Read Northwest Gbaya 2 SAMUƐL 18 Bible Online

2 SAMUƐL 18 - Northwest Gbaya bible

2 SAMUƐL 18

¹David tɔra o wi-biro nɛ̀ yaa in a̧. A̧ ee gasawi zu bíí booro-booro, in zu bíí gɔmŋmaa-gɔmŋmaa.

²Nɛ́ mɔ'ɔ n'aa ha̧a̧ nú wen yaka-a. A̧ kɛ̧ɛ̧ bíí tɛ fara taar, a̧ ha̧a̧ dùk-aa kpɔk ha̧ Jɔab, kpɔk ha̧ Abisai bem ko Sɛruya nya Jɔab, ɓɛɛ a̧ ha̧ kpɔk ha̧ Itai be Gat. Wannu tɔ̧ɔ̧ ha̧ dukbíí: «Mi kɔ̧ɔ̧ kànà mɛ yak biro in'nɛ̀ɛ́ mbɛt.»

³O wi-biro kifa nú ha̧ wannu: «K’ɛ́nɛ́ nɛ́ k’ɛ́nɛ́ biro na. K’ɛ̀ɛ̀ yu mɔ, ɓɛɛ bo nɛ ŋma mɔ na; kóó reeta ɛɛ kuma, beka de ŋma mɔ na mbɛt. Ɓɛɛ k’ɛ́nɛ́, ɛ́nɛ́ nyɛma ŋmaa in wi-biro booro-ɓu; gana so ɛ̀nɛ̀ dúk k’ɛ́nɛ́ saaye wen gbaka yɛ.»

⁴Wannu tɔ̧ɔ̧ ha̧ wa: «Mi tɛ de nɛ mɔ n’ɛnɛ kɔ̧a̧.» Ɓɛɛ a̧ yor ká̧ nú garo ŋgimbi nɛ o wi-biro gbo nɛnɛ tɛ fara gɔmŋmaa-gɔmŋmaa in tɛ fara booro-booro.

⁵Wannu tɔ̧ɔ̧ ha̧ Jɔab, Abisai in Itai hee mɔ'ɔ ga: «Ɛ̀nɛ̀ dé mɔ mɔktɛ in Absalɔm bem kɔ‘m.» O wi-biro lɛŋ zia wannu fara ha̧a̧ heembea'i ha̧ o gasawi wen zu Absalɔm.

⁶Nɛ́ mɔ'ɔ nɛ̀ wa gboo a zaŋbɛɛ, we nɛ̀ ti o be Israɛl, ɓɛɛ biro ba kɔ̧ kombo Efraim.

⁷O wi-biro ko David gbina biro'i ti o be Israɛl. O bíí fee nɛ̀ dɔka-a wese'i. Wa lɛŋ nɛ́ bíí booro-ɓu-yiitoo a̧ fea.

⁸Biro bìì dam zu nù‘i lɛŋ; o bíí nɛ̀ fee ɓɔn kɔ̧ kombo gana wan nɛ fee nú gba-paa.

⁹Absalɔm nɛ̀ɛ̀ tó zu nɛ̀ o wi-biro ko David. A̧ daŋa so nɛ́ sunda, ɓɛɛ sunda ye ɗɔɔ da̧a̧ gbaa-er ŋma gasa te[13]. Mui̧-zu Absalɔm haka gbaa-er te'i, ɓɛɛ Absalɔm ga̧i̧ sɛnɛ, ɓɛɛ sunda yak kɔ‘i.

¹⁰Nɛ́ mɔ'ɔ nɛ̀ ŋma bíí zɔka a̧, ɓɛɛ nɛ́ɛ̀ tɔ̧ ha̧ Jɔab: «Mi zɔka Absalɔm fara ga̧i̧a-a tɛ ŋma gasa te mɛ‘i.»

¹¹Jɔab kifa nú ha̧ wi nɛ tɛ̀ɛ́ tɔ̧ wen'i ha̧ a̧‘i: «Mɛ zɔka a̧ nɛ gbaayí-mɛ, sa mɛ gɔm a̧ gbɛ ɓɔn bɛɗɛ na wen ge? Mi tɛ̀ɛ́ ha̧ so kɔya bu-mbɔi ɓu in kanda ha̧ mɛ gɔ.»

