASA WAN a̧ dee ha̧ mbɔrɔ ko Ahitɔfɛl nɛ̀ duka so nɛ̀ de-a mɛ de geemɔ wen ha̧ ŋgamɔ mɛ kpa Absalɔm.

¹⁵Nɛ́ mɔ'ɔ nɛ̀ Husai nɛ̀ɛ̀ tɔ̧ ha̧ o wi-ɗafi-sɔ̧ Sadɔk in Abiatar: «Mɔ nɛ Ahitɔfɛl tɔ̧ɔ̧ ha̧ Absalɔm in o gasawi Israɛl nɛ́ mɔ'ɔ, ɓɛɛ war kɔ‘m n'am tɔ̧ɔ̧ nɛ mɔ'ɔ.

¹⁶Kinii, ɛ̀nɛ̀ tóm mbaŋ tɛ David nɛ̀ haya-a, ɛ̀nɛ̀ tɔ̧́ ha̧ a̧, ká a̧ yor nú ŋga-gbárà mɛ zɛ hɛ̧ɛ̧ na; kà nɛ́ nyɛma, a̧ a̧ ɓír ɓir yak; kà bó hegɔ na, wa tɛ kum wannu in o bíí nɛ̀ nɛ́ in a̧ yinɛ war kpɔk.»

¹⁷Yɔnataŋ in Ahimas yaa so sɛn Ɛn-Rogɛl zɛm nɛ̀ ŋma kó-de-tom, ɓɛɛ nɛ́ kó-de-tom'i a̧ duk so we nɛ̀ ɗoŋ mɔ ha̧ wa, sɛka wa nɛ̀ɛ́ tɔ̧ ha̧ wannu David, wen wa nyɛm so mɛ ye saaye na, ka bíí tɛɛ zɔk wa.

¹⁸Ŋma wese, ŋma be-ŋgaiwi zɔka wa, ɓɛɛ nɛ́ɛ̀ dali ha̧ Absalɔm. Wa yuu mɔ wa yiitoo lɛŋ nɛ haya-a si tɛ ko ŋma bíí saaye Bahurim. Kɔ̧-yì duka so bee-gara kɔ̧-a̧, ɓɛɛ wa ye hu̧si sɛnɛ.

¹⁹Kóò ko wi’ɛi baa ndàrá kpe nɛ nú kɔ̧-yì‘i, ɓɛɛ tati o gba̧a̧-nyɔnɔ sɛnɛ. Wi iŋ‘e ŋma mɔ a̧a̧ hi̧i̧ na.

²⁰Nɛ́ mɔ'ɔ nɛ̀ o ŋgaiwi ko Absalɔm tɛɛ ye kɔ̧ tua ko kóò‘i, ɓɛɛ ak mɔ: «Ahimas in Yɔnataŋ a̧a̧ déè nde?» Kóò‘i kifa nú ha̧ wa: «Wa kuu yì yak kaɗi.» Wa kia mɔ fara'i lɛŋ, wa kpa wa na, ɓɛɛ wa si ɗoŋ si Jerusalɛm.

²¹Ɗoŋ nɛ o wi-kii-mɔ ko Absalɔm yaka kaɗi, Yɔnataŋ in Ahimas gboa nɛ kɔ̧-yì nɛ́ɛ̀ mbaŋ tɛ wannu David. Wa tɔ̧ɔ̧ ha̧ a̧: «Ɛ̀nɛ̀ yak! Ɛ̀nɛ̀ kú yì nɛ̀ haya-a, wen mbɔrɔ nɛ̀ Ahitɔfɛl tɔ̧ɔ̧ wen zu'nɛ́ nɛ́ mɔ'ɔ.»

²²David baa yuwar in o bíí lɛŋ nɛ a̧a̧ in a̧, ɓɛɛ wa ku Jurdɛn. Mɛ gɔna ndaa-zan, ɓɛɛ bíí lɛŋ kuu yì kaɗi.

²³Ŋgimbi nɛ̀ Ahitɔfɛl zɔka'e, bíí ba mbɔrɔ kɔ‘i de nɛ̀ tom na, a̧ hɛra tuifuu kɔ̧-a̧, daŋ ɓɛɛ a̧ ba war yak si saaye kɔ̧-a̧. A̧ tɔ̧ɔ̧ wen ha̧ o bíí kɔ̧ tua kɔ̧-a̧, ɓɛɛ a̧ ga̧i̧ tɛ-a nɛ nyak. Ɗoŋ fio kɔ̧-a̧, wa guna a̧ kɔ̧ pɛsi ko dáà kɔ̧-a̧.

²⁴David hɔɔ sɛn Mahanayim, ɓɛɛ ká Absalɔm in o be Israɛl lɛŋ ku nɛ Jurdɛn.

²⁵Absalɔm ee so Amasa hee gasawi ko o wi-biro ga oi Jɔab. Amasa nɛ́ bem ko ŋma bíí nɛ̀ nin-a nɛ́ Yitra be Israɛl nɛ̀ duka so in Abigail, boko-bem ko Nahas, boko-nya Sɛruya, naa ko Jɔab.

²⁶Nɛ́ mɔ'ɔ nɛ̀ o be Israɛl in Absalɔm baa gbagari kɔ‘i sɛn nú Galad.

²⁷Ŋgimbi nɛ David hɔɔ nɛnɛ sɛn Mahanayim, o bíí taar tɛ̀ɛ̀ mɛ zɔk a̧: kuti-a nɛ́ Sɔbi, bem ko Nahas be Raba ye-wan ko o be Amɔŋ; yiitoo-aa nɛ́ Makir, bem ko Amiɛl be Lo-Dabar; sɛka Barzilai be Rogɛlim sɛn nú Galad.

²⁸Wa kaia o mɔɔ-ɔ-nɛnɛ, o mɔɔ-gu-tɛ, o nyɛk-nyɔŋ-mɔ, alkamaari, be-fon,[12] fuu, o hana gba̧a̧-nyɔnɔ, o war in o zawa,

²⁹gɔrɔ, nɔ̧́, o sami in kpoo-ndai tɛnɛ ha̧ David in o bíí nɛ ya in a̧, wen wa tɔ̧ɔ̧ so, o bíí mbɔia, wa zɔka bɔnɛ wɔ in wɔ-yì sɛn ŋga-gbárà.