Read Northwest Gbaya 2 SAMUƐL 2 Bible Online

2 SAMUƐL 2 - Northwest Gbaya bible

2 SAMUƐL 2

¹Ɗoŋ mɔ‘i, David aka GASA WAN: «A̧‘m nɛ́ si ŋma ye nú Juda nde?» GASA WAN kifa nú ha̧ a̧. «Mɛ̀ nɛ̀.» David aka GASA WAN woyo: «A̧‘m nɛ́ si déè nde?» GASA WAN kifa nú ha̧ a̧: «Si Hebrɔŋ.»

²David in o kóò kɔ‘i yiitoo, Ahinɔam zɔŋa Yizreɛl, in Abigail zɔŋa Karmɛl, ko-oi Nabal, kaia ŋmaa si hi̧i̧.

³O bíí ko David in o nam kɔ-wa daŋa in a̧, ɓɛɛ wa de ye sɛn Hebrɔŋ.

⁴Nɛ́ mɔ'ɔ nɛ̀ o be Juda tɛ̀ɛ̀ tɛn nɔ̧́ a zu David ha̧ a̧ mɛ ɔ wan zu wa. Wa tɛ̀ɛ̀ tɔ̧ ha̧ David'e, nɛ́ o be Yabɛs nú Galad a̧ guna Saul.

⁵Nɛ́ mɔ'ɔ nɛ̀ David toma o betom ha̧ o be Yabɛs nú Galad'e, GASA WAN a̧ tók de yoŋgo ha̧ wa, wen gasa demɔ nɛ wa dea gun nɛ̀ Saul wannu kɔ-wa;

⁶GASA WAN a̧ zɔ́k wa nɛ de yí, a̧ a̧ gbák wa, ɓɛɛ wi mbɛt, wi tɛ de demɔ in wa, wen mɔ nɛ wa dea'i.

⁷Wa a̧ nɔ́ ŋgiɗi, wa a̧ yór nɛ̀ nɔa-a; Saul wannu kɔ-wa fee kaɗi, ɓɛɛ kɔ‘i, wa a̧ íŋ mbɛt'e, o bíí nutua ko Juda tɛna nɔ̧́ a zu-wi ha'i mɛ ɔ wan zu wa.

⁸Nyɛm nɛ ŋgimbi'i, Abnɛr bem ko Nɛr, wi-duk-zu o wi-biro ko Saul baa Isbosɛt, bem ko Saul yu nɛ mɔ yak si Mahanayim,

⁹ɓɛɛ de ha̧ Isbosɛt mɛ ɔ wan zu Galad, zu o be Asɛr, zu Yizreɛl, zu Efraim, zu Bɛnjamin in zu Israɛl nɛ̀ oi-aa lɛŋ.

¹⁰Isbosɛt, bem ko Saul kpaa so pɛ ɓu-naar ŋgimbi nɛ wa dee nɛ wan ha̧ a̧ zu Israɛl; ɓɛɛ a̧ ɔ wan pɛ yiitoo. War ko o bíí nutua ko Juda, wa kpɛka kɔ-wa nɛ́ David mɛ ɔ wan zu wa.

¹¹Ŋgimbi nɛ David ɔɔ nɛ wan zu nutua Juda sɛn Hebrɔŋ lɛŋ nɛ́ pɛ mɔɔrɔ-ɗoŋ-yiitoo nɛ̀ fio-zɛ mɔɔrɔ-ɗoŋ-kpɔk.

¹²Abnɛr, bem ko Nɛr in o ŋma bíí ko Isbosɛt bem ko Saul gboo biro nɛ̀ Mahanayim si Gabaɔŋ.

¹³Jɔab bem ko Sɛruya in o bíí ko David gboo biro mbɛt, ɓɛɛ nɛ́ɛ̀ kpa wa ká̧ tɔp Gabaɔŋ. Wa hɔa, ɓɛɛ wa yor: o bíí ko Isbosɛt nɛ̀ kur, o bíí ko David nɛ̀ kur.

¹⁴Abnɛr tɔ̧ɔ̧ ha̧ Jɔab: «O ŋgaiwi a̧ kúr, wa a̧ bí ŋmaa ɛ̀ɛ̀ zɔk.» Jɔab kifa nú: «Wa a̧ kúr.»

¹⁵Wa kura ɓɛɛ wa tɔr wa. O wi-biro ko Bɛnjamin ɓu-zua-yiitoo kura nɛ̀ ɗoŋ Isbosɛt bem ko Saul, ɓɛɛ o wi-biro ɓu-zua-yiitoo kur nɛ̀ ɗoŋ David mbɛt.

¹⁶Kóó o ndé tika ger bíí kɔ‘i. Wa kasa nɛ ger ŋmaa yiitoo yiitoo, ɓɛɛ wa yur gba-paa ɔm ŋmaa nyɛm ŋmaa. Wa kaia ŋmaa a nù lɛŋ nɛ fio. Mɛ̀ nɛ́ wen mɔ‘i a̧ wa saa nɛ̀ nin fara'i ndé: «Fara ko o wi-duk-zu nɛ̀ ŋmaa.»[1] Fara'i a̧a̧ Gabaɔŋ.