¹²Wi’ɛi kifa nú ha̧ Jɔab: «Kóó ɛ́nɛ́ ha̧a̧ so nɛ́ kɔya bu-mbɔi booro ha̧‘m, bo nɛ mi tɛ̀ɛ́ nyɛm mɛ ba er-am gbɛ nɛ̀ bem ko wannu na! Wen wen nɛ wannu tɔ̧ɔ̧ h’ɛ́nɛ́ in ha̧ Abisai ká bá nɛ̀ Itai'i, ɛɛ lɛŋ zia; a̧ tɔ̧a̧ ndé, ɛ̀nɛ̀ kásí zu'nɛ́ ká ŋma bíí tam tɛ bem kɔ‘i Absalɔm na.

¹³Kà‘m de so ŋma ɗaŋmɔ in a̧ hee mɔ'ɔ n’ɛnɛ kɔ̧a̧ ga, bo nɛ tɛ̀ɛ́ hu̧si hu̧si na; wen ŋma mɔ nɛ ɓɔn nɛ hu̧sa̧-a̧ ɓɔnsɛnɛ nɛ wannu iŋ na bo na. Ɛnɛ tɛ̀ɛ́ kafi k’ɛ́nɛ́ e zu'm.»

¹⁴Ɓɛɛ Jɔab tɔ̧: «Mi beka ɗáŋ ŋgimbi in mɛɛ na.» Ɓɛɛ a̧ kai sɛ́ɛ̀ taar, tok nɛ̀ yí-see Absalɔm fara ga̧i̧a-a nɛ kpasa tɛ te.

¹⁵O baka-nyaŋa ko Jɔab ɓu kɛra Absalɔm, ɓɛɛ gɔm a̧ gbɛ.

¹⁶Nɛ́ mɔ'ɔ nɛ̀ Jɔab dɔma zak, ɓɛɛ biro kaɗi ndaka pata o be Israɛl, wen nɛ̀ Jɔab dora o wi-biro.

¹⁷Wa baa Absalɔm pi̧ sɛn kɔ̧ gasa gboŋgo sɛn kɔ̧ kombo hi̧i̧, ɓɛɛ wa kin o ta nɛ̀ dɔka-a a zu a̧. O be Israɛl lɛŋ pɛsa, kóó o ndé si kɔ̧ tua kɔ‘i.

¹⁸Ŋgimbi nɛ Absalɔm ɓɔna so nɛ̀ kpasa, a̧ mboo so ŋma ta-zu-nù nɛ̀ duk kɔ̧ ɗɔŋgɔ ko Wannu, wen a̧ tɔ̧ɔ̧ so: «Mi kpa be-wiwii ha̧ nin-am mɛ duk ɓɔnsɛnɛ na.» Nɛ́ mɔ'ɔ n'aa aa nin-a ha̧ ta-zu-nù‘i, nɛ wa sa hɔ sɔsɔɔ‘e, «Ta-zu-nù ko Absalɔm.»

¹⁹Ahimas bem ko Sadɔk tɔ̧a̧: «Ɛ̀nɛ̀ é ha̧‘m ma yì nɛ́ɛ̀ tɔ̧ de nyɛrɛ ha̧ wannu ndé, GASA WAN kifa er oi nú-a zuɗi nɛ a̧ yinɛ er o wisɛn kɔ̧-a̧.»

²⁰Jɔab tɔ̧ɔ̧ ha̧ a̧: «Mɛ beka duk wi-tɔ̧-de nyɛrɛ sɔsɔɔ na. Mɛ tɛ nɛ̀ɛ́ tɔ̧ tɔ̧a̧-a̧ ŋma wese, wen sɔsɔɔ‘i beka duk nɛ de nyɛrɛ na, wen nɛ̀ duk nɛ́ fio ko bem ko wannu.»

²¹Nɛ́ mɔ'ɔ nɛ̀ Jɔab tɔ̧ɔ̧ ha̧ ŋma be Kus:[14] «Mɛ̀ nɛ́ɛ̀ tɔ̧́ mɔ nɛ mɛ zɔka lɛŋ ha̧ wannu.» Be Kus'i guu nù ti Jɔab, ɓɛɛ yak nɛ̀ war-yì.

²²Ahimas bem ko Sadɔk tɔ̧ɔ̧ ha̧ Jɔab woyo: «Mɔ nɛ tɛ de a̧ dé. Ɓɛɛ ɛ̀nɛ̀ é ha̧‘m ma yì nɛnɛ ɗoŋ be Kus'i mbɛt.» Jɔab tɔ̧a̧: «Bem kɔ‘m, mɛ tɛ ma yì wen ge? Bo nɛ ŋma de nyɛrɛmɔ nɛ mɛ tɛ kpa ŋma mɔɔ-oi-aa kpaa na.»

