Read Northwest Gbaya 2 SAMUƐL 3 Bible Online

2 SAMUƐL 3 - Northwest Gbaya bible

2 SAMUƐL 3

¹Biro duka ɗoŋ-aa nyɛi̧ mgbara o bíí nutua ko Saul in o bíí nutua ko David. David ŋgai ŋgai siti, ɓɛɛ o bíí nutua ko Saul tir kɔ‘i tir si ɗɔɔ.

²David koo o bem sɛn Hebrɔŋ. Kaya-bem nɛ́ Amnɔŋ; nɛ́ Ahinɔam, zɔŋa Yizreɛl a̧ koa a̧.

³Hɔ-ɗoŋ-aa nɛ́ Kilɛab; nɛ́ Abigail ko-oi Nabal be Karmɛl a̧ koo a̧. Taar-a nɛ́ Absalɔm; nɛ́ Maka boko-bem ko Talmai, wannu Gɛsur a̧ koo a̧.

⁴Naar-a nɛ́ Adɔnias; nɛ́ Hagit a̧ koo a̧. Mɔɔrɔ-a nɛ́ Sefatia; nɛ́ Abital a̧ koo a̧.

⁵Mɔɔrɔ-ɗoŋ-kpɔk-a nɛ́ Yitrɛam; nɛ́ Egla kóò ko David a̧ koo a̧. O bem nɛ David koo sɛn Hebrɔŋ lɛŋ nɛ́ mɔɔ nɔ‘i.

⁶Mɔ nɛ̀ yaka ŋgimbi biro mgbara o bíí nutua ko Saul in ko David nɛ́ mɔ'ɔ: ŋgai ko Abnɛr daŋ daŋ siti zu o bíí ko Saul.

⁷Ŋma kóò ko Saul duka so, nin-a nɛ́ Rispa, boko-bem ko Aya. Nɛ́ mɔ'ɔ nɛ̀ Isbosɛt nɛɛ ak Abnɛr zu kóò‘i hee mɔ'ɔ ga: «Wen ge mɛ ɔɔ in kóò ko dáà kɔ‘m ge?»

⁸Abnɛr kpaa ɗaŋsee tɛ wen'i ɓɛɛ tɔ̧: «Mi nɛ toyo ko Juda sɛka'm de mɔ hegɔ nde? Sɔsɔɔ, mi de nɛ mɔ nɛ mboozu sitɛ o bíí nutua ko dáà kɔ-mɛ Saul, sitɛ o nya-a̧ in o sɛm kɔ̧-a̧ mbɛt. Mi e mɛ ha̧ mɛ mɛ tik kɔ̧ er David na. Ɓɛɛ kinii, mɛ kɔ̧ɔ̧ mɛ ha̧ tu̧u̧-see ha̧‘m wen zu kóò'ɛ!

⁹GASA WAN kana so mɔ‘e, wi tɛ ba wan yinɛ er o bíí nutua ko Saul, bá nɛ́ David e zu damti Israɛl in Juda, ku̧u̧naŋ-a nɛ̀ Dan hɔ Bɛrseba, ɓɛɛ GASA WAN a̧ dé ŋgamɔ in am kà‘m nɛ́ dee mɔ ha̧ David nyɛm nɛ̀ ɗoŋ kanamɔ‘i na.»

¹¹Isbosɛt hu̧i̧ géé nú ha̧ Abnɛr na, wen kíí Abnɛr de nɛ a̧.

¹²Nɛ́ mɔ'ɔ nɛ̀ Abnɛr toma o betom nɛnɛ ha̧ David nɛ̀ nin wi. A̧ tɔ̧a̧: «Nù nɛ́ ko o? Mɛ̀ nɔ́ tɔk in am, ɓɛɛ mi gbaka mɛ mɔi̧ nɛ̀ o be Israɛl a ɗoŋ mɛ.»

¹³David kifa nú: «Ɔ dee, mi tɛ nɔ tɔk in mɛɛ, ɓɛɛ mi ak nɛ mɔ kpɔk er mɛ. Ŋgimbi nɛ̀ mɛ tɛ tɛ mɛ zɔk am, kà mɛ̀ nɛ́ baa Mikal, boko-bem ko Saul tɛ nɛnɛ na, ká mɛ́ tɛ na.»

¹⁴David toma o betom ha̧ Isbosɛt, bem ko Saul hee mɔ'ɔ ga: «Mɛ̀ tóm kóò kɔ‘m Mikal n'am ha̧a̧ mbɔi-a nɛ mbii ko o be Filistii gɔmŋmaa piinɛ ɗoŋ ha̧‘m.»

