Read Northwest Gbaya 1 WANNU 12 Bible Online

1 WANNU 12 - Northwest Gbaya bible

1 WANNU 12

¹Roboam nɛɛ si Sikɛm, wen mɛ̀ nɛ́ sɛn hi̧i̧ a̧ o be Israɛl lɛŋ gara pii sɛnɛ mɛ de wan ha̧ a̧.

²Ɓɛɛ ŋgimbi nɛ Jeroboam bem ko Nɛbat zia nɛ̀ nyɛrɛ mɔ‘i, a̧ a̧a̧ so kɔ̧-a̧ Egiptɛ wen a̧ yuu so mɛ nyɛi̧ nɛ̀ wannu Salomɔŋ duk nɛnɛ hi̧i̧.

³Wa toma sa Jeroboam, ɓɛɛ a̧ tɛ in o be Israɛl lɛŋ; wa tɔ̧ɔ̧ ha̧ Roboam hee mɔ'ɔ ga:

⁴«Dáà k’ɛ́nɛ́ ee so gasa bɔnɛ zu yɛ. K’ɛ́nɛ́ kinii, ɛ̀nɛ̀ fó ŋma nú ŋga tom-bara ko dáà k’ɛ́nɛ́ in dita kpáŋá n'aa pi̧i̧ ger yɛ yinɛ, ɓɛɛ ɛ́ɛ́ tɛ de tom h’ɛ́nɛ́.»

⁵A̧ tɔ̧ɔ̧ ha̧ wa: «Ɛ̀nɛ̀ yàk, ɓɛɛ ɛ̀nɛ̀ píí ɗoŋ tɛ‘m ɗoŋ zɛ taar.» Hegɔ wa yaka.

⁶Wannu Roboam aka mbɔrɔ er o gasawi nɛ̀ dee so tom ha̧ dáà kɔ̧-a̧ Salomɔŋ ŋgimbi n'aa ɓɔna so nɛnɛ kpasa hee mɔ'ɔ ga: «K’ɛ́nɛ́, ɛ́nɛ́ kɔ̧ɔ̧ a̧‘m kifi nú ha̧ o wi nɔ'ɔ hee ge?»

⁷Wa tɔ̧ɔ̧ ha̧ a̧: «K’ɛ̀nɛ̀ e tɛ‘nɛ́ hee wi-de-tom ga ha̧ dukbíí'ɛ sɔsɔɔ, k’ɛ̀nɛ̀ de tom ha̧ wa, ɓɛɛ k’ɛ̀nɛ̀ kifi nú ha̧ wa nɛ̀ de-a, wa tɛ ya nɛ́ o wi-de-tom k’ɛ́nɛ́ ɓɔnsɛnɛ.»

⁸Roboam ee mbɔrɔ nɛ̀ o gasawi tɔ̧ɔ̧ ha̧ a̧‘i tɛ geemɔ, ɓɛɛ a̧ ak mbɔrɔ ko o gbama-ŋgai kɔ̧-a̧ nɛ̀ de tom ha̧ a̧‘i;

⁹a̧ aka wa: «Ɓɛɛ nɛ̀ k’ɛ́nɛ́, ɛ́nɛ́ tɔ̧ k’ɛ́nɛ́ hee ge? Kifa-nú n’ɛɛ tɛ ha̧ ha̧ o wi nɔ'ɔ nɛ̀ tɔ̧ɔ̧ ha̧‘m ndè, a̧‘m bà ŋma nú ŋga tom nɛ̀ dáà kɔ‘m aa wi sɛnɛ yinɛ wó'ɛ, hee ge?»

¹⁰O gbama-ŋgai kɔ̧-a̧ kifa nú ha̧ a̧: «Ɛ̀nɛ̀ nɛ́, ɛ̀nɛ̀ tɔ̧́ ha̧ wi nɔ‘i nɛ̀ tɔ̧ɔ̧ h’ɛ́nɛ́‘e, dáà k’ɛ́nɛ́ ee so ŋga tom zu wi, ɛ̀nɛ̀ fó ŋma nú-a yinɛ wó‘i, ndé: ‹Bekete-er wi gana guntir dáà kɔ‘i;