²³Ahimas kifa nú: «Mɔ nɛ tɛ de a̧ dé! Mi tɛ nɛ kànà!» Hegɔ Jɔab tɔ̧ɔ̧ ha̧ a̧: «Mɛ̀ nɛ̀!» Ɓɛɛ Ahimas ba war bɔkɔ-nú Jurdɛn nɛ wara yì, ɓɛɛ nɛ gan be Kus'i.

²⁴David duka so nù mgbara nú garo yiitoo. Wi-pɛm-mɔ nɛ̀ɛ̀ si fara-pɛm-mɔ nɛ̀ ŋgɔn sɛn zu garo. A̧ baa yí-a nɛ̀ ŋgɔn, ɓɛɛ a̧ zɔk ŋma bíí fara maa yì tɛnɛ ɛ̀nɛ̀.

²⁵Wi-pɛm-mɔ hiɗa mɔ nɛnɛ sitɛ David; ɓɛɛ wannu tɔ̧: «Kà wi’ɛi nɛ́ duka ɛ̀nɛ̀, ɓɛɛ a̧ ba nɛ de nyɛrɛmɔ tɛnɛ.» Ɓɛɛ hee mɔ'ɔ nɛ wi’ɛi hɛɗi nɛ mɔ tɛnɛ ga,

²⁶wi-pɛm-mɔ zɔka ŋma ɓii bíí fara maa yì tɛnɛ woyo. Wi-pɛm-mɔ hiɗa mɔ tɔ̧ nɛnɛ ha̧ wi-pɛm-nú tua: «Ŋma mbe bíí a̧ ma yì tɛnɛ ɛ̀nɛ̀‘i.» Wannu tɔ̧a̧: «Wi’ɛi ba nɛ de nyɛrɛmɔ tɛnɛ woyo mbɛt.»

²⁷Wi-pɛm-mɔ tɔ̧a̧: «Mi iŋa naŋ wara yì ko kuti-wi nɛ̀ duk ti'i; nɛ́ naŋ wara yì ko Ahimas bem ko Sadɔk.» Ɓɛɛ wannu kifi nú: «Wi’ɛi nɛ́ wi-de-demɔ; a̧ ba nɛ de nyɛrɛmɔ tɛnɛ!»

²⁸Ahimas tɔ̧ɔ̧ nɛ̀ hee ger ha̧ wannu: «Mɔ yaka nɛ̀ de-a.» A̧ guu nù ti wannu ba yi-a gu nù, ɓɛɛ tɔ̧: «Zɔnamɔ a̧ dúk nɛ ko GASA WAN Sɔ̧ k’ɛ́nɛ́ nɛ aa o wi nɛ dee so ŋgazu in'nɛ̀ɛ́ kɔ̧ er yɛ.»

²⁹Ɓɛɛ wannu ak mɔ: «Bem kɔ‘m Absalɔm duk nɛ̀ de-a nde?» Ahimas kifa nú ha̧ wannu: «Mi zɔka gasa foo mɔ ŋgimbi nɛ Jɔab toma nɛ̀ ɛɛ in ŋma bíí pii tɛ‘nɛ́, ɓɛɛ mgbák mɔ nɛ̀ a̧a̧ sɛnɛ‘i, mi iŋ na.»

³⁰Wannu tɔ̧a̧: «Mɛ̀ nɛ́ mɛ̀ dúk mɛ‘i.» A̧ yaka nɛ́ɛ̀ yor nɛ ɗoŋ.

³¹Nɛ́ mɔ'ɔ nɛ̀ be Kus'i hɔa, ɓɛɛ tɔ̧: «Dáà wannu, ɛ̀nɛ̀ zíí de nyɛrɛ n'am tɛ mɛ tɔ̧ h’ɛ́nɛ́: GASA WAN dee mɔ nɛ̀ yuwar-a in'nɛ̀ɛ̀ sɔsɔɔ, tɛ dea-a h’ɛ́nɛ́ mɛ gbo ɗɔɔ er o wisɛn k’ɛ́nɛ́.»

³²Wannu aka be Kus: «Bem kɔ‘m Absalɔm duk nɛ́ de-a nde?» Be Kus'i kifa nú: «Mɔ nɛ kpaa be-ŋgaiwi'i a̧ kpá o wisɛn ko nyaa, wannu kɔ‘m in o wi-ba-zu we nɛ̀ ɛ́nɛ́ nɛ̀ kɔ̧ɔ̧ ha̧ ɗaŋmɔ mɛ kpa so'nɛ́‘i.»