Read Northwest Gbaya 2 SAMUƐL 22 Bible Online

2 SAMUƐL 22 - Northwest Gbaya bible

2 SAMUƐL 22

¹David bia gima’ɛ ha̧ GASA WAN ŋgimbi nɛ GASA WAN kpasa nɛ̀ a̧ er Saul in er o dɔka wisɛn kɔ̧-a̧ lɛŋ.

²A̧ tɔ̧a̧: GASA WAN nɛ́ ta-ɛk-tɛ‘m, a̧ nɛ́ ŋga fara-duk kɔ‘m; a̧ nɛ́ wan-gbo'm er o wisɛn kɔ‘m.

³Mi hu̧si ɗɔɔ gi̧ɔ̧ tɛ-a, wen a̧ nɛ́ kam-ta kɔ‘m; a̧ nɛ́ ŋgee kɔ‘m in zak-gbin-biro kɔ‘m. A̧ nɛ́ ŋgárá kɔ‘m in fara hu̧sa̧-a̧ kɔ‘m. Wan-kpas'am, nɛ́ ɛnɛ'ɛ kpas'am er o wi-de-mɔ nɛ̀ ŋgai.

⁴Zɔnamɔ a̧ dúk nɛ́ ko GASA WAN; kà‘m sa a̧, ɓɛɛ a̧ kpasa'm er o wisɛn kɔ‘m.

⁵Fio aa mbul kɔ‘i zik nɛ‘m; kin-yì ɗaŋmɔ pi̧i̧ bele tɛ‘m.

⁶Yɔk yukuta'm mɛ zuɗ‘am pi̧ fara ko o fio; fio za̧a̧ lim gɔn nɛ̀ ti'm.

⁷Mi saa GASA WAN tɛ ŋga bɔnɛ kɔ‘m'i, mi hiɗa mɔ sitɛ Sɔ̧ kɔ‘m; nɛ́ mɔ'ɔ nɛ̀ hiɗimɔ kɔ‘m'i aa zer-aa kɔ̧ Tua kɔ̧-a̧ mɛ, ɓɛɛ a̧ zii tiger-am.

⁸Nù foo mɔ ɗirr, ɓɛɛ o gun yiwese nak. Nɛ́ nyimsea kɔ̧-a̧ a̧ dee ha̧ mɔ mɛ fo mɔ.

⁹Zi-wee tura nɛ̀ kɔ̧ zɔ̧ɔ̧-a̧a̧ gbonɛ nduɗɛɛ, wee baa kɔ̧ nú-a mbɛt, ɓɛɛ o kɛ̧i̧-wee nyɔŋ yoŋgoŋgo.

¹⁰Nɛ́ mɔ'ɔ n'aa gira yiwese ɓɛɛ a̧ zir tɛnɛ nɛ̀ tu̧-zan ɗɔɔ naŋ-a.

¹¹A̧ daŋa zu keribim ɓɛɛ búk ba a̧ bu̧i̧ nɛnɛ faoo tɛnɛ.

¹²A̧ baa tum kpe nɛ̀ tɛ-a; a̧ dee ha̧ tum-kórò mɛ duk nɛ́ tua kɔ̧-a̧;

¹³Sa̧a̧mɔ nɛ̀ yaka ti ha̧ a̧ pi̧i̧ lai-lai.

¹⁴GASA WAN tuɓa nɛ̀ yiwese mɛ; Dáà Wan nɛ̀ duk ŋgɔn mɛ dee ha̧ bíí mɛ zii tiger-a.

¹⁵A̧ pi̧i̧ góò ndak nɛ̀ o wisɛn kɔ̧-a̧, a̧ pi̧i̧ kórò pɛsi nɛ̀ wa a taŋ sót-sót.

¹⁶GASA WAN, ɛ́nɛ́ tɔ̧ɔ̧ wen nɛ̀ nyimsea, búk gboo nɛ̀ kɔ̧ zɔ̧ɔ̧‘nɛ́ nɛ̀ dee ha̧ yi mɛ ɔ̧si gɔn mgbót-mgbót, in ha̧ o ta ɗɔɔ nù mɛ gbo a zan.

¹⁷A̧ nyɛi̧a er tɛnɛ nɛ̀ ŋgɔn mɛ ba nɛ‘m yinɛ zɛɓɛn; a̧ daka'm ɗɔɔ gasa yì gbonɛ.