¹¹ku̧u̧naŋ-a kinii, hee mɔ'ɔ nɛ̀ dáà kɔ‘i pi̧i̧ dita kpáŋá ger-wa ga, kɔ‘i, wi tɛ de ha̧ mɛ diti diti siti; hee mɔ'ɔ nɛ̀ dáà kɔ‘i usa so mɔ ha̧ wa nɛ̀ o géé nyasi ga, kɔ‘i, wi tɛ gusi wa nɛ̀ o ndoi nɛ̀ boi a̧a̧ nú-a.› »

¹²Jeroboam in dukbíí nɛ̀ oi-aa lɛŋ tɛɛ kpa Roboam ɗoŋ taar zɛ hee mɔ nɛ̀ wannu tɔ̧ɔ̧ so ha̧ wa ga. A̧ tɔ̧ɔ̧ so ha̧ wa'e, wa a̧ píí ɗoŋ tɛ-wi ɗoŋ taar zɛ.

¹³Wannu kifa nú nɛ̀ ɗaŋ-a ha̧ dukbíí, e nɛ̀ wen nɛ o gasawi tɔ̧ɔ̧ so ha̧ a̧ tɛ geemɔ.

¹⁴A̧ zia nɛ́ mbɔrɔ ko o gbama-yari kɔ̧-a̧ tɔ̧ nɛnɛ ha̧ dukbíí ndé: «Dáà kɔ‘m ee so ŋga tom zu'nɛ́, kɔ‘m mi tɛ e mbe-a zu-a; dáà kɔ‘m usa so mɔ h’ɛ́nɛ́ nɛ̀ o géé nyasi, kɔ‘m, mi tɛ usi mɔ h’ɛ́nɛ́ nɛ̀ o ndoi nɛ̀ boi a̧a̧ nú-a.»

¹⁵Wannu kɔ̧ so mɛ zii wen ko dukbíí na. Mɔ nɛ̀ GASA WAN dee nɛ̀ hu̧sa̧-a̧ ha̧ wen n'aa tɔ̧ɔ̧ so ha̧ Jeroboam bem ko Nɛbat nɛ̀ nú Ahiya wi Silo mɛ hɔ gba̧a̧ nɛ́ mɔ‘i.

¹⁶Israɛl nɛ̀ oi-aa lɛŋ zɔka'e ndé, wannu zii wen kɔ‘i na; hegɔ ɓɛɛ o bíí kifi nú ha̧ a̧: «K’ɛɛ tɛ mɔ ko David nɛ́ ge? Ɛɛ bo nɛ̀ ŋma mɔɔ-oi in bem ko Jɛse na! O be Israɛl, ɛ̀nɛ̀ sí ɗoŋ tɛ k’ɛ́nɛ́! Kinii David, mɛ̀ dáí nɛ́ o bíí nutua kɔ-mɛ ɓɛɛ!» Ɓɛɛ o be Israɛl si ɗoŋ tɛ kɔ‘i.

¹⁷Mɔ kpɔk, Roboam ɔɔ kànà wan zu o be Israɛl nɛ̀ ya tɛ o ye nù Juda.

¹⁸Wannu Roboam hoka wi-duk-zu tom-bara; wi’ɛi nɛ́ Adoram, ɓɛɛ o be Israɛl yo a nɛ̀ ta gbɛ. Wannu Roboam yɔsɔra daŋ keekee-nyaŋa kɔ‘i, ɓɛɛ yu mɔ yak si Jerusalɛm.

¹⁹O be Israɛl dee kànà nɛ́ ŋgazu in o bíí nutua ko David hɔ sɔsɔɔ.

²⁰Ŋgimbi nɛ o be Israɛl lɛŋ zia'e Jeroboam pia ɗoŋ, wa toma sa a̧ pii tɛ mɔi̧a-a, ɓɛɛ wa de wan ha̧ a̧ zu Israɛl lɛŋ. Zuduk kpɔk nɛ̀ ndaɗa ɗoŋ o bíí nutua ko David nɛ́ ko Juda ɓɛɛ.

²¹Roboam hɔɔ Jerusalɛm, ɓɛɛ a̧ mɔi̧ o bíí nutua ko Juda in zuduk ko Bɛnjamin; o ŋga wi-biro nɛ̀ booro-gɔmŋmaa-nɛ-booro-ɓu-mɔɔrɔ-ɗoŋ-taar wen bíí o bíí nutua ko Israɛl mɛ ha̧ mɔɔ-wan siɗoŋ ha̧ Roboam bem ko Salomɔŋ.