¹⁷Biro baa dik wese'i. O bíí ko David gbina biro ti Abnɛr in o be Israɛl wese'i.

¹⁸O bem ko Sɛruya taar a̧a̧ so hi̧i̧: mɛ nɛ́ Jɔab, Abisai in Asahɛl. Asahɛl duka so nɛ́ wi-ma-yì hee kalamba ga.

¹⁹Nɛ́ mɔ'ɔ nɛ̀ Asahɛl duka ɗoŋ Abnɛr nɛ̀ maa yì; a̧ a̧r si wiiko kóó si gale na.

²⁰Abnɛr zika tɛ, ɓɛɛ ak mɔ: «Asahɛl, nɛ́ mɛ́ nde?» Ɓɛɛ Asahɛl kifi nú: «Nɛ́ mí.»

²¹Abnɛr tɔ̧ɔ̧ ha̧ a̧: «Mɛ̀ nɛ́ nɛ̀ war wiiko, kóó nɛ̀ war gale, mɛ̀ bá ŋma wi-biro, ɓɛɛ mɛ̀ káí mɔ kɔ̧-a̧ nɛ kɔ-mɛ.» Ɓɛɛ Asahɛl kɔ̧ mɛ e a̧ duk na.

²²Abnɛr tɔ̧ɔ̧ ha̧ Asahɛl woyo: «Mɛ̀ yú siɓi katɛ‘m, ká mɛ ndak am na, ká‘m tok mɛ pi̧ nù. Kà‘m tok mɛ gbɛ, mi tɛ hú̧í̧ yí‘m zɔk yí zɔmwi kɔ-mɛ Jɔab hee ge?»

²³Ɓɛɛ Asahɛl kɔ̧ yua-a na. Nɛ́ mɔ'ɔ nɛ̀ Abnɛr toka zaŋ-aa nɛ̀ ndaa sɛ́ɛ̀ sar, ɓɛɛ a̧ hɔ̧fi̧ yo nù fe. Kóó o ndé nɛ hɔ fara nɛ Asahɛl yoo nù fe sɛnɛ‘i, ɓɛɛ yora.

²⁴Nɛ́ mɔ'ɔ nɛ̀ Jɔab in Abisai ndaka ɗoŋ Abnɛr. Wa hɔɔ zu kaya Ama, ɓɛɛ ká wese a̧ ye'i. Kaya'i duk nɛ̀ war daŋa-wese ko Gia, yuwar ŋga-gbárà Gabaɔŋ.

²⁵O be Bɛnjamin mɔi̧a ŋmaa kpɔk duk ɗoŋ Abnɛr, ɓɛɛ wa nɛ́ɛ̀ yor zu ŋma kaya.

²⁶Abnɛr saa Jɔab, ɓɛɛ ak a̧: «Gba-paa beka kaɗi gbɛɛ bíí ɓɔna nde? Mɛ́ íŋ ndé mɔ‘i tɛ kaɗi nɛ ɗaŋ-a na nde? Mɛ pɛm nɛ ge mɛ dor o wi nɔ'ɔ tɛ ndaka o nya-wa gbɛ nɛnɛ ge nde?»

²⁷Jɔab kifa nú: «Hee mɔ'ɔ nɛ Sɔ̧ duk kpasa ga, kà mɛ tɔ̧ so wen'i na, bó nɛ́ o wi-biro kɔ‘m tɛ̀ɛ́ kaɗi ndaka o nya-wa na mɔ sa̧ nɛnɛ.»

²⁸Jɔab dɔma zak, ɓɛɛ o wi-biro yor, wa kaɗa ndaka o be Israɛl; wa bi ŋmaa ɓɔna.

²⁹Abnɛr in o bíí kɔ‘i nɛ̀ɛ́ nɔ nɛ̀ zɛ ɓir nɛ Araba, ku nɛ Jurdɛn, ɓir nɛ Bitrɔŋ, ɓɛɛ wa hɔ Mahanayim.

³⁰Jɔab kaɗa ndaka Abnɛr ɓɛɛ a̧ mɔi̧ o wi-biro kɔ̧-a̧ lɛŋ. O bíí ko David nɛ fee nɛ́ ɓu-zua-mɔɔrɔ-ɗoŋ-naar, ká bá nɛ̀ Asahɛl.

³¹O wi-biro ko David gbɛɛ o bezaŋ Bɛnjamin in o bíí ko Abnɛr gɔmŋmaa-taar nɛ ɓu-mɔɔrɔ-ɗoŋ-kpɔk.

³²Wa baa Asahɛl sinɛ, ɓɛɛ wa nɛ́ɛ̀ gun a̧ kɔ̧ pɛsi-fio ko dáà kɔ̧-a̧ sɛn Bɛtlɛhɛm. Jɔab in o bíí kɔ‘i nɛ̀ɛ́ nɛ̀ zɛ nɛ zɛ, kà mɔ tɛ́ sa̧, ɓɛɛ wa hɔ sɛn Hebrɔŋ.