¹⁸A̧ gboa'm er ŋga wisɛn kɔ‘m yinɛ; a̧ kpasa'm er o wisɛn kɔ‘m nɛ̀ ŋgaia gan am.

¹⁹Wa kura so zu'm wese bɔnɛ kɔ‘m, ɓɛɛ GASA WAN yee ɗoŋ am.

²⁰A̧ ɓara'm er wa yinɛ ha̧‘m mɛ yak mɔ kɔ‘m; a̧ kpasa'm wen n'aa kɔ̧ɔ̧ am nyɛmna.

²¹GASA WAN ha̧ mɔ ha̧a̧ ha̧‘m nyɛm nɛ̀ ɗoŋ deemɔ kɔ‘m nɛ̀ yuwar-a; a̧ de demɔ dee ha̧‘m nyɛm nɛ̀ ɗoŋ tom kɔ‘m,

²²wen mi ndak pata yuwar kɔ̧-a̧ nɛ̀ de-a; mi zik ɗoŋ-am e ha̧ Sɔ̧ kɔ‘m na.

²³O heembea kɔ̧-a̧ lɛŋ duk ɓɔn yí‘m; mi e o geŋa kɔ̧-a̧ duk na.

²⁴A̧ iŋa ndé, ŋma ɗaŋmɔ bo tɛ‘m na, wen mi kasi nɛ zu'm ká‘m tɛ̀ɛ́ de ɗaŋmɔ.

²⁵GASA WAN de demɔ dee in am nyɛm nɛ̀ ɗoŋ deemɔ kɔ‘m nɛ̀ yuwar-a, wen yuwar deemɔ kɔ‘m ɔ sa̧a̧ sɛn ti a̧.

²⁶GASA WAN, ɛ́nɛ́ nɛ́ wan-yor-ɗoŋ wi-mbo-zu; ɛ́nɛ́ nɛ́ wi-de-mɔ nyɛm sɛnɛ ha̧ o wi-de-mɔ nyɛm sɛnɛ mbɛt.

²⁷Yuwar deemɔ k’ɛ́nɛ́ ɔ sa̧a̧ sitɛ wi nɛ̀ yuwar deemɔ kɔ̧-a̧ ɔ sa̧a̧; ɓɛɛ wi nɛ̀ de mɔ tan na, ɛ́nɛ́ dé kànà nɛ́ mɔɔ-gɔn-zaŋ in a̧ mbɛt.

²⁸Ɛ́nɛ́ kpásí k’ɛ́nɛ́ nɛ́ o wi-mɔka-see, ɓɛɛ ɛ́nɛ́ dee ha̧ wi-gasi-zu mɛ pofi.

²⁹GASA WAN, ɛ́nɛ́ nɛ́ lamba kɔ‘m; GASA WAN, nɛ́ ɛ́nɛ́'ɛ nyɛk gɔn zik am.

³⁰Nɛ́ ɛ́nɛ́'ɛ gbak am mɛ gɔm zu̧ mgbara o wisɛn kɔ‘m, nɛ́ ɛ́nɛ́'ɛ gbak am mɛ kpíɗí yak zu garo sitɛ wa mbɛt.

³¹Wi nyɛm mɛ tɔ̧ wen zu tom ko Sɔ̧ na; wen ko GASA WAN bo nɛ́ ndela na. A̧ nɛ́ ŋgee ko bíí lɛŋ nɛ̀ hu̧si tɛ ɗoŋ-aa.

³²Ŋma Sɔ̧ a̧a̧ sɛnɛ yak zu GASA WAN nde? Ŋma ta-hu̧si-tɛ k’ɛɛ nɛ̀ gana GASA WAN nɛ́ o nde?

³³Nɛ́ Sɔ̧'ɔ̧ ha̧ ŋgai ha̧‘m, ɓɛɛ bíí nyɛm mɛ tɔ̧ wen tɛ mɔ n'am de na.

³⁴Nɛ́ a̧ a̧ de ha̧‘m mɛ nɛ nɔ̀ nɛ̀ de-a hee zambɛrɛ[16] ga; nɛ́ a̧ a̧ de ha̧‘m mɛ yor mitak zu kusa kaya.