²²Ɓɛɛ Sɔ̧ tɔ̧ wen ha̧ bíí kɔ‘i Sɛmaya hee mɔ'ɔ ga:

²³«Mɛ̀ tɔ̧́ ha̧ Roboam bem ko Salomɔŋ, wannu Juda, ha̧ o bíí nutua ko Juda lɛŋ in o bíí nutua ko Bɛnjamin ba nɛ̀ oi dukbíí lɛŋ‘e ndé,

²⁴tɔ̧ɔ̧-wen ko GASA WAN nɛ́ mɔ'ɔ: ‹K’ɛ́nɛ́ ba biro dúk nɛ̀ o nya'nɛ́ o be Israɛl na. O ndé a̧ sí ɗoŋ tɛ kɔ‘i wen nɛ́ mi a̧ dee ha̧ mɔ'ɔ mɛ hɔ.› » Wa zia wen ko GASA WAN, ɓɛɛ wa si ɗoŋ tɛ kɔ-wa hee mɔ'ɔ nɛ̀ GASA WAN tɔ̧ɔ̧ ga.

²⁵Jeroboam mboo garo zik nɛ̀ Sikɛm zu kaya Efraim, ɓɛɛ a̧ ɔ hi̧i̧. A̧ kura hi̧i̧ yak nɛ́ɛ̀ mbo garo zik nɛ̀ Pɛnuɛl mbɛt.

²⁶Jeroboam taa mɔ ndé, tɛ mɔ n'aa zɔk kinii’ɛ, mɔɔ-wan nyɛma mɛ si ɗoŋ er bíí nutua ko David.

²⁷Kà o wi nɔ‘i ɓɔn kànà tɛ daŋa-a ɗafi nɛ̀ sɔ̧ kɔ̧ Tua ko GASA WAN, see-wa tɛ si ɗoŋ tɛ wan kɔ-wa Roboam, wannu Juda. Kɔ‘i, wa tɛ gbɛ wi, ɓɛɛ wa sii ɗoŋ sitɛ a̧.

²⁸Wannu Jeroboam taa mɔ, ɓɛɛ dui o be ndai yiitoo nɛ̀ lɔr, ɓɛɛ a̧ tɔ̧ ha̧ dukbíí: «Israɛl, ɛ́nɛ́ duka so daŋ si Jerusalɛm ɓɔnsɛnɛ wen ɗafa sɔ̧; kinii, sɔ̧ nɛ foo'nɛ́ gbonɛ nɛ̀ nú Egiptɛ‘i nɛ́ mɔɔ nɔ'ɔ.»

²⁹A̧ ee ŋma be ndai kpɔk sɛn Bɛtɛl, ɓii-aa sɛn Dan.

³⁰Ku̧u̧naŋ ɗaŋmɔ a̧‘i. O bíí nɛ̀ dɔka-a gbara gasi nɛ̀ be ndai'i yaknɛ hɔ Dan mɛ.

³¹Jeroboam mboo o fara-ɗafi-sɔ̧ ɓɛɛ a̧ hok o ŋma bíí mgbara dukbíí nɛ̀ o wi-ɗafi-sɔ̧, nɛ̀ bó nɛ́ o be Levii na.

³²Jeroboam saa gasa gbaŋa tɛ mɔɔrɔ-ɗoŋ-taar fio-zɛ tɛ ɓu-zua-mɔɔrɔ ɔɔ-zɛ hee mɔ'ɔ nɛ̀ wa de so sɛn Juda ga, ɓɛɛ a̧ daŋ si fara-ɗafi-sɔ̧. A̧ dee kpɔk mɔ‘i sɛn Bɛtɛl ɗafi nɛ̀ sɔ̧ ha̧ o be ndai n'aa duia so'i.

³³A̧ aa o wi-ɗafi-sɔ̧ n'aa hoka so sɛn fara-ɗafi-sɔ̧ sɛn Bɛtɛl tɛ mɔɔrɔ-ɗoŋ-taar fio-zɛ tɛ ɓu-zua-mɔɔrɔ ɔɔ-zɛ mbɛt; mɛ̀ nɛ́ ŋgimbi n'aa gɔna so tɛ taamɔ kɔ̧-a̧. A̧ dee gbaŋa ha̧ o be Israɛl, ɓɛɛ a̧ daŋ si fara-ɗafi-sɔ̧ ha̧ a̧ mɛ dɔ fuu-nyama sɛnɛ.