Read Northwest Gbaya 2 SAMUƐL 23 Bible Online

2 SAMUƐL 23 - Northwest Gbaya bible

2 SAMUƐL 23

¹O sɔŋkur wen ko David nɛ mɔɔ nɔ'ɔ. Mɛ̀ nɛ́ wen ko David bem ko Jɛse, wen ko wi nɛ̀ GASA WAN baa e ŋgɔn, nɛ̀ Sɔ̧ ko Jakob tɛna nɔ̧́ a zu a̧, wen ko wi nɛ̀ yɔra so o gima nɛ̀ o be Israɛl kɔ̧ɔ̧ bia-a nyɛmna.

²Ɔmi ko GASA WAN tɔ̧ wen nɛ̀ tɛ‘m, ɓɛɛ wen kɔ̧-a̧ a̧a̧ gɔn leɓ‘am.

³Sɔ̧ ko Israɛl tɔ̧ɔ̧ wen’ɛ ha̧‘m, kam-ta ko Israɛl tɔ̧ɔ̧ ndé: «Wi nɛ̀ ɔ wan zu bíí nɛ̀ yuwar-a, wi nɛ̀ ɔ wan tɛ yuu kíí Sɔ̧,

⁴duk hee sa̧a̧mɔ mɛ tutuyɛ ŋgimbi nɛ̀ wese daŋ nɛnɛ ga, mɛ tutuyɛ nɛ̀ tura-zan bo na, ɓɛɛ ká wese dee ha̧ nuŋui mɛ dik gɛrɛm oi kórò ga.»

⁵Bo nɛ kpɔk mɔ‘i a̧ de in o bíí nutua kɔ‘m nɛ̀ ndaɗi in Sɔ̧ na nde? Wen nɔɔ-tɔk kɔ̧-a̧ in am tɛ duk ɓɔnsɛnɛ, nɛ̀ yuwar-a in nɛ̀ de-a. Gbina-biro kɔ‘m a̧a̧ zu mɔ lɛŋ n'am kɔ̧a̧; bo nɛ a̧ a̧ de ha̧ mɛ hɔ gba̧a̧ na nde?

⁶O wi-de-gba̧a̧-mɔ-na lɛŋ ya hee tɛn-ŋga-gbárà nɛ̀‘i kai a taŋ ga; wi fo wa nɛ̀ er na.

⁷Wi nɛ̀ fo wa, fo nɛ́ boi in te-sɛ́ɛ̀, ɓɛɛ wi dɔɔ wan ɓɔn kpɔk fara.

⁸Nin o ŋgaŋa wi-biro ko David nɛ mɔɔ nɔ'ɔ: Isbosɛt be Takemɔŋ duka so nɛ́ gasawi zu o ŋgaŋa-wi taar. Nɛ́ a̧ a̧ toka so o bíí gɔmŋmaa-mɔɔrɔ-ɗoŋ-taar nɛ̀ sɛ́ɛ̀ a nù kpɔk ŋgimbi.

⁹Hɔ-ɗoŋ-aa nɛ́ Eleazar bem ko Dodo, be Ahɔ; a̧ nɛ́ ŋma kpɔk mgbara o ŋgaŋa wi-biro taar nɛ̀ duka so in David ŋgimbi nɛ o be Filistii mɔi̧a so nɛ ŋmaa mɛ bi biro, ɓɛɛ ká o be Israɛl yu mɔ ti wa;

¹⁰ɓɛɛ war kɔ̧-a̧, a̧ yora nɛ̀ nɔa-a, ɓɛɛ a̧ gɔm o be Filistii hɔ fara nɛ̀ er-a mbɔia koŋgi ɓɔn tɛ tuzu gba-paa. GASA WAN dee ha̧ wa mɛ gbin biro wese'i, ɓɛɛ o wi-biro gbin si ɗoŋ-aa ha̧ wa mɛ nɛ̀ɛ́ kai nɛ̀ o mɔɔ-oi-biro.

¹¹Hɔ-ɗoŋ-aa nɛ́ Sama bem ko Age be Harar. O be Filistii mɔi̧a so ŋmaa ya sɛn Lehi; ŋma fɔ-zawa duka so hi̧i̧, ɓɛɛ nɛ́ hi̧i̧ a̧ o wi-biro Israɛl yuu mɔ yak ti o be Filistii.

¹²Sama dora so kɔ‘i gari ɓɔn see fɔ‘i, ɓɛɛ a̧ kum o be Filistii. GASA WAN dee ha̧ wa mɛ gbin biro wese'i.

¹³Bíí taar mgbara o bíí ɓu-taar kura, ɓɛɛ nɛ́ sitɛ wannu David kɔ̧ di̧i̧ Adulam tɛ ku̧u̧naŋ ŋgimbi-mɔi̧a-nyɔnɔ, ká o ŋma dɔka o be Filistii baa so gbagari sɛn kɔ̧ ɗɔŋgɔ Refaim.

¹⁴David duka so sɛn fara hu̧sa̧-a̧, ká o be Filistii a̧a̧ so sɛn Bɛtlɛhɛm.