³⁵Nɛ́ a̧ a̧ usi bíí biro ha̧‘m; nɛ́ a̧ a̧ usi ŋgaŋa kusaa-ndɛrɛ ha̧‘m.

³⁶GASA WAN, ɛ́nɛ́ ha̧a̧ ŋgee-gbin-biro ha̧‘m; dee demɔ k’ɛ́nɛ́ dee ha̧‘m mɛ gasi.

³⁷Ɛ́nɛ́ dee ha̧‘m mɛ ma yì nɛ ŋgaya-a, ɓɛɛ naŋ-am mbali ŋmaa na.

³⁸Kà‘m ndak pata o wisɛn kɔ‘m, ɓɛɛ mi kpaa wa; mi kum wa lɛŋ kaɗi sɛka'm pia ɗoŋ.

³⁹Kà‘m yo wa a nù, wa kur ɓɔna; wa aa nù gbuɗuk, ɛ̧ɛ̧ kinii’ɛ wa a̧a̧ ɗɔɔ naŋ-am.

⁴⁰GASA WAN, ɛ́nɛ́ ha̧a̧ ŋgai ha̧‘m tɛ biro; ɛ́nɛ́ dee ha̧ o wi-nas'am mɛ tir a nu gbéyéŋ sɛn ti'm.

⁴¹Ɛnɛ dee ha̧ o wisɛn kɔ‘m mɛ zik tɛ yu mɔ yak, ɓɛɛ mi kum o wi-kur-zu'm nɔ‘i lɛŋ.

⁴²Wa hiɗa mɔ, ɓɛɛ wi-kpasi-wa bo na; wa hiɗa mɔ sitɛ GASA WAN, ɓɛɛ kifa-nú bo ha̧ wa na.

⁴³Mi hɔ̧na wa kifi nɛ́ kutumu̧i̧; mi i̧sa wa gɔn lekete hee ɓɔtɛ yuwar ga.

⁴⁴GASA WAN, ɛ́nɛ́ kpasa'm er dukbíí kɔ‘m nɛ̀ kura so zu'm; ɓɛɛ nɛ́ mɔ'ɔ n’ɛnɛ ea'm zu o dukbíí, ɓɛɛ ɛ́nɛ́ ha̧ ŋma dukbíí n'am iŋ na ha̧‘m mɛ ɔ wan zu wa mbɛt.

⁴⁵O gɔni dukbíí nɛ́ mɔ'ɔ nɛ̀ tɛ tɛ‘m mɛ tɔ̧ yɔka wen ha̧‘m; kà‘m he mbea ha̧ wa war kpɔk, ɓɛɛ wa zia kaɗi.

⁴⁶Tɛ o gɔni dukbíí nɔ‘i mɔka lɛŋ; wa gbo nɛ̀ kɔ̧ ŋga tua-hu̧si-tɛ kɔ-wa nɛ̀ naka-tɛ.

⁴⁷GASA WAN a̧ dúk ɓɔnsɛnɛ! Zɔnamɔ a̧ dúk nɛ ko wi nɛ̀ duk nɛ́ kam-ta kɔ‘m! O bíí a̧ gásí Sɔ̧, wi-gbin-biro ha̧‘m!

⁴⁸Nɛ́ Sɔ̧'ɔ̧ ha̧ ŋgai mɛ kifi er ha̧ o wisɛn kɔ‘m; nɛ́ a̧ a̧ e ha̧‘m mɛ ɔ wan zu o dukbíí.

⁴⁹GASA WAN, nɛ́ ɛ́nɛ́'ɛ gbo'm er o ŋga wisɛn kɔ‘m; nɛ́ ɛ́nɛ́'ɛ ba'm e ŋgɔn zu o wi-kur-zu'm; nɛ́ ɛ́nɛ́'ɛ gbo'm er o wi-de-ŋgamɔ.

⁵⁰Mɛ̀ nɛ́ hegɔ sa'm gasi'nɛ́ mgbara o dukbíí nɛ̀ iŋ‘nɛ na. Mi tɛ bìì gima zɔn nɛ̀ nin'nɛ́.

⁵¹Nɛ́ GASA WAN a̧ de ha̧ wannu n'aa hoka mɛ gbin o biro; a̧ yor ɗoŋ wi n'aa tɛna nɔ̧́ a zu a̧, ɗoŋ David in o bezaŋ-aa hegɔ ɓɔnsɛnɛ.