¹⁵Isbosɛt toma nɛ́ɛ̀ ba kóò‘i tɛ ko wíì kɔ̧-a̧ Paltiɛl bem ko Lais.

¹⁶Wíì kɔ̧-a̧ nɛɛ in a̧. A̧ nɛa ɗoŋ-aa hi̧i̧ nɛ̀ kɔ̧a̧ hɔ Bahurim. Abnɛr tɔ̧ɔ̧ ha̧ a̧: «Mɛ̀ yák, mɛ̀ sí ɗoŋ.» Ɓɛɛ a̧ si ɗoŋ.

¹⁷Nɛ́ mɔ'ɔ nɛ̀ Abnɛr ee zu-wen in o gasawi Israɛl. A̧ tɔ̧ɔ̧ ha̧ wa: «Zɛ dɔka kaɗi n’ɛnɛ kɔ̧ɔ̧ so ha̧ David mɛ ɔ wan zu'nɛ́.

¹⁸Ɛ̀nɛ̀ dé mɔ kinii ŋgaɓo! Zɔ́k, GASA WAN tɔ̧ɔ̧ wen zu David'e, wi tɛ gbo dukbíí kɔ‘i, o be Israɛl er o be Filistii in o wisɛn kɔ-wa lɛŋ nɛ̀ ɗoŋ David, wi-de-tom kɔ‘i.»

¹⁹Abnɛr tɔ̧ɔ̧ wen'i ha̧ o be Bɛnjamin, ɓɛɛ yak si Hebrɔŋ tɛ David mɛ we ɗoŋ mɔ lɛŋ nɛ o be Israɛl in nutua ko Bɛnjamin tɔ̧a̧ ha̧ a̧.

²⁰Abnɛr in o bíí ɓu-yiitoo nɛɛ tɛ David sɛn Hebrɔŋ mɛ; ɓɛɛ David de gasa nyɔŋmɔ ha̧ a̧ in o bíí nɛ nɛɛ in a̧.

²¹Abnɛr tɔ̧ɔ̧ ha̧ David: «Mi tɛ mɔi̧ o be Israɛl lɛŋ a ɗoŋ‘nɛ́, nyaa wannu. Wa tɛ nɔ tɔk in'nɛ̀ɛ́, ɓɛɛ ɛnɛ tɛ ɔ wan fara lɛŋ n’ɛnɛ kɔ̧a̧.» Ɓɛɛ David e Abnɛr yak zaŋ ga̧a̧mɔ.

²²O wi-biro ko David in Jɔab pii so kɔ‘i pii nɛ̀ yí biro, kai nɛ̀ o mɔɔ-oi-biro nɛ̀ dɔka-a piinɛ. Abnɛr bo so kɔ‘i in David sɛn Hebrɔŋ ɓɔna, wen nɛ̀ David ee so a̧ yak zaŋ ga̧a̧mɔ.

²³Ŋgimbi nɛ Jɔab in o wi-biro kɔ‘i hɔa, wa tɔ̧ɔ̧ ha̧ a̧: «Abnɛr bem ko Nɛr tɛɛ hɔ oi'nɛ́ hɛ̧ɛ̧ zɔk nɛ wannu David, ɓɛɛ wannu David e war ha̧ a̧ yak zaŋ ga̧a̧mɔ.»

²⁴Jɔab nɛɛ kpa wannu, ɓɛɛ tɔ̧: «Nɛ́ ge ɛnɛ dea’ɛ ge? Abnɛr tɛɛ tɛ‘nɛ́, ɓɛɛ wen ge ɛnɛ ee a̧ yak hegɔ ge?

²⁵Ɛnɛ iŋ Abnɛr, bem ko Nɛr na nde? A̧ tɛɛ ha̧ a̧ mɛ ɔr'nɛ́, ha̧ a̧ mɛ kpe naŋ nɛɛ-nɔ̀ in pia-ɗoŋ k’ɛ́nɛ́, ha̧ a̧ mɛ iŋ mɔ lɛŋ n’ɛnɛ de!»

²⁶Jɔab gboo nɛ̀ tɛ́ David, ɓɛɛ tom o betom nɛnɛ ɗoŋ Abnɛr. Wa nɛ̀ɛ́ kpa a̧ ká̧ gɔna-yì Sira, ɓɛɛ wa sa a̧ piinɛ ɗoŋ; David iŋ na.