¹⁵Ŋma wese, ɗɛɗɛ David gɔna duk tɛ ye kɔ‘i, ɓɛɛ a̧ ai nú: «Ba bɔɔ ŋma bíí ha̧ nɛ́ɛ̀ ɗu gɔna-yì nɛ̀ a̧a̧ sɛn nú garo Bɛtlɛhɛm ha̧‘m nɔ ndé-oo!»

¹⁶Nɛ́ mɔ'ɔ nɛ̀ o ŋgaŋa-wi nɔ‘i taar'i gbaa war gbo nɛ̀ kɔ̧ gbagari ko o be Filistii nɛ́ɛ̀ ɗu gɔna-yì nú garo Bɛtlɛhɛm, ɓɛɛ wa ba sinɛ ɗoŋ ha̧ David. David nɔ so yì‘i na, ɓɛɛ a̧ tɛn a nù ha̧ GASA WAN.

¹⁷A̧ tɔ̧a̧: «GASA WAN a̧ dór am tɛ dee mɔ hegɔ; yì‘i nɛ́ tɔk-tɛ o bíí nɛ̀ ee tɛ tɛ́ fio.» Ɓɛɛ a̧ kɔ̧ mɛ nɔ yì‘i na. Mɔ nɛ o ŋgaŋa-wi nɔ‘i taar'i dea nɛ́ mɔ‘i.

¹⁸Abisai nya Jɔab bem ko Sɛruya duka so gasawi ko o ŋgaŋa-wi Ɓu-taar; nɛ́ à̧ á̧ bìì so o bíí gɔmŋmaa-taar nɛ̀ kpɔk sɛ́ɛ̀ kɔ̧-a̧, ɓɛɛ nin-a hur mgbara o bíí Ɓu-Taar;

¹⁹a̧ duka gasawi kɔ-wa, ɓɛɛ a̧ nyɛm ŋmaa in o ŋgaŋa-wi taar na.

²⁰Bɛnaya bem ko Yehoyada, be Kabsɛl nɛ́ ŋma ŋgaŋa-wi nɛ̀ dee o mɔ nɛ̀ dɔka-a mbɛt. Nɛ́ a̧ a̧ gbɛɛ so o ŋgaŋa-wi Mɔab yiitoo a nù. Nɛ́ a̧ a̧ gbɛɛ so dila kɔ̧ gɔna-yì wese gasa ɓɔrɔ.

²¹Nɛ́ a̧ a̧ gbɛɛ so ŋma kusa be Egiptɛ mbɛt. Be Egiptɛ‘i a̧a̧ so nɛ̀ sɛ́ɛ̀ er, ɓɛɛ a̧ ba kɔ̧-a̧ nɛ́ ɓira-te. A̧ ɓara sɛ́ɛ̀‘i yinɛ er be Egiptɛ‘i, ɓɛɛ ba sɛ́ɛ̀‘i tok nɛ̀ a̧ gbɛ woyo.

²²Mɔ nɛ Bɛnaya bem ko Yehoyada dee ha̧ nin-a mɛ hur nɛnɛ mgbara o ŋgaŋa-wi Ɓu-Taar nɛ́ mɔ‘i.

²³A̧ dee ha̧ nin-a mɛ hur gan o ŋgaŋa-wi Ɓu-Taar, ɓɛɛ a̧ gan o ŋgaŋa-wi taar na. David ee a̧ nɛ̀ gasawi mgbara o wi-pɛm-tɛ.

²⁴O ŋma ŋgaŋa-wi nɔ‘i Ɓu-Taar'i nɛ́ mɔɔ nɔ'ɔ: Asahɛl, nya Jɔab, Ɛlhanaŋ bem ko Dodo be Bɛtlɛhɛm,

²⁵Sama be Harod, Ɛlika be Harod,

²⁶Hɛlɛs be Palti, Ira bem ko Ikɛs be Tɛkɔa,

²⁷Abiɛzɛr be Anatot, Mɛbunai be Husa,

²⁸Salmɔŋ be Ahɔ, Marai be Nɛtɔfa,

²⁹Hɛlɛb bem ko Bana be Nɛtɔfa, Itai bem ko Ribai, be Gibea ko o bezaŋ Bɛnjamin,

³⁰Bɛnaya be Pirɛatɔŋ, Hidai be ká̧ zaŋ yì Gas,

³¹Abi-Albɔŋ be Bɛt-Ha-Araba, Azmavɛt be Bahurim,

³²Ɛliaba be Salbɔŋ. Yɔnataŋ bem ko Yasɛn,

³³in Sama be Harar, Ahiam bem ko Sarar be Arar,

³⁴Elifɛlɛt bem ko Asbai be-koo ŋma be Maka, Ɛliam bem ko Ahitɔfɛl be Gilo,

³⁵Hɛsrai be Karmɛl, Pari be Arab,

³⁶Yigɛal bem ko Nataŋ be Soba, Bani be Gad,

³⁷Sɛlɛk, be Amɔŋ, Narai be Bɛrot baka-nyaŋa ko Jɔab bem ko Sɛruya,

³⁸Ira be Yatir, Garɛb be Yatir,

³⁹sɛka Urii be Hit. Wa lɛŋ nɛ́ bíí ɓu-taar-zua-mɔɔrɔ-ɗoŋ-yiitoo.