²⁷Ŋgimbi nɛ Abnɛr pia ɗoŋ hɔ Hebrɔŋ, Jɔab mgbɔɔ a̧ yaknɛ si ká̧ nú garo hee a̧ tɛ tɔ̧ nɛ ŋma ga̧a̧ wen ha̧ a̧ ga, ɓɛɛ a̧ tok a̧ tɛ zaŋ, kifi nɛ̀ er tɔk-tɛ nya-a̧ Asahɛl.

²⁸Ŋgimbi nɛ David zia nyɛrɛ mɔ‘i, a̧ tɔ̧a̧: «Mi in mɔɔ-wan kɔ‘m lɛŋ, ɛɛ bo k’ɛɛ ɗɔɔ fom ti GASA WAN wen tɔk-tɛ Abnɛr bem ko Nɛr na.

²⁹Tɔk-tɛ Abnɛr a̧ tík nɛ zu Jɔab in o bíí nutua kɔ‘i! Zɛɛ tɔk in doko a̧ bá o bíí nutua ko Jɔab. Wa a̧ ɓɔ́sí, kóó wa a̧ fé nɛ́ fio gba-paa, kóó san a̧ bá wa.»

³⁰Jɔab in nya-a̧ Abisai gbɛɛ Abnɛr, wen n'aa gbɛɛ so nya kɔ-wa Asahɛl tɛ biro Gabaɔŋ.

³¹David tɔ̧ɔ̧ ha̧ Jɔab in o bíí lɛŋ nɛ duk in a̧: «Ɛ̀nɛ̀ á̧k laa tɛ‘nɛ́ a nù; ɛ̀nɛ̀ á nɛ laa-bufu, ɓɛɛ ɛ̀nɛ̀ zím fio ko Abnɛr.» Wannu David duka ɗoŋ mɔɔ-gɔ-fio.

³²Wa guna Abnɛr sɛn Hebrɔŋ. Wannu taŋa kɔ̧a̧-fio Abnɛr zik nɛ pɛsi, ɓɛɛ o bíí lɛŋ a nú tɛ kɔ̧a̧ mbɛt.

³³Wannu dee gima-fio’ɛ zu Abnɛr: «Abnɛr tɛɛ fe so nɛ́ ŋga fio hegɔ nde?

³⁴Bo nɛ wa hɛra so nɛ er-mɛ na, bo nɛ wi aa so nɛ nyak-boi naŋ-mɛ na! Mɛ tika nù fe hee mɔ'ɔ nɛ‘i fe nɛnɛ ti o wi-gbɛ-zu’ɛ ga!» Ɓɛɛ dukbíí a nú tɛ kɔ̧a̧-fio siti.

³⁵Dukbíí ɗafa mɔ ha̧ David mɛ nyɔŋ mɔ, ká zɛ tɛ de na, ɓɛɛ David kan mɔ; a̧ tɔ̧a̧: «Sɔ̧ a̧ dé ŋgamɔ in am, a̧ a̧ dé mbe-a woyo kà‘m nɛ́ foo nyɔŋmɔ nɛ̀ nú‘m sɔsɔɔ nɛti ha̧ yee-wese!»

³⁶Dukbíí nɛ̀ oi-aa lɛŋ zɔka mɔ nɛ wannu dea, ɓɛɛ kpa desee, wen mɔ nɛ wannu dea'i lɛŋ, o bíí kɔ̧ɔ̧ ɗɔaa.

³⁷Wese'i, dukbíí nɛ̀ oi-aa lɛŋ in o be Israɛl lɛŋ iŋa'e, bo nɛ wannu a̧ gbɛɛ Abnɛr bem ko Nɛr na.

³⁸Ɓɛɛ wannu tɔ̧ ha̧ o gasa wi-biro kɔ‘i: «Ɛ́nɛ́ íŋ ndé ŋma gasa wi-duk-ti fee sɛn Israɛl sɔsɔɔ na nde?

³⁹War kɔ‘m, sɔsɔɔ, kóó nɛ̀ oi nɔ̧́-wan nɛ wa tɛna a zu'm'i, mi nɛ́ ziɓa-wi. O bem ko Sɛruya ŋgaia gan am, ɓɛɛ GASA WAN a̧ dé mɔ ha̧ wi-ɗaŋ nyɛm nɛ ɗoŋ ɗaŋ ko wi’ɛi.»